Tusun 45 - Microsoft.com

Selamat tengahari serta tabi basa ngagai peninga.

Selamat kita begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 45.

Saritu aku nyambung kenang pasal website ti patut ditemu kitai. Website ti deka dikenang aku saritu mega siti ari website tauka kompeni ti besai bendar reti sereta jasa sida ia dalam pemansang ICT dalam dunya tu. Kompeni tu tau dkumbai kitai orang ti nentu ka curak kuing tuju pemansang ICT di dunya tu. Kompeni ti deka dikenang aku saritu ianya Microsoft. Url company tu ianya www.microsoft.com

Company Microsoft tu ditumbuh ka dalam taun 1975 di Albuquerque, New Mexico, US. Orang ti numbuh ka company tu ianya William Henry Gates III, tauka dikelala orang Bill Gates.

Bill Gates betemu enggau orang ti ngaga microcomputer ti baru ianya Micro Instrument Telemetry Systyem (MITS) minta diri diberi peluang ngada ka demonstrasi bakani software ti baru digaga ia ianya BASIC Altair 8800 ulih nyadi operating system dalam computer baru tu.
Udah ti nunjuk ka bala saintis ti bempu microcomputer ti baru nya tadi, sida ia rindu sereta setuju ngena Altair BASIC tu dalam computer ti baru nya. Bepun ari nya Bill Gates lalu pindah ari Havard University lalu pindah ngagai Albuquerque alai ngaga MITS tu tadi. Dia meh ia ngepun ka kompeni Microsoft.

Udah nya dalam taun 1980 Bill Gates pindah ari Albuquerque ngagai Bellevue, Washington. Maya nya mega Steve Balmer, CEO Microsoft ti baru diatu, masuk enggau kompeni tu.
Pemujur Microsoft tu dalam pengawa dagang sida ia ianya leboh sida ia ngaga Disk Operating System (DOS). Nya pan enggau cara ti enda sengaja. Dalam taun 1981, Digital Research enggau IBM benong berunding ka kerjasama dagang. Tang pekara ti dikerunding ka sida ia enda bulih pemutus ti ngemuas ka ati, lalu ngujung ka kerjasama ti deka dipadu ka enda nyadi.

Nya alai IBM lalu bekalih ngagai Microsoft ngasuh Microsoft ngada ka CP/M operating system. Operating system nya dikena IBM ba PC ti deka dijual sida.

Ari Agreement nya tadi Microsoft lalu meli klon CP/M ti diberi nama 86-DOS ari Seattle Computer Products. Udah nya IBM meri ia nama baru – PC-DOS.

Udah nya maioh bendar komputer IBM dijual laban tu keterubah ia komputer ti mit dikeluar ka orang ngena cara maioh sekali. Laku bendarf meh computer IBM tu tadi digaga orang ngena cara klon. Microsoft lalu meda peluang ti besai ditu. Sida ia lalu bebendar agi bejual ka MS-DOS ngagai kompeni ti ngaga komputer klon ari IBM nya tadi. Ari kompeni vendor ti mit Microsoft lalu ngerembai nyadi pengeluar software.

Udah nya dalam taun 1983 Microsoft ngeluar ka siti perengka komputer ti enda tau nadai diatu ianya mause, ngena software sida ia ti dikumbai Microsoft Mouse.

Dalam taun 1985 Microsoft bekerjasama enggau IBM ngemansang sereta ngeluar ka siti agi operating system ti dikumbai OS/2. Pia mega berindik ari nya Microsoft ngemansang sereta ngeluar ka Microsoft Windows. Asal Microsoft Windows tu ianya OS/2 ti ngena grafik sereta nyamai agi dikena orang maioh enti dibanding ka enggau operating system maya nya suba ti ngena standard command.

Udah ti ngeluar ka Microsoft Windows, Penatai pemisi Microsoft terus niki. Dalam taun 1986, Bill Gates enggau pangan ia Paul Allen sereta mega Steve Balmer lalu nyadi Billionaire magang. Nambah ka nya 12,000 pekerja Microsoft mega nyadi millionaires laban sida ia bisi syer dalam kompeni nya.

Dalam taun 1989, Microsoft ngeluar ka software ti nyungkak nama kompeni tu tinggi agi ianya Microsoft Office. Dalam komponen tu bisi Microsoft Words, Microsoft Excel, enggau software ti bukai ti maioh bendar dikena ofis di serata dunya.

Udah nya dalam taun 1990 Microsoft ngeluar ka Windows 3.0. Software tu ianya siti Operating system Microsoft ti baru ti jauh nyamai agi dikena enti dibanding ka enggau operating system ti dulu agi laban maioh grafik. Operating system tu mega enda ulih dikacau enggau enda sengaja laban bisi sistem ti ngelindung processor nya ari kena tegu. Maya nya intel 386 processor dikena. Ia laku dijual sampai 100,000 iti dalam dua minggu.

Pemujur Microsoft tu dibai pemujur Microsoft Office dikena orang di serata dunya. Enda salah enti kitai ngumbai pengaya Microsoft sereta mega pengaya Bill Gates empu sigi bepun ari Microsoft Office. Sida ia besemekih enggau WordPerfect enggau Lotus-123 sereta lebih agi dikerindu ka orang enti disbanding ka enggau dua iti kompeni tu.

Dalam taun 1995 Microsoft ngeluar ka Windows 95. Enti dibanding ka enggau operating system ti dikeluar ka sida ia sebedau tu, Windows 95 tu jauh mujur ngering ka Microsoft nyadi kompeni ti pemadu kaya di dunya maya nya suba. Kebuah pia laban Windows 95 tu nyamai dikena.

Orang ti enda kala ngena komputer pan nadai penanggul ngena komputer laban operating system tu cukup nyamai dikena. Dalam tempoh 4 hari, lebih ari sejuta software tu laku dijual. Pia mega Microsoft ngeluar ka Web browser Internet Explorer dikena orang ngelayar internet. Web browser tu dijual kediri nyadi ka pakej tambah Windows 95 ti sigi udah laku maya nya.
Pia mega dalam taun ti sama Bill Gates bepalik ngagai internet dikena ngerembai ka pengaw dagang ia ti sigi udah maju. Ia ngepun ka Microsoft Network tauka MSN. MSN tu nyadi ka payung service ti diada ka Microsoft nengah internet nyentok ka kemaia hari tu.

Udah nya dalam taun 1996 Microsoft bekerjasama enggau NBC ngada ka stesen berita ngena cara bebayar ianya MSNBC.

Dalam taun ti sama mega Mnicrosoft ngada ka Windows CE 1.0 ianya operating system ti dikena Personal Digital Assistant (PDA) ianya computer ti mit agi. Software tu mega laku bendar dijual lalu meri maioh penguntung ngagai Microsoft.

Dalam taun 1997 Microsoft ngeluar ka Internet Explorer 4.0. Sida ia mujur besemekih enggau browser ti tebilang maya nya suba ianya Netscape Navigator.

Dalam taun 1998 Microsoft madu ka Steve Balmer nyadi President kompeni Microsoft. Taja pia Bill Gates agi nyadi CEO enggau Chairman. Taun nya mega Microsoft ngeluar ka Windows 98. Enti dibanding ka enggau Windows 95, operating system tu lebih agi berat ka guna ia dalam internet. Ia nyamai agi dikena orang melayar internet.

Dalam taun 2000 Microsoft ngeluar ka Windows XP ianya operating system ti ulih dikena dalam pengawa ofis enggau di rumah. Windows XP lebih agi nyamai dikena laban maioh ngena grafik sereta ngena mouse aja, enda iboh betekan ka coding agi.

Pia mega dalam taun 2001 Microsoft ngerembai ka dagang sida ia ngeluar ka Xbox, ianya perengka Games. Sebedau tu dagang perengka games tu diempu sereta dikuasa kompeni Sony enggau Nintendo.

Dalam taun 2007 Microsoft ngeluar ka siti agi operating system ianya Windows Vista. Nyentok ka diatu 140 millions software tu bisi dijual. Tu nambah ka penguntung Microsoft lalu agi nyadi kompeni ti pemadu ia kaya nyentok ka saritu.

Dalam taun 2008 dagang Microsoft manggai $60 Billions. Untung beresi sida ia bisi $18 Billions. Sida ia bisi 90,000 pekerja ba 105 Menua serata dunya tu.

Kena ka 27/6/2008 Bill Gates matak diri ari nyadi CEO lalu diganti Steve Ballmer. Taja pia ia agi nyadi Chairman kompeni Microsoft. Semina ia enda agi kiruh berati ka pengawa dagang kompeni tu agi baka ti dikereja ia ngelama tu.

Penutup

Microsoft tu kompeni ti pemadu kaya dalam dunya. Enti kitai berati ka ari pun kompeni tu nyentok ka saritu kitai ulih meda pemendar Bill Gates ngada ka operating system ti makin sehari makin nyamai dikena orang.

Enti suba kitai enda ulih ngena computer enti kitai enda nemu ngena coding, diatu orang ti baru meda computer pan ulih ngena computer laban pengawa tu cukup mudah dikereja ngena operating system ti diada ka kompeni Microsoft.

Enti suba takut kitai ngena computer takut salah tekan tang diatu enti salah tekan keyboard pan nadai ngawa laban enda ngacau operating system ti bisi dalam computer nya. Semua tu nyadi ari pengering ati Bill Gates ti deka ngada ka PC ba genap rumah.

Maioh meh perengka sereta software ti bukai dikeluar ka Kompeni Microsoft tu ti enda ulih dikenang kitai ditu. Cukup meh kitai ngenang jasa Bill Gates tu dalam dunya ICT sigi maioh kelebih agi nyadi ka pengawa ngena computer tu cukup nyamai sereta mudah dikereja kitai ari pengawa kompeni ia ianya Microsoft ti enda ngetu ngemansang ka software sereta operating system.

Nya alai peninga,

Kena nutup randau ICT kitai ba Tusun 45 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.
Enggau nya, mupok aku.

Terima kasih.