Tusun 25 - Virus Komputer

Terubah ia aku meri tabi basa ngagai peninga.

Selamat kitai begulai baru enggau aku Kassim Jeritan dalam program Randau ICT. Saritu tu Randau ICT kitai ba Tusun 25.

Saritu kitai berandau ka siti agi pekara ti beguna bendar ditemu kitai dalam pekara ICT ianya virus komputer.

Diatu maioh macam virus komputer. Ia ka baru maioh agi deka datai. Aku enda ngerintai ka nama virus komputer ka bisi laban kelalu maioh. Cukup meh kitai nemu nama reti virus komputer.

Virus komputer tu ianya siti file ti mit tauka “coding“ digaga orang dikena nyerang tauka ngacau file ti bisi udah meruan dalam komputer kitai. Tiap iti utai ti dipeda kitai ba skrin komputer bisi file ia empu ti udah digaga computer programmer. Dalam file nya ngundan coding ti meruan. Enti coding dalam file nya ditambah tauka dikurang file nya udah kena kacau. Dalam genteran jako ICT tu file tu dikumbai corrupt file. Maioh penanggul dibai komputer virus. File ti udah rosak tadi enda ulih dikena agi. Reti ia data dalam file nya lenyau.

Pengawa virus dalam komputer kitai bisi 3 cara. Kesatu, ia nambah coding ti bisi. Ia temu nyelepak ka diri dalam file nya tadi lalu tusah bendar deka ditemu. Kedua ia ngurang ka coding ti udah bisi. Ketiga, ia nganti coding ti udah bisi. Ngena cara tu coding ti udah bisi dalam file nya tadi udah berubah ari coding asal.

Kena kitai mereti ka pekara tu enggau mudah agi, kitai nyema ka pengawa kitai nyumai lauk. Enti lauk nya beguna garam dua sudu, lauk nya tadi nyamai diempa kitai. Nya sigi udah nyadi ka resepi lauk nya tadi.

Virus tu baka garam. Enti ditambah nyadi 3 sudu, lauk nya tadi kelalu masin. Enti kurang ka nyadi sesudu aja, lauk nya tabar. Enti garam nya diganti enggau gula, udah jauh lari asai lauk nya tadi. Bakanya ko reti pengawa virus dalam computer kitai.

Taja pia diatu bisi bansa virus computer ti ulih beranak dalam file computer kitai. Ia ukai semina nganti coding dalam file computer kitai tang ia mega nemu betambah dalam file nya tadi ngujung ka file kitai makin lama makin besai nyentok ka ia nyadi kelalu besai. Pengerusak ti dibai virus computer ti bakatu balat bendar ngujung ka computer kitai tau jam tauka “hang”. Ni enda deh, laban komputer kitai nya tadi udah penuh laban file. Virus bansa Trojan siti ari bansa virus komputer ti nyerang komputer kitai ngena cara tu.

Bakani kitai deka nyaga komputer kitai ari kena serang virus komputer?

Kesatu, tentu ka komputer kitai bisi anti virus. Diatu maioh bansa anti virus bisi dikeluar ka maioh kompeni. Bisi nya enda bebayar, bisi nya limited free trial, serta bisi mega bebayar. Anang kiroh masau jam milih ni bansa anti virus ti patut dikena. Kebuah pia laban nadai anti virus ti ulih ngelaban semua virus komputer ti bisi. Asal kitai bisi anti virus udah manah. Diatu maioh anti virus ti enda bebayar. Tentu ka anti virus nya active serta mega updated.
Kedua, anang mudah muka email ti enda ditemu penatai. Kadang- kadang email ti bansa tu bisi ngundan virus komputer.

Ketiga, anang download sebarang file ari internet kelebih agi file ti free baka file MP3 alai kitai ninga lagu, file video clip, flash file. Diatu computer virus bisi mega dilalai ka dalam file gambar, ianya JPEG file. Virus komputer tu maioh dilalai ka dalam file ti bansa tu. Kitai tau scan file nya tadi ngena anti virus dulu sebedau download ari internet.

Keempat, enti kitai ngena external drive baka pen drive, tentu ka kitai scan dulu perengka nya ngena anti virus tadi sebedau kitai muka file dalam nya. Pia mega anang enda bejimat enti kitai bekunsi pen drive nya enggau orang bukai.

Kelima, tadi aku udah madah nadai anti virus ulih ngelaban semua virus ti bisi. Bisianti virus ulih ngelaban siti bansa virus tang ia tau enda tetemu ka virus bansa bukai. Selalu nukar anti virus ti dikena kita. Enti kitai bisi ari tau nguji nukar anti virus nya 3 bulan sekali ari bansa siti ngagai bansa ti bukai. Betukar enda kurang ari 6 bulan sekali nyangka virus computer nya tadi enda ulih ditemu anti virus ti benong dikena kitai.

Keenam, anang enda nyikap diri enggau penerang pasal anti virus. Siti alai endor kitai ulih ngiga penerang pasal anti virus ianya ba www.pcworld.com. Maioh penerang ulih ditemu kitai ditu.

Penutup

Kitai enda ulih nyeliah ka diri ari besatup enggau virus computer lebih agi maia kitai ngena internet. Taja pia enti kitai mereti ka bakani virus computer ulih nyerang tauka ngacau file dalam computer kitai, kitai ulih ngurang ka diri kena pengerugi ari penanggul ti dibai virus computer nya tadi. Kitai mega ulih nyaga diri ngambi ka ngurang ka computer kitai ulih kena serang computer virus ti majak maioh dalam internet.

Kena nutup randau ICT kitai ba Tusun 25 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.