Tusun 17 - Bakani ngepun ka Dagang internet (Bagi 2)

Selamat tengah hari. Sekali agi aku meri tabi basa ngagai peninga maioh.

Selamat kitai begulai baru dalam program Randau ICT. Saritu tu Randau ICT kitai ba Tusun 17. Kita begulai enggau aku, Kassim Jeritan ngenang pekara ICT.

Ba program tu kitai nyambung randau kitai ka bakani kitai ulih ngereja pengawa dagang internet.

Dalam program ba Tusun 16 nyin kemari kitai ngenang bakani kitai ulih ngepun ka dagang internet enti kitai bisi barang kitai empu.

Ba program ka sekali tu kitai sama berati ka bakani kitai ulih sama besemekih dalam dagang internet taja pan kitai nadai barang kitai empu.

Munyi ti udah dipadah aku suba, dagang internet ulih dikereja kitai ngena maioh macam cara. Ukai reti kitai nadai barang dijual kitai enda ulih enggau dalam pengawa tu.

Enti kitai nadai barang diri empu dijual, kitai tau nyual serta ngelaku ka barang orang bukai. Dalam dagang internet pengawa ti bansa tu dikumbai Affilliate Program.

Kompeni baka amazon.com mansang serta besai baka ka ditemu kitai diatu laban maioh bendar orang ngelaku ka barang ti dijual sida. Kompeni tu tebilang nama ketegal nyual bup ngena internet. Tang kompeni tu mega nyual macam barang ti bukai. Sida maju ukai ulih pengelelak sida kediri. Maioh orang ngelaku ka barang sida ngena cara affiliate program.

Semua kitai tu ulih ngelaku ka barang ti bisi dijual kompeni amazon.com. Kitai semina dipinta ngerejister diri nyadi affiliate sida. Udah nya kitai diberi siti link dikena kitai ba website kitai. Link tu mega tau semina dikena kitai ngena email.

Peninga tentu agi ingat leboh aku ngenang pasal email ba Tusun 13 suba. Email ulih dikena kitai bedagang. Tu siti ari cara ia. Ngena link ti diberi nya tadi kitai ulih mai orang ti ngiga barang ngagai barang ti bisi dijual amazon.com. Enti orang nya nyadi meli barang ba amazon.com, kitai lalu nerima komisyen kitai. Enti ia meli maia bukai, enda meli tekalanya, amazon.com ulih nyidi penatai orang ti meli nya tadi datai ari website kitai. Ngena cara nya pan kitai agi ulih nerima komisyen.

Diatu maioh bendar kompeni ngada ka cara dagang ti bansa tu. Bisi kompeni tu manah lalu ngamat ka semaia sida ti deka mayar komisyen kitai. Bisi mega kompeni tu enda ngamat ka semaia sida. Nya alai perati ka enggau manah. Anang enda nyidi latar belakang kompeni ti deka alai kitai ngelaku ka barang. Ingat peninga, giga penerang pasal kompeni tu ngena internet baka ti udah dikenang aku ba Tusun 10 suba. Enggai lagi, barang dah laku, komisyen kitai enda dibayar. Rugi ga pengelelak kitai.

Kelimpah ari ngena cara affiliate program, peninga mega tau nguji ngelaku ka barang ti dijual ngena cara ti dikumbai dropshipper. Affiliate program mayar komisyen tetap ti udah disemaia. Dropshipper, nuan tau ngeletak rega barang kediri empu.

Dropshipper tu baka tu: Bisi kompeni meli barang ngena cara pukal, ianya meli maioh sekali. Kompeni ti bansa tu nyimpan barang ba gudang sida ba siti tempat. Selalu ia gudang sida tu enda jauh ari penyangkai kapal tauka airport. Penau sida ia nyual barang begantung ba orang ti ngelaku ka barang sida ngena internet. Nuan ngerejister diri ba kompeni tu baka ka nyadi ejen. Selalu ia kompeni tu bisi minta nuan mayar registration fee. Kebuah pia sida ia bisi rega barang sida ia empu ti enda tau dipeda semua orang. Udah nya nuan ulih muka website sida nya tadi sereta enggau rega barang ti bisi dijual.

Nuan milih ni barang ti deka dijual dalam list nya tadi. Nuan tau mega ngelaku ka semua barang ti bisi, tang ni bisi ari. Maioh barang nya. Nuan ngelaku ka barang nya ngena internet. Tau mega enda iboh ngena internet. Bejual ari rumah ka rumah tau meh. Nuan ngeletak rega barang nya tadi nitih ka nuan empu. Tentu meh rega diletak nuan lebih tinggi ari rega nuan meli ia ari dropshipper company. Enti enda bakanya ukai pengawa dagang ga. Udah nuan nerima bayar ari orang ti meli, nuan lalu ngoder barang nya. Nyau ka semua dropshipper company tu minta nuan mayar sida ia dulu.

Dropshipper company nya lalu ngirum ka barang ti diorder nuan nitih ka address ti diberi nuan. Nuan tau ngena address nuan nyangka nuan deka meresa barang nya dulu. Nuan ulih mega meri address orang ti meli ia ngambi ka barang nya terus dianjung ngagai pembeli nuan. Nuan bulih untung ari beda nuan meli barang nya dibanding enggau rega nuan nyual.
Diatu, maioh kompeni dropshipper dalam internet. Maioh sida nya ulih diarap magang laban sida tu bulih penatai pemisi ngena cara nya.

Penutup
Pengawa dagang internet sigi maioh. Peninga tau nguji ngena cara ti pemadu mudah serta murah ianya masuk affiliate program. Kita tau ngerejister diri enggau amazon.com nyadi affiliate. Udah kita bulih affiliate link, giga barang ti asai ka ulih dijual kita. Maioh barang dalam nya. Udah nya email ngagai bala kaban gambar barang nya tadi. Ni nemu, nyangka bisi bala kaban tekuing ati deka meli barang nya.

Kitai nyambung randau kitai pasal bakani kitai ulih ngereja dagang internet ngenang cara ti ulih dikena kitai ba program ti deka datai.

Kena nutup randau ICT kitai ba Tusun 17 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka forum alai kitai berandau ba www.kassimjeritan.com/forum alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.