Tusun 42 - Amazon.com

Selamat tengahari serta tabi basa ngagai peninga.

Selamat kita begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 42.

Dalam program kitai ba Tusun 41 nyin kemari kitai berandau ka siti kompeni ngena website ebay.com. Kompeni tu ngada ka palan alai orang bejual beli barang ngena cara lelong. Website tu manah alai kitai neleba ka diri dalam pengawa dagang internet.
Saritu aku deka ngenang siti agi website ti ulih endor kitai ngepun ka pengawa dagang internet ianya Amazon.com.

Amazon.com tu ditumbuh ka dalam taun 1994, setaun dulu ari ebay.com ti dikenang kitai dulu kemari. Orang ti numbuh ka kompeni tu ianya Jeffrey P. Bezos di Seattle, USA. Nama Amazon tu diambi ari nama sungai ti pemadu besai di dunya ianya sungai Amazon di Brazil.
Pun pengawa dagang Amazon.com tu ianya ari pengawa nyual bup nengah internet. Bup ti terubah ia dijual company tu ianya “Fluid Concepts And Creative Analogies“ ti ditulis Douglas Hofstadter. Bup tu dijual dalam taun 1994.

Pemansang kompeni tu cukup narit ati maioh orang. Enda baka kompeni dagang internet ti bukai ti maioh mansang ngerembai enggau ngenyit, Amazon.com tu mansang belubah-lubah. Dalam plan pengawa dagang sida ia, untung semina ulih dipeda dalam 5 taun ti deka datai.
Taja pia Amazon.com bedau kala kena tinggang pengerugi. Genap taun sida ia semampai untung belama nyentok ka diatu. Dalam taun 2008 penyampau dagang sida ia bisi manggai $19.2 Billion. Untung beresi sida ia bisi $645Millions maya nya, nambah enti dibanding ka enggau taun 2007.

Pengering pengawa dagang Amazon.com tu ianya dalam pengawa dagang internet ngena cara Affiliate Program. Amazon.com antara kompeni ti terubah ia ngada ka Affiliate program ka semua barang ti bisi dijual sida. Reti ia kitai tau nyual semua barang ti bisi dijual Amazon.com kediri, ukai semina mai orang datai ngagai website Amazon.com tu.

Kala ga aku ngenang pengawa dagang internet ngena Affiliate Program suba tang diatu aku agi deka ngenang pekara tu ngambi nyamai agi diperati ka kitai becontoh ka Amazon.com tu.
Cara Affiliate Program tu baka tu: Terubah ia kitai ngerejister diri nyadi Affiliate ba Amazon.com. Udah nya kitai diberi siti akaun ti ngundan nama akaun kitai enggau password dikena muka webpage ti ngundan semua penerang pasal akaun kitai. Ari nya kitai diberi perengka dikena kitai ngelaku ka barang baka banner, gambar ti narit ati sereta mega link ti ulih dianjung kitai ngena email. Pia mega kitai ulih milih ni barang ti deka dilaku ka kitai. Enti bisi orang meli barang nya nengah link kitai nya tadi kitai lalu dibayar komision ari Amazon.com tu tadi.

Enti dibanding ka enggau ClickBank.com ti udah dikenang aku suba, komision dibayar Amazon.com tu enda tinggi, antara 5% ngagai 15%. Kebuah pia laban maioh kos bukai baka kos nganjung barang ditanggung Amazon.com magang. Tambah mega barang ti dijual ditu maioh barang nyengenda tauka “Physical products”. Nya alai maioh kos bukai ti enda ulih dipeda kitai.
Gudang Amazon.com tu bisi di serata menua ti besai. Maioh agi gudang sida ia tu semak padang bilun laban nyamai agi ngirum ka barang ti dibeli orang.

Diatu Amazon.com ngerembai ngagai pengawa dagang ti bukai. Taja pan asal pengawa dagang sida ia nyual bup nengah internet, sida ia mega nyual CD, DVD, software, barang elektronik, computer, TV, radio, perengka dapur, perengka bekebun, barang ayam anak mit, perangka anak mit, emas, jam, barang kosmetik, alat music, gari, barang industri enggau maioh agi macam barang ti bukai. Enda tentu salah enti kitai nyebut semua barang ti ulih dipeda kitai sigi bisi dijual ba Amazon.com diatu.

Cara pengawa dagang Amazon.com tu sama. Strategi dagang internet ti dikena sida ia sama baka sida ti nyual bup, ianya pun pengawa dagang sida ia suba. Tu meh siti ari kompeni ti tegap ari segi cara bedagang sereta mutus ati ngena cara ti udah disetuju ka sida ia.

Belaboh ari taun 2007 Amazon.com belaboh bedagang ka information products kelebih agi “online music”. Taja pia dagang sida ngena carat u enda tentu maju enti disbanding ka sida ti bedagang ka “tangible products“ ianya barang ti ulih dipegai. Taja pia sida ia enda ngelengka ka oline music sida ia diatu. Dagang nya agi dikemeran ka sida ia.

Dalan taun 2008, bisi 615 millions orang datai meda website sida ia ba url www.amazon.com. Reti nya purata dalam sehari bisi nyau ka 2 juta orang bisi muka website tu. Ari nya kitai ulih nemu berapa maioh penatai pemisi ulih sida ia. Sema jako, enda iboh nyual barang, semina ngada ka ruang iklan aja udah maioh bendar penatai pemisi enti website kitai bisi ngemaioh tu orang datai meda website kitai.

Website tu mega semampai ba ranking ti tinggi ianya ba lambar „search page“ ti terubah laban sida ia bisi siti team ti ngemata ka peninggi ranking website sida ia genap ari. Enti kitai ngiga penerang nengah google tauka Yahoo kitai selalu tepeda ka “search result“ ti datai ari website amazon.com tu.

Siti agi pengering pengawa dagang Amazon.com tu ianya sida ia ngena cara laveraging tauka nguna pengering tauka pengelandik orang bukai. Sida ia maioh “third party“ partner. Kompeni ti ngeluar ka barang sida ia diberi kuasa penuh dalam pengawa ngaga barang tang leboh barang tu datai ba orang ti meli ia, barang tu ngundan identiti barang Amazon.com. Nya alai enti kitai meli barang ari amazon.com kitai enda ulih nentu ka sapa orang ti ngaga barang nya laban semua barang nya tadi nitih ka standard ti udah ditentu ka Amazon.com.

Taja pia amazon.com jarang bendar masuk campur dalam pengawa kompeni pengeluar barang sida ia. Ia ka ditemu sida ia barang ti dianjung ngagai orang ti meli sama baka barang ti dikedeka ka sida ia. Dipelaba ka aku tu meh nyadi ka tiang pengering kompeni tu besemekih dalam pengawa dagang.

Ngena cara ti bansa tu orang enda kakang ati meli barang ari amazon.com laban kualiti barang sida ia sigi udah ditemu manah.

Kitai ulih ngiga penatai pemisi ari amazon.com. Kitai semina ngerejister diri nyadi affiliate Amazon.com. Tang sida ia ngelar orang tu Associates. Cara ia sama enggau cara affiliate enti ba website bukai. Nyangka meh nama associates tu manah agi didinga tang ia ngena konsep affiliate. Diatu Amazon.com bisi lebih ari sejuta iko affiliates ari serata dunya. Pemaioh sida tu nambah genap hari laban pemanah system pengawa dagang amazon.com tu sigi manah dikena. Tambah mega ngerejister diri ditu sigi enda bebayar.

Ulih ka nyadi associates Amazon.com kitai mega diajar cara bejual barang. Tips sereta jako ajar tu dikirum ka ngagai email kitai. Ari nya kitai ulih mereti agi ka pengawa dagang. Semua penemu tu datai ngagai kitai enggau percuma.

Kitai mega ulih ngada ka website kitai empu nyual barang Amazon.com tu nengah website kitai. Tu siti ari cara kitai ulih ngepun ka pengawa dagang internet kitai sebedau kitai ulih ngada ka barang kitai empu.

Enti kitai bisi kedai kitai empu tauka bisnes mit kitai mega tau meli barang ari amazon.com tu lalu dijual ba kedai kitai. Tu mega siti ari peluang pengawa dagang.

Website Amazon.com tu mega siti ari contoh website ti manah enti kitai deka ngada ka website ti dikena nyual barang ti ulih dipegai ianya “tangible product”. Kitai patut belajar sereta berati ka orang ti udah mujur dalam pengawa sida ia. Ari website Amazon.com tu kitai ulih belajar ngaga website dagang internet kitai.

Enti kitai deka meli bup kitai tau ngiga bup ti deka dibeli kitai nengah amazon.com. Maioh bup dijual dia jauh murah ari bup ti dijual di kedai kelebih agi enti ia second hand. Ngena cara tu kitai ulih bejimat ka belanja.

Penutup

Amazon.com tu siti ari website ti manah alai kitai neleba ka diri dalam pengawa dagang internet. Kitai mega ulih belajar ka maioh pekara besangkut paut enggau dagang internet ari website tu.
Enti peninga deka nemu website ni ti manah ditunda kitai, aku sigi rekomen ka kita berati ka website amazon.com tu. Perati ka bakani sida ia ngelaku ka barang. Belajar ka cara sida ia nerima bayar sereta mega mayar komisyen ngagai orang. Cara tu meh kitai ulih belajar.
Kitai mega tau ngiga barang ti bisi dijual ba amazon.com, dibeli kitai lalu dijual ba menua kitai ditu. Kebuah pia enti kitai benasib manah, kitai tau tetemu ka barang ti murah lalu enti dijual di menua kitai ditu kitai ulih nyual ia enggau rega ti tinggi.

Amazon.com mega siti palan ti manah alai kitai ngiga penerang pasal barang ti laku digiga orang kemaya ari tu. Enti kitai bisi barang ti digiga orang tentu meh mudah kitai ulih nyual barang nya nengah ebay.com.

Nya alai peninga, aku arap ka kitai ulih ngerejister diri nyadi associate ba Amazon.com lalu berati ka cara sida ia ngereja pengawa dagang dia. Udah nya kitai nguji enggau orang bebeli ka barang dia.

Kitai enda tau enda ngasai sereta ngereja pengawa dagang internet. Siti ari website ti manah endor kitai neleba ka diri ianya ba amazon.com.

Nya alai peninga,

Kena nutup randau ICT kitai ba Tusun 41 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.