Social Icons

twitterfacebookgoogle pluslinkedinrss feedemail

Pages

June 26, 2009

Tusun 54 - Ccleaner

Selamat tengahari serta tabi basa ngagai peninga.

Selamat kita begulai enggau aku Kassim Jeritan dalam program Randau ICT. Saritu program kitai ba Tusun 54.

Kitai ngena komputer enggau maioh macam tuju. Kitai ngena komputer kitai ngaga dokumen ngena words editor baka Microsoft Words. Kitai ngena excel ngaga spreadsheet baka belanja kitai besari- sari. Kitai mega ngena computer ninga lagu. Kitai ngena computer kitai meda gambar. Kitai ngena komputer kitai meda movie. Kitai ngena computer kitai ngiga penerang kitai nengah internet. Kitai ngena computer nyimpan penerang kitai ngambi ka ulih dikena kitai dudi hari. Kitai ngena komputer kitai ngereja pengawa dagang internet.

Dalam sehari purata orang ngena komputer enda kurang ari 2 jam. Enti kitai ngiga penerang nengah internet 2 jam nya enda berasai. Kebuah pia laban kitai ulih penerang ari siti webpage ngagai webpage ti bukai enggau mudah bendar. Nya alai kitai enda berasai udah ngena komputer nyau bejam-jam.

Enti peninga bisi berati ka, makin lama kitai ngena komputer, makin lubah speed komputer kitai. Pekara tu tampak bendar ulih diperati ka kitai enti kitai ngena internet tauka ngereja pengawa ti besangkut paut enggau network. Pekara tu nyadi enda milih komputer kitai rega mar tauka rega murah. Munyi ka kala dikenang aku suba rega komputer tu bepanggai ba speed hard disk enggau peninggi RAM.

Pekara tu nyadi laban genap kali kitai muka webpage, semua data ti besangkut paut enggau webpage nya disimpan dalam komputer kitai dalam file sementara tauka temporary folder . Besai agi file webpage nya tadi maioh agi meh file disimpan dalam file sementara nya tadi. Enti kitai meda video clip, genap kali kitai muka video clip, file ari video clip nya lalu disimpan dalam komputer kitai. Nya alai makin lama makin maioh file disimpan dalam komputer kitai. Tu ngujung ka ruang ti nyimpan data dalam komputer kitai makin penuh.

Data ti disimpan dalam file sementara nya tadi agi disimpan dia. Enti kitai enda muai ia, data nya tadi lalu mengkang diau dia. Kitai empu enda nemu diri akin sehari computer kitai makin penuh. Kadang – kadang komputer kitai baka ka enda response jampat ngagai kitai. Enti kitai nguji muka webpage bukai ia enda ulih muka webpage ti baru nya enggau jampat. Pekara tu mega selalu dikumbai kitai hang.

Kebendar ia peninga, pekara tu enda ulih dikenggai ka kitai. Semua computer sigi bakanya. Enti kitai muka webpage, komputer kitai nya tadi mindah ka data baka ka ngurut tauka nginsap data ari server. Udah abis data ti diguna kena muka webpage nya tadi dipindah ka ngagai komputer kitai baru webpage nya ulih ayan dipeda kitai. Pekara tu nyadi enggau jampat nitih ka pemesai kapasiti hard disk dalam komputer kitai. Nya alai makin lama data dalam komputer kitai betimbun nyadi makin maioh ngujung ka hard disk kitai nyau penuh lalu komputer kitai makin lama makin lubah dikena kitai serta mega ngujung ka ia hang tauka jam.

Nya alai kitai beguna ka perengka ti ulih dikena kitai muai data ti disimpan dalam temporary folder nya tadi ngambi ka data nya tadi enda menuh ka computer kitai. Taja pia kitai enggai muai data bukai ti agi diguna kitai. Tambah mega data dalam temporary folder nya tadi jarang bendar agi diguna kitai. Enti kitai deka ngingat ka webpage ti udah dipeda kitai, kitai tau ngada ka bookmark ka webpage nya tadi.

Perengka ti diguna kitai dikena muai data dalam temporary folder nya tadi dikumbai orang Cleaning Application softwares. Software ti bansa tu maioh diada ka dalam internet. Bisi nya bebayar serta mega bisi nya free.

Siti ari Cleaning Application ti enda bebayar ianya Ccleaner. Ia siti ari software ti enda tau enda bisi dalam computer kitai. Ccleaner tu ulih diambi kitai ari website www.cnet.com. Enti kitai muka website tu kitai enda lalu tetemu ka Ccleaner software tu laban website cnet.com tu mega maioh nyendia ka software bukai. Nya alai ba search Box bisi lambang kanta dalam kotak merah, kitai naip Ccleaner. Udah nya result page nya tadi ulih dipeda kitai. Kitai lalu click ba link download Ccleaner. Udah nya kitai dibai ngagai Button download Now. Kitai lalu klik ba button nya. Software nya lalu dipindah ka ngagai computer kitai. Udah nya kitai semina nitih ka atur ti dipadah ka dia alai kitai install software nya baka kitai ti install software bukai mega dalam computer kitai.

Udah kitai install software Ccleaner nya tadi kitai ulih meda lambang Ccleaner nya ba skrin computer kitai. Enti kitai klik ba lambang nya tadi kitai ulih meda window Ccleaner nya ayan ba skrin computer kitai. Dua iti pekara ulih dikereja kitai ianya Analyse enggau Run Cleaner. Enti kitai klik ba Analyse Button, software tu lalu meresa berapa maioh temporary data bisi dalam computer kitai. Enti kitai klik ba Run Cleaner, software tu lalu madam ka semua temporary data ti bisi dalam computer kitai.

Nya alai udah kitai klik ba Button Run Cleaner computer kitai patut berasai laju baru. Ni enda deh, semua sampah dalam nya udah dibuai kitai magang.

Penutup

Nya alai peninga,

Makin sehari komputer kitai makin lubah. Siti ari kebuah ia ianya laban hard disk dalam computer kitai penuh laban data ti diambi kitai ari internet leboh kitai ngena computer kitai melayar internet. Enti kitai ngasai ka computer kitai nyau lubah anang guai berumban deka meli computer baru.

Siti ari software ti ulih mantu kitai mulai ka pengelaju komputer kitai ianya Ccleaner. Tambah mega software tu ulih diambi kitai nengah internet enggau enda bebayar. Ia mega selamat dikena kitai laban ia diada ka Cnet.com, siti ari website ti ngada ka software ti enda bebayar ti udah lama tebilang sereta dipecaya ka maioh orang dalam dunya tu.

Taja pia kitai enda ulih semina begantung ba Ccleaner tu aja dikena mulai ka pengelaju komputer kitai ngagai pengelaju ti asal. Cara kitai nyimpan file serta mega data ngena cara ti betul ulih ngurang ka komputer kitai ari ka penuh laban file ti enda diguna.

Maioh mega pekara bukai ulih ngasoh ruang dalam hard disk komputer kitai tau penuh tang enda balat baka data ti diambi kitai enggau enda ditemu kitai leboh kitai ngelayar internet. Nya alai komputer kitai mesti bisi Ccleaner dikena kitai muai data ti enda diguna kitai ti disimpan secara automatik dalam komputer kitai. Kitai mega patut ngena software tu sekali sehari ngambi ka data dalam temporary folder enda menuh ka ruang dalam hard disk dalam komputer kitai.

Peninga ti dipebasa,

Kena nutup randau ICT kitai ba Tusun 54 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

No comments:

 

Sample text

Sample Text

Sample Text