Tusun 48 - Nyual Gambar Nengah Internet

Selamat tengahari serta tabi basa ngagai peninga.

Selamat kita begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 48.

Saritu kitai berati ka siti agi peluang kitai ngada ka penatai pemisi kitai nengah internet.
Ngelama tu maioh meh cara kitai ulih ngada ka peluang penatai pemisi nengah internet kelebih agi enti kitai bisi website kitai empu. Taja pia aku nemu ukai semua orang ulih ngaga website kediri empu. Enti ia ulih ngaga website kediri empu ukai reti ia bisi ari ngadu ka website nya.

Taja pan kitai nadai webswite kediri ukai reti kitai enda ulih ngena peluang ti bisi dalam internet. Peluang penatai pemisi ari internet sigi maioh, nanya ka pengerajin kitai ngiga peluang ti bisi.

Aku kala ngenang website baka ebay.com ti ulih alai kitai nyual barang kitai. Ngena website tu kitai enda iboh bisi website laban semua perengka ti patut udah diada ka ba website ebay tu.
Siti agi cara kitai ulih nambah ka penatai pemisi kitai nengah internet ianya nyual gambar ba internet. Maioh bendar website ti nyedia ka service alai kitai nyual gambar digital nengah internet. Bisi nya bebayar, bisi mega enda bebayar laban sida ngambi komisyen ari gambar ti laku dijual kitai.

Bisi website nya mantu kitai ngelaku ka gambar kitai tebal agi website ti bebayar. Bisi mega website ti ngelak ka kitai ngelaku ka gambar kitai kediri kelebih agi website ti enda bebayar.
Peluang tu tebuka besai ngagai orang ti rindu ka pengawa ngambi gambar tauka fotografi. Cukup meh kitai bisi kamera sereta pengelandik ngena kamera nya. Udah nya kitai ulih nyual gambar ti diambi kitai nengah internet.

Maioh website ngada ka peluang alai kitai nyual gambar nengah internet. Saritu aku mai peninga berati ka sekeda website ti bisi ngada ka palan alai kitai ulih nyual gambar ti udah diambi kitai.

Siti ari website ti tau diperunding ka kitai ianya photostockplus.com. Company tu ngada ka palan alai kitai nyual gambar kitai dalam bentuk digital. Sida ia bisi orang sedia meli gambar ti baru. Photostockplus.com tu nyadi orang tengah antara kitai ti bempu gambar engga orang ti meli gambar nya tadi.

Kitai ngerejister diri enggau kompeni tu lalu dipinta mayar fee. Taja pia website tu bisi ngada ka free trial dikena kitai neleba ka diri enggau servis sida ia. Enti kitai ngasai ka servis sida ia tu enda cukup manah ba ati kitai, kitai tau nginsil membership kitai lalu duit ti udah dibayar kitai dipulai ka baru.

Udah kitai masuk nyadi kaban ba website tu kitai ulih mantai ka gambar ti deka dijual kitai. Kitai mega diberi ruang alai kitai ulih ngada ka subpage ti nyau ka baka website ti kediri. Peninga ulih nguji website tub a url www.photostockplus.com.

Siti agi website ti ulih alai kitai nyual gambar kitai ianya ba shutterpoint.com. Enti kitai ngerejister diri ditu kitai mega dipinta mayar membership fee sebedau kitai ulih mandang ka gambar ti deka dijual kitai. website tu mayar kitai enti gambar kitai laku. Cara bebayar ianya ngena akaun paypal. Sida ia mayar kitai udah gambar ti laku dijual kitai manggai lebih ari $50. Peninga ulih nguji ngabas website tub a www.shutterpoint.com

Pia mega peninga tau nguji siti agi website ianya orderpicture.com. Ditu kitai ulih ngerejister diri enggau enda bebayar. Enti gambar kitai bisi dibeli orang nya baru website tu ngambi komisyen ari rega gambar ti dijual kitai nya tadi. Pengawa ngelaku ka gambar mega diatur dalam website tu ti bisi perengka ti udah bisi sedia ngambi ka gambar kitai narit ati orang ti deka meli ia. Peninga ulih ngabas website tub a url www.orderpicture.com lalu brati ka penerang ti silik agi dia.

Nya sekeda ari website ti bisi ngada ka peluang alai kitai nyual gambar kitai nengah internet. Nya alai enti kitai rindu ka pengawa ngambi gambar kitai tau nguji nyual gambar kitai nengah internet.

Kitai enda nemu, gambar nya nyangka tau narit ati orang ti meda ia lalu tekuing deka meli ia ari kitai. Ngena cara nya kitai bulih penatai pemisi.

Maioh orang beguna ka gambar enggau maioh macam tuju. Bisi nya dikena sida ia dalam website, dijual nyadi gambar besai, ngaga poskad, dikena ba ruang iklan enggau maioh macam tuju tu bukai. Nya alai gambar ti diambi kitai nyangka tau berega dipeda mata sida ia tu.

Ba asai ati kitai nyangka meh gambar nya nadai tentu reti tang peninga anang enda ingat, diatu bisi 1.5 Billions orang ngena internet di serata dunya. Tentu meh bisi antara sida tu tekuing ati rindu meda gambar ti udah diambi kitai lalu sanggup mayar rega ti dipinta kitai.

Nya alai peninga, gambar ti udah diambi kitai anang berumban muai ia. Manah engkah ba website ti bisi ngada ka servis nyual gambar nengah internet.

Website ti dirintai ka aku di atas nya tadi semina contoh website ti ngada ka servis nyual gambar nengah internet. Peninga tau ngiga kediri website ti ngemuas ka ati kitai ngena cara ngiga ba Google enggau Yahoo! kita naip “selling photograph” dia ia bisi ngayan ka wesite ti ngada ka sevis tu. Dia kitai ulih milih website ti manah ba ati kitai.

Penutup

Pengerindu kitai ngambi gambar tau nyadi ka siti ari penatai pemisi kitai. Kitai ulih nyual gambar kitai nengah internet. Maioh website bisi nyendia ka servis alai kitai ulih mandang ka sereta nyual gambar ti diambi kitai.

Nya alai peninga,
Kena nutup randau ICT kitai ba Tusun 47 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.