Tusun 37 - Ngelaku ka Website (Bagi 1)

Terubah ia aku meri tabi basa ngagai peninga.

Selamat kitai begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 37.

Saritu kitai ngenang siti agi website ti ulih dikena kitai ngereja pengawa dagang internet ianya bakani kitai ulih ngelaku ka website kitai ngambi ka ulih dipeda orang.

Nadai meh guna website kitai, taja naka ia pemanah digaga kitai tang nadai ulih ditemu orang bukai. Naka meh pengerugi kitai, masau jam, masau ari ngaga website kitai tang nadai orang meda. Pia mega naka meh pengerugi belanja ti udah dikena kitai ngada ka maioh macam perengka dalam website kitai tang nadai orang ngabas, mansa website kitai.

Diatu bisi enda kurang ari 500 millions website bisi dalam internet. Pia mega enda kurang ari 3 billions webpage bisi dalam internet. Penyampau tu nambah genap hari. Setiap hari bisi aja website ti baru digaga. Pia mega setiap hari bisi aja posting ti baru, serta mega webpage ti baru dalam internet.

Taja pia ukai reti ia dagang internet tu enda ulih dikereja kitai agi. Indah pia, dagang internet tu agi dikumbai kitai baru laban agi maioh pekara bedau diuji orang dalam internet. Bisi aja cara dikena ngerembai ka dagang internet bisi digaga orang. Semua tu ngambi ka kitai ulih besemekih, enti enda nyulut agi ari orang bukai dalam pengawa dagang internet kitai.
Nya meh kebuah dagang internet tu dikumbai orang “K-economy“ ianya pengawa dagang ti besabung ka pengelandik enggau pengering runding kitai.

Nadai siti – siti menoa ulih ngumbai diri kering sereta nyulut agi dalam dagang internet. Nadai siko orang ulih nguasa dagang internet lalu nagang orang bukai maju dalam pengawa tu. Peluang dalam dagang internet tu sama rata diberi ka kitai ti bisi internet enggau komputer. Nya alai kitai patut ngena peluang tu bisi tu.

Udah website kitai tembu digaga kitai, semua perengka ti diguna udah diatur kitai magang, ukai reti ia website kitai lalu tembu, kitai lalu begoyang kaki nganti duit ti datai. Enti kitai bisi ngibun penemu ti bansa tu, enda ulih enda kitai deka mantul ati dalam pengawa dagang internet kitai.
Indah enda salah baka orang ti bumai, udah nugal ukai reti ia umai nya tadi lalu ditinggal ka lalu enda iboh diintu kitai agi. Tentu meh padi nya deka dibaja kitai, rumput deka dipantun, indu utai deka dipancit enggai ka ngacau padi ka udah ditanam kitai.

Baka nya mega website kitai. Ia enda nemu ngiga orang datai kediri. Bisi aja pengawa patut diatur kitai ngambi ka orang ulih tetemu ka website kitai. Udah ia tetemu ka website kitai, nya baru kitai bisi peluang penatai pemisi dalam dagang internet kitai.

Ba randau kitai sekali tu aku ngenang 4 iti cara kitai ulih ngelaku ka website kitai ngambi ka ulih ditemu orang ti ngiga barang ti dijual kitai.

Search Engine

Siti ari cara orang ulih nemu pasal website kitai ianya ari search engine. Search Engine tu ianya siti ari directory, enda salah baka buku panduan telefon kitai ka tebal curak kuning. Diatu nyau jarang meda buku nya, tang baka tu meh gaya directory tu tadi.

Contoh search engine ti tebilang bendar ianya Google. Enti kitai kala ngena internet, kitai tentu kala meda google.com. Diatu Google.com tu siti ari kompeni ti pemadu besai ukai semina dalam dunya internet tang mega siti ari kompeni ti pemadu besai dalam dunya.

Bulih ranking ti tinggi dalam list search engine sigi nyadi ka juluk ati orang ti ngereja pengawa dagang internet. Enti ranking website kitai tinggi, kitai ulih ayan ba result page ti terubah dalam search engine. Enti kitai ba result page ti terubah reti ia maioh orang ulih tetemu ka website kitai.

Search engine tu nemu penerang pasal website kitai laban ia ngena software ti dikumbai “crawler” tauka selalu mega disebut spider. Robot tu ngabas website ti bisi. Ia mansa sekali dalam 4 tauka 5 ari.

Leboh ti ngabas website tauka webpage, robot tu ngiga penerang ti baru enti dibanding ka enggau leboh maya ia datai dulu suba. Enti bisi pekara baru, ia lalu meri ranking website kitai tinggi agi enti dibanding ka enggau website bukai ti besemekih enggau kitai.

Pia mega Robot tu ngiga enti penerang dalam website kitai sebaka bendar enggau penerang dalam website bukai. Enti robot nya tadi tetemu ka pekara tu bisi nyadi, ia manding ka penerang ni dulu agi di-upload. Enti enggi kitai dudi di-upload kitai, reti nya penerang dalam website kitai nya ulih kitai ngupi ari website orang bukai.

Search engine ngukum pengawa ti ngupi bakatu lalu nurun ka ranking kitai jauh kebaruh. Reti ia address website kitai enda ulih ayan ba result page ti terubah.

Nya alai kitai anang sekali ngupi penerang ari website bukai. Ukai semina kitai diukum search engine, kitai mega tau kena dawa orang ketegal ngupi.

Search engine mega meri ranking kitai tinggi enti maioh website bukai bisi back link ngagai website kitai.

Betukar Link enggau orang bukai

Kitai mega ulih ngelaku ka website kitai ngena cara betukar link enggau orang bukai. Link tu ianya siti coding ti mudah ti mai orang ngagai website kitai enti orang click ba link nya tadi.
Kitai patut nyendia ka siti ruang dalam website kitai endor kitai engkah link orang ti betukar link enggau kitai. Ngena cara nya orang pan sanggup ngada ka siti ruang alai sidai ia engkah link ngagai website kitai dalam website sida ia.

Ngena cara tu, orang ti mansa website orang ti bisi bekerjasama enggau kitai dalam pengawa betukar link nya tadi bisi peluang tetemu ka website kitai.

Viral tauka cara berampit

Viral tu datai ari nama virus, ianya kitai ngerembai ka penerang pasal website kitai sama sebaka enggau virus ngerampit penyakit ari orang siko ngagai orang bukai.

Cara tu ianya kitai meri barang free baka ebook tauka special report. Orang ti ninggal ka nama enggau email address sida dalam autoresponder kitai diberi kitai ebook percuma. Dalam ebook nya kitai ninggal ka link ngagai website kitai. Reti ia enti orang nya deka nemu enggau silik agi pasal penerang ti dikenang kitai dalam ebook kitai, ia ulih click ba link ti disedia ka kitai nya tadi.
Kitai mega mesan orang ti nerima ebook nya ngirum ka ebook nya ngagai bala kaban ia tang isi kandung ebook nya enda tau diubah. Nya alai link ngagai website kitai nya tadi sama enggau ebook ti percuma nya dipasing ka kin kitu. Ari nya maioh orang bisi peluang tetemu ka website kitai.

Ngena media

Taja pan kitai dalam dagang internet ukai reti ia kitai melakang ka pekara ukai internet tauka offline promotion. Kitai tau engkah address website kitai dalam suratkabar. Pia mega kitai ulih ngena majalah ti sama ngenang pekara ti dikenang kitai dalam website kitai. Ambi ka contoh, enti website kitai ngenang pasal badminton, kitai tau iklan ka website kitai dalam majalah sukan.

Pia mega kitai enda patut melakang ka stesen radio. Stesen radio bisi ngada ka slot iklan alai kitai ulih ngelaku ka website kitai. Ngena cara tu orang ulih nemu pasal website kitai.
Enti enda salah ingat aku, nyentok ka diatu aku jarang bendar ninga orang bisi ngena radio iklan ka website sida ia. Tang di menua luar din maioh orang ngena radio ngelaku ka website sida. Kitai patut ngena peluang ti bisi tu dikena ngelaku ka websiter kitai.


Penutup

Website kitai enti udah tembu ukai reti ia kitai goyang kaki pia aja nganti orang ti datai meli barang ari website kitai. Maioh agi pekara patut dikereja kitai dikena ngelaku ka website kitai. Enti enda pia nadai orang ulih nemu pasal website kitai, ngujung ka kitai lalu mantul ati dalam pengawa dagang internet.

Munyi ka udah dipadah aku dulu suba, dagang internet tu ukai pengawa dagang alai kitai goyang kaki nganti duit datai. Ia sama mega baka pengawa dagang di luar din alai kitai mesti deka ngereja maioh pengawa ngelaku ka website kitai ngambi ka orang ulih tetemu ka website kitai.

Kenang pasal 4 agi cara ngelaku ka website kitai deka disambung aku ba Tusun 38. Aku ngasai ka patut bendar kitai berandau ka pengawa ngelaku ka website tu enggau silik laban pengawa tu besai bendar reti enti kitai deka maju dalam dagang internet.

Kena nutup randau ICT kitai ba Tusun 37 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.