Tusun 59 - Public Blog – Bagi 4

Selamat tengahari serta tabi basa ngagai peninga.

Selamat kita begulai enggau aku Kassim Jeritan dalam program Randau ICT. Saritu program kitai ba Tusun 59.

Saritu kitai nyambung kenang kitai ba Tusun 58 nyin kemari ianya Public Blog. Ba program kitai Tusun 58 nyin kemari kitai sama ngenang bakani kitai ulih ngada ka posting tauka nulis article dalam blog kitai. Aku arap ka peninga udah bisi nulis article dalam blog kita. Maioh agi posting kitai manah agi laban search engine meda blog kitai bisi kualiti ari ti ngundan maioh penerang. Pia mega orang bukai tentu meh rindu maca blog kitai enti maioh penerang ulih digiga dia.

Enti ulih kitai ngatur diri ngambi ka kitai ulih ngada ka enda kurang ari 2 iti posting dalam seminggu. Kebuah pia laban crawler tauka spider search engine mansa nginau dalam internet antara 2 enggau 3 hari sekali. Enti ia mansa blog kitai lalu tetemu ka penerang ti baru belama, blog kitai bisi peluang diberi ranking ti tinggi dalam search engine result page.

Saritu kitai nambah ka penemu kitai dalam public blog alai kitai ngenang siti agi pekara saritu ianya bakani kitai ulih ngadu ka setting blog kitai. Pekara tu penting bendar ngambi ka blog kitai kemas serta manah dipeda.

Ba control panel blog kitai kitai klik ba link “settings“. Udah nya kitai lalu dibai ngagai webpage ti bisi ngayan ka pekara ti deka diubah kitai.

Ba link “Basic Setting” kitai ulih nukar nama blog kitai. Nama blog ti ayan dia ianya nama blog ti ditaip kitai leboh kitai baru ngerejister blog suba. Diatu kitai tau nukar nama blog nya enti ka. Pia mega kitai ulih nerang ka tuju blog kitai ba “Description”. Pekara tu mega beguna bendar diatur kitai enggau manah laban search engine ngena genteran jako ditu dikena ngayan ka penerang pasal blog kitai.

Ba link “Publishing” kitai ngena setting tu enti kitai deka engkah blog kitai kelimpah ari blogspot. Tang diatu kitai nadai ngubah setting ditu laban kitai agi deka engkah blog kitai ba Blogger.com.

Enti kitai klik ba link “formatting” kitai dibai ngagai webpage alai kitai ulih nentu ka berapa posting patut ayan ba lambar depan blog kitai. Enti kitai meda blog kjict.blogspot.com, dia aku ngayan ka 2 iti posting ti pemadu baru laban dalam setting tu aku netap ka 2 iti posting ba lambar depan. Ba webpage tu siti ari pekara patut diperati ka kitai ianya “time zone”. Enti kitai di Menua Malaysia tu time zone kitai ianya GMT+8. Enti kitai ngena time zone bukai, lalu enda sama enggau jam dalam komputer kitai, kadang kadang kitai bisi penanggul dalam blog kitai laban pekara ti bansa tu dikumbai spamming dalam pekara pengelikun dalam internet. Nya alai tentu ka jam ba computer kitai sama enggau jam dini alai kitai diau, lalu time zone dalam blog kitai sama enggau time zone ba menua alai kitai diau mega. Pekara tu ukai semina nyadi dalam control panel blog aja. Ia mega nyadi enti kitai ngena email kitai serta mega pekara bukai ti beguna ka login username enggau password.

Enti kitai klik ba link “comments” kitai dibai ngagai webpage alai kitai ulih ngadu ka setting pasal orang bukai ti maca blog kitai. Ditu kitai ulih netap ka sapa orang ti tau meri komen dalam blog kitai. Anang ngemendar ka semua orang ulih komen sebarang dalam blog kitai. Manah agi kitai minta orang ti deka meri komen dalam blog kitai ngerejister diri dulu dalam blog kitai. Ngena cara nya kitai ulih nagang komen ti sebarang tulis ayan dalam blog kitai. Pia mega kitai ulih ngada ka pengelikun ruang komen ngena cara napis dulu komen ti datai sebedau ngayan ka komen nya dalam blog kitai. Kitai enggai sebarang orang nulis sebarang komen ti enda besangkut paut enggau pekara ti dikenang dalam blog kitai. Tambah mega komen ti sebarang tulis tauka spamming tau ngasoh ranking kitai ba search engine result nyadi baruh. Pekara tu enda manah pulai ka blog kitai.

Enti kitai klik ba link “Archiving“ kitai dibai ngagai webpage alai kitai ullih netap ka bakani posting kitai disimpan dalam blog kitai. Ngena cara tu blog kitai kemas serta beresi dipeda laban posting di disimpan enggau manah.

Enti kitai klik ba “site feed“ kitai dibai ngagai webpage alai kitai netap ka bakani posting kitai ulih diambi orang bukai lalu diayan ka ba website tauka blog sida ia. Ditu penting bendar kitai netap ka enda semua posting tauka article ti ditulis kitai nya tadi ayan ba blog tauka website orang bukai. Dia kitai milih “short“ ba “allow blog feed“ ngambi ka enda semua article kitai nya tadi ulih diambi orang bukai ngena cara blog feed. Ari nya enti orang ka maca article kitai enggau silik agi, ia ulih dibai ngagai blog kitai.

Siti agi setting ti penting bendar dalam blog ianya ba link “Permission”. Ditu kitai ulih netap ka sapa orang ti tau nulis posting tauka article dalam blog kitai. Enti kitai deka nambah orang bukai nyadi penulis dalam blog kitai, kitai tau klik ba button “Add Authors”. Orang ti direjister kitai nya tadi ulih nulis article tauka posting dalam blog kitai, sama baka kitai empu. Kitai ulih ngerejister sampai 100 iko orang bukai nyadi penulis dalam blog kitai.

Penutup

Peninga ti dipebasa,

Saritu kitai berandau ka bakani kitai ulih netap ka setting dalam blog kitai. Tu dikena nentu ka blog kitai kemas serta manah dipeda. Blog ti kemas tentu meh ngerindu ka ati orang ti maca article tauka posting dalam blog kitai.

Pia mega dalam setting tu kitai deka nyaga pengelikun dalam blog kitai. Kitai enggai blog kitai nyadi ka palan alai orang nulis sebarang komen ti tau ngenatai ka pengerusak ukai aja ngagai blog kitai tang mega tau ngenusah kitai empu. Blog kitai ngayan ka penemu serta runding kitai. Kitai enda patut orang bukai ngayan ka sebarang penemu serta runding ti enda menuku dalam blog kitai.

Udah tu ila kitai berandau ka bakani kitai ulih ngemanah ka blog kitai agi ngambi ka ia manding dipeda serta nyamai dibaca. Penerang enggau tusun penerang dalam nya mudah dibaca orang bukai. Enti blog kitai manah pendiau, orang pan rindu maca ia. Enti maioh orang maca blog kitai, kitai ulih ngena peluang tu dalam pengawa dagang.

Kenang pasal blog Bagi 3 dilengka ka aku naka tu dulu. Kitai nyambung kenang pasal blog enggau silik agi ba Tusun program ti deka datai. Agi panjai kenang kitai pasal blog tu peninga laban aku maioh nerima tanya pasal ngaga blog, nya alai aku ngasai ka patut bendar pekara tu dikenang enggau silik agi.

Peninga ti dipebasa,

Kena nutup randau ICT kitai ba Tusun 59 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku. Terima kasih.

Tusun 44 - Yahoo.com

Selamat tengahari serta tabi basa ngagai peninga.

Selamat kita begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 44.

Saritu aku nyambung kenang pasal website ti patut ditemu kitai. Website ti dikenang kitai saritu, baka website ti udah dikenang kitai ba Tusun 44 nyin kemari semampai enda kala ditinggal ka aku ari Tusun Program kitai ti keterubah nyentok ka ngagai program kitai saritu. Enti peninga semampai mending ka program kitai peninga tentu ulih nyangka website ti deka dikenang aku saritu.

Website ti dikenang kitai saritu ianya Yahoo.com. Enti kitai kala ngena internet tentu meh kitai kala meda website Yahoo.com.

Baka Gogle.com ti udah dikenang aku dulu kemari, Yahoo.com mega siti ari website ti dikumbai orang “search engine”. Reti ia website ti dikena orang begiga ka penerang ti bisi dalam internet.

Yahoo.com ditumbuh ka di Sunnyvale, California dalam taun 1994 olih Jerry Yang enggau David Filo. Seduai ia tu sama graduate ari Stanford University. Enti peninga agi ingat ka orang ti ngepun ka Google.com suba ianya Larry Page enggau Sergey Brin sama mega belajar di Stanford University.

Yahoo tu nama singkat bagi “Yet Another Herarchical Officious Oracle”. Asal url yahoo.com tu ianya akebono.stanford.edu/yahoo.

Dalam beberapa bulan aja pemaioh orang udah click website tu manggai sejuta. Ari nya Jerry Yang seduai ia David Filo tu ngasai ka website seduai ia bisi bendar peluang maju meda pemaioh orang ngena website tu.

Dalam taun 2008 nyin kemari, bisi 1.6 billions orang bisi ngena website Yahoo.com tu. Asal Batang dagang internet Yahoo.com tu ianya nyadi “Web Portal” tauka alai orang ngada ka berita, pemerindang sereta mega ngada ka ruang iklan. Ia enda salah baka suratkhabar ti diada ka nengah internet.

Belaboh ari taun 1997, Yahoo.com balat bendar ngerembai ka dagang sida ia sereta nambah ka pengering sida dalam besemekih kelebih agi nyadi “web Portal” ti tebilang. Sida ia maioh meli website bukai baka ClassicGames.com ti ditukar nama Yahoo!Games.

Pia mega dalam taun 1997 sida ia meli kompeni Rocketmail ti ditukar nama ngyadi Yahoo Mail, ianya siti ari public email ti tebilang dikena kitai ti ngena extention name @yahoo.com.

Udah nya dalam Taun 1998 Yahoo! Ngada ka siti agi service ti beguna bendar nyentok ka saritu ianya Yahoo! Pager, ditukar nama baru ngagai Yahoo! Messenger. Service Yahoo! Messenger tu ianya ngada ka alai orang chatting tauka berandau nengah internet.

Maioh mega service internet ti bukai ti dibeli kompeni Yahoo! tu nyentok ka web hosting enggau eGroup ti ditukar nama ngaga Yahoo! Group, siti alai palan berandau baka forum tang dalam raban ti mit agi.

Leboh maya k-ekonomi benong tebilang ianya dalam taun 2000 – 2001 ti dikumbai orang maya nya “dotcom bubble”, Yahoo! tu siti ari kompeni ti bulih untung besai. Siti ari pengering sida ia ianya sida ia maioh bebeli ka kompeni ti ngada ka sevice ti specific. Tambah mega maya nya cara ngada ka iklan nengah internet benong dikerindu ka orang maioh.

Dalam taun 2002 Yahoo.com ngerembai ka pengawa dagang ia kelebih agi dalam dagang internet leboh sida ia berat agi ka pengawa search engine. Enti sebedau nya sida ia semina nyadi Web portal, diatu sida ia mutus ka diri besemekih dalam pengawa search engine. Kebuah pia laban sifda ia nemu search engine tu ulih mai maioh agi orang datai ngagai website sida ia.

Ngena cara ti sama Yahoo bebeli ka kompeni ti besangkut paut enggau search engine baka “Overture Service” ianya alai orang ulih ngada ka link ngagai website sida ia ngena cara bebayar, enda salah baka cara Google.com ti ngena Adwords program ti dikenang kitai dulu kemari.

Yahoo! Belaboh besemekih enggau Google.com dalam pengawa search engine. Dalam taun 2004 sida ia belaboh ngada ka Yahoo!mail ti nadai limit dikena ngelaban gmail ti diada ka Google. Ngena cara ngada ka public email, maioh agi orang deka selalu datai ngena website sida ia.
Yahoo! enda ngetu bebeli ka kompeni ti diasai ka sida ulih ngering ka kompeni tu besemekih dalam ngada ka service dalam internet. Kelebih agi sida ia besemekih enggau kompeni Google.com.

Antara kompeni ti dibeli sida ia dalam taun 2005 ianya del.isio.us ianya siti ari kompeni boomarking ti tebilang nyantok ka diatu. Website bookmarking tu dikena orang nanda website tu udah kala ditengah kitai tang kitai deka datai ngabas website nya dudi ari, enfda iboh kekalat agi ngiga nengah search engine. Bookmarking website tu beguna bendar ka orang ti belajar ti ngiga genturung penerang ti diguna sida ia.

Taja pan dulu agi ditumbuh ka ari Google.com, Yahoo.com tu nyau enda tentu tan besemekih enggau google.com. Belaboh ari taun nyin kemari berita pasal penusah ketegal pengusut penatai pemisi bisi ninggang kompeni tu nyentok ka sida ia ngetu ka 1,000 iko orang ti bekerja enggau sida ia ari pengawa.

Dalam taun 2008 mega kitai bisi ninga pasal kompeni ti pemadu besai di dunya tu ianya Microsoft deka meli Yahoo.com enggau rega $45 Billoins. Taja pia pekara tu enda nyadi lalu Microsoft agi berunding enggau Yahoo! pasal bejual beli ka kompeni tu. Enti pemgawa tu nyadi suba, tu nyadi ka rekod pengawa bebeli ka kompeni ti pemadu besai rega dalam sejarah.

Pengawa dagang Yahoo! dalam taun 2008 kemari manggai $7.2 Billion tauka lebih RM25 Billion duit kitai. Untung sida ia maya nya bisi $ 4 Billions tauka RM13 Billions duit kitai. Sida ia bisi 13,500 orang bekerja enggau sida ia ari serata dunya.

Batang pengawa dagang Yahoo! Tu ianya ngada ka service ngagai orang ti ngereja pengawa dagang internet. Maioh bendar service bisi diada ka Yahoo.com

Kitai ulih meda berita ari Yahoo New. Kitai ulih nemu berita sukan ari Yahoo!Sport. Kitai mega ulih berati ka pengawa dagang mata wang ari Yahoo! Finance. Enti kitai rindu meda movie, kitai ulih meda ia ari Yahoo! Movie. Penerang pasal pemerindang bisi ayan ba Yahoo! Buzz.

Pia mega Kompeni tu saemampai ngada ka kaul kerjasama enggau kompeni bukai baka AT&T, siti ari kompeni telekomunikasi ti tebilang di menua Amerika, Verizon Communication, Regers Communication enggau British Telecom.

Yahoo.com mega kompeni ti terubah ia ngada ka service internet nengah telfeon bincing nengah Yahoo!mobile.

Dalam pengawa e-commerce, Yahoo bisi ngada ka Yahoo!Shopping alai kitai ulih bebeli barang ari internet, besemekih enggau Amazon.com ti udah kala dikenang aku suba.

Sida ia mega bisi ngada ka Yahoo! Real estate alai orang ulih bejual beli ka rumah. Enda cukup dia sida ia mega bisi ngada ka Yahoo! Travel alai orang bebeli ka tiket enggau booking bilik hotel nengah internet.

Yahoo mega ngada ka palan orang ngereja pengawa dagang ti mit nengah program ti dikumbai sida ia Yahoo! small business.

Penutup

Leboh aku berati ka Yahoo.com tu bepun ari ia ditumbuh ka suba nyentok ka diatu, dia aku meda pemerani Jerry Yang, orang ti numbuh ka kompeni tu. Ia enda ngetu bebeli ka kompeni bukai ti diasai ka ia tau meri pengering ngagai Yahoo.com.

Ia enda semina ngarap ka diri ulih ngada ka semua service nya tang ia nemu sereta landik ngiga orang ti ulih ngada ka service ti diasai ka ia ulih meri penguntung sereta pengering ngagai Yahoo.com.

Pia mega Jerry Yang tu siko orang ti mutus ati dalam pengawa dagang ia. Maioh penemu ia enda dipesetuju ka orang ti bisi syer dalam kompeni nya tang ia enda mantul ati. Ia majak ka penemu ti diasai ka ia patut dalam mai Yahoo.com tu ulih besemekih enggau kompeni ti bukai.
Enda tentu salah enti kitai nyebut pemansang sereta pengaya kompeni Yahoo! tu sigi bepun ari pemerani Jerry Yang dalam pengawa dagang.

Nya alai kitai patut berati sereta ngambi Jerry Yang tu nyadi ka contoh kitai dalam pengawa dagang ukai semina dalam pengawa dagang internet tang pengawa dagang ti bukai mega.
Tusah kompeni Yahoo! Tu ka mansang enti enda ari pemerani Jerry Yang bebeli ka kompeni bukai. Laban dalam pengawa dagang internet, penyampat kitai mutus ka runding nentu ka dagang kitai mansang tauka enda.

Nya alai peninga,

Kena nutup randau ICT kitai ba Tusun 41 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

Tusun 43 - Google.com

Selamat tengahari serta tabi basa ngagai peninga.

Selamat kita begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 43.

Saritu aku nyambung kenang pasal website ti patut ditemu kitai. Website ti dikenang kitai saritu semampai enda kala ditinggal ka aku ari Tusun Program kitai ti keterubah nyentok ka ngagai program kitai ba Tusun 42 nyin kemari. Enti peninga semampai mending ka program kitai peninga tentu ulih nyangka website ti deka dikenang aku saritu.

Website ti dikenang kitai saritu ianya Google.com. Enti kitai kala ngena internet tentu meh kitai kala meda website google.com.

Google.com tu ianya siti ari website ti dikumbai orang “search engine”. Reti ia website ti dikena orang begiga ka penerang ti bisi dalam internet.

Google.com tu ditumbuh ka dalam taun 1996. Ia siti ari projek thesis Ph.D ti digaga siko student ti belajar ka penemu Matematik ba Stanford ianya Larry Page. Ba penemu Larry Page, penerang ti didiga orang patut ngayan ka penerang ti beguna dulu, udah nya ditangkan ka enggau penerang ti kurang beguna dalam list penerang ti ayan ba search result enti orang ngiga penerang ngena siti siti genteran jako.

Profesor ia, ianya Terry Winograd meransang Larry Page ngada ka pansik tentang pekara tu enggau dalam agi lalu nyadi ka pansik nya batang pengawa pansik dikena Larry Page ngambi Ph.D ia.

Ia ngambi backlink nyadi ka sukat pengering siti – siti website ti nentu ka website nya ayan ba ranking ti tinggi. Reti ia, maioh agi orang ngada ka link ngagai website nya, tinggi agi meh ranking website nya tadi. Ari nya ia mansik formula matematik ti ulih dikena ngereja pengawa tu. Research projek Larry Page nya tadi diberi nama “BackRub”. Larry Page mai kaban ti sama belajar enggau ia mansik sereta berati ka pekara tu ianya Sergey Brin.

Seduai ia lalu mujur ngaga siti formula lalu digaga nyadi programming ti dikumbai “web crawler”. Program tu ulih nginau website ti bisi dalam internet dalam taun ti sama ianya 1996. Maya nya ukai semina web crawler seduai ia aja bisi dalam internet. Maya nya sigi udah maioh search engine ti bukai udah bisi dalam internet.

Larry seduai ia Sergey tu tadi ngada ka siti formula algorithm ti agi dikena nyentok ka saritu ti diberi nama ‘PageRank’. Ngena formula dalam PageRank tu peninggi ranking website ulih ditentu ka. Ngena cara tu website ti ayan ba search result meri penerang ti manah agi enti disbanding ka cara website diberi ranking maya nya. Enti nitih ka cara lama, maioh agi leka jako ti digiga orang nya ayan tinggi agi meh ranking website nya tadi. Taja pia pemaioh leka jako enda ngayan ka pemanah penerang dalam siti-siti website.

Dalam taun 1997 database BackRub tu tadi bisi 75 Millions Url dalam rekod sida. Maya nya BackRub agi numpang ba website Stanford ngena url www.google.stanford.edu. Kena 15/9/1997 nama google.com diregister. Pia mega nama kompeni Google Inc. mega sama diregister taun nya. Ofis seduai ia ba baruh rumah tauka garaj pangan seduai ia ba Menlo Park, California.

Asal nama Google tu ianya salah spelling ari “googol”. Asal reti googol tu ianya nombor ti bisi 100 iti kosong di belakang. Enti seratus bisi dua iti kosong, enti seribu bisi 3 iti kosong di belakang. Enti segoogol, bisi 100 iti kosong di belakang ia. Bakanya ka asal nama google tu tadi.
Dalam taun 1998 ianya udah 2 taun ditumbuh ka, google bisi 60 millions webpage dalam rekod sida ia. Taja pan agi baru, penerang dalam website ti ayan ba ranking ti tinggi dalam list google manah agi kaliti enti disbanding ka enggau penerang ti tinggi ranking ti ayan ba search engine ti bukai baka excite.com, yahoo.com, msn.com, Lycos, AOL.com enggau dotcom bubble. Orang maioh makin rindu agi ngena google nyadi ka search engine sida ia.

Orang ti melabur ba stok market mega nyau majak rindu ka google laban penerang ti ayan dia ngayan ka penerang ti sigi amat diguna orang kelebih agi dalam pengawa bedagang saham.
Dalam taun 1999 kompeni Google Inc mindah ka ofis sida ia ngagai Palo Alto alai. Ditu mega maioh kompeni ICT ti bukai ti udah tebilang nama maia nya suba.

Udah nya kompeni tu meli ofis sida ia ba Amphitheatre Parkway ti nyadi ka ofis sida ia nyentok ka saritu. Kompleks ofis tu diberi nama Googleplex enggau rega 319 Million dalam taun 2006.
Enti kitai berati ka website google.com tu, ia enda kelalu maioh pekara diayan ka ba homepage tauka lambar ti terubah website sida. Nadai maioh ruang iklan enti disbanding ka enggau website search engine ti bukai. Pekara tu meh narit ati maioh orang rindu ka google. Nya alai maioh meh orang ngena website tu nyadi ka search engine sida ia.

Dalam taun 2000, google ngepun ka siti program iklan ti jauh nyelai ari iklan orang bukai. Nyentok ka saritu nadai kompeni bukai ulih ngaga cara iklan ti bansa tu. Program iklan tu diberi nama adwords. Bakatu ka program tu : enti kitai deka meda website kitai ayan tinggi ba search engine, kitai meli genteran jako ti nerang ka website kitai nya lalu ngerejister ba google adwords. Udah nya link ngagai website kitai dipandang ka ba sudut kanan skrin monitor kitai enti bisi orang ngiga penerang ngena genteran jako ti udah dipilih kitai nya tadi. Ngena cara nya jampat agi website kitai ditemu orang. Genap kali enti bisi orang klik ba website kitai nengah link nya tadi kitai dipinta mayar google penyampau ti udah dipadah ngagai kitai. Program tu mega selalu disebut orang “pay per click”.

Link ngagai website kitai nya tadi mega ayan ba website orang bukai ti bisi ngerejister diri dalam siti agi program iklan google ianya Adsense. Enti kitai meda sekeda website bisi genteran jako “Ads by Goooogle”, website tu bisi enggau dalam program iklan Adsense.

Semoa orang ti bisi website tau ngerejister diri dalam program google adsense. Kitai ngada ka siti ruang dalam webpage kitai alai google ngayan ka link ngagai website orang ti bisi ngerejister diri dalam program Adwords. Enti orang ti mansa webpage kitai bisi click ba link ti udah disedia nya tadi, kitai ti benpu website ti ngayan ka link nya tadi bulih komisyen ari google.

Google tu siti ari kompeni ti pecaya ka pengawa ti manah semampai bulih balas ti manah. Sida ia ngada ka siti tiang penem ti belalau ka genteran jako “Don’t be evil” tauka enti dalam jako kitai; anang ngereja penyai. Kompeni tu selalu ngayan sereta bekempen ka cara runding ti manah dalam website sida ia.

Google nerima Bantu belanja ngemesai ka kompeni sida ia dalam taun 1998 ari Andy Bechtolsheim ianya orang ti ngepun ka Sun Microsystem. Bantu belanja nya ianya $100,000.
Udah nya dalam taun 1999 siti kompeni dagang ianya Kleiner Perkins Caufield & Bryers begulai enggau Sequoia Capital ngada ka loan $25 millions dikena google ngerembai ka pengawa dagang sida ia.

Dalam taun 2004, semua pekerja tetap dalam kompeni google tu nyadi orang ti bisi saham dia. Maya nya bisi 3,000 iko pekerja ba kompeni tu. Semua sida tu bisi share dalam kompeni nya. Maia nya untung pengawa dagang internet google.com tu manggai $2 Billions.

Dalam taun 2003 google mel kompeni Pyra Labs, kompeni ti ngempu blogger.com. Kompeni tu ngada ka blog percuma ba .blogspot.com. Belaboh ari taun 2004 85% orang ngiga penerang ari internet nengah google.com.

Dalam taun 2006 google meli siti agi website ti tebilang bendar ianya youtube.com enggau rega $1.65 Billion Website tu ngada ka service online video. Maioh mega kerjasama ti bukai enggau kompeni ti tebilang baka Time Warer, Sun Microsystem enggau Myspace.

Dalam taun 2005 google bekerjasama enggau NASA alai sida ia ulih ngada ka google earth, ianya alai kitai ulih meda kar serata dunya enggau gambar satelit semua menua di dunya tu. Diatu sida ia bekerjasama ngada ka Google Ocoen alai kitai ulih meda pendiau menua dalam tasik nyin. Kedua dua penerang ti ulih dipeda kitai ari Google Earth enggau Google ocean tu ulih dikena kitai enggau enda bebayar.

Google mega ngada ka web browser sida ia empu ianya Google Chrome dikena besemekih enggau Internet Explorer, web browser ti tebilang diempu Microsoft.

Plan pengawa dagang google.com tu jauh nyelai ari maioh kompeni ti bukai. Sida ia pecaya semua peneka orang ulih diberi maioh kompeni kemaya hari tu. Taja pia kompeni ti udah bisi enda ulih ngemuas ka ati orang genap hari. Bisi aja pekara enda ulih diada ka kompeni tu taja udah lama bisi. Pekara ti bansa tu meh diperati ka google.com nyadi ka peluang pengawa dagang lalu sida ia napi peminta tu ngena teknologi sida ia empu.

Nya alai google.com enda kala kena pengerugi nyentok ka saritu. Tambah mega google.com berat ka orang ti bekerja enggau sida. Enti kitai meda gambar ofis sida ia baka taman alai bemain, nadai baka ofis ti selalu dipeda kitai. Semua orang ti bekerja enggau google bisi diberi syer sida ia dalam kompeni. Nya alai tentu meh ransing orang gawa enggau sida ia.

Penutup

Kebuah aku ngenang google.com tu dalam program kitai ngambi ka kitai sama berati ka bakani dagang internet ulih maju taja ia semina bepun ari thesis student aja. Idea tauka buah runding enti diperati sereta dikereja kitai ulih nyadi ka pun penatai pemisi kitai kelebih agi diatu kitai bisi teknologi ti nyamai alai kitai ngereja semua pengawa nya.

Nya alai peninga, enti kitai asai ka deka mantul dalam pengawa dagang internet kitai, ngat ka google.com tu. Ia ukai bepun ari kompeni ti kaya. Sida ia belaboh ari baruh rumah tauka stor tauka garaj. Nadai ofis ti meruan, tang Larry Page tu ngereja siti pengawa ti mudah, ia ngasai ka buah runding ia manah sereta patut dikereja.

Tu meh contoh ti patut ditunda kitai, ukai semina dalam pemgawa dagang internet aja tang mega dalam pengidup kitai genap hari.

Nya alai peninga,
Kena nutup randau ICT kitai ba Tusun 43 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

Tusun 37 - Ngelaku ka Website (Bagi 1)

Terubah ia aku meri tabi basa ngagai peninga.

Selamat kitai begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 37.

Saritu kitai ngenang siti agi website ti ulih dikena kitai ngereja pengawa dagang internet ianya bakani kitai ulih ngelaku ka website kitai ngambi ka ulih dipeda orang.

Nadai meh guna website kitai, taja naka ia pemanah digaga kitai tang nadai ulih ditemu orang bukai. Naka meh pengerugi kitai, masau jam, masau ari ngaga website kitai tang nadai orang meda. Pia mega naka meh pengerugi belanja ti udah dikena kitai ngada ka maioh macam perengka dalam website kitai tang nadai orang ngabas, mansa website kitai.

Diatu bisi enda kurang ari 500 millions website bisi dalam internet. Pia mega enda kurang ari 3 billions webpage bisi dalam internet. Penyampau tu nambah genap hari. Setiap hari bisi aja website ti baru digaga. Pia mega setiap hari bisi aja posting ti baru, serta mega webpage ti baru dalam internet.

Taja pia ukai reti ia dagang internet tu enda ulih dikereja kitai agi. Indah pia, dagang internet tu agi dikumbai kitai baru laban agi maioh pekara bedau diuji orang dalam internet. Bisi aja cara dikena ngerembai ka dagang internet bisi digaga orang. Semua tu ngambi ka kitai ulih besemekih, enti enda nyulut agi ari orang bukai dalam pengawa dagang internet kitai.
Nya meh kebuah dagang internet tu dikumbai orang “K-economy“ ianya pengawa dagang ti besabung ka pengelandik enggau pengering runding kitai.

Nadai siti – siti menoa ulih ngumbai diri kering sereta nyulut agi dalam dagang internet. Nadai siko orang ulih nguasa dagang internet lalu nagang orang bukai maju dalam pengawa tu. Peluang dalam dagang internet tu sama rata diberi ka kitai ti bisi internet enggau komputer. Nya alai kitai patut ngena peluang tu bisi tu.

Udah website kitai tembu digaga kitai, semua perengka ti diguna udah diatur kitai magang, ukai reti ia website kitai lalu tembu, kitai lalu begoyang kaki nganti duit ti datai. Enti kitai bisi ngibun penemu ti bansa tu, enda ulih enda kitai deka mantul ati dalam pengawa dagang internet kitai.
Indah enda salah baka orang ti bumai, udah nugal ukai reti ia umai nya tadi lalu ditinggal ka lalu enda iboh diintu kitai agi. Tentu meh padi nya deka dibaja kitai, rumput deka dipantun, indu utai deka dipancit enggai ka ngacau padi ka udah ditanam kitai.

Baka nya mega website kitai. Ia enda nemu ngiga orang datai kediri. Bisi aja pengawa patut diatur kitai ngambi ka orang ulih tetemu ka website kitai. Udah ia tetemu ka website kitai, nya baru kitai bisi peluang penatai pemisi dalam dagang internet kitai.

Ba randau kitai sekali tu aku ngenang 4 iti cara kitai ulih ngelaku ka website kitai ngambi ka ulih ditemu orang ti ngiga barang ti dijual kitai.

Search Engine

Siti ari cara orang ulih nemu pasal website kitai ianya ari search engine. Search Engine tu ianya siti ari directory, enda salah baka buku panduan telefon kitai ka tebal curak kuning. Diatu nyau jarang meda buku nya, tang baka tu meh gaya directory tu tadi.

Contoh search engine ti tebilang bendar ianya Google. Enti kitai kala ngena internet, kitai tentu kala meda google.com. Diatu Google.com tu siti ari kompeni ti pemadu besai ukai semina dalam dunya internet tang mega siti ari kompeni ti pemadu besai dalam dunya.

Bulih ranking ti tinggi dalam list search engine sigi nyadi ka juluk ati orang ti ngereja pengawa dagang internet. Enti ranking website kitai tinggi, kitai ulih ayan ba result page ti terubah dalam search engine. Enti kitai ba result page ti terubah reti ia maioh orang ulih tetemu ka website kitai.

Search engine tu nemu penerang pasal website kitai laban ia ngena software ti dikumbai “crawler” tauka selalu mega disebut spider. Robot tu ngabas website ti bisi. Ia mansa sekali dalam 4 tauka 5 ari.

Leboh ti ngabas website tauka webpage, robot tu ngiga penerang ti baru enti dibanding ka enggau leboh maya ia datai dulu suba. Enti bisi pekara baru, ia lalu meri ranking website kitai tinggi agi enti dibanding ka enggau website bukai ti besemekih enggau kitai.

Pia mega Robot tu ngiga enti penerang dalam website kitai sebaka bendar enggau penerang dalam website bukai. Enti robot nya tadi tetemu ka pekara tu bisi nyadi, ia manding ka penerang ni dulu agi di-upload. Enti enggi kitai dudi di-upload kitai, reti nya penerang dalam website kitai nya ulih kitai ngupi ari website orang bukai.

Search engine ngukum pengawa ti ngupi bakatu lalu nurun ka ranking kitai jauh kebaruh. Reti ia address website kitai enda ulih ayan ba result page ti terubah.

Nya alai kitai anang sekali ngupi penerang ari website bukai. Ukai semina kitai diukum search engine, kitai mega tau kena dawa orang ketegal ngupi.

Search engine mega meri ranking kitai tinggi enti maioh website bukai bisi back link ngagai website kitai.

Betukar Link enggau orang bukai

Kitai mega ulih ngelaku ka website kitai ngena cara betukar link enggau orang bukai. Link tu ianya siti coding ti mudah ti mai orang ngagai website kitai enti orang click ba link nya tadi.
Kitai patut nyendia ka siti ruang dalam website kitai endor kitai engkah link orang ti betukar link enggau kitai. Ngena cara nya orang pan sanggup ngada ka siti ruang alai sidai ia engkah link ngagai website kitai dalam website sida ia.

Ngena cara tu, orang ti mansa website orang ti bisi bekerjasama enggau kitai dalam pengawa betukar link nya tadi bisi peluang tetemu ka website kitai.

Viral tauka cara berampit

Viral tu datai ari nama virus, ianya kitai ngerembai ka penerang pasal website kitai sama sebaka enggau virus ngerampit penyakit ari orang siko ngagai orang bukai.

Cara tu ianya kitai meri barang free baka ebook tauka special report. Orang ti ninggal ka nama enggau email address sida dalam autoresponder kitai diberi kitai ebook percuma. Dalam ebook nya kitai ninggal ka link ngagai website kitai. Reti ia enti orang nya deka nemu enggau silik agi pasal penerang ti dikenang kitai dalam ebook kitai, ia ulih click ba link ti disedia ka kitai nya tadi.
Kitai mega mesan orang ti nerima ebook nya ngirum ka ebook nya ngagai bala kaban ia tang isi kandung ebook nya enda tau diubah. Nya alai link ngagai website kitai nya tadi sama enggau ebook ti percuma nya dipasing ka kin kitu. Ari nya maioh orang bisi peluang tetemu ka website kitai.

Ngena media

Taja pan kitai dalam dagang internet ukai reti ia kitai melakang ka pekara ukai internet tauka offline promotion. Kitai tau engkah address website kitai dalam suratkabar. Pia mega kitai ulih ngena majalah ti sama ngenang pekara ti dikenang kitai dalam website kitai. Ambi ka contoh, enti website kitai ngenang pasal badminton, kitai tau iklan ka website kitai dalam majalah sukan.

Pia mega kitai enda patut melakang ka stesen radio. Stesen radio bisi ngada ka slot iklan alai kitai ulih ngelaku ka website kitai. Ngena cara tu orang ulih nemu pasal website kitai.
Enti enda salah ingat aku, nyentok ka diatu aku jarang bendar ninga orang bisi ngena radio iklan ka website sida ia. Tang di menua luar din maioh orang ngena radio ngelaku ka website sida. Kitai patut ngena peluang ti bisi tu dikena ngelaku ka websiter kitai.


Penutup

Website kitai enti udah tembu ukai reti ia kitai goyang kaki pia aja nganti orang ti datai meli barang ari website kitai. Maioh agi pekara patut dikereja kitai dikena ngelaku ka website kitai. Enti enda pia nadai orang ulih nemu pasal website kitai, ngujung ka kitai lalu mantul ati dalam pengawa dagang internet.

Munyi ka udah dipadah aku dulu suba, dagang internet tu ukai pengawa dagang alai kitai goyang kaki nganti duit datai. Ia sama mega baka pengawa dagang di luar din alai kitai mesti deka ngereja maioh pengawa ngelaku ka website kitai ngambi ka orang ulih tetemu ka website kitai.

Kenang pasal 4 agi cara ngelaku ka website kitai deka disambung aku ba Tusun 38. Aku ngasai ka patut bendar kitai berandau ka pengawa ngelaku ka website tu enggau silik laban pengawa tu besai bendar reti enti kitai deka maju dalam dagang internet.

Kena nutup randau ICT kitai ba Tusun 37 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

Tusun 36 - ClickBank.com

Terubah ia aku meri tabi basa ngagai peninga.

Selamat kitai begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 36.

Belaboh ari program kitai ba Tusun 31 kemari nyentok ngagai Tusun 35 kemari kitai sama udah ngenang pekara ti patut bisi ba website kitai. Enti kitai sama berati sereta nitih ka pekara tu udah dikenang aku diatu kitai udah bisi website ti menyana sereta ulih dikena kitai belaboh ka dagang internet kitai.

Pia mega dalam program randau kitai ti dulu agi kitai sama udah ngenang bakani kitai milih batang pengawa dagang ti deka dikereja kitai. Enti peninga agi ingat, kitai ulih milih maioh macam batang pengawa dagang ti ulih dipilih kitai. Kitai ulih nyual barang ti digaga kitai. Kitai mega tau nyual barang ti digaga orang bukai. Kitai mega ulih nyual penerang ti dipelaba ka kitai ulih diguna orang bukai.

Saritu aku deka ngenang siti agi pekara ti ulih nambah ka penyakah kitai dalam dagang internet laban ba asai ati aku pekara tu patut bendar dikenang ngambi ka kitai enda kelalu jauh tinggal dalam pengawa dagang internet.

Pekara ti deka dikenang aku ianya pengawa ngelaku ka barang orang bukai. Sama baka orang ti ngereja pengawa dagang di luar din, kedai tauka supermarket ukai semina nyual barang sida ia empu aja tang sida mega nyual sereta ngelaku ka barang orang bukai mega.

Enti kitai berati ka supermarket, maioh bendar macam barang dijual sida ia. Taja pia barang dia ditusun enggau manah nitih ka guna ia. Enti sayur, ia ditusun begulai enggau sayur bukai. Enti gari ia dijual ba alai siti begulai enggau gari bukai. Nya alai taja pan maioh barang dijual ia ukai semina ditugung sengapa tang bisi endor sida ia empu.

Baka nya mega dalam pengawa dagang internet. Kitai enda ulih semina ngarap ka siti aja barang ti dijual kitai tang kitai deka gelaku ka naka pemaioh barang ti ulih. Enti kitai semina ngarap ka siti aja barang dijual kitai, tusah kitai deka besemekih enggau orang bukai.

Saritu aku ngenang bakan kitai ulih besemekih dalam dagang internet enti kitai nyual information products baka ebooks, video tauka lagu. Ba program ti deka datai aku ngenang bakani kitai ulih ngelaku ka barang bukai. Kebuah pia laban diatu website kitai agi baru sereta nadai maioh penerang. Diatu kitai patut ngisi website kitai enggau naka maioh penerang ti ulih ngambi ka ia jampat niki dalam ranking ba search engine.

Ambi ka contoh, kitai rindu ka pengawa main Badminton lalu deka ngaga website kitai nya ngelaku ka perengka badminton. Maioh pekara ulih dikenang kitai pasal badminton dalam website kitai. Taja pia kitai nyangka enda ulih ngada ka penerang pasal semua pekara ti besangkut paut enggau badminton. Kesatu, kitai nadai cukup ari dikena kitai mansik semua penerang pasal badminton. Kedua, penemu kitai pasal badminton sigi bisi takat ia. Enda kitai ulih nemu semua pekara. Ketiga, kitai ka website kitai meri penatai pemisi ngagai kitai enggau jampat. Enti ulih enda lebih ari 3 bulan.

Nya alai kena kitai nangkup pekara tu kitai deka ngiga penerang ti bisi dalam internet ngambi ka ulih dikena kitai. Ditu meh kitai beguna ka website baka ClickBank.com .
ClickBank.com tu siti ari alai orang ngelaku ka information products baka books, movie enggau lagu.

Orang ti ngaga information products maioh engkah barang sida ia ba ClickBank.com ngambi ka ulih dipedagang ka orang bukai. ClickBank.com tu nyadi orang tengah antara orang ti empu barang enggau kitai ti deka ngelaku ka barang orang nya tadi. Kitai ngelaku ka barang orang nya dalam website kitai bulih komisyen ari rega barang ti dijual nya tadi. Komisyen tu dibayar ClickBank.com ngagai akaun kitai enti kitai bisi ngerejister diri dia.

Terubah ia kitai ngerejister diri ba www.ClickBank.com . Udah register kitai diberi siti password dikena kitai muka webpage ti bisi ngundan penerang pasal akaun clickbank kitai. Ari nya kitai diberi nama akaun tauka nickname dikena kitai genap kali kitai ngelaku ka barang ti bisi dalam list ClickBank.com.

Udah nya kitai ngiga webpage ti diberi nama “MarketPlace”. Ditu meh endor kitai ulih ngiga information products ti bisi dijual nengah ClickBank.com.

Pulai ngagai contoh website kitai ti ngelaku ka perengka badminton, dia ba marketplace nya kitai lalu naip keyword “Badminton”. Dia kitai dibai ngagai website ti ngayan ka list information product ti bisi ngundan penerang pasal badminton. Diatu bisi siti ebook pasal badminton bisi dijual nengah ClickBank.com ianya Badminton Secrets ti dijual enggau rega USD37, tauka RM100 duit kitai. Komisyen ti dibayar ngagai kitai enti ngelaku ka ebook tu ianya USD16.32 tauka RM50 duit kitai.

Enti kitai udah mutus ati deka ngelaku ka ebook tu dalam website kitai, kitai lalu click ba “Create hoplink”. Dia kitai dipinta ngisi form. Enda maioh penerang ti diguna dia, semina nama akaun ti diberi ka kitai leboh kitai ngerejister diri dulu tadi.

Udah kitai ngisi form nya tadi kitai diberi siti coding. Coding tu nyadi link dikena kitai mai orang ti mansa website kitai ngagai webpage ti ngelaku ka ebook tu tadi. Enti orang nya tadi nyadi meli ebook nya tadi, kitai lalu bulih komisyen. Komisyen nya tadi lalu dipasuk ka ngagai akaun kitai ba ClickBank.com . Setiap 2 minggu sekali clickbank ngirum ka cek ngagai kitai enti bisi barang laku dijual kitai.

Enti orang ti mansa website kitai nya tadi enda meli ebook nya tekala nya, ia meli maia bukai, agi meh kitai ulih nerima komisyen laban ClickBank.com bisi ngada ka siti coding dikena nyidi penatai orang nya ari website kitai.

Komisyen ti dibayar nengah ClickBank.com tu maioh. Antara 65% ngagai 75%. Information products ti dijual dia mega berega antara RM30 ngagai RM1,000. Enti dikira, kitai ulih nerima komisyen antara RM20 ngagai RM500 ari siti ebook ti laku dijual kitai. Nya alai enti kitai berati ka pekara tu, ClickBank.com tu siti ari endor kitai ulih ngiga penatai pemisi kitai ari internet.
Ia mega jampat sereta nadai maioh pengiroh. Ebook sigi udah ditulis orang bukai. Kitai semina ngelaku ka ebook nya tadi enggau leka jako kitai empu ba website nya.

Enti kitai bisi information product kitai empu kitai ulih mega nyual ia nengah ClickBank.com. Oang bukai ulih ngelaku ka barang kitai. Kitai empu nentu ka berapa kitai meri komisyen ngagai orang ti ngelaku ka barang kitai nya tadi. Udah nya pengawa bebayar ka komisyen nya kitai enda iboh irau laban semua nya dikereja ClickBank.com magang. Ngena cara nya kitai enda iboh kelalu kiruh ngelaku ka barang nya tadi laban maioh orang bukai ngelaku ka barang nya ka kitai.

Penutup

Enti kitai deka besemekih dalam dagang internet, ClickBank.com tu meh siti ari website ti patut selalu diperati ka kitai. Maioh orang bulih penatai pemisi semina ngelaku ka barang ti bisi dijual ba ClickBank.com aja. Kitai mega ulih nambah ka penatai pemisi kitai ngena cara ti sama.
Enti dagang internet kitai udah maju lalu kitai nyau ulih ngaga information product kitai empu, kitai beguna ka ClickBank.com nyadi ka palan endor orang bukai ulih sama ngelaku ka barang kitai.

Kena nutup randau ICT kitai ba Tusun 36 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.
Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

Tusun 35 - Google Analytic

Terubah ia aku meri tabi basa ngagai peninga.

Selamat kitai begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 35.

Saritu kitai nyambung kenang pasal pekara ti patut bisi dalam website kitai enti kitai deka besemekih enggau cakah agi dalam dagang internet.

Belaboh ari program kitai ba Tusun 31 kitai sama udah nemu bakani kitai ulih ngerejister nama dagang internet kitai leboh aku ngenang pasal Domain name. Ia sama tuju enggau kitai ti ngerejister nama kompeni leboh kitai bedagang di luar din. Ungkus dikena ngerejister domain name tu dalam RM30 setaun.

Udah nya dalam program kitai ba Tusun 32 aku ngenang bakani kitai ulih nyewa endor kitai bedagang ianya Hosting. Ia mega selalu disebut orang server. Enti dibanding ka enggau nyewa kedai antara RM800 ngagai RM3,000 sebulan, sewa server tu antara RM50 ngagai RM300 sebulan nitih ka pakej ti dipilih kitai.

Kitai nerus ka randau kitai ba Tusun 33 kitai nemu kitai enda ulih enda beguna ka Autoresponder. Enti dibanding ka enggau dagang di luar din, Autoresponder tu baka orang ti jaga kedai. Enti ba supermarket, autoresponder tu baka salesgirl tauka promoter ti bekerja dia. Baka nya meh pengawa autoresponder dalam website kitai.

Kenang aku ti penudi bendar ianya ba Tusun 34 aku bisi ngenang Merchant Account. Enti dibanding ka enggau dagang di luar din, merchant account tu bekerja ka kitai baka tukang wang tauka cashier. Merchant account tu alai kitai nerima bayar ari orang ti meli barang kitai. Merchant account ti suah dikena orang dalam dagang internet tu ianya ba PayPal.com.

Nya alai peninga, enti website kitai udah bisi empat iti pekara ti udah dikenang aku 4 minggu tu ka udah, kitai ulih mupok ngereja dagang internet kitai. Kitai ulih belaboh ngelaku ka barang ti dijual kitai.

Taja pia, kitai deka nemu pengering dagang internet kitai. Kitai deka nemu bisi ka enda orang mansa website kitai. Enti bisi maioh ni orang ti datai ngagai website kitai dalam sehari, seminggu, sebulan tauka setaun.

Kitai mega deka nemu ari menoa ni penatai orang ti singgah ba website kitai. Ari kitai ti nemu penatai orang ngagai website kitai, kitai ulih ngaga website kitai enggau manah agi.

Nadai guna kitai ngaga website kitai enggau naka ia pemanah tang kitai enda nemu bisi ka enda orang datai ngagai website kitai. Pia mega nadai guna enti kitai semina nemu pemaioh orang bisi datai ngagai webite kitai tang kitai enda nemu ia datai ari menoa ni.

Seninjik bendar dalam pengawa dagang internet maioh pengawa ulih dikereja kitai. Kitai ulih nemu sapa orang ti datai ngagai website kitai. Kitai mega nemu menoa penatai orang nya tadi.

Cara tu ulih diperati ka kitai dalam website kitai. Pia mega cara tu ulih dikereja kitai enggau nadai bebayar. Cara ti dipadah ka aku nya tadi ianya ngena Google Analytics. Ia ulih digiga kitai ba url www.google.com/analytics .

Google analytics tu siti ari perengka ti disedia ka kompeni Google.com dikena mantu orang dalam dagang internet. Ia siti ari perengka ti enda tau nadai dalam website kitai.

Munyi ti dipadah ka aku dulu tadi, kitai ulih ngena google analytics enggau nadai bebayar. Kitai ngerejister akaun google analytics ba www.google.com/analytics . Enti kitai bisi ngena email ti ngena @gmail.com, kitai tau enda iboh ngerejister akaun ti baru. Kitai ulih ngena username enggau password ti sama leboh kitai ngerejister google analyctics kitai.

Udah kitai ngerejister akaun google analytics kitai dipinta meri url website kitai. Contoh ia http://www.kassimjeritan.com . Url ti terubah diregister kitai lalu secara automatic dikena nyadi ka nama akaun google analytics kitai. Nama tu enda ulih ditukar agi, semadi meh kitai nutup akaun nya tadi lalu ngerejister nama baru.

Udah nya kitai diberi lumor baka UA 1234567-1 ianya siti coding ti unik ka siti siti website ti dikena kitai. 1234567 tu lumor coding google analytics kitai. Lumor 1 tu diberi ngagai website kitai ti terubah. Enti kitai bisi maioh website lalu deka nambah website kitai dudi ari ia diberi lumor UA 1234567-2. Sereta baka nya mega enggau website ti bukai. Nya alai kitai enda iboh suah ngerejister akaun google analytic kitai taja pan kitai maioh website ti dikena.

Udah kitai ngerejister website kitai, kitai mega diberi coding dalam java script ti ulih di tambah ka kitai ba coding website kitai. Coding tu enda kelalu panjai sereta nyamai dikelala. Dalam setting google account kitai ia bisi madah dini alai kitai patut engkah coding nya tadi.

Enti kitai ngena website ti digaga kitai empu, kitai deka nambah ka coding nya dalam semua webpage dalam website kitai. Ia ulih dikereja kitai ngena cara ngupi java script ti diberi ka kitai leboh kitai ngerejister website ti dikena kitai. Semadi meh kitai enda iboh ngena google analyctics dalam webpage nya tadi baka webpage ti deka dilalai ka kitai nya baru kitai enda iboh nambah ka coding nya tadi.

Enti kitai ngena public blog baka blogspot.com kitai semina dipinta ngada ka Gadget Google analytic dalam blog kitai. Udah nya dalam setting gadget nya tadi kitai semina ngupi lumor UA ti udah diberi ka website kitai nya tadi. Udah setting tu dikereja kitai, google analyctics nya tadi lalu active dalam kandang 24 jam ari setting nya tadi.

Enti kitai ngena private blog baka wordpress kitai deka ngada ka plugin google analytics. Plugin nya tadi ulih diambi kitai ari control panel dalam wordpress blog kitai. Udah plugin nya active, kitai dipinta ngupi coding java script nya tadi dalam setting plugin google analytics kitai. Ngena cara tu google analytics kitai ulih dikena dalam tempoh 24 jam.

Google analytics tu siti ari perengka ti active dalam website kitai. Reti ia, google analytics ukai semina coding aja tang ia ngambi sereta nerima penerang ari website kitai. Nya alai ia enda ulih active tekala nya tang beri tempoh dalam 24 jam dikena google ngadu ka akaun kitai.

Dalam tempoh 24 jam kitai patut ulih meda report pasal orang ti bisi datai ngagai website kitai. Kitai mega ulih nemu pemaioh orang ti datai dalam sehari, seminggu, sebulan enggau setaun. Pia mega dalam penerang ti silik agi google analytics ulih madah ka kitai menoa penatai orang ti bisi singgah dalam website kitai. Kitai mega ulih nemu ngena cara ni orang ti datai ngagai website kitai nya nemu pasal website kitai sekali ka ngena search engine, ari link website bukai tauka terus ari Url kitai, ianya ngena cara terus naip nama website kitai nya tadi.

Ia mega ulih madah ka ari webpage ni orang datai ngagai website kitai laban setiap webpage kitai nya tadi bisi ngundan coding dikena kitai nyidi penatai orang ti singgah ba siti – siti webpage dalam website kitai. Ngena cara tu kitai ulih ngemanah ka agi webpage ti selalu ditengah orang ngambi ka orang tau tekuing ati deka datai baru ngagai webpage kitai dudi ari ila. Kitai mega tau nambah penerang ti baru dalam webpage nya tadi. Pia mega enti webpage kitai nya maioh dipeda orang, kitai ulih ngada ka ruang iklan. Kitai mega ulih nguji nyual barang kitai dalam webpage tu.

Penutup

Kitai patut ulih nemu penatai orang ti bisi meda website kitai. Pekara tu nyamai dikereja kitai ngena google analytics. Ari ka nemu penerang pasal orang ti datai ngagai website kitai, kitai ulih ngemanah ka website kitai. Enti website kitai manah sereta penuh enggau penerang ti beguna kitai ulih besemekih enggau manah agi dalam dagang internet kitai.

Kitai patut ngena peluang ti bakatu dikena ngemansang ka dagang internet kitai.

Kena nutup randau ICT kitai ba Tusun 35 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.