Tusun 53 - Wireless Internet

Selamat tengahari serta tabi basa ngagai peninga.

Selamat kita begulai enggau aku Kassim Jeritan dalam program Randau ICT. Saritu program kitai ba Tusun 53.

Saritu kitai ngenang siti agi pekara ICT ianya Wireless Internet. Dalam Program kitai ba Tusun 9 suba aku kala ngenang wireless internet leboh aku ngenang Internet Provider ti bisi ba menua kitai.

Saritu aku deka bekunsi enggau peninga enggau silik agi pasal wireless internet ti bisi di menua kitai ditu.

Nitih ka nama ia, wireless internet tu ianya internet ti ulih dikena kitai enggau enda iboh besambung ka wayar. Internet disambung ngagai komputer kitai ngena wireless modem ti disambung nengah USB Port.

Wireless internet tu makin dikerindu ka orang laban kitai ulih ngena internet ba maioh macam endor enti dibanding ka enggau wired internet. Komputer kitai ulih dibai kin kitu leboh kitai ngena internet. Nya alai wireless internet tu jampat bendar mansang.

Wireless internet tu bisi maioh macam bansa nitih ka pemaioh file ti ulih dipindah ka dalam sesecond. Maioh agi file ulih dipindah ka sekali mar agi meh rega pakej internet nya tadi.
Bansa wireless internet ti terubah ia ianya GPRS, tauka nama singkat General Packet Radio System. System internet tu mindah ka data nengah GSM network, ianya system ti sama ti mancar signal handphone kitai. Reti ia enti bisi signal GSM tauka signal handphone, kitai ulih ngena wireless internet ti dipancar ka dalam system GPRS. Pemaioh data ti dipancar ka ngena system tu 56 kBit/s ngagai 114 kB/s. GPRS selalu mega digelar orang 2.5G ianya generasi kedua dalam teknologi wireless.

Udah nya bala saintis ti ngemaju ka teknologi wireless tu bisi nguji deka ngemanah ka system GPRS laban sida ia pecaya enti GSM udah maioh dikena orang di serata dunya, ungkus ngada ka infrastructure enda kelalu maioh laban infrastructure ti diguna ngada ka wireless internet bansa tu sigi udah bisi. Nya alai sida ia lalu tetemu ka system ti dikumbai EDGE, ianya Enhanced Data Rates for GSM Evaluation. Pemaioh data ti ulih dipindah ka nengah system tu maioh agi ari GPRS ianya manggai ngagai 200kB/s. EDGE tu mega selalu digelar orang 2.75G.
EDGE tu keterubah ia wireless internet Broadband laban system ti ulih mindah ka data lebih ari 200 kB/s tau dikumbai orang Broadband. Enti kitai berati ka endor ti bisi signal GSM ti kuat kitai ulih ngena EDGE dalam system wireless internet kitai. Data ti dipancar ka nengah EDGE berupai laju agi enti disbanding ka enggau GPRS.

Siti agi system wireless ti bisi dikena di menua kitai ianya Third Generation of GSM Technologies, UMTS(Universal Mobile Telecomunication System) ti ulih mancar ka data enggau maioh agi dalam sesecond. Pemaioh data ti ulih dipancar ka ngena system tu bisi manggai 384kB/s. Taja pia system tu beguna ka infrastructure ti baru, enda ulih bekunsi ka infrastructure ti ngena GSM. Nya alai enti kitai berati ka, enda semua endor ti ulih nerima signal GSM tauka mudah agi disebut kitai signal handphone, bisi signal 3G. Kebuah pia laban system tu enda sama. Enti GPRS tu ngena Packet Switching, 3G tu ngena Circuit Switching, nya alai data ulih dipindah ka maioh agi dalam sesecond.

Pemansang dalam ICT ti balat bendar ngerembai beguna ka data dipindah ka enggau jampat agi. File dalam siti siti webpage mega nyau majak besai baka file video enggau Audio. File gambar ti tinggi resolution mega beguna ka file ti besai. Nya alai sistem ti ulih mindah ka maioh agi data dalam sesecond makin dikerindu ka orang. Tentu meh rega sistem tu mar agi enti dibanding ka enggau sistem ti ulih mindah ka data enggau maioh agi. Nya alai bala saintis ngemansang ka Circuit Switching enggau cakah agi. Sida ia lalu tetemu ka system ti dikumbai High Speed Downlink Packet Access tauka HSDPA tauka lebih agi dikelala orang 3.5G. Ia ulih mindah ka data ari 1000 kB/s tauka 1MB/s ngagai 14MB/s.

Diatu siti agi system ti baru bendar sereta makin dikerindu ka orang ianya Worldwide Interoperability for Microwave Access tauka WiMAX. Ia ulih mindah ka data manggai ngagai 3MB/s sereta ulih mungkur 70km radius ari siti pemancar. Taja pia enti kitai semak enggau pemancar data ulih dipindah ka manggai ngagai 10MB/s.

Sistem WiMAX tu terubah ia diuji ba mensia maioh leboh penusah Tsunami di Acheh dalam taun 2004 suba. Maya nya semua infrastructure ancur ditaban ka umbak besai. Orang ti ngereja pengawa mantu orang ti tasah laban ombak tsunami tu enda ulih berandau enggau pangan diri laban perengka baka telefon enggau telefon bincing enda ulih dikena agi. Nya alai Sida ia lalu ngena WiMAX ti ulih mungkur genturung menua ti besai. Ari nya sida ia ulih ngena internet enggau VoIP baka Skype dalam pengawa sida ia mantu beratus ribu orang ti tasah laban tsunami nya tadi.

Di menua kitai Malaysia WiMAX udah dikena 2 taun ti udah. Sistem tu mega baru datai sebulan dua tu di Kuching ditu.

Nya alai peninga,

Kitai berandau ka Wireless Internet saritu dikena nambah ka penemu kitai dalam ICT. Saritu kitai nemu maioh bansa wireless internet ti bisi disedia ka ba menua kitai. Rega macam bansa service ti bisi disedia ka mega enda sama. Enti ngena GPRS enggau EDGE kitai dipinta mayar nitih ka pengelama kitai ngena ia tauka nitih ka pemaioh data ti dipindah ka kitai.

Enti kitai ngena 3G rega ia lebih kurang RM60 sebulan. Enti kitai ngena 3.5G rega ia semak RM100 sebulan. Diatu enti kitai ngena WiMAX, rega ia antara RM138 ngagai RM1,000 sebulan nitih ka pakej ti dipilih kitai.

Ari nya kitai ulih milih ni bansa wireless internet ti sanggup sereta ulih ditangkup kitai nitih ka guna internet ba kitai. Enti kitai deka besemekih dalam pengawa dagang internet kitai patut bisi wireless internet ngena system 3.5G tauka tinggi agi baka WiMAX. Taja pia enti dagang internet kitai baru bepun kitai tau belabuh ngena 3G aja.

Wireless internet ti dikenang aku tadi ianya wireless internet ti ngena komputer enggau wireless modem, ukai wireless internet ngena handphone. Enti ngena handphone speed ia lain agi. Pengawa ti ulih dikereja kitai ngena 3G handphone mega enda sama enggau pengawa ti ulih dikereja kitai ngena komputer.

Peninga ti dipebasa,

Kena nutup randau ICT kitai ba Tusun 53 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.