Tusun 52 - Mindah Ngagai Menua Bukai

Selamat tengahari serta tabi basa ngagai peninga.

Selamat kita begulai enggau aku Kassim Jeritan dalam program Randau ICT. Saritu program kitai ba Tusun 52.

Sebedau aku bepun ka Randau ICT kitai aku ngena peluang tu meri Selamat Hari Gawai ngagai bala peninga ti semampai dipebasa ka aku.

Leboh cuti Hari Gawai tu kemari, kami sebilik raun ngagai Negeri Melaka enggau Kuala Lumpur 4 hari. Kami ngena peluang cuti sekula tu bejalai meda menua bukai. Tambah mega pelajar anak-anak nyau bisi maju ari ti udah nya alai kami mutus ka ati diri deka bejalai sebelah Kuala Lumpur din.

Tiket bilun sigi udah lama dibeli aku ari kompeni AirAsia nengah website sida ia ianya AirAsia.com. Aku ulih meli tiket nya enggau murah laban aku ngerejister diri ba website tu. Enti kitai bisi ngerejister diri ba website AirAsia.com kitai nerima promosi ari AirAsia sehari dulu agi sebedau promosi nya ayan di suratkhabar. Nya alai aku semampai bulih penerang dulu agi ari orang bukai.

Sebedau kami mupok aku ngiga penerang pasal tempat ti patut dilawa kami di negeri Melaka. Maioh bendar penerang ti beguna ayan ba internet kelebih agi penerang ti datai ari orang ti udah kala kia. Ari nya kami nyamai bendar ngatur pejalai kami di Melaka din laban udah bisi penerang ti diambi aku ari internet. Kami nemu berapa tambang ari LCCT ngagai Melaka. Pia mega kami nemu anang ngambi teksi ari luar Airport laban rega ia jauh mar agi enti dibanding ka enggau teksi ti ngena kupon ari LCCT. Pia mega enti kitai deka bejimat agi kitai ulih ngena bas terus ari LCCT. Penerang nya mega bisi dipadah dalam internet.

Kami di Melaka bisi ngada ka siti pengawa ianya reunion tauka begempuru baru enggau bala ka sama enggau aku belajar ba Semenanjung taun 1991/ 1992 suba. Bala kami ti udah 17 taun nadai kala betemu. Kami betemu lalu ngada ka reunion ketegal ka sama ngena website Facebook.com, siti ari website social networking ti tebilang bendar kemaia hari tu. Enti nadai internet tentu meh kami enda ulih begiga ka pangan diri. Pemaioh kami ka reunion maya nya ianya bisi 17 iko lalu pemaioh anak kami bisi 53 iko. Semoa ia enggau bini anak tauka laki sida ia, pemaioh kami bisi lebih 80 iko. Reunion tu ulih nyadi lalu kami tetemu ka pangan diri enggau jampat ketegal bisi internet, kelebih agi website baka Facebook.com.

Ari Melaka kami menyanak mupok ka KL. Mula ia kami ka ngena cara “backpack“ bejalai nengah menua KL. Reti ia kami nadai booking hotel dulu. Taja pia bala anak nyau enda tentu tan laban menua din balat angat. Orang din madah ari din nadai ujan nyau ka sebulan udah.

Aku pan lalu ngubah plan kami, kurang agi bejalai sereta diau ba hotel siti aja maya ka diau ba KL din. Enti nitih ka plan asal kami keluar ari siti hotel lalu diau ba hotel bukai ka hari siti tang laban kami nyau enda tentu tan bejalai bebai ka beg, manah kami semina diau ba siti hotel aja dalam tempoh 3 hari nya.

Aku lalu telefon ngagai siti hotel ba Bukit Bintang nanya ka bisi enda bilik alai kami menyanak diau. No. Telefon nya ulih aku ngiga nengah internet leboh aku naip “hotel Bukit Bintang KL“ ba Google.com .Maya ka telefon lama bendar orang enda nyaut, nyau ninga ka pesan ti udah direkod orang aja. Udah nyau lima kali dail no telefon hotel nya tadi nya baru bisi orang nyaut. Reciptionist nya madah ka aku sida ia semina bisi bilik ti mar rega aja ianya RM380 semalam.

Aku sigi udah ngadang hotel sigi madah sida ia semina bisi bilik rega mar aja enti kitai deka check in tekala nya,nadai enggau booking dulu. Taja pia aku enda pecaya ka bilik ba hotel nya penuh magang. Tentu bisi bilik agi puang. Taja pan maya nya sekula pemisi lalu maioh orang bejalai ngagai KL, enda patut semua hotel penuh magang laban hari nya hari satu. Enti ujung minggu tentu meh penuh.

Aku lalu ngiga penerang pasal hotel ba Bukit Bintang nengah internet ianya ngena Google.com. Aku lalu tetemu ka siti website, Booking.com alai kitai ulih booking hotel nengah internet. Ari nya aku lalu booking bilik hotel ti ditanya aku nengah telefon dulu tadi. Dia aku meda bisi bilik ti murah agi ari ti dipadah ka reciptionist nya ngagai aku dulu agi. Rega bilik nya RM190 semalam. Nya jauh murah ari RM380 ti dipadah ka dulu agi. Aku lalu booking bilik nya nengah internet. Kami diau dia leboh ka 3 hari nya. Ketegal ka bisi internet kami menyanak bejimat ka belanja ari ka bebayar RM380 semalam ngagai RM190 aja.

Lemai nya aku lalu ngiga penerang pasal endor ti deka dilawa kami leboh ka diau di KL din. Aku sigi udah berambu deka mai bala anak bejalai ba KLCC tauka Petronas Twin Tower. Aku lalu ngiga penerang pasal KLCC nengah internet. Maioh meh penerang dalam internet pasal KLCC kelebih agi blog orang ti udah kala kia. Ari penerang ti dia kami nemu enti ngambi teksi ari Bukit Bintang tambang ia enda lebih ari RM15. Pia mega enti deka ngelawa skybridge kitai enda patut laun mansang kin laban maioh orang bukai deka sama ngelawa tempat nya. Enti udah penuh kitai enda ulih ngelawa skybridge ba tingkat 41 KLCC.

Pia mega kami bulih maioh penerang pasal Aquaria, siti agi tempat ti enda tau enda dilawa kitai enti kitai melawat KLCC. Semua penerang tu ditemu kami magang nengah internet. Nya alai nyamai bendar kami bejalai di KL enda kalat kalat tauka gining- gining ngapa laban siang ari kami bejalai, malam hari aku lalu ngiga penerang pasal tempat ti deka dilawa kami hari siti. Penerang baka perengka pengangkut ti tau dikena, berapa tambang ngena teksi sereta mega komen orang ti kala kia semua digiga aku nengah internet magang. Ari nya kami nyamai betawar rega enggau driba teksi enti rega ti dipinta sida ia kelalu mar.

Bala aku rindu bendar bebeli ka barang ba Bukit Bintang Walk. Sebedau kami bepeda ka barang ti deka dibeli aku sekali agi ngiga penerang ari internet nanya ka berapa rega barang patut ditawar ari rega ti dipinta orang ti bejual dia. Ari penerang dia kami nemu rega barang dia patut ditawar sampai naka 30% ari rega ti dipinta sida ti bejual dia. Udah bisi penerang nya baru kami belaboh betawar enggau sida ti bejual. Barang ti berega RM120 nyau tinggal RM30 aja. Uji enti kitai nadai bulih penerang ari internet enda kitai bisi pengering hati betawar rega sampai tinggal 30% aja.

Nya alai peninga,

Saritu aku bekunsi ka guna internet dalam pengidup kitai. Ngena internet kami ulih meli tiket bilun enggau rega ti murah agi. Ngena internet mega kami ulih booking bilik hotel enggau rega ti murah mega enti dibanding ka enggau rega kitai telefon booking ngagai hotel nya tadi. Ngena internet mega kami nemu tempat ti deka dilawa kami. Ari internet mega kami nemu rega tambang teksi ti patut ngambi ka kami enda dipinta tambang sebarang rega.

Pengawa mindah ngagai menua bukai nyamai bendar dikereja diatu kelebih agi bisi kompeni baka AirAsia ti ngada ka pejalai ngagai menua bukai ukai semina di Menua kitai Malaysia tang mega ngagi menua luar enggau rega ti murah. Pia mega kitai ulih ngatur pejalai enggau belanja kitai ari kitai ti bisi penerang ti cukup nengah internet.

Ari nya peninga anang enda ngena peluang ti bansa tu mindah ngagai menua bukai ngambi ka runding kitai tebuka agi meda gaya pendiau orang di menua bukai. Diatu maioh orang melancong 2 kali setaun, raun ngagai menua bukai dikena sida ngelantang ka runding sereta nambah ka penemu.

Aku arap ka peninga ngena peluang ti bisi diatu bejalai ngagai menua bukai. Tumu agi kitai meli tiket bilun nengah website AirAsia.com tauka Malaysiaairlines.com murah agi tiket ulih dibeli kitai. Pia mega penerang pasal menua ti deka dilawa kitai semampai bisi dalam internet.

Kena nutup randau ICT kitai ba Tusun 52 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

Tusun 28 - Social Networking

Terubah ia aku meri tabi basa ngagai peninga.

Selamat kitai begulai baru enggau aku Kassim Jeritan dalam program Randau ICT. Saritu tu Randau ICT kitai ba Tusun 28.

Saritu kitai berandau ka siti agi pekara dalam dunya ICT ianya Social Networking. Penerang pasal social networking tu besai bendar. Enti diterang ka enggau ringkas, reti social networking tu ianya gerempong orang ti ngembuan penemu ti sebaka. Sida tu begulai tauka betemu enggau pangan diri laban sida saum penemu nya alai sida tu ulih begempung enggau diri sama diri. Maioh macam social networking ti bisi di luar ari dunya ICT. Gerempung ti ukai dikuasa perintah tauka NGO semua nya bepun ngena konsep social networking magang.

Pendiau kitai di rumah panjai mega ngena social networking laban kitai sama saum ati sayau ka rumah panjai kitai. Ia ukai semina alai kitai diau beteduh tang mega alai kitai ngereja pengawa social kitai ninting hari.

Saritu kitai berandau ka bakani social networking tu dikereja dalam internet. Siti ari guna internet ti besai ianya alai orang social networking. Ngena internet social networking tu nyau makin nyamai dikereja. Ia nadai irau ka garis antara menoa laban asal kitai bisi internet, kitai ulih ngereja pengawa tu.

Asal Kitai mensia digaga kelia sigi idup besosial. Nadai tentu maioh kitai mensia ulih idup kediri. Makin maioh orang enggau kitai begulai makin besai reti pengidup kitai. Nya alai dini bisi peluang besosial enggau pangan diri, maioh kitai lalu ngambi peluang nya tadi. Tu sigi pengerindu asal kitai mensia. Semina cara kitai bisi lain nitih ka arus pemansang dunya.

Jarang bendar kitai tetemu ka orang ti enda rindu begulai enggau orang bukai. Bisi meh orang ti bansa nya tang sida tu nadai maioh. Tebal agi kitai sigi rindu begulai enggau orang bukai.
Berindik ari penemu ti bansa tu bisi orang ngambi peluang ngada ka tempat alai kitai ulih begulai tauka besosial enggau pangan diri ngena internet. Pengawa bersosial ngena internet sigi udah lama dikereja, nyau ka sama pengelama enggau penatai internet di dunya tu. Enti kitai ingat ka asal internet ti dikenang aku ba Tusun 3 dia kitai nemu siti ari guna internet maya nya sigi dikena nganjong email. Udah nya ia ngerembai alai orang chatting, tauka berandau ngena komputer. Tu meh asal pengawa social networking ngena internet. Nya alai tentu meh pengawa social networking tu siti ari pengawa ti besai bendar reti ia dalam dunya ICT.

Diatu maioh bendar website ti ngada ka social networking. Maioh ari website tu bepun ari membership website alai orang berandau ka siti pekara. Udah nya randau sida ia nyau ngerembai ngenang ngagai pekara bukai tauka betambah buah penemu. Laban nyau maioh pekara dikerandau ka, orang ti ngerejister nyadi kaban mega nyau majak nambah. Tegal nya website tu mega ngerembai besai agi. Bisi mega website ti bansa tu dibeli orang enggau rega ti tinggi nitih ka pemaioh orang ti nyadi kaban website nya.

Antara contoh website social networking ti tebilang nama ianya Myspace, Facebook, Hi5, Twitter, Friendster, Yahoo!360, Classmate, Meetup enggau Friendwise. Sida tu ukai sebarang social networking website. Sida ia bisi kaban bejuta-juta ari serata dunya. Empai lama tu ka udah, Facebook dibeli siko tycoon ari Hong Kong ianya Li Kai Shing enggau rega manggai berbillion Dollar Amerika. Nama kebuah tokey penyangkai kapal meli website? Laban ia nemu pemesai guna website dalam pengawa dagang ia.

Nama kebuah orang rindu ka social networking? Social networking tu nyamai alai kitai bulih kaban. Kitai enda iboh betemu enggau orang nya tang kitai ulih meda profil ia. Ari profil nya tadi kitai ulih nentu ka orang nya tau nyadi ka kaban kitai tauka enda. Ngena social networking tu mega kitai ulih bulih maioh kaban enggau jampat laban semina ngena beberapa klik aja kitai ulih nambah kaban kitai. Kitai minta diri nyadi kaban ia, udah nya enti ia nerima kitai nyadi ka kaban, ia klik “accept“ button, kitai lalu bulih siko agi kaban baru. Kaban kitai nya mega nyangka jauh ari menua bukai. Pia mega kitai bisi peluang bekaban enggau kaban ia nya tadi. Munyi lagu kaban tu...

Enti ba dunya luar, ukai ari internet kitai enda ulih ngereja pengawa tu enggau jampat. Pia mega maioh orang malu leboh ka terubah ia betemu enggau pangan diri. Nya alai social networking website tu balat bendar dikerindu ka orang.

Social networking website tu maioh manah. Enti enda manah tentu enda ngemaioh nya orang ngena social networking website. Ngena social networking tu kitai ulih nemu maioh pekara laban tebal agi website ti bansa tu alai orang bekunsi ka penemu. Pia mega ia alai kitai bekunsi ka penemu kitai enggau orang bukai. Ngena cara nya kitai semampai bisi tempat alai betanya.
Pia mega social networking tu ulih alai kitai ngelaku ka dagang internet kitai. Kitai ulih nesau bala kaban kitai madah ka kitai bisi barang dijual. Enti bala kaban kitai udah teleba enggau kitai, mudah agi ati ia tebuka deka meli barang kitai enti dibanding ka enggau orang bukai ti enda dikelala ia. Nya alai maioh orang ngena peluang ti bansa tu dalam social networking website.
Taja pia bisi mega orang nguji deka ngena peluang ngereja pengawa ti enda manah dalam social networking website. Bisi orang ngelalai ka identity diri leboh ka berandau ngena social networking website.

Orang ti bansa tu nguji deka mai betemu, kelebih agi enggau orang indu tauka anembiak. Udah betemu maioh pekara ti enda patut, nyadi. Enda lama tu ka udah kitai bisi maca ba surat kabar maioh indu di Singapore ulih umpan orang ari menua Afrika nyadi pengedar dadah. Maioh sida tu ditemu orang ti ngumpan sida nya tadi ari social networking website.

Pia mega bisi orang deka nguji ngambi penerang kitai ari profil ti diberi kitai ba website nya tadi. Penerang ti lengkap diisi kitai tau mega dikena ia ngerja pengawa ti tau ngerugi kitai baka dikena sida ia minta loan ari bank. Penyalah ti bakatu ti selalu didinga kitai ianya identity theft.
Nya alai kitai anang enda cukup jaga leboh ngena social networking website laban kitai tentu meh enggai kena tuntung pengerugi.

Siti cara kitai bejaga, munyi ti selalu dipadah aku ngelama tu, giga penerang orang ti enggau kitai berandau ngena internet empu. Ngena Google, taip nama ia dah nya tentu bisi penerang pasal orang nya. Enti nadai penerang dia, nyangka ia nya ukai orang ti bendar tauka ia ngena nama sebarang. Pia mega Tanya penerang pasal orang nya dalam social networking ti dikena kitai nya tadi. Enti orang ti enggau kitai berandau mai betemu anang enda madah ka pejalai diri. Manah agi enti kitai betemu enggau orang nya mai kaban bukai. Pia mega anang betemu enggau orang nya ba tempat ti sunyi. Enti kitai semina ngelala orang nya ari internet aja, agi mimit bendar penemu kitai pasal orang nya tadi.

Enti kitai ngisi profil kitai dalam social networking website, perati ka address tauka URL kitai ba atas skrin sudut kiba. Dia kitai ulih meda http:// tauka https:// . Enti semina http:// aja anang ngisi semua penerang kitai ti bendar laban penerang tu ulih dipeda orang bukai taja pan kitai enda ngasoh penerang nya ayan. Semadi meh kitai meda https:// baru penerang ti diberi kitai nya enda ulih dipeda orang bukai.

Anang mantai ka penerang ti beguna dalam social networking website baka no I.C enggau no akaun bank kitai laban penerang ti bansa tu patut bendar dilalai ka kitai enggai ka dikena orang enggau tuju ti enda manah.

Penutup

Social networking website tu siti ari cara kitai berandau enggau orang bukai enda ngira sempadan garis menua. Ia mega siti ari cara ti jampat alai kitai ulih ngelaku ka barang kitai dalam dagang internet kitai. Taja pia bisi orang ti ngibun ati ti enda manah sama mega bisi ngena social networking website nya tadi. Enti kitai nemu atur bejaga leboh ti ngena social networking website tu tentu meh kitai ulih nyeliah ka pekara ti enda patut nyadi.

Kitai patut ngena peluang social networking tu dalam dagang internet kitai ngambi ka maioh agi orang ulih nemu pengawa dagang kitai. Enti maioh orang nemu pengawa dagang kitai besai agi meh peluang dagang kitai ulih maju.

Kena nutup randau ICT kitai ba Tusun 28 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.