Social Icons

twitterfacebookgoogle pluslinkedinrss feedemail

Pages

April 6, 2009

Tusun 22 - Pengawa Nipu Ngena Internet

Terubah ia aku meri tabi basa ngagai peninga.

Selamat kitai begulai baru dalam program Randau ICT. Saritu tu Randau ICT kitai ba Tusun 22. Kita begulai enggau aku, Kassim Jeritan ngenang pekara ICT.

Diatu udah masuk 4 Bulan kitai begulai dalam program Randau ICT. Bulan 11 taun nyin kemari kitai berandau ka reti ICT, asal computer enggau asal internet. Kitai mega berandau ka bakani kitai berate ka pekara ti patut diperati ka kitai enti kitai deka meli computer enggau perengka computer ti bukai. Kitai mega sama ngenang bakani pakej internet ti bisi diada ka ba menua kitai.

Udah nya kitai sama berandau ka bakani kitai ulih ngena ICT dalam pengidup kitai. Kitai sama ngenang bakani pengawa bebayar ka bil ti datai ninting bulan tau dikereja kitai ngena internet aja. Maioh meh penguntung ari pekara ti bansa tu laban hari kitai enda tebasau, belanja pan ulih dijimat.

Ba tuju program Randau ICT kitai ti ketiga, ianya nyadi ka ICT penatai pemisi kitai, kitai sama ngenang bakani kitai ulih ngereja pengawa Dagang Internet. Maioh meh cara dibai aku diperati ka kitai ngambi ka kitai ulih ngambi peluang ti bisi alai kitai nambah ka penatai pemisi kitai.
3 tuju Randau ICT ti udah dipadah ka aku ba pun program tu suba ianya ba Tusun 1 udah dikelansa aku magang. Taja pia ukai reti program Randau ICT kitai abis ditu. Randau ICT kitai agi tetap disambung laban maioh agi pekara deka diperati ka kitai dalam pekara ICT. Tambah mega kitai semina agi baru bepun dalam Randau ICT kitai.

Ba bulan 3 tu aku mai kitai sama berati ka siti agi pekara dalam dunya ICT ianya cara kitai nyaga pengelikun diri leboh ka beguna ka ICT, kelebih agi leboh kitai ngena internet.

Enti kitai berati ka program Randau ICT kitai ti udah, kitai maioh berandau ka pekara internet. Kebuah pia nyau ka 95% pekara ICT sigi besangkut paut engau internet. Nya alai kitai enda tentu ulih ngelari ka diri ari ngenang pasal internet, taja pan program kitai tu pasal ICT. Aku arap kitai enda salah penemu ditu. Internet nya siti ari komponen ICT tang ia komponen ti pemadu besai, nyau deka nyerangkung semua pekara ICT.

Enti peninga agi ingat, dulu suba ICT tu semina dikumbai IT, tang laban ka penatai sereta guna internet ti maju bendar, ia dikumbai ICT diatu laban komponen “communication“ ianya internet nyau enda ulih dikelaung ka agi.

Panjai bendar randau kitai pasal pekara tu, tang aku enggai enda ngenang ia enggai a kitai ngumbai program kitai tu kelalu berat ka internet lalu enda ingat ka komponen ICT ti bukai.
Bulan tu kitai berati ka bakani kitai ulih nyaga pengelikun diri leboh ngena internet. Pekara tu patut bendar dikenang kitai enggau silik. Kabuah pia laban diatu bisi 1.4 Billions orang ngena internet dalam dunya tu. Ari pemaioh nya tentu meh bisi orang ti ngibun penemu ti enda manah. Bisi meh orang deka ngambi ulih ari orang bukai ngena cara ti enda patut. Munyi ko jako tuai, maioh mensia maioh meh ulah. Pia mega enti kitai nemu cara nyaga diri leboh ngena internet kitai tentu meh nadai irau ati sereta enda kakang ati ngena internet dalam pengidup kitai.

Pekara ti deka diperati ka kitai saritu ianya bakani kitai ulih nyeliah ka diri ditipu orang dalam internet. Diatu kitai selalu ninga berita pasal orang ti dikena tipu ngena internet.
Tebal bendar orang nipu kitai dalam internet ngena cara ngirum ka email ngagai kitai. Saritu aku deka ngerintai ka cara ti suah dikena orang nipu dalam internet.

Kitai kena loteri, tiket betuah tauka perais

Tu cara ti suah bendar dikena.Orang ti ngena cara tu madah ka kitai kena loteri tauka tiket betuah tauka perais ari kompeni ti besai. Udah nya kitai dipinta malas email sida ia. Udah kitai bebalas email empat lima kali enggau sida ia, kitai berasai teleba enggau sida ia. Udah nya baru sida ia minta penerang bukai ti beguna ba sida ia pasal kitai. Enti sida bulih penerang ti beguna baka no. akaun bank, sida ia ulih ngereja pengawa ti tau ngerugi ka kitai. Bisi mega sida tu minta kitai mayar duit deposit dulu sebedau perais nya tadi ulih dikeluar ngagai kitai.

Reta ti enda ulih diambi

Pia mega bisi sida tu madah ka diri wakil orang ti kaya ti udah mati. Bisi nya madah ka diri balu orang kaya nya tadi. Sida madah bisi duit ti maioh, sampai bepuluh juta ditinggal ka orang kaya nya tadi tang enda ulih ambi. Udah nya sida ia madah semina enggau bantu aja ulih ngeluar ka duit nya. Tang, sida ia ngasuh nuan mayar duit ngagai sida ia dulu, service charge, ko jako.

Kerjasama Pengawa Dagang

Bisi mega orang tu mai kita bekerjasama ngereja pengawa dagang. Tebal agi sida tu madah ka diri ari menua luar deka bedagang di menua kitai. Tang kerjasama tu lain. Kitai dipinta mayar duit dulu ngagai sida.

Kitai dipadu ka nyadi stokist

Bisi mega sida tu madah ka diri bisi stok barang ti ulih dijual di menua kitai. Sida ia minta nuan nyadi wakil sida ia nyual barang sida tu di menua kitai. Tuju ia sama mega, kitai dipinta mayar dulu ka deposit barang nya tadi.

Wakil ari Bank

Diatu bisi siti agi cara baru dikena orang ngulih ka penerang ti beguna pasal kitai. Sida tu madah ka diri wakil ari bank. Udah nya sida ia madah ka akaun kitai bisi penanggul lalu patut diadu ka. Sida lalu minta kitai meri no. akaun bank kitai ngena cara malas email nya tadi. Ambi ka contoh, aku empu bisi nerima email ti madah ka sida tu ari Maybank, madah ka akaun aku bisi penanggul. Aku nemu nya siti ari pengawa nipu laban aku berati ka email nya enda baka email ti patut datai ari kompeni ti besai baka Maybank.

Kaban ari kaban kitai

Bisi mega orang nganjung email ngagai kitai madah ka diri kaban orang ti udah dikelala kitai. Pekara tu tau nyadi leboh kitai bisi ngerejister diri dalam social networking website baka facebook, hi5 tauka tweeter. Udah nya sida mai kitai ngereja pengawa kerjasama dagang. Sida mega madah ka kaban ti dikelala kitai nya tadi sama bisi enggau dalam pengawa dagang nya. Enda semua orang ngena cara tu nipu magang. Bisi meh sida nya amai semina deka bedagang aja, tang kitai enda tau enda bejaga enti nerima email ti bansa tu.

Melabur Duit Ba Internet

Cara melabur duit dalam internet udah ditagang perintah laban balat bendar udah ngenusah ka orang di menua kitai. Taja pia agi bisi orang nguji deka mai kitai melabur duit kitai dalam internet. Sida ia enda tentu ngena cara tebuka baka ti udah. Sida ia nganjung email ngagai kitai, madah ka kitai tepilih ari orang maioh, tauka exclusive. Sida mega madah ka diri ukai baka kompeni bukai ti beranak ka duit dalam internet baka ti udah ditagang perintah.
Maioh macam cara bukai ti enda ulih dikenang aku enggau silik ba randau kitai ditu. Tang kitai anang irau. Asal kitai nemu berati ka bakani kitai ulih nyaga diri enda kena tipu orang ti bakatu.

Penutup

Taja pan maioh macam cara orang deka nipu dalam internet, nadai siko sida tu ulih nipu kitai enti kitai cukup bejaga sereta nyikap diri ngena penemu asas dalam ngena internet. Tebal agi orang ti kena tipu tu laban sida ia empu bisi ngembuan ati ti deka ngiga pengaya ngena cara ti mudah. Munyi ti udah dipadah ka aku dalam program ti udah suba, internet nadai mai kitai bulih pengaya enggau jampat. Ia semina ulih meri peluang pengawa dagang ti manah agi ngagai kitai.

Ba program kitai di deka datai ianya ba Tusun 23 aku deka berandau ka bakani kitai ulih nyeliah ka diri ari kena tipu dalam internet. Kitai enda patut takut ngena internet taja pan kitai selalu ninga berita orang selalu kena tipu dalam internet. Tang kitai patut nemu cara nyaga diri. Sama baka kitai ti enda patut takut driba kereta taja pan kitai selalu ninga berita pasal orang bebadi di jalai alun tiap ari.

Kena nutup randau ICT kitai ba Tusun 22 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.
Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

No comments:

 

Sample text

Sample Text

Sample Text