www.sarawak.gov.my

Selamat tengahari serta tabi basa ngagai peninga.

Selamat kita begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 39.

Belaboh ari bulan 2 suba nyentok ka ngagai bulan 4 nyin kemari kitai bendar berandau ka dagang internet. Pelaba ka aku nyau silik bendar aku mai peninga ngenang dagang internet, kelebih agi ngada ka pengawa dagang internet kitai empu.

Maioh meh komen ari peninga nemu nya ari blog kjict.blogspot.com, bisi mega nengah blog aku empu ba www.kassimjeritan.com , ari email ti diterima aku, ari bala kaban ti telefon enggau sms ngagai aku, pia mega ari bala kaban ti bisi betemu enggau aku sama bisi besaup mantai ka penemu besangkut paut enggau program randau ICT kitai.

Endang baka ia, maioh meh komen ti sama ulih pulai ka pemansang program randau ICT kitai. Aruh ia ga, bulan tu udah nyau ka setengah taun program randau ICT kitai udah ditabur ka ba WaiFM.

Ngena peluang tu aku meri besai terima kasih ngagai peninga ti sanggup ngiruh diri nganjong komen pasal program kitai. Bisi nya nyamai dibaca, bisi mega meri komen ti madah ka diri enda tentu setuju enggau pekara ti dikenang aku, pia mega maioh tanya ari peninga di deka nemu enggau dalam agi pekara ti udah dikenang dalam program tu. Pekara baka tu meh manah, munyi ti selalu disebut aku leboh genap kali randau ICT kitai ditabur, randau ICT tu randau kitai. Aku semina nyadi pengatur randau dalam program tu.

Bulan tu aku deka ngelengka ka dulu pasal kenang dagang internet kitai kelebih agi kenang pasal ngaga sereta ngadu ka website kitai. Kitai pulai baru ngagai dua iti tuju program Randau ICT kitai ianya nemu ICT enggau nguna ICT dalam pengidup kitai.

Saritu aku deka ngenang siti website ti enda tau enda selalu dipeda kitai ianya website rasmi perintah menoa Sarawak.

Website tu ulih dipeda kitai ba Url www.sarawak.gov.my. Enti kitai ingat ka program kitai ba Tusun 6 suba website tu kala dikenang aku. Tang maya nya suba kenang aku dia enda silik baka ka deka dikenang aku saritu. Kebuah pia laban maya nya suba aku sigi deka ngenang website tu dalam agi ba program ti bukai. Pia mega aku ngarap ka peninga bisi udah meda website nya sebedau aku ngenang ia enggau silik agi baka ka saritu.

Enti kitai berati ka website tu kitai meda extension name ia .gov. Website ti ngena extension .gov tu sigi website rasmi perintah. Enda semua orang ulih ngerejister website ti ngena extension .gov. Enti website nya ngena extension name .gov.my ia website opis perintah menua Malaysia. Enti ia ngena extension .gov.sg website tu ari perintah di Menua Singapre. Enti ia ngena .gov.cn website tu datai ari perintah menua China. Bakanya mega enggau perintah ari menua bukai.

Enti website ngena extension name .gov semua penerang ti ayan sigi datai ari ofis perintah. Penerang ti bisi dia ukai penerang ti sengapa. Penerang ti ayan ditu udah diperati sereta udah dipesetuju ka ofis perintah ti besangkut paut enggau penerang ti ayan dia.

Tu meh siti ari kebuah kitai enda tau enda suah meda sereta berati ka penerang ti ayan ba website ti datai ari ofis perintah baka penerang ti ayan ba website sarawak.gov.my tu.
Enti kitai naip url www.sarawak.gov.my kitai dibai ngagai homepage tauka lambar moa website tu. Enti dibanding ka enggau suratkhabar tauka majalah, homepage tu baka lambar ti terubah tauka lambar kulit. Ia ngayan ka penerang ti bisi dalam website maya nya. Kitai ulih milih ngena English tauka ngena Bahasa Melayu.

Ba lambar homepage kitai ulih meda penerang ti diasai ka ofis perintah beguna bendar ba kitai ba “highlights”. Leboh aku ti bejako ditu website tu ngayan ka penerang bakani kitai ulih bebayar ngena paybillsmalaysia.com. Cara tu mega udah kala dikenang aku dulu suba, saritu ia ayan ba website rasmi perintah menua kitai.

Enti kitai selalu ngabas website tu dia kitai ulih berati ka penerang ti baru tu semampai ditambah enggau penerang ti baru ayan ba “Latest Information”. Penerang ti ayan ditu mega maioh besangkut paut enggau penerang ICT kelebih agi penerang ICT ti besangkut paut enggau perintah menua Sarawak.

Pengawa tauka pengerami ti diatur perintah bisi ayan ba “events”. Ditu kitai ulih nemu nama pengawa besai tauka pengerami ti bisi diatur ba menua kitai. Ingat peninga, enti dia bisi pengerami tauka pengawa besai, dia kitai ulih ngada ka cara ngiga penatai pemisi. Pia mega peluang ti bansa tu ulih dikena kitai ngelaku ka dagang internet kitai.

Enti kitai click ba “Directories” kitai ulih meda penerang pasal ofis ti ngemata ka penusah baka penusah ampuh bah. Enti bisi penusah nyadi di menua kitai, tu siti ari ofis ti patut alai kitai betanya.

Ba “Directories” nya mega kitai ulih nemu address enggau no tel. ofis polis ti bisi di menua kitai belaboh ari ofis besai nyentok ka semua balai polis ti bisi di menua Sarawak. Enti bisi penerang ti bansa tu tentu meh nyamai kitai begiga ka orang ti bekuasa kelebih agi enti bisi pekara ti ngacau pengelikun nyadi.

Pia mega kitai ulih nemu address enggau no tel. ofis pelilih menua. Semua penerang tu bisi ayan ba “Directories” nya magang.

Enti kitai click ba link “About Sarawak” dia kitai dibai ngagai webpage ti madah penerang pandak pasal enua kitai Sarawak. Dia mega bisi kar ti ngayan ka pemesai siti siti bagi menua ti bisi di menua kitai. Contoh ia, bagi menua Kuching bisi 4,560 km2. Bagi menua ti pemadu bisai ianya Kapit bisi 38, 900km2, ianya 8 kali besai agi ari bagi menua Kuching.

Kitai mega ulih meda penerang pasal reti lambang menua kitai baka bendera menua Sarawak, enggau Lambang Burung Kenyalang.

Kitai mega ulih meda penerang pasal bansa ti bisi enggau adat main asal pupu raban bansa ti bisi ba menua kitai.

Kitai mega ulih nemu penerang pasal menua kitai ianya baka pemesai menua, pekara ekanomi enggau social menua kitai sereta mega pun penatai pemisi menua kitai.

Ba subpage infrastructure kitai diberi penerang pasal pemansang jalai raya, padang bilun, enggau cara pengangkut ti bukai mega.

Webpage “Sarawak Government” nerang ka system perintah ti bisi ba menua kitai. Dia kitai nemu bagi perintah baka bala Hakim, Dewan Undangan Negeri enggau Kabinet Menua Sarawak.

Ba webpage “Online Service” kitai ulih meda pengawa ti bisi disedia ka perintah menua Sarawak ti ulih dikereja kitai ngena internet. Ditu kitai ulih mayar bil ngena internet.

Kitai mega ulih minta scholarship dikena mantu anembiak ti nampung pelajar tinggi. Scolarship tu disedia ka Yayasan Sarawak enggau Suruhanjaya Perkhidmatan Awam (SPA) ulih dipinta kitai nengah internet. Cara kitai minta scholarship tu bisi dipadah ka dalam website webpage tu.

Perintah menua Sarawak mega ngada ka alai kitai ngenatai ka serebana ngena “Talikhidmat”. Pengawa tu ulih dikereja kitai ngena internet ari webpage tu mega. Maioh pekara tau dikenatai ka kitai ngagai perintah baka pekara ti enda ngemuas ka ati kitai tau dikenatai ka ngagai perintah nengah webpage tu.

Enti kitai bisi peminta tauka complaint ngagai local council kitai ulih ngena service ti dikumbai e-Request. Ditu kitai ulih ngenatai ka peminta kitai ngagai local authority ti nguasa alai kitai diau. Semua tu dikereja kitai nengah internet, enda iboh datai ngagai ofis local council tu enti kitai nadai ari.

Orang ti ngiga pengawa puang ba perintah ulih ngisi form minta pengawa puang ngena system e-recruitment. Kitai semina ngisi form online lalu ulih dianjung ngena internet mega. Jimat meh kitai, enda ibuh kiruh bekirum ka form ngena pos ofis sereta enda nangi ka form kitai enda datai ba ofis perintah ti dituju kitai.

Maioh pekara ulih dikereja ngena internet diada ka perintah Negeri Sarawak. Dipelaba ka aku maioh mega pekara ti deka ditambah ngambi ka kitai ulih ngena servis tu enggau nyamai agi. Makin lama makin kurang kitai kendang kelut ngagai ofis perintah enti kitai ulih ngereja maioh pengawa ngena internet.

Maioh mega penerang ti bukai baka penerang ti tau diguna orang ti datai ngagai menua kitai, pengawa penatai pemisi dalam menua kitai sereta mega penerang pasal pengawa pelajar di serata negeri Sarawak.

Penutup

Perintah Negeri Sarawak sigi ngemeran ka pemansang dalam ICT. Maioh bendar belanja udah dikena ngada ka infrastructure ICT ba menua kitai Sarawak ditu. Pia mega pemansang ICT sigi siti ari pemansang ti jampat ngerembai. Perintah menua Sarawak ngulu ka kitai ngena ICT nya alai bisi ngada ka Website ba www.Sarawak.gov.my.

Tuju perintah ngada ka website ti bansa tu sigi dikena ngenyamai ka pengidup kitai. Enti pengawa dikereja ngena internet, tentu meh kitai enda masau ari sereta mega masau belanja kundang kelut ngagai ofis perintah. Kitai sama nemu pengawa ti ulih dikereja kitai ngena internet ulih dikereja kitai ari sebarang alai ti bisi internet.

Kena nutup randau ICT kitai ba Tusun 39 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.