Tusun 11 - Ngiga Penerang Ngena ICT (Bagi 2)

Selamat ngalih hari. Terubah ia aku meri tabi basa ngagai kita peninga.

Selamat kitai begulai baru dalam program Randau ICT. Saritu tu Randau ICT kitai ba Tusun 11. Kita begulai enggau aku, Kassim Jeritan ngenang pekara ICT.

Ba program tu kitai berandau ka bakani ngiga penerang ngena ICT ka ujung ka agi. Minggu nyin kemari kitai ngepun ka randau pasal bakani deka ngiga penerang ngena internet. Minggu tu kitai nyambung randau kitai ngenang penerang ti patut bendar ditemu kitai. Diatu kitai deka berati ka website ti patut selalu dilayar kitai.

Website ti patut selalu dilayar kitai ianya www.gov.my ianya website rasmi Perintah Besai enggau www.sarawak.gov.my ianya website rasmi Perintah Negeri Sarawak.

www.gov.my

Ba website tu maioh bendar penerang pasal perintah besai ulih digiga kitai. Ambi ka contoh ba pengawa pelajar, peluang bekerja serta mega pekara ti besangkut paut enggau pengereja pengawa. Ambi ka contoh, enti kitai diketu ka ari pengawa kitai, nama patut dikereja kitai? Maioh penerang ari pekara ti bakatu ulih ditemu kitai ari website rasmi Perintah Besai tu.
Website tu mega bisi nyendia ka macam bansa form ti ulih download kitai. Reti nya kitai enda iboh datai ngagai ofis perintah besai 2 tauka 3 kali ketegal ngambi form tauka nganjung form. Maioh form ka diguna kitai ulih diambi kitai ari internet, dah tembu diisi ulih terus anjung. Sekali aja kitai nurun, enda iboh suah. Kati, enda jimat pengawa baka tu? Bisi mega form baka Form 8i ti dikena minta pengawa puang ba agensi perintah diisi kitai ba internet lalu abis diisi kitai lalu ulih anjung tekala nya. Semina sida ia nyuruh kitai nganjung resume enggau gambar kitai ngena pos. Enda iboh kitai irau ka form kitai enda datai.

Kitai mega ulih bebayar ka maioh macam bill enggau cukai ngena website tu. Ambi ka contoh orang ti nginjau loan ari PTPTN ulih mayar loan sida ia ditu. Pia mega mayar macam bansa lesen pan ulih dibayar ditu.

Tender ti dikeluar a Perintah Besai mega bisi ayan ba website tu. Tu beguna bendar ba sida ti nyadi kontraktor. Udah nya report ari komiti ti muka tender nya mega bisi dipantai ka ditu.
Maioh mega program pemansang ti dikereja perintah bisi dipadah ba website tu. Ukai semina nya aja, enti program pemansang nya bisi besangkut paut enggau kitai, kitai ulih ngenatai ka Tanya kitai nengah website tu.

Kitai mega ulih ngenatai ka serebana kitai ngagai perintah enti bisi service ofis perintah ti enda ngemuas ka ati kitai. Kitai tau klik ba “public complaint” button alai kitai ulih meda form ti patut diisi kitai. Kitai mega ulih meda saut ari perintah pasal serebana nya tadi.

www.sarawak.gov.my

Ba website tu maioh penerang pasal Perintah Negeri Sarawak ulih ditemu kitai. Kitai ulih meda kementerian ti bisi, tuju pengawa sida. Dia kitai ulih meda semua perintah menua ti bisi di Negeri Sarawak ditu.

Website tu mega bisi mantai ka penerang pasal menua Sarawak. Tu manah bendar dikena kitai nemu sereta ngelala menua kitai enggau dalam agi.

Perintah menua di serata negeri mega bisi ngayan ka penerang pasal menua ti dipegai sida. Reti ia enti kitai deka nemu pasal menua mit ti bukai di seluruh negeri Sarawak kitai ulih meda nya ba website ofis pelilih menua. Semua website sida tu bisi disambung enggau website tu.

Maioh online service bisi disedia ka ba website tu. Contoh ia kitai ulih mayar bill kitai ngena website tu. Ekitai mega ulih ngenatai ka peminta kitai ngagai local Authority ngena e-request.
Kitai mega ulih ngerejista nyadi kontraktor tauka consultant ka ofis perintah ngena e-register.
Pia mega kitai ulih booking facility ti dijaga local authority ngena e-booking.

Kitai mega ulih minta scholarship ti dikeluar ka SPA Sarawak enggau Yayasan Sarawak secara online ngena e-scolarship.

Penutup

Perintah Besai Menua Malaysia enggau Perintah Negeri Sarawak udah bebelanja maioh bendar dikena ngada ka website www.gov.my enggau www.sarawak.gov.my ngambi ka ulih dikena kitai. Kitai enda ulih nemuai ngagai semua ofis perintah nanya ka semua penerang ti diguna kitai. Enti kitai ulih nemuai ngagai semua ofis perintah pan empai temu kitai bulih penerang ti diguna kitai baka kitai ti bulih penerang ari dua iti website tu. Nya alai anang enda nyikap diri enggau maioh macam penerang pengawa perintah ti bisi besangkut paut enggau kitai ngambi ka kitai enda tinggal ari arus pemansang.

Kena nutup randau ICT kitai ba Tusun 11 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog http://kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Mupok aku.

Terima kasih.