Tusun 15 - Buah Runding Dalam Dagang Internet

Selamat tengah hari. Sekali agi aku meri tabi basa ngagai peninga maioh.

Selamat kitai begulai baru dalam program Randau ICT. Saritu tu Randau ICT kitai ba Tusun 15. Kita begulai enggau aku, Kassim Jeritan ngenang pekara ICT.

Ba program tu kitai berandau ka nama buah runding ti patut dikembuan kitai enti kitai deka nyadi ka ICT penatai pemisi kitai.

Dalam program ti lepas kitai sama udah ngenang pemaioh orang ngena internet dalam dunya tu. Pia mega kitai sama dah nemu pemaioh dagang udah dikereja orang dalam internet.

Kitai ngingat ka baru, dalam taun nyin kemari bisi 1.4 billions orang ngena internet dalam dunya tu. Dalam taun 2006 bisi RM18 Trillions pengawa dagang dikereja dalam internet.

Enggau reti jako siti, enti kitai bisi enggau dalam dagang internet, pengawa dagang kitai nya ulih dipeda tauka ditemu 1.4 billions orang ari serata dunya. Orang ti bedagang ngena cara conventional nemu pemesai reti pemaioh orang nemu dagang kitai.

Ari 1.4 billions nya enda iboh maioh, 0.0001% bisi mansa website kitai sehari ulih men kitai idup nyamai. Ari sida ti mansa nya bisi 1% meli barang dagang kitai bisi meh 1,400 orang meli barang kitai. Seringgit siti barang dijual kitai bisi meh kitai RM1,400 ulih sehari nya.

Nya contoh peninga. Aku meri contoh ti bakatu ngambi ka kitai nemu nama kebuah buah runding ti betul beguna bendar ukai semina dalam dagang internet tang beguna mega dalam pengawa dagang ti bukai.

Pakar pengawa dagang dalam internet bisi nyebut munyi tu;“internet business is a volume game“. Reti nya dalam dagang internet pekara ti patut diberat ka kitai ianya pemaioh orang ti nemu dagang kitai.

Buah runding ti terubah ianya dagang internet tu ukai skim jampat kaya ti suah bendar nipu orang. Kitai bedagang dalam internet mesti bisi barang dijual. Paling kurang kitai ngelaku ka barang orang bukai lalu nerima komisyen. Enti bisi orang meli barang dipedagang ka kitai bisi meh penatai pemisi. Enti nadai orang meli nadai meh ulih kitai. Enda tentu bisi beda ari dagang ngena cara offline.

Buah runding ti kedua, internet tu ukai jalai singkat kitai ngiga pengaya. Kitai mesti deka rajin ngelaku ka website enggau barang kitai. Maioh cara ulih dikena kitai. Maioh system ulih mantu kitai. Enti kitai set up website kitai aja lalu nganti orang datai ngagai website kitai baka nya aja kitai deka teperasa. Laban dagang internet tu ukai pengawa tau ajih. Kitai mesti agi ka kerja keras.

Buah runding ti ketiga, anang ngereja pengawa tu kediri aja. Anang rangka penemu enggau orang bukai. Orang ti mujur dalam dagang internet semua sida ngereja pengawa besaup enggau pangan diri. Giga orang ti ulih bekerjasama enggau kitai. kitai ngelaku ka barang sida, sida ngelaku ka barang kitai. Pengawa tu dikumbai orang laveraging. Anang enda ingat bisi lebih 1.4 billions orang ngena internet dalam dunya tu. Nadai nya ulih tangkup kediri aja.

Buah runding ti keempat, CFC. Committed, Focus, Consistent. Mutus ka runding kitai ba barang ti deka dijual kitai. Maioh macam barang tau dijual kitai. Anang masau ari milih barang ti patut dijual. Nama nama barang digaga dalam dunya tu tentu bisi orang deka meli. Semina kitai deka kerja keras ngenatai ka penerang pasal barang kitai ngagai orang ti ngiga.

Anang runding kiba kanan leboh kitai ngereja dagang internet. Ambi ka contoh, enti kitai ngereja dagang internet ari pukul 9 mlm ngagai 12tgh mlm anang nguji deka muka webpage bukai. Muka email enda meh tau. Laban pengawa limpang kin kitu tau bendar masau jam. Sekali limpang ila lusa deka limpang baru. Nya ngujung ka dagang kitai tejanggal.

Kitai mega patut konsisten. Sebulan, dua bulan, 3 bulan ti terubah nadai penatai pemisi, nadai orang meli kitai lalu ngetu. Bisi orang sampai 2 taun nadai penatai pemisi ari website sida tang enda badu laban sida ia nemu dagang internet tu ukai pengawa ajih. Dalam sida ngembuan ati ti mutus sida diatu sida nya nyau nyamai pengidup bedagang ngena internet.

Buah runding ka lima, kitai patut nyendia ka diri nerima penemu baru. Dalam dunya ICT penemu baru jampat bendar datai. Cara dagang jampat mega berubah. Taja pia enda semua penemu baru tu enda tau enda dikena kitai. Enti kitai kelalu deka berubah nyau nadai pengawa bukai. Asal bisi teknologi baru kitai lalu enggau betukar ngagai teknologi baru. Masau jam bakatu.

Penutup

Sebedau kitai ngepun ka pengawa dagang internet kitai mesti deka ngibun buah runding ti betul. Dalam jako English dikumbai mindset. Enti buah runding kitai enda betul sereta enda tegap kitai mudah bendar ngalah ka diri.

Semua orang bisi peluang ngereja pengawa dagang dalam internet. Nadai siko mensia dalam dunya tu ulih nagang nuan. Asal ati deka. Enti kitai ngumbai diri kelalu tuai aku kala sama kursus dagang internet enggau orang ti umur 62 taun. Gegetar jari tudah tuai megai keyboard tang pengeran ati ia first class. Enti kitai ngumbai diri kelalu biak aku nemu siko anembiak umur 13 taun mujur dalam dagang internet. Nadai lebih ari pengeran ati diguna kitai. Enti nuan enda nemu komputer sekali, enda patut dalam sepintu kita sebilik enda nemu sekali. Kati baka bala kaban kitai. Kerjasama enggau pangan diri. Nuan bisi barang jual, ia ngaga website bisi untung bagi nitih ka udah semaya.

Kena nutup randau ICT kitai ba Tusun 15 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka forum alai kitai berandau ba www.kassimjeritan.com/forum alai kita ulih ngenatai ka komen tauka tanya kita.
Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.