Selamat tengahari serta tabi basa ngagai peninga.
Selamat kita begulai baru dalam perogram Randau ICT. Saritu Program kitai ba Tusun 63.
Saritu aku deka belaboh ngenang pengelikun ngena internet. Pekara ti deka dikenang kitai saritu ianya bakani kitai ulih nyaga pengelikun kitai leboh ti melayar internet.
Tuju kitai melayar internet ianya dikena ngiga penerang pasal pekara ti deka ditemu kitai. Kitai melayar internet dikena nambah ka penemu kitai enggau dalam agi pasal siti – siti pekara ti deka ditemu kitai. Pia mega kitai melayar internet dikena ngiga penerang ti tau nyukong penerang di deka dikenang kitai ngambi ka buah kenang kitai enda sebubu ngapa tang bisi disukong enggau penerang ti bendar. Ari internet semua penerang tu ulih diambi kitai enggau manah.
Taja pia ukai semua penerang ti bisi ayan ba internet ulih diarap ka kitai magang. Kitai enda tau nerima penerang ti ayan dia enggau seratus peratus pengarap kitai. Nya alai kitai mesti nemu ni bagi penerang ti tau diguna. Kitai enggai nyadi penyukong sereta ngerembai ka penerang ti enda betul ngagai orang bukai berindik ari kitai ti tetemu ka penerang ti salah nya tadi. Nya alai kitai patut nemu pemendar penerang ti diterima kitai ngambi ka kitai enda kena penusah dudi ari. Kelebih agi, kitai enggai enda nemu diri tau kena penusah ari pekara ti bansa tu.
Siti ari cara kitai nemu penerang ti ayan dia bisi diguna ianya penerang ti datai ari website ti bisi kredibiliti. Antara website ti bisi kredibiliti ianya baka Google.com, Yahoo.com, Amazon.com, Wikipedia.com, Pcworld.com enggau eHow.com. Pia mega penerang ari Ezine.com ulih diarap kitai laban penerang dia ditapis orang ti nyadi moderator website tu tadi.
Nya alai enti kitai ngiga penerang pasal pekara ti deka ditemu kitai, kitai tau muka website tu dulu lalu giga penerang ti deka digiga kitai dalam website ti udah dipadah ka aku dulu tadi. Kadang- kadang penerang ti digiga kitai enda maioh ayan tauka nadai ayan sekali. Enti bakatu, kitai tau ngiga penerang ari website bukai. Enti ulih giga penerang ari enda kurang ari 10 iti website ti bukai lalu banding ka semua penerang dia tadi. Ari nya kitai bulih siti genturung penerang ti sama nerang ka pekara ti deka ditemu kitai.
Tentu meh maioh penerang tu nyau deka nerang ka pekara ti sama. Nya alai enti bisi penerang ti becanggah enggau penerang maioh ti bukai, penerang tu tau dikumbai kitai penerang ti enda tentu betul. Kitai mega tau enda iboh ka penerang ti bansa tu.
Kitai mega patu berati ka penerang ti disukong enggau contoh tauka data ti betul. Enti penerang nya enda disukong enggau data tauka contoh ti betul, penerang nya tadi enda tegap lalu tau dikelaung ka kitai. Ari nya kitai nemu penerang tu enda tentu ulih diguna.
Tu siti ari cara kitai nyaga pengelikun kitai melayar internet, kelebih agi bakani kitai ulih milih penerang ti betul.
Bisi mega website ti ngada ka pop-up ianya window page ti mit ti bisi ngundan iklan. Pop-up tu bisi maioh macam tuju. Bisi nya tuju ti manah sereta bisi mega tuju ti enda manah. Bisi pop-up tu ngumpan kitai klik ba link ti bisi dia lalu mai kitai ngaga webpage ti bukai. Bisi mega pop –up tu ngundan spyware dipindah ka ngagai computer kitai lalu ngumpul penerang dalam computer kitai. Udah nya spyware tu ngirum ka penerang pasal computer kitai ngagai computer orang ti bempu spyware tu tadi. Bisi mega pop – up tu ngundan virus computer ti tau ngerusak computer kitai.
Nya alai enti ulih anang peduli ka pop – up tu. Anang ulih diumpan enggau maioh macam semaia ti bula. Antara semaia ti bula nya ia madah ka kitai bisi bulih perais. Pekara ti bansa tu tusah bendar dipecaya ka kitai. Pia mega manah agi enti kitai ngalih ngagai website bukai. Website ti meruan jarang ngada ka pop –up ba webpage sida laban sida ia nemu cara ti bansa tu enda tentu dikerindu ka maioh orang.
Bisi mega website ti enda tentu manah dipeda kitai kelebih agi bala anak kitai. Website ti bansa tu sigi maioh bendar diatu lalu majak nambah genap hari. Enda iboh aku ngenang enggau nyentok reti website ti ko aku nya tadi. Website ti bansa tu sigi nadai pulai ka pemanah ka kitai. Ia ukai semina tau ngerusak runding kitai engau kitai sebilik aja. Ia mega masau jam kitai lalu ngelepas ka peluang kitai dalam pengawa dagang internet.
Siti ari cara kitai nyeliah ka website ti bansa tu ianya ngena cara engkah komputer kitai ba tempat ti tebuka baka bilik besai rumah kitai. Ngena cara tu kitai ulih meda webpage ti dilayar anak kitai. Pia mega kitai empu enda tekuing ati deka muka webpage ti enda manah laban skrin computer kitai ulih dipeda kitai sebilik ti bukai. Nya alai kurang agi penguji kitai ti deka muka website tauka webpage ti bansa tu. Webpage serta website ti enda manah tu mega tau ngasoh kitai gian deka meda website nya belama. Ari nya tadi rugi bendar kitai laban enda ulih ngena peluang bisi perengka serta pemansang ICT pulai ka penguntung kitai kelebih agi dalam pengawa dagang internet.
Penutup
Peninga ti dipebasa,
Penemu pengelikun internet sigi patut dikembuan kitai. Tu siti ari penemu ti asas serta patut diibun lalu dikerembai ka ngagai bala kaban kitai. Kesatu, kitai enggai ka enda nemu diri diumpan orang ngujung ka kitai ulih kena penusah. Kedua, kitai enggai kelalu takut ngena internet laban ti enda nemu bakani penusah tau nuntung kitai.
Pengelikun ngelayar internet patut ditemu kitai. Kitai patut ulih berati ka ni website ti ngundan penerang ti beguna ba kitai. Kitai mega patut ulih milih penerang ti deka diambi sereta dikena kitai nambah ka penerang pasal pekara ti deka dikenang kitai.
Pia mega penguji ti datai ari website ti enda manah mega maioh. Kitai patut engkah computer kitai ba tempat ti mudah dipeda baka ba bilik besai, lalu skrin computer nya enda lindung ari dipeda kitai ngambi ka kitai tauka bala kitai sebilik ti bukai enda tekuing ati deka muka website ti enda manah tu.
Aum sereta pekat diri sebilik mega beguna bendar dikena nagang penusah ari pengingin ngena internet meda serta melayar website tauka webpage ti enda manah. Anang enda madah serta nerang ngagai bala anak kitai tuju kitai ngada ka internet ba rumah kitai. Anang enggai ngerara enti sida ia bisi muka website ti enda manah tit au ngerugi sida ia. Bisi meh software ti tau nagang website ti enda manah tu dipeda, tang makin sehari, webswite ti bansa tu makin landik nyeliah ka sistem pengelikun ti bisi. Nadai lebih ari runding kitai ti betul ti ulih nagang pekara bansa tu nyadi. Software ti bisi diada ka semina ulih mantu aja tang runding ti betul nya meh nentu ka penguntung kitai dalam nguna internet enggau manah.
Ba Tusun program ti deka datai aku deka mai peninga ngenang pasal pengelikun ngena email. Tu mega penting bendar ditemu kitai ngambi ka kitai ulih berati ka pekara tu lalu enda ngereja pengawa ti tau ngerugi kitai leboh ti ngena email enda ngira public email tauka private email.
Kena nutup randau ICT kitai ba Tusun 62 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.
Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.
Enggau nya, mupok aku. Terima kasih.
No comments:
Post a Comment