Tusun 14 - Populasi Internet

Selamat tengah hari. Sekali agi aku meri tabi basa ngagai peninga maioh.

Selamat kitai begulai baru dalam program Randau ICT. Saritu tu Randau ICT kitai ba Tusun 14. Kita begulai enggau aku, Kassim Jeritan ngenang pekara ICT.

Ba program tu kitai berandau ka bakani kitai ulih ngena ICT nyadi ka penatai pemisi kitai.
Bulan nyin kemari kitai ngenang objektif tauka tuju Randau ICT ti kedua ianya ngena ICT dalam pengidup kitai.

Diatu kitai nambah ka penerang ti tau pulai ka penemu kitai dalam pekara ICT. Kitai datai ba tuju program Randau ICT ti ketiga ianya bakani kitai ulih nyadi ka ICT penatai pemisi kitai. Enti peninga berati ka jako aku tadi, aku nyebut penatai pemisi; bedau nyebut “pun penatai pemisi”.

Dalam bulan 2 tu manah bendar alai kitai ngepun ka pengawa baru. Bulan tu mega program Randau ICT kitai ditambah maioh agi ngambi ka kitai nemu maioh agi pasal ICT. Tang munyi ti udah dipadah aku suba, program tu nadai guna enti nadai komen ari peninga.

Kena ngepun ka kenang kitai bakani kitai ulih nyadi ka ICT penatai pemisi kitai, manah bendar kitai berandau ka ni pemaioh orang ngena internet diatu.

Enti peninga ingat ka program kitai ba Tusun 4 ianya asal intenet, dia aku bisi ngenang dalam taun 1968 bisi 200,000 orang ngena internet dalam dunya maia nya suba. Tang10 taun ti udah ianya dalam taun 1998 pemaioh orang ngena internet dalam dunya tu manggai 14 Millions.
Dalam taun 2008, baru taun nyin kemari, pemaioh orang ngena internet bisi 1.4 billions. Enti kitai manding ka enggau pemaioh orang ba dunya diatu ianya 6.6 billions, reti ia 21% tauka 1:5 orang di dunya tu ngena internet.

Pemaioh orang ngena internet semampai nambah setiap taun. Dianggar ka tiap- tiap taun pemaioh orang ngena internet nambah 40%. Menoa kitai Asia diatu paling maioh orang ngena internet. Siti ari kebuah ia laban 2/3 mensia di dunya tu diau di menua Asia. Pia mega maioh menoa di Asia sigi benong deka mansang nya alai maioh pekara baru deka bepun.

Di menoa ti maju baka Amerika, penetration rate sida din 70%. Reti nya dalam 10 ruang bilik tauka 10 pintu, 7 ari sida nya bisi internet. Di menua kitai Asia penetration rate kitai agi baruh ianya 14%. Reti ia dalam 10 ruang bilik semina sepintu dua aja bisi internet. Di menoa kitai Malaysia Penetration Rate kitai lebih ari 20%, nyau ka manggai 30%. Kitai benasib bendar laban perintah menoa kitai sigi berat ka pemansang ICT. Penetration Rate di menua kitai tentu meh deka nambah mega.

Pemaioh pengawa dagang dalam internet mega mansang sereta nambah genap ari. Sebedau taun 1998 pengawa dagang ngena internet dkereja ngena cara B2B, ianya Business to Business. Ambi ka contoh, kompeni computer meri service ngagai bank dikena pengawa dagang. Reti nya dagang tu antara siti kompeni enggau kompeni ti bukai. Kos pengawa dagang tu mega maioh manggai bermillion tauka billions USD.

Udah taun 1998 dia bisi cara dagang ti baru jampat bendar ngerembai dalam internet ianya B2C. Cara dagang tu ianya ari kompeni terus datai ngagai orang ti meli. Orang ti bedagang ngena internet ulih nyual barang sida terus ngagai orang ti meli. Pengawa bejual beli tu dikereja dalam internet. Siti ari contoh di menoa kitai empu, kitai ulih meli tiket bilun AirAsia enggau MAS terus ari internet. Pengawa dagang ti baka tu dikumbai orang B2C. Bepun ari nya pengawa dagang dalam internet nyai mansang nyentok ka bisi dipeda kitai baka ka diatu.

Pemaioh duit dikena bedagang baka tu mega makin nambah. Dalam taun 2006 pemaioh pengawa dagang ngena internet dalam dunya tu manggai RM18 Trillion. Ba menoa Asia Pacific bisi RM2 Trillion. Di Malaysia penyampau dagang dikereja ngena internet bisi RM13.6 Billions.
Nyadi ka internet penatai pemisi kitai dikereja kitai dalam B2C. B2B tu enda dikenang aku dalam randau kitai tu laban ia nadai tentu ulih dikereja kitai kediri. Ongkos ia pan kelalu jauh mar.

Penutup

Kebuah aku ngenang pemaioh orang ti ngena internet sereta mega pemaioh pengawa dagang dikereja dalam internet ngambi ka kitai sama nemu peluang nyadi ka internet penatai pemisi kitai sigi bisi. Enti kitai bisi internet, bisi cara ti betul sereta mega ngembuan tuju ati ti semampai deka ngemansang ka pendiau pengidup diri, pekara tu ulih dikereja.

Munyi ko aku tadi orang bukai dah 10 taun ngereja pengawa tu. Tentu meh bisi sida nya mujur sereta bisi mega enda tang peluang sigi tebuka ngagai semua orang.

Nadai orang ulih nagang kitai ngereja pengawa dagang dalam internet. Dalam Randau ICT kitai ti deka datai aku deka ngenang siti agi pekara ti patut ditemu kitai enti kitai deka nyadi ka ICT penatai pemisi kitai ianya Mindset tauka Buah Runding ti betul ngambi kitai ulih ngemanah ka pendiau pengidup kitai ngena teknologi ti pemadu besai kala digaga kitai mensia ianya ICT.

Kena nutup randau ICT kitai ba Tusun 14 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka forum alai kitai berandau ba http://kjict.blogspot.com alai kita ulih ngenatai ka komen tauka tanya kita.
Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.