Tusun 20 - Dagang Internet – Ngaga Intangible Products (Bagi 2)

Terubah ia aku meri tabi basa ngagai peninga.

Selamat kitai begulai baru dalam program Randau ICT. Saritu tu Randau ICT kitai ba Tusun 20. Kita begulai enggau aku, Kassim Jeritan ngenang pekara ICT.

Ba program tu kitai nyambung randau kitai ka bakani kitai ulih ngereja pengawa dagang internet.

Dalam program ba Tusun 19 nyin kemari kitai ngenang bakani kitai ulih ngaga information product kitai empu.

Diatu kitai nambah ka penerang bakani kitai ulih ngaga information product kitai empu enggau lebih dalam agi. Kebuah pia laban aku ngasai ka, patut bendar kitai nemu ngaga information products tu sigi mudah.

Nulis Pekara Ti Nyadi Ngelingi Kitai

Dalam setaun maioh pekara sereta pengerami diatur semak alai kitai diau. Maioh pelilih menua ngada ka Regatta enggau Pesta Ai. Kitai Bisi Pesta Benak di Sri Aman, kitai bisi Pesta Air Sungai Krian, Pesta Batang Ai di Lubok Antu, Pesta Ikan Buntal di Bagi Menoa Betong, Baram Regatta, Baleh Safari, Kuching Regatta, Rainforest Festivals. Semua pengerami tu tau nyadi ka information product kitai. Kitai tau nulis ebook pasal pengerami ti bansa tu. Sarawak Tourism Board tentu rindu deka bekerjasama enggau kitai dalam pekara tu. Kitai mega tau ngambi gambar tauka video lalu dijual dalam internet.

Pia mega pengerami taun baka rumah terbuka Gawai Dayak, Hari Raya, Taun Baru Cina enggau pegerami taun ti bukai mega tau ditulis nyadi ebook. Pekara ti nyadi maia pengerami tu tau digambar tauka digaga dalam video. Maioh orang serata dunya ngiga penerang ti bansa tu.

Pekara Ti Besangkut Paut Enggau Kereja Kitai

Pengawa ti dikereja kitai tau mega nyadi ka penerang ti tau ditulis dalam ebook. Enti kitai nyadi cikgu, kitai tau nulis bakani apai indai ulih ngajar anak sida di rumah. Penerang bakatu tentu beguna bendar ka bala apai indai anembiak. Enti nuan nyadi polis, nuan tentu ulih ngajar orang cara nyaga pengelikun diri dikena nyeliah ka penusah. Enti nuan kerja ba bank nuan tentu deka bekunsi penemu enggau orang bukai cara beranak ka duit enggau betul. Enti kitai bekebun sawit kitai ulih bekunsi penerang bakani kitai nyaga sereta ngurus ka kebun sawit kitai. Enti kitai muka kedai makai kitai tentu deka bekunsi resepi ti dikerindu ka kitai.

Kursus

Kitai tentu bisi kala dikangau kursus. Dalam kursus nya maioh me penerang ulih kitai. Tentu meh manah enti kitai ulih nulis baru nama pekara ti ditemu kitai ngena leka jako kitai empu. Tu tau nyadi ka ebook. Ambi ka contoh, enti bisi peninga kala enggau kursus bakani nupi ikan keli ti maioh diatur diatu, peninga tau nulis dalam ebook.

Penusah Dalam Pengidup

Kitai tentu kala ditingang penusah dalam pengidup. Nadai orang enda kala tinggang penusah. Kitai tau bekunsi ka nama penusah ti nuntung kitai. Kitai tau bekunsi ka bakani kitai nampung pengidup kitai setiap ari mai penusah ti nepan kitai. Enti bisi orang ngibun penusah baka ti tiibun kitai, tentu ia bisi ati deka meli information product kitai. Ambi ka contoh, enti nuan bisi penyakit buah pinggang, ngena mesin dialisis. Nuan tau nulis dalam ebook bakani nuan nerus ka pengidup ditepan penyakit buah pinggang nya tadi. Orang bukai ti bisi penyakit buah pinggang tentu deka nemu penerang ari nuan. Bakani nuan ngintu diri, bakani pemakai ti diambi nuan. Pia mega enti kitai dituntung penusah bukai. Orang bukai ulih belajar ari kitai.

Ubah Dalam Pengidup Kitai (Turning Point In Life)

Dalam pegidup kitai tentu bisi berubah. Ambi ka contoh, enti dulu suba kitai pengirup, diatu kitai dah badu ngirup. Maioh orang deka nemu bakani kitai ulih ngemadu ka diri ngirup. Enti kitai dah ngetu nginsap, orang ti agi nginsap tang deka ngetu tentu meh bisi ati deka belajar ari nuan. Semua penerang tu tau dikunsi kitai, tulis dalam ebook lalu dijual ba internet.
Pengidup kitai dalam pengarap.

Penutup

Maioh cara kitai ulih ngada ka information products. Nanya ka kitai ka tauka enggai kitai ngada ka ia. Pia mega maioh cara kitai ulih ngaga information product kitai: ebooks, gambar, video enggau audio, power point slide presentation.

Dikena ngepun ka ngaga information product kitai, kitai tau meda ba cermin, nanya ka nama dalam runding kitai tau nyadi ka guna orang bukai.

Kena nutup randau ICT kitai ba Tusun 17 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka forum alai kitai berandau ba www.kassimjeritan.com/forum alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.