Tusun 55 - Spyware

Selamat tengahari serta tabi basa ngagai peninga.

Selamat kita begulai enggau aku Kassim Jeritan dalam program Randau ICT. Saritu program kitai ba Tusun 55.

Saritu kitai ngenang siti agi pekara ti diasai ka aku patut bendar ditemu kitai dalam dunya ICT ianya spyware.

Spware tu ianya coding ti dilepas ka dalam internet. Ia ngelekat ka diri dalam komputer kitai leboh kitai ngena internet. Pekara tu nyadi leboh kitai melayar webpage tauka website ti bisi dipasang enggau coding tu tadi.

Munyi ka udah dikenang aku ba program kitai ba Tusun 54 nyi kemari, genap kali kitai muka webpage, dia data ti besangkut paut enggau webpage tu tadi dipindah ka ari server diluar din ngagai komputer kitai. Uydah nya baru webpage nya tadi ulih dibuka lalu dipeda kitai ba skrin komputer kitai.

Ditu meh alai spyware tu tadi ulih tama ngagai komputer kitai laban ia dipindah ka sama masuk begulai enggau data bukai dalam komputer kitai.

Tuju spyware tu sigi maioh enda tentu manah. Ia ngumpul penerang pasal kitai ti ngena komputer lalu nganjung penerang tu ngagai komputer orang ti bempu webpage tu tadi. Antara penerang ti diguna sida tu tadi ianya penerang pasal email address kitai. Pia mega spyware tu ulih ngambi penerang pasal email orang bukai ti bisi dalam rekod email kitai. Ari nya orang tu tadi bulih siti set email address ti ulih dijual ia ngagai orang bukai. Email address tu tadi mega ulih dikena ia ngelaku ka barang ia.

Spyware tu mega ulih ngambi penerang pasal bakani kitai ngena computer kitai. Ia ulih nemu sereta ngumpul penerang pasal website ti selalu dilayar kitai. Ari nya ia ulih ngena penerang tu dalam pengawa ti pulai ka penguntung sida ia aja.

Spyware tu mula dikena orang ari taun 1995. Tuju spyware maya tu ianya dikena ngulih ka penerang orang ti ngena computer. Penerang nya lalu digumpul lalu dijual ngagai orang bukai. Kelebih agi spyware tu dikena besemekih dalam pengawa dagang.

Maioh orang enda nemu spyware bisi dalam computer sida ia. Spyware tu enda baka virus laban ia nadai nambah diri dalam flie komputer nya tadi. Ia mega nadai ngacau program ti bisi dalam komputer kitai. Nya alai spyware tu tusah deka ditemu antivirus. Reti ia antivirus enda cukup dikena kitai ngelaban spyware dalam komputer kitai.

Spyware tu mudah agi tama dalam komputer kitai enti kitai ngena Windows Operating System. Tambah mega ia mudah tama dalam komputer kitai enti kitai ngena Internet Explorer nyadi ka browser dikena kitai melayar internet. Kebuah pia laban Internet Explorer tu tebal bendar dikena orang enti dibanding ka enggau browser ti bukai. Nya alai spyware tu digaga tauka diprogram ngambi ka mudah agi tama dalam komputer ti ngena Internet Explorer.

Spyware tu enti siti aja tentu enda kelalu ngacau komputer kitai. Ia nadai ngubah coding tauka program ti udah bisi dalam komputer kitai. Ia enggai ditemu kitai laban tuju ia deka diau dalam komputer kitai lalu ngumpul penerang pasal bakani kitai ngena komputer nya tadi.
Taja pia enti nyau kelalu maioh spyware dalam komputer kitai tentu meh ia ngacau komputer kitai. Ia nyau ngena ruang ti bisi dalam hard disk kitai. Nya ngujung ka komputer kitai makin lubah. Tambah mega ia semampai nguji ngulih ka penerang ari komputer kitai. Nya alai starting-up komputer kitai pan nyadi makin lama. Reti tu tadi enti kitai baru muka computer, kitai lama nganti dulu sebedau computer kitai nya ulih dikena kitai.

Nya alai enti kitai lama nganti udah kitai nekan suis muka computer kitai, computer kitai nya tadi nyangka bisi spyware.

Pia mega spyware tu mega ulih ngacau pengelancar kitai ngena internet. Kadang – kadang computer kitai tau hang laban spyware. Tang suah agi kitai enda nemu computer kitai bisi spyware.

Dikena ngurang ka computer kitai ari kena tama spyware manah kitai bejaga leboh kitai ngena internet. Enti bisi pop-up windows ayan ngumpan kitai enggau macam- macam pekara ti susah deka pecaya,anang peduli ka pop-up nya tadi. Tebal bendar pop-up window tu alai orang engkah spyware ti nganti maya aja tama dalam computer kitai. Enti webpage bisi pop-up ti bansa tu manah agi nutup webpage nya lalu ngiga penerang kitai nengah webpage bukai.
Kitai mega ulih ngada ka anti-spyware dalam computer kitai. anti-spyware tu ianya siti software ti ulih nyidik sereta muai spyware ari computer kitai. Ia diambi kitai ari internet lalu dipasang tauka install dalam computer kitai.

Maioh bansa anti-spyware ti bisi diada ka nengah internet. Bisi nya bebayar serta mega bisi nya enda bebayar. Peninga ulih download siti anti-spyware ti enda bebayar ianya SuperAntiSpyware. Ia ulih diambi kitai ari website www.SuperAntiSpyware.com. Udah kitai download ari website tu kitai install ia ba computer kitai baka kitai install software ti bukai mega. Software tu active lalu deka update tiap hari. Ia bisi madah maya kitai patut update ia ngena cara ngayan ka update window ba skrin computer kitai.

Penutup

Peninga ti dipebasa,

Maioh macam cara orang ngiga penatai pemisi nengah internet. Bisi nya ngena cara ti lurus serta mega bisi nya ngena cara ti enda tentu lurus. Siti ari cara ti enda tentu lurus ianya ngena cara ngada ka spyware dalam computer orang bukai enggau tuju ngulih ka penerang ari computer orang nya tadi. Cara tu enda lurus laban ia nadai pemendar ari orang ti bempu computer.

Maioh bendar orang ngena spyware dalam internet. Taja pan spyware enda balat ngerusak computer kitai enti disbanding ka enggau virus, ia kadang- kadang tau ngacau pengelancar kitai ngena computer. Ia mega tau menuh ka file komputer kitai ngujung ka komputer kitai majak lubah.

Taja komputer kitai bisi anti-virus spyware tu jarang uilih ditemu anti-virus laban ia enda sebaka enggau virus. Nya alai anti-virus aja enda cukup dikena kitai ngelaban spyware tama ngagai komputer kitai.

Nya alai kitai beguna ka anti-spyware dalam komputer kitai.

Kitai enda ulih nyeliah ka komputer kitai ari spyware. Taja pia kitai ulih ngada ka pengelikun komputer kitai ngelaban spyware kitai enti komputer kitai bisi dipasang anti-spyware.
Aku arap ka peninga ulih download superantispyware ari website ti udah dipadah aku dulu tadi ngambi ka computer kitai enda kena spyware ti makin maioh dalam internet.

Peninga ti dipebasa,

Kena nutup randau ICT kitai ba Tusun 54 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google tauka Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.
Enggau nya, mupok aku. Terima kasih.