Tusun 51 - Skype.com

Selamat tengahari serta tabi basa ngagai peninga.

Selamat kita begulai enggau aku Kassim Jeritan dalam program Randau ICT. Saritu program kitai ba Tusun 51.

Ngelama tu kitai maioh berandau ka bakani kitai bulih penerang nengah internet. Pia mega kitai maioh ngenang website ti ulih pulai ka penguntung kitai kelebih agi dalam pengawa dagang internet, siti peluang dagang ti baru lalu tebuka besai ngagai semua kitai. Enti peninga berati ka semua website ti udah dikenang kitai lalu ngiga peluang dagang internet ari website tu, tentu meh bisi pulai ka penatai pemisi kitai.

Saritu aku deka ngenang siti agi guna internet kelimpah ari ngiga penerang tauka ngada ka website. Saritu kitai ngenang bakani kitai ulih ngena internet berandau enggau pangan diri baka kitai ti berandau ngena telefon.

Nama kebuah kitai berandau ka pekara tu? Enda iboh ngena internet pan kitai ulih betalipon enggau pangan diri?

Siti ari penguntung kitai berandau betalipon nengah internet ianyacara tu murah agi. Siti ari kompeni ti ngada ka servis tu enggau enda bebayar. Kitai nadai bebayar lebih kelimpah ari mayar line internet ti dikena kitai. Reti ia servis tu free.

Diatu maioh computer bisi dipasang kamera tauka webcam. Enti computer kitai bisi webcam, kitai mega ulih bepeda moa enggau orang ti berandau enggau kitai. Cara tu mega ulih diada ka kitai enggau nadai bebayar.

Siti ari kompeni ti ngada ka servis tu ianya Skype.com. kompenui tu ditumbuh ka dalam taun 2002. Orang ti ngada ka software tu ianya Ahti Heinla, Priit Kesasalu enggau Jaan Tallinn. Sida tu ari Estonia. Ofis sida ia maya nya bisi di Luxembourg enggau London.

Skype tu asal ari nama Sky peer-to-peer tauka skyper. Taja pia nma domain skyper.com udah direjister orang bukai. Nya alai sida ia nukar nama kompeni tu ngagai Skype.com.
Skype balat bendar mansang belaboh ari ia ditumbuh ka. Makin sehari makin maioh orang ngena software tu berandau enggau pangan diri nengah internet.

Dalam taun 2005 kompeni tu dibeli eBay.com, siti kompeni ti ngada ka servis alai orang bejual beli barang ngena cara lelong nengah internet. Kompeni tu kala dikenang kitai dalam program kitai ti dulu. Penyampau eBay.com meli skype.com ianya $2.6 Billions.

Dalam taun 2006 kitai ulih ngada ka Video Conferencing tauka berandau bebala maioh ngena Skype laban skype bisi ngada ka sistem alai kitai ulih muka maioh line sekali.

Dalam taun nya mega bisi 100 millions orang ngena servis skype di serata dunya baik nya dalam pengawa dagang tauka dikena diri empu aja.

Orang ti meri kursus maioh ngena cara video conferencing ti diada ka skype.
Dalam taun 2007 Skype ngada ka servis alai kitai ulih bebayar tauka bekirum duit nengah skype enti kitai sama bisi akaun ba paypal. Kebuah pia laban Skype enggau Paypal sama udah dibeli eBay.com kedua.

Enti kitai deka ngena servis skype, kitai download software ti enda bebayar ari website www.skype.com. Udah nya software tu tadi dipasang tauka install kitai ba computer kitai baka kitai install software ti bukai.

Udah software nya dipasang, ia lalu ulih dikena kitai. Taja pia kitai deka ngerejister akaun kitai dulu. Udah nya baru kitai ulih dail ngagai orang ti deka enggau kitai berandau.

Enti komputer kitai bisi kamera ianya webcam, kitai ulih bepeda moa enggau orang ti enggau kitai berandau. Bisi setting tauka webpage ti ulih dikena kitai ngatur pekara tu. Enti kitai enggai ngena webcam pan tau mega. Kitai semina ngadu ka setting ti bisi dia nitih ka penyamai kitai ngena.

Penutup

Enda lama ti udah aku dikangau ka pangan aku ngagai ofis ia ba Batu 3. Udah nya nyau puas ka berandau ia lalu ingat ka diri patut betalipon ngagai manager ba workshop sida ia di Batu 8. Ia madah dalam sehari bisi bebelas kali ia telefon ngagai manager ia din. Belanja telefon nyau lebih seribu dalam sebulan. Kaban aku nya tadi ngada ka bisnes nyewa machinery baka excavator enggau lori.

Aku nanya ia ba workshop sida bisi internet? Ia madah bisi. Nya alai aku lalu madah ia patut ngena skype ba ofis ia ngambi ka ulih berandau enggau manager ia sereta jimat ka ongkos betalipon nya tadi.

Diatu ia ngena skype ba semua ofis sida ia nyengkaum ofis ia di Sibu enggau Bintulu. Sida ia bejimat ka maioh bendar belanja ari ti kurang ngena telefon tang ngena servis skype ti enda bebayar. Semina mayar line internet ti sigi udah dibayar ngelama tu.

Kitai patut berati ka peluang tu dalam pengidup kitai. Enti kita bisi anak belajar di menua bukai, skype tu patut dikena kitai laban ia free. Kitai ulih berandau engau pangan diri ni pengelama deka kitai.

Nya alai peninga,
Kena nutup randau ICT kitai ba Tusun 47 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.