Tusun 13 - Email

Selamat tengah hari. Terubah ia aku meri tabi basa ngagai kita peninga.

Selamat kitai begulai baru dalam program Randau ICT. Saritu tu Randau ICT kitai ba Tusun 13. Kita begulai enggau aku, Kassim Jeritan ngenang pekara ICT.

Ba program tu kitai berandau ka bakani kitai ulih ngena email.

Kitai udah berandau ka tuju Program Randau ICT ti kedua ianya ngena ICT dalam pengidup kitai. Tiga minggu ti udah kitai berandau pasal bakani deka ngiga penerang ngena internet sereta ngena internet bebayar ka bill kitai ti datai ninting bulan.

Saritu kitai berandau ka siti agi guna internet ti ulih ngaga pengidup kitai nyamai agi ianya bakani kitai ulih ngena email.

Email tu nama singkat bagi “electronic mail”. Ia sama baka surat ti dikirum tauka diterima kitai ngena pos ofis semina ia dikereja kitai ngena internet.

Email tu lama udah dikena. Bepun ari asal internet suba email sigi udah dikena orang. Enti kitai sama ingat ka kenang aku pasal asal internet ba program kitai Tusun 4, guna internet maia nya suba sigi dikena ngirum email.

Diatu maioh orang dah bisi email account. Pia mega maioh orang muka email sida setiap ari. Munyi ti udah dipadah aku tadi, muka email sama baka kitai muka peti surat ba depan rumah kitai. Semina pengawa tu dikereja ba computer.

Bisi dua macam email account ianya public email enggau private email.
Public email tu ianya email ti ulih dikena semua orang. Public email tu baka email ba ujung a bisi @yahoo.com ti disedia ka company YAHOO!, @gmail.com ianya email ti disedia ka Google enggau @hotmail.com ti disedia ka Microsoft. Semua orang ulih ngerejista email account ditu enggau enda bebayar.

Private email tu ianya email ti ngena ujung ia enggau nama bukai. Selalu ia nama ba ujung nya nama kompeni tauka nama website. Enda semua orang ulih rejista ngena email tu. Ambi ka contoh @streamyx.com semina dikena orang ti ngena steramyx service aja.

Ngerejista email account ba public email diatu enda bebayar. Tambah mega semua public email provider ti dipadah ka aku nya tadi nadai nyekat pemaioh email account ti ulih dikena kitai. Pemesai fail ba siti account mega nadai limit. Taja pia, cukup meh kitai ngerejista 2 iti account aja. Regista maioh nadai meh guna, semina masau jam kitai muka semua email nya tadi.
Enti ulih kitai muka dua iti account ba provider ti enda sama. Ambi ka contoh, siti ngena @yahoo.com lalu siti agi ngena @gmail.com. Kebuah pia laban kadang – kadang kitai dipinta meri back – up email address.

Kitai ngena email dikena betulis surat enggau pangan diri. Email tu ulih dikirum ngagai serata dunya asal bisi internet. Ia jampat datai, semina beberapa second aja. Kitai mega ulih nganjung attachment ngena email baka gambar. Pia mega maioh fail bukai ulih sama dikirum ka ngena email.

Email tu manah dikena betesau pangan diri. Ambi ka contoh kami ba Lions Club, kami bekangau meeting ngena email. Minute meeting dikirum ka sama ngena surat tesau nya tadi. Cara tu jauh jimat kos sereta enda masau ari.

Enti kitai ngena email, anang enda bejimat. Tentu ka password kitai enda ditemu orang bukai. Password tu ianya jako lalai ti dikena kitai muka account email kitai. Enti password kitai ditemu orang bukai, orang nya ulih ngena email kitai. Enti orang nya ngena email kitai enggau tuju ti manah nadai ngawa, tang penusah deka datai nuntung kitai enti ia ngena email kitai ngena tuju ti jai, baka ngerembai ka jako petenah.

Pia mega anang meri email kita ngagai orang sebarang. Dalam internet, maioh website minta email kita sebedau kita ulih muka webpage sida. Tentu ka kitai nemu tuju website ti bansa tu. Bisi meh website tu manah tuju tang bisi mega ngembuan tuju ti bukai. Kebuah pia bisi orang bejual ka email address, enggai ka email address kita kena jual ngapa. Enti email address kitai kena jual, agi meh kitai ulih ngena ia tang maioh macam email diterima kitai udah nya. Email ti bakatu dikumbai “Spam” tauka “junk mail”.

Email mega ulih dikena kitai bedagang ka barang kitai. Diatu maioh orang bulih penatai pemisi ngena cara ngirum ka email ngagai orang ti dipelaba ka deka meli. Pekara tu deka dikenang aku leboh kitai datai ba tuju Randau ICT kitai ti ketiga ila, ianya nyadi ka ICT pun penatai pemisi kitai.

Private email tu maioh agi ka tuju pengawa dagang. Cara kitai ngerejista private email mega jauh lain agi. Pekara tu deka mega dikenang kitai leboh kitai berandau ka pengawa dagang ngena internet ila.

Penutup

Email tu siti cara kitai bekirum sereta nerima penerang enggau pangan diri. Ia siti cara ti mudah sereta jampat dikena kitai. Enti ulih saritu enti peninga bedau bisi email account, tau nguji muka siti email account ba google tauka Yahoo! Enti kita ngena Google.com kita click ba “Gmail” dah nya click ba “sign up”.Titih ka semua “step by step instruction” ti bisi dia. Enti kita ngena Yahoo.com kita click ba “mail” dah nya clik ba “sign up”. Ari nya kita semina titih ka “step by step instruction” ti bisi dia. Dah nya enti kita nadai nemu ka ngirum ngagai sapa, kirum ka email kita ngagai aku ba kassimjeritan@yahoo.com . Aku gerenti malas email kita dikena meransang kita peninga ngena ICT dalam pengidup kitai.

Kena nutup randau ICT kitai ba Tusun 13 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog http://kjict.blogspot.com/ alai kita ulih ngenatai ka komen tauka tanya kita. Peninga mega tau email ngagai aku ba kassimjeritan@yahoo.com .

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.