Tusun 19 - Dagang Internet – Ngaga Information Products

Terubah ia aku meri tabi basa ngagai peninga.

Selamat kitai begulai baru dalam program Randau ICT. Saritu tu Randau ICT kitai ba Tusun 19. Kita begulai enggau aku, Kassim Jeritan ngenang pekara ICT.

Ba program tu kitai nyambung randau kitai ka bakani kitai ulih ngereja pengawa dagang internet.

Dalam program ba Tusun 18 nyin kemari kitai ngenang bakani kitai ulih ngepun ka dagang internet ngelaku ka barang ti enda ulih dipegai, ianya intangible product kitai empu. Barang tu nyamai agi dikumbai kitai information products.

Diatu kitai nambah ka penerang kitai dalam pekara ICT ngenang bakani kitai ulih ngaga information product kitai ti tau dijual ba internet.

Peninga tentu deka nemu bakani kitai deka ngada ka barang ti deka dijual. Saritu kitai sama berandau ka peluang alai kitai ulih ngaga information products kitai.

Nulis Pekara Ti Dikerindu Ka Nuan

Tu siti ari peluang dagang ti pemadu besai dalam dagang internet. Kitai bekunsi penemu ka pekara ti dikerindu ka kitai enggau orang bukai. Orang ti sama bisi pengerindu enggau kitai bisi peluang deka meli barang kitai. Contoh:- Enti kitai rindu nanam sereta ngintu bungai orkid, kitai tau nulis pasal pengerindu ka bunga orkid kitai dalam ebook. Laban kitai bisi ati rindu ka bungai orkid, kitai tentu nadai penanggul ngiga penerang pasal bungai orkid. Kitai ulih ngambar bungai orkid kitai lalu bekunsi ka cara ngintu bungai orkid kitai. Baja ti bakani ngasoh curak bungai orkid nya tadi manah agi. Penerang ti bakatu tau bendar narit ati orang meli ebook kitai.

Ajar Orang Tuai

Kitai tentu ingat ka apai indai tauka aki ini kitai bisi ngajar kitai penemu. Sida nyangka bisi ngajar petua, resepi turun temurun, ubat tradisi, jako perangsang pengidup tauka pengerawang ati. Bakani utai tu tau nyadi ka bekal sereta lalau dalam pengidup kitai. Semua tu tau ditulis dalam ebook lalu dijual kitai. Enti enda ditulis sereta dikerembai ka, sayau ga penerang tu tekubur nitih ka orang tuai.

Kitai mega tau nyidi cerita lama lalu gaga ka ebook. Tu nyadi ka keresa kitai dudi ari, ulih dijual sereta dikerembai ka ngagai anak uchu ichit kitai.

Bakani Kitai Ngajar Anak Kitai

Setiap apai indai bisi cara kediri empu ngajar anak sida. Tentu meh kitai bisi cara ti ulih dikunsi enggau orang bukai bakani kitai nupi sereta ngajar anak kitai. Tu manah bendar nyadi ka penerang ngagai apai indai ti bukai kelebih agi enti anak kitai mujur dalam pengidup sida. Anang enda bekunsi ka penemu. Tulis penerang kitai dalam eBook lalu jual dalam internet. Maioh apai indai beguna ka penerang ti bansa tu, kelebih agi apai indai ti biak. Nya alai bala aya, kunsi penemu kita.

Adat Main Asal Bansa Kitai

Tentu peninga bisi nemu sekeda adat main asal bansa kitai. Ambi ka contoh, pangka gasing. Kitai tau nulis penerang pasal pangka gasing. Sejarah ia, perengka ti diguna, cara bemain serta undang2 main. Bakani nentu ka orang ti menang tauka ia ti alah. Tulis semua penerang tu dalam ebook kitai lalu tau dijual.
Bakani adat bumai taun? Tentu mega maioh orang deka nemu pekara tu sereta sanggup meli ebook kitai.
Penerang pasal adat main asal kitai tau ngerembai ka pengawa dagang temuai ba menoa kitai.

Jako Kitai Iban

Maioh bendar orang ngiga penerang pasal jako bansa bukai. Tebal agi sida tu temuai ti deka datai ngagai menua nya. Ambi ka banding, sebedau nemuai ngagai menua kitai, temuai ari menua luar tentu meh deka ngiga penerang pasal menua kitai dulu. Bisi mega sida deka belajar jako bansa kitai ngambi ka sida nyamai agi leboh diau di menua kitai lalu ulih belajar maioh pekara pasal bansa kitai enggau adapt asal kitai.

Kitai tau ngaga ebook pasal bakani belajar jako iban, tauka jako Bidayuh, tauka jako kayan. Enti kitai landik belajar jako bansa bukai, kitai mega ulih bekunsi ka cara kitai belajar suba. Kitai ulih ngerekod bakani kitai ulih nyebut leka jako ngambi ka nyamai agi dikena belajar.

Penutup

Maioh kitai nyangka tusah bendar deka ngaga information products. Kitai mega bisi nangi takut ka information product kitai enda laku. Peninga, kitai enda nemu bisi ka enda orang deka meli barang kitai, tang kitai nemu diatu bisi 1.4 billions orang ngena internet dalam dunya tu. Tentu meh bisi peluang kitai nyual barang kitai.

Kitai nyambung randau kitai pasal bakani kitai ulih ngereja dagang internet ngenang cara ti ulih dikena kitai ba program ti deka datai.

Kena nutup randau ICT kitai ba Tusun 19 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka forum alai kitai berandau ba www.kassimjeritan.com/forum alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.