Social Icons

twitterfacebookgoogle pluslinkedinrss feedemail

Pages

April 6, 2009

Tusun 31 - Domain Name

Terubah ia aku meri tabi basa ngagai peninga.

Selamat kitai begulai baru enggau aku Kassim Jeritan dalam program Randau ICT. Saritu tu Randau ICT kitai ba Tusun 31.

Saritu kitai berandau ka siti agi pekara ICT kelebih agi pekara internet ti patut bendar diperati ka kitai. Pekara tu besai bendar reti asai ba ati aku kelebih agi enti kitai deka sama besemekih dalam pengawa dagang internet. Perkara ti deka dikenang aku saritu ianya Domain Name.

Dalam jako kitai iban aku enda tetemu ka leka jako ti ulih nganti reti Domain Name tu. Taja pia dalam bahasa melayu leka jako Domain tu agi dikena, enda dikalih ngagai jako melayu. Dipelaba ka aku dalam jako kitai Domain Name tu agi dikena, anang guai nukar nama ia ngagai leka jako kitai iban. Kebuah pia dalam dunya internet Domain Name tu sigi udah ditemu reti ia.

Domain Name tu ianya nama website tauka blog ti dikena kitai. Enti kitai meda Address Box, Domain name tu ianya nama ti nangkan ka www. Ambi ka contoh www.radiokitai.com, Domain name tu ianya Radiokitai. .com tu dikumbai orang extension name. www.radiokitai.com enda sama enggau www.radiokitai.net serta enda sama mega enggau www.radiokitai.info laban extension name ia enda sama.

Enti dalam pengawa dagang di luar din, Domain Name tu tau disema ka kitai baka nama syarikat tauka nama kompeni. Nama kompeni tu direjister ba ofis pengeregister kompeni. Enti di Kuching ditu Ofis tu ba Bangunan LHDN tauka SSM ba Simpang Tiga dia. Sebedau kitai ulih ngerejister nama kompeni kitai, kitai dipinta ngiga nama ti bedau derejister orang bukai. Enti nama ti dikedeka ka kitai udah direjister orang bukai, kitai dipinta ngiga nama baru ti bedau dikena. Udah nama kompeni kitai direjister, baru kitai ulih ngepun ka pengawa dagang.

Dalam dagang internet, pekara tu pan nyau ka sebaka. Tentu meh bisi lain mimit tang reti asal ia sama. Sebedau kitai ulih belabuh ngereja dagang internet, kitai deka ngiga Domain Name ti deka dikena kitai.

Tang sebedau nya kitai deka nemu nama pemgawa dagang kitai. kitai enggai nyadi semina bisi website tauka blog tang nadai batang pengawa dagang. Kitai mesti deka bisi batang pengawa dagang. Enti nadai bakani ka bedagang? Bah, nama batang pengawa dagang kitai deh? Enti peninga agi ingat ka randau kitai ba bulan 2 suba, aku bisi ngenang maioh pengawa dagang ti ulih dikereja kitai. Kitai tau ngelaku ka barang kitai empu. Kitai mega tau ngelaku ka barang orang bukai. Maioh Contoh dipadah ka aku ngambi ka muka jalai dikena peninga ulih ngepun ka dagang internet.

Kena kitai berandau saritu aku ngambi dagang ti nyual pua kumbu nyadi ka contoh ngambi ka nyamai agi kitai berandau. Contoh ia kitai bisi maioh pua kumbu ti deka dijual lalu kitai udah milih pengawa bejual ka pua kumbu nyadi ka batang pengawa dagang kitai. Nya alai Domain Name kitai mesti besangkut paut enggau pua kumbu mega. Enggai nyadi enti kitai engkah domain name kitai ngena nama pemakai baka manok pansoh laban pua kumbu enggau manok pansoh tu nadai besangkut paut sekali. Domain Name kitai tu ulih ngait ka nama pua kumbu enti orang maca ia sekali pansa.

Kitai enggai nyadi terus ngerejister nama www.puakumbu.com . Kesatu, nama tu udah diregister orang bukai. Nya alai enda ulih direjister agi. Kedua, serta mega kebuah ti penting bendar ianya, nadai maioh orang nemu pua kumbu enti ukai bansa kitai iban. Bansa bukai mimit bendar nemu reti pua kumbu. Leboh aku berati ka pemaioh orang ti ngiga pua kumbu dalam internet, nadai penerang pasal orang ti ngiga pua kumbu. Enti pia tusah kitai. Nadai orang deka meli pua kumbu kitai. Ukai bakanya ia. Tiap-tiap barang ti dijual kitai, tentu meh bisi orang deka meli. Semina diatu, kitai mesti nemu ngiga orang ti deka meli. Kitai mesti ulih mantai ka dagang kitai ngagai orang ti bisi ati deka meli.

Bansa bukai tentu meh bisi rindu ka pua kumbu. Pua kumbu tu manah dipeda sereta mega jarang ditemu kelebih agi ba menoa barat, jauh ari menua kitai. Sida ia rindu ka pua kumbu dikena ngias dinding. Sida mega rindu ka pua kumbu laban ia digaga ngena jari, ukai ngena injin. Sida ia rindu meda pua kumbu laban pua kumbu tu siti ari perengka lama ti agi bisi nyentok ka saritu. Tang sida ia maioh enda nemu nama pua kumbu. Nya alai nama domain kitai mesti ulih nerang ka pua kumbu, ukai nama ia.

Kitai tau ngerejister nama www.BorneoTraditionalTextile.com . Penerang pasal menua Borneo maioh digiga orang. Tambah mega tebal agi orang ngiga penerang pasal Borneo ianya pelancung ti deka datai ngagai menua kitai. Nya alai enti orang ngiga penerang pasal Borneo, website kitai nyangka ulih ayan ba search engine result page. Nya tau mai orang nya tadi tetemu ka website kitai. Taja pan orang nya tadi empai temu lalu meli pua kumbu kitai, tang orang bisi meda website kitai.

Kitai ngerejister Domain Name kitai ngena cara berati ka genteran jako ti selalu dikena orang ngiga penerang dalam internet. Domain name ti manah ti ulih mai penguntung ngagai dagang internet kitai ianya Doamin Name ti ngena genteran jako ti maioh digiga orang. Ba contoh pua kumbu ti dkenang aku tadi, nama BorneoTraditionalTextile tu maioh agi digiga orang enti dibanding ka enggau puakumbu. Munyi ti udah dikenang aku, semina bansa kitai iban aja nemu nama pua kumbu. Orang ti enda nemu nama pua kumbu ngena genteran jako ia ngiga penerang ari internet, baka BorneoTraditionalTextile tauka IbanTraditionalTextile. Ngena penemu tu kitai ulih milih Domain Name ti patut dikena kitai.

Anang guai mutus ka runding Domain Name ti deka dipilih kitai. Pilih 5 ngagai 10 genteran jako ti ulih dipilih kitai nyadi ka Domain Name kitai. Genteran jako ti dipilih kitai nyangka ukai genteran jako ti digiga orang maioh. Kitai mesti ngiga pemaioh orang ngiga genteran jako nya. Cara tu ulih digiga kitai dalam internet. Siti ari website ulih dikena kitai enggau cara enda bebayar ianya ba www.goodkeywords.com. Enti bisi orang ngiga genteran jako nya dalam pemaioh enda kurang ari 500 sebulan, genteran jako nya tadi tau dikena.

Udah nya kitai deka ngiga berapa maioh webpage bisi ngena genteran jako ti sama enggau genteran jako ti deka dikena kitai tadi. Tu meh orang ti besemekih enggau kitai. Enti kitai ngena Google tauka Yahoo! Kitai ulih meda bisi lumor ba sudut atas kanan monitor komputer kitai. Nya meh pemaioh website ti bisi sama genteran jako enggau genteran jako ti dikena kitai. Enti webpage ti ngena genteran jako nya nyau kelalu maioh, kitai nyangka enda ulih besemekih enggau sida, laban website kitai agi baru. Nya alai kitai patut ngena genteran jako ti bukai. Nyadi ka lalau, enti pemaioh webpage bukai ti sama ngena genteran jako enggau kitai nya tadi kurang ari 100,000 genteran jako nya tau dikena kitai.

Pilih genteran jako ti bepun ari A enti dibanding ka enggau Z. Contoh ia, pilih BorneoTraditionalTextile enti dibanding ka enggau IbanTraditionalTextile laban search Engine maca Domain Name tu ari A dulu, ditangkan ka B, udah nya C lalu ujung sekali Z. Tang enti enda tau enda engkah nombor ba moa. Contoh ia 1IbanTraditionalTextile.com laban search engine tu maca lumor dulu ari ABC.

Udah kitai tetemu ka genteran jako ti manah, maioh orang ngiga sereta kurang orang enggau besemekih, nya baru kitai tau ngerejister Domain Name kitai. Maioh kompeni sereta website ngada ka service endor kitai ulih ngerejister Domain Name kitai. Giga aja dalam Google taip “Domain”, dia kitai ulih meda maioh website ulih endor kitai ngerejister Domain Name. Ongkos ia mega antara RM30 ngagai RM70 setaun.

Tadi aku bisi ngenang extension name baka .com, .net, .info, .biz, .tv, .mobi, .org enggau maioh mega extension name ti bukai. Search engine nadai meda beda extension name tu. Nya alai anang kelalu irau ka ni bagi extension name ti patut dipilih. Tang enti ulih uji ka ngena .com dulu laban .com tu extension name ti terubah ia dikena. Ari segi Psikologi, orang lancat agi ngena .com. Tang enti .com udah dikena orang kitai tukar ngena extension bukai.

Penutup

Domain Name ti ngena genteran jako ti maioh digiga tang kurang dikena orang bukai ditambah enggau website kitai ti cukup digaga ulih mai dagang internet kitai ngerembai enggau jampat. Nya alai enti kitai ngerejister Domain Name anang enda berati ka pekara ti udah dikenang aku tadi.

Kena nutup randau ICT kitai ba Tusun 31 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

No comments:

 

Sample text

Sample Text

Sample Text