Tusun 49 - Simpul Kenang Randau ICT Bulan 5

Selamat tengahari serta tabi basa ngagai peninga.

Selamat kita begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 49. Saritu randau kitai ti penudi dalam Bulan 5 tu. Taja pia ukai reti ia randau kitai abis naka tu aja. Agi maioh bendar pekara ICT deka dibai aku bekunsi enggau peninga ngambi ka kitai sama bela bulih penguntung ari ICT, siti pemansang dunya ti enda ulih dikelari ka kitai.

Saritu udah genap 6 bulan kitai udah berandau ka pekara ICT. Program kitai udah manggai ngagai Tusun 49, reti nya udah 49 pekara dikenang kitai. Bisi nya kala didinga sereta bisi mega baru didinga kitai.

Sigi baka ia peninga. ICT semampai mansang. Genap hari bisi aja pekara baru ditemu kitai ari pemansang ICT. Mensia enda ngetu ngiga penemu dikena ngemanah ka pengidup diri sereta ngenyamai ka pengidup orang bukai mega. Genap hari bisi aja website ti digaga ngambi ka penerang dalam internet manah agi ulih dikena kitai dalam pengidup kitai.

Saritu aku nadai ngenang pekara baru. Taja pia aku deka ngenang baru pekara ti udah dikenang kitai dalam bulan 5 tu. Tambah mega kitai nyau ngintu Hari Gawai, nya alai kitai ngelantang ka seput mimit.

Bulan tu maioh bendar website udah dikenang aku. Sida nya ukai sebarang website. Sida ia mega ukai sebarang kompeni. Sigi kompeni ti udah mujur sereta nyulut dalam ICT. Bisi nya kompeni ti pemadu besai dalam dunya tu.

Sida tu dipilih aku ketegal sida ia bisi pengering sida ia empu magang. Pia mega aku ngenang sida tu ngambi ka kitai nemu asal kompeni tauka website tu. Enti kitai nemu asal sereta pun penumbuh kompeni tu nyamai agi meh kitai bisi pengarap ka servis ti diada ka sida ia.

Taja pan aku ngenang kompeni tu aku enggai enda madah dulu, aku nada besangkut paut enggau kompeni ti udah dikenang aku nya suba. Aku semina bisi ngena servis ti diada ka sida nya alai aku nemu ni ti manah enggau ni ti enda.

Pun bulan tu kemari aku bisi ngenang website negeri Sarawak ba www.Sarawak.gov.my enggau website perintah menua kitai Malaysia ba http://www.gov.my/. Dua iti website tu patut semampai dilayar kitai laban penerang ari perintah kitai sigi bisi ayan ditu. Tambah mega penerang ti ayan ditu sigi datai ari ops perintah. Nya alai penerang ti bisi ayan dia sigi penerang ti bendar.

Pia mega enti bisi pekara deka diatur enggau ofis perintah manah kitai ngiga penerang ba dua iti website tu dulu. Kebuah pia pekara ti deka diatur kitai nyangka ulih diatur kitai nengah website tu. Ari nya nyamai meh kitai enda iboh masau ari datai ngagai ofis perintah laban pekara nya ulih dikereja kitai nengah internet. Suba aku dah madah bisi lebih seribu iti pekara ulih diatur kitai nengah website http://www.gov.my/. Tentu meh maioh agi pekara ulih diatur kitai enggau ofis perintah nengah internet dudi hari ila.

Udah nya aku ngenang siti website ti cukup tebilang diatu ianya ebay.com. Website tu alai orang bejual beli barang ngena cara lelong. Kitai mega ulih enggau bejual beli barang ditu. Enti kitai bisi barang ti nyelai kitai tau nguji nyual barang kitai ba ebay.com. Maioh orang udah bulih penatai pemisi ti maioh ari ti bejual beli barang nengah ebay.com. Enti kitai bisi barang ti enda diguna agi, sebedau kitai tepikir deka muai ia, kitai tau nguji mandang ka ia ba ebay.com. Diatu bisi 2 juta orang ngelayar website ebay.com sehari.

Kitai mega bisi berandau ka Amazon.com alai kitai ulih bebeli ka maioh macam barang. Nyau ka semua barang ti ulih dipeda kitai bisi dijual ba Amazon.com. Amazon.com bepun ari website ti nyual bup nengah internet. Taja pia laban pengawa dagang ti semampai mujur sida ia mega bejual ka maioh macam barang bukai. Kitai mega ulih bulih penguntung ari website tu laban kitai ulih ngelaku ka barang Amazon.com lalu nerima komisyen enti bisi orang meli barang ketegal ti laku laban kitai. Website tu mega manah alai kitai belajar ka pengawa bejual ka barang nengah internet.

Aku mega bisi ngenang Google.com, siti kompeni search engine ti mujur bendar diatu. Enti kitai kala ngena internet tentu meh kitai nemu google.com tu. Taja pia nadai maioh orang nemu pun kompeni google.com tu semina ari thesis pelajar Ph.D. Ia mega bepun ari stor tauka garaj. Diatu maioh bendar penerang ulih diguna kitai diada ka google.com. Maioh sistem ti diada ka sida ia sedia dikena semua kitai baik nya dalam pengawa dagang internet tauka semina begiga ka penerang aja.Google.com tu antara kompeni ti pemadu kaya di dunya. Kompeni tu mega siti ari kompeni ngada ka pemadu maioh millionaires laban sida ia sigi berat ka orang ti bekerja enggau sida. Google.com landik ngiga peluang pengawa dagang ari servis orang bukai ti dulu agi. Sida ia berati ka ni kurang ba kompeni bukai ti dulu agi lalu sida ia ngada ka service dia lalu bulih penguntung ari nya.

Kitai nambah ka kenang kitai ngagai siti agi kompeni ti bepun ari news portal tauka website ti ngada ka berita nengah internet ianya yahoo.com. Nyau kelama Yahoo.com ngalih ngagai search engine. Kompeni tu ngerembai enggau jampat ngena cara bebeli ka kompeni bukai ti diasai ka ulih nyungkak Yahoo.com besemekih enggau orang bukai.

Udah nya kitai ngenang siti kompeni ti pemadu kaya dalam dunya ianya Microsoft.com. Sapa orang enda kala ninga nama Bill Gates, mensia ti pemadu kaya ba dunya tu. Pengaya ia datai ari pengawa bejual ka software ianya Microsoft Windows. Diatu Microsoft Windows bisi ba genap iti komputer din dunya tu nyadi ka operating system. Pun Microsoft tu mega ari projek pelajar Bill Gates leboh ia ngaga software di universiti.

Kitai mansang agi ngenang kompeni ti bisi bendar jasa dalam pengawa dagang internet ianya PayPal.com. Kompeni tu ngada ka palan orang bebayar nengah internet kelebih agi bebayar ngena kad kredit. Servis ti diada ka kompeni tu free semadi meh bisi orang meli barang kitai nya baru kitai dipinta mayar komision. Ketegal kompeni ti baka PayPal.com tu meh pengawa dagang internet balat bendar ngerembai sereta mansang. Pengelikun pengawa bebayar nengah internet mega makin manah laban PayPal tu sigi berat ka pengelikun nengah internet.

Kitai nambah ka penerang dalam pekara ICT leboh aku ngenang siti kompeni ti ngada ka Autoresponder service ianya Aweber.com. Autoresponder tu ianya servis ti enda tau nadai enti kitai ngereja pengawa dagang internet. Ketegal autoresponder tu kitai ulih ngirum ka email ngagai maioh email bukai sekali. Pia mega kitai ulih ngirum ka email kitai betangkan- tangkan. Enda cukup pengawa dagang internet kitai enti kitai nadai autoresponder, enda salah baka kedai ti nadai salesgirl.

Penutup

Semua website ti udah dikenang aku sekumbang ka bulan 5 tu sigi tau pulai ka penguntung kitai magang. Sema jako enda iboh kitai kiruh begiga ka penerang ari website bukai, semina ari 8 iti website tu udah cukup meri penerang ti diguna kitai.

Maioh bendar contoh ti manah udah diayan ka orang ti bempu kompeni enggau website ti udah dienang aku nya suba. Kitai ulih belajar sereta becontoh ka pengering ati sida ia dalam pengawa dagang ukai semina dagang internet tang mega pengawa dagang ti bukai.

Pia mega penngerembai kompeni tu ukai nyadi tekala nya ang maioh pemedis sereta mega penusah sida ia ngepun ka website sida ia nyentok ka besai baka ka sehari tu. Tu meh contoh ti patut diperati ka kitai.

Nya alai peninga,
Kena nutup randau ICT kitai ba Tusun 49 u aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.