Social Icons

twitterfacebookgoogle pluslinkedinrss feedemail

Pages

February 24, 2009

Tusun 21 - Dagang Internet – Ngaga Information Products

Terubah ia aku meri tabi basa ngagai peninga.

Selamat kitai begulai baru dalam program Randau ICT. Saritu tu Randau ICT kitai ba Tusun 21. Kita begulai enggau aku, Kassim Jeritan ngenang pekara ICT.

Ba program tu kitai nyambung randau kitai ka bakani kitai ulih ngereja pengawa dagang internet.

Dalam program ba Tusun 19 enggau Tusun 20 nyin kemari kitai ngenang bakani kitai ulih ngaga information product kitai empu.

Dalam 2 program nya suba aku selalu bendar nyebut ebook. Reti nya enti kitai deka besemekih dalam pengawa bejual ka information products,kitai mesti nemu tauka landik nulis. Pia mega information products tu maioh agi ditulis dalam English.

Kati enti orang ti enda tentu landik nulis, lebih agi enda landik nulis dalam English? Tentu meh tu nyadi ka penangul sereta mai ati kitai tendur dalam ngaga information product kitai empu.

Peninga, siti pekara patut ditemu kitai, idup di dunya tu, nadai kitai ulih ngereja semua pekara. Maioh meh pekara ti enda ditemu kitai. Taja pia dunya tu mega enda suntok orang ti nemu perkara ti enda ditemu kitai. Kitai enda ulih lari ari pekara tu. Nya alai siti ari guna internet ianya nyadi ka jambatan nyambung kitai ti bisi idea enggau orang ti bisi pengelandik.

Kitai nemu ngena komputer tang enda tentu landik nulis kelebih agi ngena English. Uji giga orang ti pencen ari nyadi pengajar. English sida tu “Boleh Tahan“ laban sida tu diajar ngena system British kelia.

Uji Tanya sida ia enti ulih bekerjasama enggau kitai nulih ebook kitai. Kitai mega tau nulis semua isi ebook nya tadi lalu minta tulong sida check tulis kitai nya. Dah nya sida tau mantu kitai ngemanah ka isi ebook kitai nya tadi. Anang enda meri tudah tuai anak belanja mimit ngambi ka ia ransing agi mantu kitai.

Kitai ngena cara ti bakatu dikumbai orang leveraging.

Dalam internet maioh mega alai kitai ngiga orang ti ulih nulis ka kitai. Sida tu dikumbai Ghostwriter tauka freelance writer.

Kitai ulih ngiga sida tu ari siti website www. Elance.com. Maioh mega website ti bukai tang elance.com tu antara website ti terubah ia ngada ka service ti bakatu. Sida ia nyadi orang tengah antara kitai enggau penulis. Bala penulis nya mega bisi di serata dunya.

Enti kitai ngiga penulis, kitai ngerejister diri ba elance.com. Udah nya kitai madah ka diri ngiga orang ti nulis ebook kitai. Elance.com lalu mantai ka peminta kitai ba website sida. Udah nya Ghostwriter ti bisi register ba elance.com ulih meda peminta kita nya tadi. Enti sida ngasai ka diri ulih nulis ka kitai sida lalu madah ka berapa rega pengawa sida nya tadi lalu berapa lama pengawa sida nya ulih tembu.

Enti kitai setuju enggau freelancer nya tadi kitai lalu sama dipetemu ka dalam website elance.com. Dia kitai sama berunding ka rega sampai setuju. Udah nya kitai sama berunding ka bakani kitai deka mayar freelancer nya tadi. Kitai mega lalu meri rangka kerja, berapa lambar serta mega penerang ti bukai ti cukup dikena freelancer nya tadi nulis ebook ka kitai.

Maioh freelancer deka minta dulu deposit sebedau sida ulih belaboh ngereja pengawa sida. Tentu ka elance.com nyadi orang tengah dalam pekara tu enggai ka kitai kena tipu. Nya alai penting bendar kitai bisi website ti ulih diarap ka kitai baka elance.com.

Udah ebook kitai tembu ditulis, freelancer nya tadi lalu email ngagai kitai draft ia. Enti kitai setuju lalu puas ati enggau pengawa ia tadi, kitai tau mayar penuh penyampau ti udah disetuju kitai.

Diatu ebook nya udah tembu lalu diempu kitai 100%. Nama kitai nyadi nama penulis ebook nya.
Cara bakatu jampat laban freelancer nya sigi orang ti landik dalam pengawa nulis. Pia mega enti kitai beguna ka grafik kitai mega tau ngupah freelancer ngaga grafik ka kitai.

Penutup

Dalam dunya internet maioh pekara ti ulih dikereja kitai, ukai ketegal kitai landik ngereja tang ketegal kitai nemu sapa ti landik ngereja lalu ngena pengelandik sida ngaga barang ti ulih dijual kitai dalam internet.

Kena nutup randau ICT kitai ba Tusun 17 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka forum alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

1 comment:

Anonymous said...

Nama randau ict na oleh di peda ba website "Randau ICT" agi diatu?
Udah sampai tusun ke berapa nya diatu?

 

Sample text

Sample Text

Sample Text