Tusun 24 - Kad Kredit & Internet

Terubah ia aku meri tabi basa ngagai peninga.

Selamat kitai begulai baru enggau aku Kassim Jeritan dalam program Randau ICT. Saritu tu Randau ICT kitai ba Tusun 24.

Dalam randau kitai ba Tusun 22 suba kitai ngenang pasal pengawa orang ti nipu dalam internet. Udah nya dalam randau kitai ba Tusun 23 kitai sama berati ka bakani kitai ulih nyeliah ka diri ari kena tipu dalam internet.

Dalam randau kitai ba Tusun 24 kitai berandau ka siti agi pekara ti beguna bendar ditemu kitai ulih nyaga pengelikun kitai lebuh ti ngena internet kelebih agi enti kitai ngereja Dagang Internet. Pekara ti ko aku ianya Kad Kredit.

Kad kredit beguna bendar enti kitai ngena internet. Tebal agi orang bebayar ngena kad kredit dalam internet. Pia mega kad kredit ulih dikena kitai ngambi duit asil ari Dagang Internet kitai ari Merchant Account.

Kad kredit bisi maioh macam bansa, nama enggau standard. Taja pia kad kredit tu bisi 3 kategori aja.

Kad Kredit

Kategori terubah ianya kad kredit empu. Bank meri kitai facility kad kredit dalam nya bisi kredit limit ari RM2,000 ngagai sampai RM60,000 nitih ka latar belakang penatai pemisi kitai. Enti kad kredit nya udah dikena, leboh cukup tempoh, bill datai, kitai dipinta mayar enda kurang ari 5% tauka penyampau ti dipadah dalam bill nya. Contoh; Visa & Mastercard.

Charge Card

Kategori ti kedua ianya charge card. Ia sama baka kad kredit semina leboh bill datai kitai dipinta mayar semua penyampau ti udah dikena kitai. Nadai ulih belaluh. Contoh; American Express & Dinner Card

Debit Card

Kategori tu lain agi ari dua kategori ti udah disebut aku tadi. Debit card tu baka saving account kitai. Kitai mesti deka masuk ka duit kitai dalam akaun kad nya dulu. Udah nya baru kitai ulih ngena kad nya bebelanja enda lebih ari duit ti udah ditambah kitai dia. Taja pia kitai ulih nguna Debit card tu sama baka kredit card. Kompeni baka Visa & Mastercard sama bisi ngeluar ka Debit Card. Maioh orang ti bisi anak belajar jauh ari sida ngaga ka anak sida debit card laban ulih ngena facility baka kredit kad tang ulih diatur sida enggau penyampau duit ti ditambah dalam nya.

Diatu tebal bendar orang ngena kredit kad. Jarang orang ngena charge card. Debit card kurang agi dikena taja pan ia sigi manah laban kitai ngena duit ti bisi kitai.

Dalam Dagang Internet kad kredit sigi maioh dikena. Baka ti udah dikenang aku dulu tadi, kitai meli barang dalam internet ngena kredit kad.

Maioh penerang dipinta enti kitai mayar ngena kredit kad dalam internet. Kitai dipinta ngisi form madah ka nama kitai. Address kitai mesti ka sama enggau address alai bill kredit kad kitai dianjung. Udah nya kitai dipinta meri no. 16 digit ba kredit kad kitai. Enda cukup, kitai dipinta meri CV code, ianya 3 digit ba belakang kredit kad kitai. Semua penerang tu dikena nentu ka kitai tu sigi orang ti bempu kredit kad nya tadi.

Taja pia penerang ti baka tu muka peluang ngagai orang bukai ti enda manah runding ti deka ngambi ulih ari kitai. Enti sida ia ulih ngambi penerang tu, sida ia ulih ngena kad kredit kitai. Tentu meh kitai rugi enti pekara baka tu nyadi.

Nya alai penting bendar kitai nemu bejaga leboh ngena kad kredit dalam internet.
Kesatu, tentu ka website alai kitai meli barang nya endang website ti betul. Ia ukai sebarang website ti deka semina ngambi ulih ari kitai. Tentu ka kita nemu sapa orang ti endor kitai meli barang. Kitai empu nemu website nya sigi betul. Contoh, kitai tentu enda kakang ati meri penerang kad kredit kitai leboh kitai meli tiket ari AirAsia laban kitai nemu website nya sigi meruan, kompeni pan meruan.

Kedua, enti kita meda ba “Address Box“ ba atas sudut kiba kitai meda https:// ukai semina http:// aja. Enti ngena https:// reti nya semina “one way traffic” aja. Semina nuan siko aja ngena line maia nya. Tang enti http:// nuan ngena 2 way traffic, orang bukai pan bisi ngena line ngagai webpage ti sama dikena nuan.

Ketiga, kena kad kredit ti enda maioh kredit limit. Manah enti kitai ulih ngena kredit kad ti bisi kredit limit enda lebih ari RM5,000. Anang ngena Gold Card tauka Platinum card alai kredit kitai tinggi tauka nadai limit. Kebuah pia, enti kitai nadai nasib lalu nyadi target orang ti ngencuri ari kad kredit kitai kitai enda lenyau duit maioh.

Keempat, register merchant account baka paypal. Enti kitai ngerejister diri ngena paypal, kitai enda iboh suah ngisi form pasal penerang kad kredit kitai tiap kali kitai meli barang. Enti kitai meli barang ngena paypal, paypal ngecaj kad kredit kitai enti nadai laluh duit ba akaun paypal kitai. Paypal mega alai kitai ulih nerima bayar enti orang bisi meli barang kitai. Kitai deka berandau pasal paypal enggau silik agi ba program ti deka datai.

Kelima, anang enda ngibun kad kredit kitai enggau manah. Ia baka duit mega.
Keenam, anang enda ngibun transaction slip kitai enggau manah. Enti kitai meli barang dalam internet, kitai bisi nerima email bisi ngundan electronic receipt dikirum ngagai kitai. Simpan rekod nya enggau manah.

Ketujuh, sedia ka siti email account kediri dikena tuju kitai bejual beli ngena kad kredit kitai. Anang becampur enggau email bukai. Nya ngambi ka nyamai agi kitai nyimpan rekod sereta mega nyidi rekod kitai ti udah.

Kelapan, enti ulih kena Debit Card dibanding ka enggau kad kredit ti bukai. laban nyamai agi kitai nyaga ia. Kebuah pia laban kitai nemu penyampau duit bisi dalam akaun kitai.

Penutup

Kitai enda ulih nyeliah ka diri ngena kad kredit dalam internet. Pia mega kitai anang enda ingat, bisi orang semampai deka ngambi ulih ari kitai enti kitai enda cukup jaga. Laban kad kredit tu besangkut paut enggau duit kitai, tentu meh kitai patut cukup bejaga leboh ngena ia. Taja pia kitai enda patut takut ngena kad kredit dalam internet. Sama baka kitai ti enda patut takut driba kereta taja pan kitai selalu ninga berita pasal orang bebadi di jalai alun tiap ari.

Kena nutup randau ICT kitai ba Tusun 24 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.