Tusun 23 - Nyeliah Ari Kena Tipu Ngena Internet

Terubah ia aku meri tabi basa ngagai peninga.

Selamat kitai begulai baru dalam program Randau ICT. Saritu tu Randau ICT kitai ba Tusun 23. Kita begulai enggau aku, Kassim Jeritan ngenang pekara ICT.

Dalam program kitai ba Tusun 22 suba kitai sama ngenang cara ti suah dikena orang nipu dalam internet. Cara ti bisi dikenang aku maia nya kemari ianya baka kena tiket betuah, kerjasama pengawa dagang, ngambi reta ti ditinggal ka orang kaya ti mati, maintenance akaun ari bank serta mega maioh cara ti bukai.

Taja pia bisi cara dikena kitai ulih nyeliah ka diri ari kena tipu orang ti bansa tu. Anang enda ingat, pengawa nipu enda ulih nyadi enti nadai pemendar ari kitai.
Senjata ti patut dikena kitai ngelaban pengawa ti nipu baka tu di kumbai aku N-O-S-C-A-M.

Aram kitai sama berati ka ia.

N – Name / Nama

Suah agi orang ti nipu ngelalai ka nama sida. Ni enda deh, enti ngena nama ti bendar tentu meh nyamai orang ti kena tipu ngiga sida tauka madah ngagai orang ti bekuasa. Bisi mega sida tu ngena nama orang bukai. Tentu ka kitai nemu orang nya endang orang ti bendar. Mudah bendar orang ngelalai ka nama diri laban dalam internet kitai enda betemu mua.
Pia mega tentu ka nama kompeni ti dikena sida kompeni ti bendar, bisi register ba orang ti bekuasa. Enti kompeni nya ari menua luar, ia tentu meh bisi register ba menua sida ia empu.

O – Over Promise

Maioh email sida ti nipu tu bejanji kelalu besai. Sida madah kitai kena loteri RM5 juta, RM10 Juta. Tauka sida madah ka diri balu orang kaya ti bisi duit Bejuta- juta deka bai kunsi kitai. Sida mega madah ka kerjasama dagang enggau sida ulih mulai ka pokok dalam 2 minggu. Sida madah ka semina kitai aja nyadi stokist kompeni sida ba menua kitai tu. Orang bukai nyadi downline kitai. Sida madah ka sida bisi kaki enggau orang pangkat ti pemadu tinggi di menua sida. Sida madah ka pengawa dagang sida ia udah ngerembai jauh ngagai maioh menua bukai. Sida madah ka akaun bank kitai ulih diatur baru dalam 24 jam. Semua semaia tu ulih ngasoh ati kitai tekait kena umpan sida.

Tang enti kitai berati ka enggau dalam agi, dini bisi ngenyamai nya ngulih ka pengaya. Sida tu janji kelalu lebih. Ari nya kitai tau berati sereta nyagam penemu, sida tu tentu deka nipu kitai.

S – Search

Giga penerang pasal orang nya tadi. Giga penerang pasal kompeni ti diwakil ka sida. Suba aku udah madah, giga penerang ngena internet. Enti kompeni, tentu sida tu bisi website ti meri penerang pasal kompeni sida. Giga penerang pasal kompeni tu ari website perintah baka www.gov.my tauka www.sarawak.gov.my . Enti kompeni sida tu ari menua luar, giga ba website perintah alai menua asal sida, ngena .gov menua nya tadi. Giga ngena search engines baka Google enggau Yahoo. Taip nama orang nya, nama kompeni, nama dagang ti dibai. Maioh orang udah nemu pasal maioh pekara. Baca komen pasal pekara nya dalam blog tauka forum.

C – Contact

Kompeni ti meruan bisi nyendia ka alai kitai betanya baka no. telefon enggau fax ba website sida. Enti kitai nerima email, tentu ka sida bisi meri cara berandau enggau sida dalam email ti diterima kitai. Tentu ka kitai ulih berandau enggau orang nya tadi, ukai semina ngena email aja. Tentu ka sida bisi no. telefon ulih alai kitai betanya. Anang pecaya sebarang nyentok ka kitai berandau enggau orang nya empu, paling kurang ngena telefon.

A – Ask

Tanya orang bukai pasal pekara tu. Anang belalai enti kitai nerima email madah ka kitai kena loteri. Anang gaga kediri. Tanya bala kaban enti kitai bisi dibai orang dalam kerjasama dagang. Tanya orang ti nemu dalam pekara internet. Tanya ngagai orang ti bekuasa. Opis perintah ti bisi di pelilih menua sigi sedia alai kitai betanya. Pia mega Tanya ngagai kompeni ti diwakil ka orang nya tadi. Contoh, enti ari bank, telefon terus ngagai bank ti disebut sida.

M – Make Sure

Tentu ka kitai ngereja semua pekara ti udah disebut aku nya tadi sebedau kitai mutus ka runding enggai ka kitai kena tipu. Enti siti ari pekara nya enda betul, anang kiruh agi, orang nya sigi deka nipu kitai.

Enti kitai nerima email, tentu ka email nya enda nyelai gamal. Enti ari kompeni email selalu bakatu; support@companyname.com. Enti email nya jauh nyelai, tentu meh ia ukai ari kompeni nya.

Selalu ia orang ti kena tipu bisi berasai nyima ati sebedau nya. Sida bisi berasai enda nyamai ati sebedau nyerah ka duit sida, tang tegal janji ti manis sereta penyampau duit ti disemaia ti cukup maioh, sida enda berasai lalu ulih kena tipu.

Penutup

Taja pan maioh macam cara orang deka nipu dalam internet, nadai siko sida tu ulih nipu kitai enti kitai cukup bejaga sereta nyikap diri ngena penemu asas dalam ngena internet. Tebal agi orang ti kena tipu tu laban sida ia empu bisi ngembuan ati ti deka ngiga pengaya ngena cara ti mudah. Munyi ti udah dipadah ka aku dalam program ti udah suba, internet nadai mai kitai bulih pengaya enggau jampat. Ia semina ulih meri peluang pengawa dagang ti manah agi ngagai kitai.

Kitai enda ulih ditipu orang dalam internet enti kitai ngena cara ti udah dipadah ka aku nya tadi ianya N-O-S-C-A-M. Kitai enda patut takut ngena internet taja pan kitai selalu ninga berita orang selalu kena tipu dalam internet. Tang kitai patut nemu cara nyaga diri. Sama baka kitai ti enda patut takut driba kereta taja pan kitai selalu ninga berita pasal orang bebadi di jalai alun tiap ari.

Kena nutup randau ICT kitai ba Tusun 23 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.