Tusun 18 - Dagang Internet – "Intangible Products" Nuan Empu

Terubah ia aku meri tabi basa ngagai peninga.

Selamat kitai begulai baru dalam program Randau ICT. Saritu tu Randau ICT kitai ba Tusun 18. Kita begulai enggau aku, Kassim Jeritan ngenang pekara ICT.

Ba program tu kitai nyambung randau kitai ka bakani kitai ulih ngereja pengawa dagang internet.

Dalam program ba Tusun 16 enggau Tusun 17 nyin kemari kitai ngenang bakani kitai ulih ngepun ka dagang internet ngelaku ka barang ti ulih dipegai kitai, tauka tangible products.

Diatu kitai nambah ka penerang kitai dalam pekara ICT ngenang Dagang Internet ngelaku ka barang ti enda ulih dipegai kitai, tauka intangible products. Intangible products tu ianya barang ti ukai fizikal baka lagu, video movie, software, electronic book, electronic megazine, electronic report, electronic photo serta mega maioh macam barang ti bukai. Barang tu dikena kitai enggau enda iboh dipegai. Baka lagu, semina didinga kitai aja. Pia mega baka software semina dikena dalam computer aja.

Dalam dunya ICT, intangible products tu sigi maioh diguna orang. Kebuah pia laban barang barang intangible tu maioh bendar besangkut paut enggau penerang. Pia barang intangible tu ngaga dunya ICT balat bendar mansang ari siti ngagai ari siti.

Nya alai belaboh ari program kitai ba Tusun 18 tu ngagai Tusun 21 ila, ianya nyentok ka ujung bula 2 tu kitai deka ngenang bakani kitai ulih ngaga intangible products nyadi ka penatai pemisi kitai dalam dagang internet.

Terubah ia aku deka ngenang enti kitai bisi intangible product ka diri empu. Contoh ia kitai rindu bendar ka pengawa belagu serta mega landik nulis lagu. Kitai lalu ngerekod kediri lagu kitai nya tadi. Enda iboh bangat ta bisi studio ti manah, asal kitai bisi software dikena ngerekod lagu kitai.

Udah direkod, lagu nya tadi lalu disimpan kitai ngena audio file. Diatu maioh audio software bisi dijual. Pia mega enti kitai meli computer baru, tebal agi audio file nya sigi udah bisi dalam pakej software computer nya tadi. Diatu lagu kitai nya tadi udah sedia dijual dalam internet. Tentu ka lagu kitai nya tadi original laban enti kitai ngupi lagu orang bukai kitai tau kena dawa ba court tegal ti ngelanggar undang2 Intellectual Property. Enti nuan nyual lagu nya RM1 sekali orang download tentu meh nuan untung RM1 nya 100%.

Pia mega enti kitai rindu bemain muzik kitai ulih ngerekod ka muzik kitai, sama cara ngerekod lagu tu tadi. Tu tau dikerembai ka kitai ngagai adat main asal kitai iban ti bukai baka taboh kajat, pengap enggau pantun.

Enti kitai landik sereta rindu ka pengawa nulis tauka ngarang cerita, kitai tau ngaga cerita kita nya nyadi ka bup cerita dalam electronic book. Ia mudah sereta ulih mega dijual dalam internet. Enda iboh kitai ngiga kompeni ti ngeluar ka bup tang kitai ulih naip cerita kita nya tadi ngena Microsoft words. Udah nya convert kita ngagai PDF file ngambi ka cerita kita nya tadi enda ulih diubah orang bukai. Udah nya kita ngaga ebook cover awak ka file ti dijual nuan nya tadi berupai baka gamal bup ti bendar. Diatu ebook nuan nya udah sedia dijual. Diatu ebook dijual antara RM40 ngagai RM300 sekali download. Nya dikira untung beresi.

Enti kitai bisi penemu deka dikunsi enggau orang bukai kitai mega tau nulis ia nyadi ka e-report. Sema jako kitai pandai mekanik kereta lama, kitai ulih bekunsi penemu kitai begaga ka kereta lama ngena cara nulis penemu kitai dalam e-report. Cara ia sama baka nuan ti ngaga ebook nya tadi. E-report dijual orang dalam internet dalam RM30 ngagai RM100.

Enti kitai rindu sereta rajin nulis majalah, kitai tau ngaga ezine, nama singkat bagi electronic megazine. Beda ia enggau ebook tauka eReport, eZine tu deka semampai dikeluar ka belama, ambi ka contoh, sekali sebulan. Orang meli ari kitai ngena cara bebayar bulan.

Enti nuan bisi penemu programming, kelebih agi ngagai sida ka bisi belajar komputer, kita ulih ngaga software. Ketebal agi software tu digaga dikena ngeyamai ka pengawa ti dikereja. Ngena software tu orang ulih ngaga siti2 pengawa enggau jampat agi, mudah agi sereta kurang agi silap. Maioh macam software bisi digaga sereta dijual dalam internet diatu. Software tu dijual antara RM300 ngagai RM3,000 nitih ka pemesai tuju software tu diguna orang.

Penutup
Kitai nyambung randau kitai pasal bakani kitai ulih ngereja dagang internet ngenang cara ti ulih dikena kitai ba program ti deka datai.

Kena nutup randau ICT kitai ba Tusun 17 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka forum alai kitai berandau ba www.kassimjeritan.com/forum alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.