Social Icons

twitterfacebookgoogle pluslinkedinrss feedemail

Pages

May 5, 2009

Tusun 40 - www.gov.my

Selamat tengahari serta tabi basa ngagai peninga.

Selamat kita begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 40.

Dalam Randau kitai ba Tusun 39 nyin kemari aku mai peninga sama berati ka website rasmi perintah negeri Sarawak ba www.sarawak.gov.my. Maioh meh pekara sama bai aku perati ka kitai ba website perintah negeri Sarawak kelebih agi pengawa ti ulih dikereja kitai ngena internet.

Saritu kitai ngenang siti agi website ti bisi disedia ka perintah ianya website perintah Menua Malaysia. Website tu mega kala dikenang aku ba pun program Randau ICT kitai ti dulu suba leboh aku sama ngenang pasal website rasmi perintah negeri Sarawak. Maya nya suba aku semina ngelansa aja penerang pasal website tu.

Saritu kitai sama berati ka website tu. Enti ulih kitai sama begiga ka penerang tit tau pulai ka penguntung kitai ari website tu.

Website tu ulih dibuka kitai ba www.gov.my. Url tu ianya address homepage tauka muka depan website tu. Baka website perintah negeri Sarawak, Website tu mega ulih dipeda kitai dalam English tauka Bahasa Melayu. Kitai ulih milih ni ti nyamai dikena kitai.

Maya aku ti muka website tu maioh bendar penerang ti bisi diayan ka ba homepage. Taja pia enda semua penerang ulih ayan dia magang. Nya alai sida ia bisi ngada ka siti ruang dikumbai “search” dikena kitai ngiga genteran jako ti besangkut paut enggau penerang ti deka ditemu kitai.

Pia mega enti kitai enda tetemu ka genteran jako ti nerang ka pekara ti digiga kitai, kitai ulih click ba “Site Map”. Ditu kitai ulih meda list semua webpage ti bisi ba website tu. Ari nya kitai ulih click ba website ti digiga kitai.

Website tu, taja pan maioh penerang diayan, ia ditusun enggau kemas sereta mudah dibaca kitai. Tambah mega ia bisi ngada ka “Site Map” nya alai pengawa begiga ka penerang dalam website tu nyamai bendar dikereja.

Enti kitai berati ka menu ari kiba ka kanan, menu nya bisi dua lapis. Menu tu ianya list pekara ti bisi dalam website nya. Menu ba lapis ti tinggi agi ianya berita ba webpage “News”. Berita tu diambi ari Agensi Berita Nasional tauka Bernama. Berita tu di ada ka genap ari nitih ka penerang ti dikeluar ka Bernama.

Ba webpage“ Event“ kitai ulih meda pengerami tauka pengawa besai ti udah diatur di serata Menua Malaysia. Munyi ti selalu dipesan aku, kitai ulih sama ngiga peluang kelebih agi pengawa dagang internet leboh maya pengawa besai tauka pengerami bisi diatur.

Perintah mega semampai nanya ka penemu rakyat. Ba website tu perintah menua Malaysia bisi ngada ka webpage dikena nanya ka penemu rakyat nengah webpage sida ia ba “Polling”. Enti bisi pekara baru deka diatur ba menua kitai, ditu meh alai perintah besai nanya ka penemu rakyat. Nya alai kitai patut selalu ngabas website tu, nyanka pekara ti ditanya dalam “Polling” tu bisi besangkut paut enggau kitai.

Menu ti penudi ianya “Register” alai kitai ulih ngerejister diri ngambi ka kitai ulih nerima penerang ti baru nengah email kitai. Enti kitai nadai ulih suah ngabas ebsite tu kitai ulih ngerejister diri gambi ka penerang ti diguna kitai ulih dianjung ngagai email address kitai.
Ba menu ari kiba ka kanan ba lapis ti kedua, penerang dibagi ngagai kitai rakyat Malaysia ba webpage “Citizen”. Reti nya penerang ti dituju ngagai kitai Rakyat Malaysia. Tu meh webage ti patut selalu dipeda kitai.

Siti ari penerang ti ulih ditemu kitai dia ianya penerang pasal pengawa pelajar nengah webpage “Education”. Silik bendar penerang dia dipeda aku, ari kindergarden nyentok ngagai kenang pasal pengawa belajar ba Universiti. Enti penerang pasal pengawa pelajar enda cukup ngemuas ka ati kitai, kitai ulih nemu pekara tu enggau silik agi nengah link Kementerian Pelajaran enggau Kementerian Pelajaran tinggi ti sama bisi disedia ka dia.

Siti agi penerang ti ulih ditemu kitai ditu ianya penerang pasal pengereja pengawa ba webpage “Employment”. Dia kitai ulih meda gerah pengawa puang, training ti bisi diatur sereta mega pekara ti besangkut paut enggau pengereja pengawa. Kitai mega sama nemu undang-undang enggau atur perintah ngagai kitai ti pengereja pengawa sereta mega orang ti ngambi kitai bekerja. Pia mega kitai ulih nemu pekara tu enggau silik agi nengah link ngagai ofis menteri ti bekuasa ba pekara pengereja pengawa baka Kementerian Sumber Manusia. Maioh kitai pengerja pengawa enda nemu pekara ti besangkut paut enggau kitai baka pekara undang-undang. Ditu kitai ulih nemu penerang ti bakatu.

Penerang pasal penyaga pengelikun mega bisi dipadah ka ditu nengah webpage “Security And Safety” . Penerang baka cara nyeliah ka diri ari kena penusah ketegal orang ti bisi ngibun ati ti jai bisi dipadah ka ditu. Pia mega cara bejaga ari penusah angus bisi diterang ka ditu. Kenang pasal penusah ketegal penyakit ti berampit mega bisi dipadah ka ba webpage tu ngambi ka kitai nemu cara sereta enda tegepang ngapa leboh pekara baka tu nyadi.

Pekara undang undang mega bisi dipadah ka ba webpage “Legal Matters”. Pia mega enti kitai beguna ka Bantu dalam pekara undang undang kitai ulih nemu ba webpage “Legal Aid”. Maioh mega penerang pekara undang undang ti bukai baka pekara ti besangkut paut enggau pemeli barang enggau insurance. Penerang ti bansa tu patut ditemu kitai laban kitai sigi beguna ka penerang ti bansa tu.

Kitai mega ulih ngiga penerang pasal perengka ti bisi disedia ka perintah ba menua kitai nengah wenpage “Public Amenities & Utilities”. Ditu kitai ulih nemu bakani sereta dini kitai ulih nguna perengka ti bisi disedia ka perintah baka Balai Raya. Ditu mega kitai ulih nemu pekara ti besangkut paut enggau elektrik, ai enggau telefon. Sampai ka penerang pasal Internet provider ulih ditemu kitai ditu.

Penerang pasal ngintu pengerai ulih ditemu kitai ba webpage “Health“. Ditu kitai ulih nemu bakani kitai ulih ngintu pengerai diri. Kitai mega dipadah ka list Hospital enggau ofis pengerai di bisi di serata Malaysia.

Ba webpage “Social Welfare & Community” kitai dipadah ka penerang pasal Bantu ti diberi ngagai orang ti kurang benasib. Ditu kitai ulih nemu nama bansa tulong ti bisi diada ka perintah kelebih agi ngagai orang ti bisi timpang pendiau.

Maioh agi penerang ti bukai ti diungkup ka ngagai kitai rakyat Malaysia bisi dikenang dalam website tu baka pengawa ngintu ruang bilik ba webpage “Family” . Aku berati ka website tu mega semampai diberi penerang baru.

Maioh bendar pekara ulih dikereja kitai ba internet nengah website tu. Enti peninga ngisi form income tax taun 2008 tu ngena internet, tentu peninga setuju engau kau, pengawa tu cukup nyamai dikereja kitai. Aku empu ngisi form income tax aku enda datai 10 minit, dah tembu sereta nerima resit tekala nya.

Enti peninga meda webpage “Online Services“ diatu bisi 1,064 pengawa ti besangkut paut enggau ofis perintah menua Malaysia ulih dikereja kitai ngena internet. Pengawa baka ngisi form, minta kerja, renew lesen, minta permit, booking balai raya, meda result masuk universiti enggau maioh macam agi ulih dikereja kitai nengah internet. Naka penyamai kitai bisi perengka ti bansa tu bisi disedia ka perintah.

Pia mega enti kitai nemu penerang pasal pengawa dagang kitai ulih meda ba webpage “Business”

Penerang pasal perintah menua Malaysia ulih dipeda kitai ba webpage “Government”
Enti orang luar ari menua Malaysia deka nemu penerang pasal menua kitai sida ia tau muka webpage “Non-Citizen”.


Penutup

Perintah Menua Malaysia sigi berat ka pemansang dalam pekara ICT. Perintah kitai empu ngulu ka pengawa tu ngena cara ngada ka website rasmi ba www.gov.my. Maioh bendar pekara ulih ditemu sereta dikereja kitai nengah website tu. Semua tu diada ka perintah ngambi ka pengawa kitai ti besangkut paut enggau ofis perintah ulih dkereja enggau jampat sereta nyamai agi.

Pengawa ti ulih dikereja kitai nengah internet sigi pulai ka penguntung kitai laban ari sereta belanja kitai ulih dijimat.

Taja pia, rugi meh kitai enti enda ulih ngena peluang ti bansa tu dalam pengidup kitai. Rugi meh kitai enti kitai agi bebaris ba bank mayar bil elektrik enggau bil ai genap bulan. Rugi meh kitai enti kitai agi kundang kelut nurun niki ofis perintah genap kali kitai bisi pekara diatur enggau ofis perintah.

Perintah menua Malaysia udah bebelanja bejuta ringgit dikena ngada ka sereta ngintu website www.gov.my tu. Semua nya ngambi ka mudah agi kitai ngatur pekara ti bisi besangkut paut enggau ofis perintah.

Nya alai kitai patut selalu ngabas website tu. Manah agi enti kitai ulih ngerejister diri ngambi ka penerang ti diguna kitai ulih datai ba email kitai.

Kena nutup randau ICT kitai ba Tusun 40 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

No comments:

 

Sample text

Sample Text

Sample Text