Tusun 68 - Bejual Barang Nengah Website Diri Empu

Selamat tengahari serta tabi basa ngagai peninga.

Selamat kita begulai baru dalam program Randau ICT. Saritu Program kitai ba Tusun 68.

Munyi ka udah dipadah ka aku dalam program kitai ba Tusun 67 nyin kemari, saritu kitai deka ngenang pasal pengawa dagang internet enggau silik agi. Kebuah pia laban aku maioh nerima komen sereta Tanya ari peninga ti deka nemu enggau silik agi bakani pengawa dagang internet ulih dikereja kitai.

Maioh cara kitai ulih ngereja dagang internet. Kitai ulih ngereja pengawa dagang internet enti kitai bisi barang dijual. Kitai mega ulih ngereja pengawa dagang internet enti kitai nadai barang dijual tang kitai ulih ngelaku ka barang orang bukai.

Saritu kitai ngenang pengawa dagang internet enti kitai bisi barang dijual. Pengawa nyual barang nengah internet mega ulih dikereja ngena maioh macam cara.

Kesatu, ianya kitai ngada ka website kitai empu. Kita ngelaku ka barang kitai nengah website kitai empu. Kitai ngerejister domain name tauka nama website kitai nengah domain registration services. Enti domain name ngena .com, ungkus ngerejister domain name tu ianya antara RM20 ngagai RM30 setaun. Antara domain service provider ti manah sereta ulih diarap ka ianya GoDaddy.com enggau NameCheap.com Pengawa ngerejister domain name kitai ulih dikereja dalam 15 minit.

Udah nya kitai ngerejister web hosting alai kitai nyewa ruang dalam internet dikena engkah semua penerang enggau data website kitai. Web hosting ti manah baka Hostgator.com nyendia ka service hosting ti nadai disekat enggau ungkus RM270 setaun.

Udah kitai ngerejister domain name enggau web hosting kitai ulih belaboh ngaga website kitai. Siti cara ti mudah ngaga website ianya ngena Wordpress blog laban maioh setting udah disedia ka magang. Tambah mega diatu maioh corak blog ti manah sereta mudah dikena kitai. Giga aja ngena google.com ngena genteran jako “Wordpress Theme” dia kitai ulih milih corak wordpress ti dikedeka ka kitai. Tambah mega hosting service baka Hostgator.com sigi digaga dikena blog baka Wordpress laban sida ia nemu orang diatu maioh rindu agi ngena wordpress enti disbanding ka enggau website ti digaga ari pun.

Enti kitai enda nemu ngaga website tauka blog kediri empu, kitai tau ngiga nengah Google.com nanya ka genteran jako “blog tutorial” tauka “wordpress tutorial” tauka “build a website tutorial”. Dia kitai dibai ngagai webpage ti ngayan ka website ti bisi ngajar kitai cara ngaga Wordpress Blog tauka website. Kitai ulih milih ni cara tutorial ti ulih sereta mudah diterima kitai. Kitai mega tau ngupah orang bukai ngaga website tauka blog ka kitai. Kitai ulih ngiga orang ti ngaga website tauka blog ka kitai ba Elance.com tauka RentACoder.com. Ba 2 iti website tu kitai ulih minta orang ngeletak rega penyampau kitai mayar sida ia enti kitai deka ngasoh sida ia ngaga website kitai.

Udah website tauka blog kitai digaga lalu ulih ayan ba internet kitai deka nentu ka kitai ulih nerima bayar enti orang tekuing ati deka meli barang dijual kitai ba website kitai nya tadi. Ditu kitai beguna ka merchant account. Siti ari merchant account ti ulih dikena kitai ianya PayPal.com. Kitai ulih ngerejister diri nengah PayPal.com tu enggau enda bebayar. Sida ia semina ngambi komisyen enti bisi orang meli barang kitai lalu bebayar nengah merchant account tu.

Udah website kitai ulih dikena kitai nerima bayar kitai deka nentu ka barang kitai datai ngagai orang ti meli barang kitai nya tadi. Ingat peninga, orang ti meli barang kitai nya tadi datai ari serata dunya. Nya alai kitai mesti bisi cara ngirum ka barang kitai ngagai dini-dini alai di serata dunya tu. Ari nya kitai beguna ka kurier servis ti bisi. Antara kurier servis ti ulih dikena kitai ianya baka UPS enggau DHL. Tanya ngagai sida ia ungkus ngirum ka barang kitai lalu ungkus nya tadi nentu ka rega barang ti patut dijual kitai. kitai ulih nemu penerang tu ari website sida ia baka ups.com.

Kitai mega patut nentu ka menua alai barang kitai enda tau dijual. Kebuah pia kitai ulih nyeliah ka orang ari menua nya meli barang kitai enggai ka kitai sama kena disalah ka.

Diatu website kitai udah ulih ayan ba internet. Kitai mega ulih nerima bayar nengah merchant account kitai ba PayPal.com. Udah nya kitai mega ulih ngirum ka barang kitai nengah kurier servis. Nya alai website kitai udah sedia dikena kitai ngereja pengawa dagang internet.

Taja pia ukai reti ia website kitai nya tadi udah ulih ditinggal ka pia aja lalu ngarap ka orang datai lalu terus meli barang kitai. Taja pan maioh orang ngelayar internet, nadai meh guna enti orang enda tetemu ka website tauka blog kitai.

Ari nya kitai patut ngelaku ka website kitai. Kitai patut nulis article pasal barang ti dijual kitai dalam website kitai. Kitai patut minta tulong orang bukai ti bisi website engkah link ngagai website kitai ngambi ka bisi backlink ngagai website kitai. Maioh agi backlink manah agi ranking website kitai ba search engine, sereta manah agi peluang website kitai dipeda orang. Kitai mega patut ngirum ka email ngagai bala kaban kitai madah ka pasal website kitai. Pia mega kitai patut ngena peluang ari Social Networking baka Facebook.com dikena nesau orang maioh pasal website kitai. Ari nya baru bisi peluang orang datai sereta maca website kitai. Ngena cara nya baru barang ti dijual kitai ulih laku.

Kitai mega patut mandang ka gambar barang ti dijual kitai enggau terang sereta ngerindu ka ati. Gambar ti manah sereta terang bisi bendar peluang narit ati orang ti maca website kitai. Anang ngena gambar kelalu besai enggai ka lubah ayan ba website. Kadang- kadang fail gambar ti kelalu besai enda ulih ayan sekali.

Pia mega kitai tau ngambi video klip pasal barang kitai nya tadi lalu dipandang ka kitai ba Youtube.com. Kitai ngaga video klip enda lebih ari 5 minit nerang ka guna barang ti dijual kitai nya. Video klip nya tadi lalu diayan ka kitai ba Youtube.com. Udah nya kitai lalu ngadu ka setting dalam website kitai ngambi ka video klip nya tadi ulih ayan ba website kitai. Proses tu dikumbai orang “Video Streaming”.

Website kitai patut ditambah kitai enggau penerang ti baru enda kurang ari seminggu sekali. Nya nentu ka robot tauka spider search engine semampai tetemu ka penerang baru leboh ia datai ngagai website kitai. Ari nya baru website kitai bulih ranking ti tinggi dalam search engine ngujung ka ia mudah ditemu orang dalam internet.

Penutup

Peninga ti dipebasa, Enti kitai bisi barang deka dijual nengah internet, siti ari cara ulih dikena kitai ianya kitai ngada ka website tauka blog kitai empu. Ngena modal dalam RM500 setaun, kitai ulih ngada ka website kitai empu. Penguntung kitai ngena cara tu ianya kitai ulih ngaga sereta ngubah website kitai nitih ka peneka hati kitai. Kitai mega ulih ngelaku ka barang bukai dalam siti website aja.

Dalam program kitai ti deka datai aku deka ngenang bakani kitai ulih ngelaku ka barang kitai enggau cara enda ibuh bisi website kediri empu. Kitai ulih ngelaku ka barang kitai nengah website orang bukai.

Kena nutup randau ICT kitai ba Tusun 68 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku. Terima kasih.

Tusun 46 - Paypal.com

Selamat tengahari serta tabi basa ngagai peninga.

Selamat kita begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 46.

Saritu aku nyambung kenang pasal website ti patut ditemu kitai. Kompeni ti deka dikenang aku saritu lain mimit ari kompeni ti udah dikenang aku dulu suba. Taja pia kompeni tu enda kurang penting dalam dunya ICT kelebih agi dalam pengawa dagang internet. Ketegal kompeni ti bansa tu meh kitai ulih ngereja pengawa dagang internet enggau nadai nangi.

Kompeni ti dikenang aku saritu ianya PayPal.com. Kompeni tu suah disebut aku leboh kitai berandau ka pengawa dagang internet kelebih agi Merchant Account. Taja pia laban guna kompeni tu dalam pengawa dagang internet cukup besai reti, aku deka berandau ka kompeni tu enggau dalam agi ngambi ka kitai bisi pemerani ngena service ti bisi disedia ka kompeni tu tadi.
PayPal ditumbuh ka dalam taun 1998 di San Jose, California. Asal Paypal tu ianya ari dua iti kompeni ianya Confinity ti ditumbuh ka Max Levchin, Peter Theil, Luke Nosek enggau Ken Howery. enggau X.com ti ditumbuh ka Elon Musk.

Confirnity tu pakar dalam pengawa nyaga pengelikun ari orang ti niru signature orang bukai. Sida ia ngada ka system ti ulih nagang pengawa nipu ngena technology cryptography.
X.com tu asal ia ngada ka financial service nengah internet. Betul bendar dua iti kompeni tu begulai enggau pangan diri lalu nyadi kompeni PayPal.com laban dua iti pekara ti penting udah bisi sedia ianya internet financial service enggau security.

Kompeni tu mula ngadu ka akaun orang ti bebayar dalam pengawa dagang ngena email.
Dalam pun taun 2000, Paypal bisi ngada ka service ngagai 200,000 dagang dalam sehari. Dalam bulan 4 taun ti sama, pemaioh pengawa dagang ngena service Paypal tu manggai 1,000,000 daam sehari.

Siti kompeni ti udah dikenang kitai dlu suba ianya eBay ngasai ka pengawa bebayar nengah internet nyau makin nambah. Nya alai Sida ia ngasai ka patut bendar sida ia bisi ulih ngereja pengawa bebayar tu tadi lalu enda kelalu ngarap ka orang bukai. Kebuah pia enti pengawa bebayar nengah internet enda cukup narit ati orang, tentu meh pengawa dagang eBay tu tau tejanggal ngapa.

Nya alai dalam taun 1999 eBay meli Billpoint ti ngatur pengawa bebayar ka orang ti bedagang nengah website eBay.com aja. Ari nya PayPal ulih ngada ka service sida ngagai orang bukai. Ngena cara nya mega PayPal ulih ngerembai mansang agi.

Dalam taun 2002 eBay meli Paypal enggau rega $1.5 Billions. Maya nya PayPal besemekih enggau Billpoint, c2it ti diempu Citibank, Yahoo!PayDirect ti diempu Yahoo.com enggau BidPay diempu Westren Union. Maioh company tu udah tutup diatu laban enda ulih besemekih agi. Taja pia PayPal makin sehari makin kering agi laban nyau majak maioh orang ngena service sida ia. Pia mega sida ia nyau berani muka peluang dagang ba nmenua bukai. Diatu service sida ia ulih dikena di serata dunya.

Diatu PayPal nyendia ka service ngagai 190 bengkah menua, ngemata sereta ngurus ka 184 Millions Account. Sida ia mega bisi beroperasi ba 13 menua di serata dunya. Kitai di Malaysia ulih ngena Paypal pun taun 2008 tu kemari.

Dalam taun 2008 dagang PayPal bisi $ 3 Billion. Sida ia bisi ngurus ka $64 Billions pengawa dagang ngena service Paypal.com. Tu nya penyampau duit orang ti bebayar nengah account sida ia ba PayPal. Penyampau tu bisi 9% ari penyampau duit ti dikena orang bedagang nengah internet. Enti Paypal tu enda manah tentu meh orang enda berani ngereja pengawa dagang ari kompeni tu. Tang ditu kitai nemu bisi 1/10 duit ti dibelanja nengah internet dikereja ari website PayPal tu.

Dalam taun 2008 nyin kemari bisi 260 millions orang bisi nengah website PayPal.com.
Service ti diada ka PayPal.com tu ianya dua iti aja. Kesatu, nerima bayar. Kedua dikena orang bebayar.

Bakatu ko service sida tu. Kitai ngerejister diri nengah website PayPal.com. Udah kitai bisi akaun kitai ulih meli barang ari internet. Kitai mega ulih nyual barang ari internet.
Enti kitai deka meli barang, kitai ngena akaun PayPal kitai. Enti dalam akaun nya agi bisi duit, penyampau rega barang ti dibeli kitai ari akaun lalu ditolak ari balance ti bisi dalam akaun nya tadi. Enti duit dalam nya enda cukup, penyampau ti enda cukup nya tadi lalu ditambah ari duit ti bisi dalam kad kredit ti dikena kitai ngerejister.

Enti kitai deka nyual barang lalu ngena service PayPal.com, kitai ngadu ka setting dalam akaun kitai lalu ari setting nya kitai diberi coding alai kitai ulih ngada ka Payment Button ti bisi dipeda orang dalam website kitai. Enti orang deka bebayar ka barang kitai ngena cara ia klik ba payment button nya tadi, ia lalu dibai ngagai webpage akaun kitai alai ia nerus ka proses bebayar nya tadi. Webpage tu likun, enti kitai meda ba address box dia kitai ulih meda ia ngena https:// ukai semina http aja. Udah bayar ari orang nya diterima kitai, nya baru kitai ngirum ka barang ti udah dibeli orang nya tadi. Ari penyampau rega barang ti udah dijual kitai Paypal.com ngambi 0.5% nyadi ka service charge. Tu meh nyadi ka penatai pemisi PayPal.com.

Pengelikun service ti diada ka PayPal.com tu jauh manah enti disbanding ka enggau pengelikun service ti disedia ka orang bukai. Nadai orang ulih muka akaun kitai semadi meh sida ia nemu email ti dikena kitai enggau Password ti dikena kitai.

Pengelikun ti diada ka PayPal sigi tinggi. Enti kitai nadai nerima barang ti dibeli kitai dalam 45 hari kitai ulih ngeripot ngagai PayPal.com lalu ulih minta duit kitai dipulai ka baru. Pia mega enti kitai enda puas hati enggau barang ti udah dibeli kitai, kitai ulih minta duit kitai dipulai ka baru. Pengawa tu dikereja PayPal, ukai dikereja orang ti nyual barang ari kitai. Paypal empu ti ngambi duit ari akaun orang nya tadi lalu dibayar ngagai akaun kitai.

Penutup

Leboh aku betemu enggau bala kaban lalu sama ngenang pengawa dagang internet pekara ti maioh ditanya ngagai aku ianya: bakani pengelikun pengawa dagang internet. Enti kitai ngena kad kredit kitai bakani kitai nemu kad kredit kitai nya enda dikena orang sebarang. Ulih ka enda orang malsu ka kad kredit kitai ari internet.

Saut aku bakatu; Kitai ngena kad kredit ba internet jauh agi likun enti dibanding ka kitai ngena kad kredit ba luar din. Kitai patut berati ka genap kali kitai ngena kad kredit nengah internet, kitai anang enda berati ka address box kitai ngena https:// ukai semina http:// aja.

Kedua, tentu ka kitai nemu merchant account provider ti nerima bayar kitai. PayPal.com tu siti ari merchant account ti ulih diarap ka kitai. Sida ia bisi ngurus sereta ngemata ka 1/10 ari penyampau duit ti dibelanja ka orang nengah internet. Tentu meh sida tu ulih diarap ka kitai.
Nya alai peninga,Kena nutup randau ICT kitai ba Tusun 46 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

Tusun 34 - Merchant Account

Terubah ia aku meri tabi basa ngagai peninga.

Selamat kitai begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 34.

Saritu kitai sama ngenang siti agi pekara dalam pengawa dagang internet ti enda kurang mega penting ianya Merchant Account. Merchant Account tu ianya endor kitai nerima bayar ari orang ti meli barang ari kitai. Ia mega alai kitai ulih mayar orang bukai enti kitai meli barang sida ia.

Dalam pengawa dagang ba luar din, kitai ulih nerima bayar ari orang ti meli barang kitai enggau besua duit pia aja laban kitai sama bisi semak pangan diri. Enti rega barang RM5, ia meri kitai RM10, udah nya kitai mulai kaRM5 ngagai ia baru. Dalam pekara tu kitai enda beguna ka Merchant Account.

Pia mega enti pengawa dagang kitai semina sama dalam menua Malaysia tu kitai ulih ngasoh orang ti meli barang kitai mayar ngagai akaun bank kitai. Ia semina ngirum ka cek tauka jako kemaia hari tu, “bank in” ngagai akaun kitai.

Pia mega kitai ulih nerima wang pos, nyau ka sama baka cek, semina kitai nerima duit tu ari pos ofis. Ngena cara nya kitai sama ulih nerima bayar ari orang ti meli barang ari kitai.

Tang dalam dagang internet orang ti ulih meli barang kitai ukai semina orang ti ngimbai kitai tauka ari menua Malaysia aja. Orang ti bedagang enggau kitai datai ari serata dunya. Orang ti maioh bendar bebeli ka barang ari internet maioh datai ari Amerika, Eropah, Australia, Canada enggau Menua Jepun.

Sida tu kelalu jauh ari kitai. Tentu meh sida ia enda ulih datai kitu semina deka nyua ka duit dikena meli barang kitai. Sida ia mega enda ulih bank in ngagai akaun kitai laban kitai enda sama menua, nyangka serice bank sida ia din enda ulih kena bekirum ka duit ngagai kitai. Bisi meh service baka “wire transfer” tang ungkus ia kelalu mar. Nyau mar agi ari rega barang ti dijual kitai.

Tambah mega enti kitai ngayan ka no.akaun bank kitai dalam internet, enda tentu manah pulai ka pengelikun kitai. Agi bisi orang dipeda aku ngayan ka no. akaun sida ia dalam internet dikena nerima bayar ari orang ti meli barang sida. Ba asai ati aku, pengawa tu tau bendar ngenatai ka penusah ngagai kitai.

Orang ti berati ka pengawa dagang internet nemu pemesai penanggul enti kitai bedagang enggau nadai sempadan menoa. Sida ia nemu enti deka ngemansang ka dagang internet pengawa bebayar dalam internet mega mesti deka mudah dikereja. Nya alai sida tu bisi ngada ka endor ngambi ka kitai ulih nerima bayar ari orang ti meli barang kitai.

Kompeni ti baka tu nyadi orang tengah antara kitai ti empu barang enggau orang ti meli barang kitai. Kitai ngerejister diri ba kompeni ti bakatu. Udah nya sida ia ngada ka akaun kitai alai ulih meri penerang ti diguna. Antara penerang ti enda tau salah ianya nama kitai mesti ka sama enggau dalam I.C kitai. Dalam akaun kitai nya tadi meh endor kitai ngadu ka setting barang ti dijual kitai. Ari nya mega kitai ulih ngada ka tanda rega barang ti dijual kitai.

Udah setting digaga serta ulih dikena, kitai lalu diberi siti coding alai kitai tau engkah payment button dalam website kitai. Orang ti meli barang kitai lalu klik ba payment button kitai nya tadi lalu sida ia dibai ngagai website merchant kompeni tu tadi. Ditu orang ti meli barang kitai nya tadi lalu ngisi penerang ti dipinta baka nama, address enggau lumor kredit kad ti dikena ia. Ari nya penyampau bayar ti diambi ari kad kredit orang nya tadi lalu dipindah ka ngagai akaun kitai ba merchant kompeni nya tadi.

Merchant kompeni tu ngambi komisyen ari pengawa jual beli tu tadi. Komisyen sida enda kelalu maioh, lebih kurang 1.5%. Contoh ia enti barang kitai berega RM10, kompeni tu ngambi komisyen antara RM0.15 Jauh lebih murah enti dibanding ka enggau ungkus “wire transfer”.

Bisi mega kompeni merchant account tu dulu nerima bayar leboh kitai ngerejister, nya alai kitai nadai dipinta mayar komisyen agi.

Siti ari kompeni ti ngada ka service Merchant Account ianya www.PayPal.com. Kompeni tu siti ari pampang kompeni ebay.com pia mega siti ari pampang kompeni Google.com. Kompeni tu antara kompeni ti besai dalam pengawa dagang internet. Kitai ulih ngerejister diri ba PayPal.com enggau enda bebayar. Sida semina ngambi komisien ari kitai enti bisi orang meli barang kitai. Nya alai nyamai bendar kitai ngereja pengawa dagang internet laban bisi kompeni baka PayPal.com tu. Taja pia kitai mesti ka bisi kad kredit dikena muka akaun tu.

Enti kitai bisi PayPal Account, kitai mega nyamai bebeli barang ari internet. Kitai enda iboh suah ngisi penerang baka lumor kad kredit kitai, nama enggau address kitai laban semua penerang tu udah bisi dalam PayPal account kitai. Enti penyampau duit kitai dalam nya enda cukup, ia ulih nambah ngena duit dalam kad kredit kitai ti dikena kitai muka akaun kitai nya tadi.

Kitai mega enda patut irau ngena service ari sida tu laban pengawa bebayar ngena PayPal.com account sigi likun. Sida ia ngada ka online security ti manah sereta udah lama dipecaya ka orang. Tambah mega kompeni baka PayPal.com tu ukai baru diatu dalam pengawa dagang internet. Sida ia udah ngereja pengawa tu lebih ari 10 taun.

Enti kitai ngena PayPal account orang mega bisi pengarap meli barang ari kitai laban PayPal button tu udah cukup dikelala orang lebih agi dalam pengawa dagang internet.

Penutup

Kitai patut ulih nerima bayar ari website kitai enggau mudah. Orang ti meli barang ari kitai pan patut ulih ngereja pengawa nya enggau mudah mega. Diatu pengawa bebayar enggau pengawa nerima bayar ari website mudah bendar dikereja laban bisi maioh kompeni ngada ka service Merchant Account.

Cara ngena payment button ari merchant account tu mega mudah digaga laban setting ia mudah dikereja. Pia mega enti kitai bisi penanggul ngena service sida tu kitai semampai ulih minta Bantu ari help service sida ia 24 jam.

Kitai patut ngena peluang ti bakatu dikena ngemansang ka dagang internet kitai.

Kena nutup randau ICT kitai ba Tusun 34 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.