Tusun 35 - Google Analytic

Terubah ia aku meri tabi basa ngagai peninga.

Selamat kitai begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 35.

Saritu kitai nyambung kenang pasal pekara ti patut bisi dalam website kitai enti kitai deka besemekih enggau cakah agi dalam dagang internet.

Belaboh ari program kitai ba Tusun 31 kitai sama udah nemu bakani kitai ulih ngerejister nama dagang internet kitai leboh aku ngenang pasal Domain name. Ia sama tuju enggau kitai ti ngerejister nama kompeni leboh kitai bedagang di luar din. Ungkus dikena ngerejister domain name tu dalam RM30 setaun.

Udah nya dalam program kitai ba Tusun 32 aku ngenang bakani kitai ulih nyewa endor kitai bedagang ianya Hosting. Ia mega selalu disebut orang server. Enti dibanding ka enggau nyewa kedai antara RM800 ngagai RM3,000 sebulan, sewa server tu antara RM50 ngagai RM300 sebulan nitih ka pakej ti dipilih kitai.

Kitai nerus ka randau kitai ba Tusun 33 kitai nemu kitai enda ulih enda beguna ka Autoresponder. Enti dibanding ka enggau dagang di luar din, Autoresponder tu baka orang ti jaga kedai. Enti ba supermarket, autoresponder tu baka salesgirl tauka promoter ti bekerja dia. Baka nya meh pengawa autoresponder dalam website kitai.

Kenang aku ti penudi bendar ianya ba Tusun 34 aku bisi ngenang Merchant Account. Enti dibanding ka enggau dagang di luar din, merchant account tu bekerja ka kitai baka tukang wang tauka cashier. Merchant account tu alai kitai nerima bayar ari orang ti meli barang kitai. Merchant account ti suah dikena orang dalam dagang internet tu ianya ba PayPal.com.

Nya alai peninga, enti website kitai udah bisi empat iti pekara ti udah dikenang aku 4 minggu tu ka udah, kitai ulih mupok ngereja dagang internet kitai. Kitai ulih belaboh ngelaku ka barang ti dijual kitai.

Taja pia, kitai deka nemu pengering dagang internet kitai. Kitai deka nemu bisi ka enda orang mansa website kitai. Enti bisi maioh ni orang ti datai ngagai website kitai dalam sehari, seminggu, sebulan tauka setaun.

Kitai mega deka nemu ari menoa ni penatai orang ti singgah ba website kitai. Ari kitai ti nemu penatai orang ngagai website kitai, kitai ulih ngaga website kitai enggau manah agi.

Nadai guna kitai ngaga website kitai enggau naka ia pemanah tang kitai enda nemu bisi ka enda orang datai ngagai website kitai. Pia mega nadai guna enti kitai semina nemu pemaioh orang bisi datai ngagai webite kitai tang kitai enda nemu ia datai ari menoa ni.

Seninjik bendar dalam pengawa dagang internet maioh pengawa ulih dikereja kitai. Kitai ulih nemu sapa orang ti datai ngagai website kitai. Kitai mega nemu menoa penatai orang nya tadi.

Cara tu ulih diperati ka kitai dalam website kitai. Pia mega cara tu ulih dikereja kitai enggau nadai bebayar. Cara ti dipadah ka aku nya tadi ianya ngena Google Analytics. Ia ulih digiga kitai ba url www.google.com/analytics .

Google analytics tu siti ari perengka ti disedia ka kompeni Google.com dikena mantu orang dalam dagang internet. Ia siti ari perengka ti enda tau nadai dalam website kitai.

Munyi ti dipadah ka aku dulu tadi, kitai ulih ngena google analytics enggau nadai bebayar. Kitai ngerejister akaun google analytics ba www.google.com/analytics . Enti kitai bisi ngena email ti ngena @gmail.com, kitai tau enda iboh ngerejister akaun ti baru. Kitai ulih ngena username enggau password ti sama leboh kitai ngerejister google analyctics kitai.

Udah kitai ngerejister akaun google analytics kitai dipinta meri url website kitai. Contoh ia http://www.kassimjeritan.com . Url ti terubah diregister kitai lalu secara automatic dikena nyadi ka nama akaun google analytics kitai. Nama tu enda ulih ditukar agi, semadi meh kitai nutup akaun nya tadi lalu ngerejister nama baru.

Udah nya kitai diberi lumor baka UA 1234567-1 ianya siti coding ti unik ka siti siti website ti dikena kitai. 1234567 tu lumor coding google analytics kitai. Lumor 1 tu diberi ngagai website kitai ti terubah. Enti kitai bisi maioh website lalu deka nambah website kitai dudi ari ia diberi lumor UA 1234567-2. Sereta baka nya mega enggau website ti bukai. Nya alai kitai enda iboh suah ngerejister akaun google analytic kitai taja pan kitai maioh website ti dikena.

Udah kitai ngerejister website kitai, kitai mega diberi coding dalam java script ti ulih di tambah ka kitai ba coding website kitai. Coding tu enda kelalu panjai sereta nyamai dikelala. Dalam setting google account kitai ia bisi madah dini alai kitai patut engkah coding nya tadi.

Enti kitai ngena website ti digaga kitai empu, kitai deka nambah ka coding nya dalam semua webpage dalam website kitai. Ia ulih dikereja kitai ngena cara ngupi java script ti diberi ka kitai leboh kitai ngerejister website ti dikena kitai. Semadi meh kitai enda iboh ngena google analyctics dalam webpage nya tadi baka webpage ti deka dilalai ka kitai nya baru kitai enda iboh nambah ka coding nya tadi.

Enti kitai ngena public blog baka blogspot.com kitai semina dipinta ngada ka Gadget Google analytic dalam blog kitai. Udah nya dalam setting gadget nya tadi kitai semina ngupi lumor UA ti udah diberi ka website kitai nya tadi. Udah setting tu dikereja kitai, google analyctics nya tadi lalu active dalam kandang 24 jam ari setting nya tadi.

Enti kitai ngena private blog baka wordpress kitai deka ngada ka plugin google analytics. Plugin nya tadi ulih diambi kitai ari control panel dalam wordpress blog kitai. Udah plugin nya active, kitai dipinta ngupi coding java script nya tadi dalam setting plugin google analytics kitai. Ngena cara tu google analytics kitai ulih dikena dalam tempoh 24 jam.

Google analytics tu siti ari perengka ti active dalam website kitai. Reti ia, google analytics ukai semina coding aja tang ia ngambi sereta nerima penerang ari website kitai. Nya alai ia enda ulih active tekala nya tang beri tempoh dalam 24 jam dikena google ngadu ka akaun kitai.

Dalam tempoh 24 jam kitai patut ulih meda report pasal orang ti bisi datai ngagai website kitai. Kitai mega ulih nemu pemaioh orang ti datai dalam sehari, seminggu, sebulan enggau setaun. Pia mega dalam penerang ti silik agi google analytics ulih madah ka kitai menoa penatai orang ti bisi singgah dalam website kitai. Kitai mega ulih nemu ngena cara ni orang ti datai ngagai website kitai nya nemu pasal website kitai sekali ka ngena search engine, ari link website bukai tauka terus ari Url kitai, ianya ngena cara terus naip nama website kitai nya tadi.

Ia mega ulih madah ka ari webpage ni orang datai ngagai website kitai laban setiap webpage kitai nya tadi bisi ngundan coding dikena kitai nyidi penatai orang ti singgah ba siti – siti webpage dalam website kitai. Ngena cara tu kitai ulih ngemanah ka agi webpage ti selalu ditengah orang ngambi ka orang tau tekuing ati deka datai baru ngagai webpage kitai dudi ari ila. Kitai mega tau nambah penerang ti baru dalam webpage nya tadi. Pia mega enti webpage kitai nya maioh dipeda orang, kitai ulih ngada ka ruang iklan. Kitai mega ulih nguji nyual barang kitai dalam webpage tu.

Penutup

Kitai patut ulih nemu penatai orang ti bisi meda website kitai. Pekara tu nyamai dikereja kitai ngena google analytics. Ari ka nemu penerang pasal orang ti datai ngagai website kitai, kitai ulih ngemanah ka website kitai. Enti website kitai manah sereta penuh enggau penerang ti beguna kitai ulih besemekih enggau manah agi dalam dagang internet kitai.

Kitai patut ngena peluang ti bakatu dikena ngemansang ka dagang internet kitai.

Kena nutup randau ICT kitai ba Tusun 35 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.