Tusun 36 - ClickBank.com

Terubah ia aku meri tabi basa ngagai peninga.

Selamat kitai begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 36.

Belaboh ari program kitai ba Tusun 31 kemari nyentok ngagai Tusun 35 kemari kitai sama udah ngenang pekara ti patut bisi ba website kitai. Enti kitai sama berati sereta nitih ka pekara tu udah dikenang aku diatu kitai udah bisi website ti menyana sereta ulih dikena kitai belaboh ka dagang internet kitai.

Pia mega dalam program randau kitai ti dulu agi kitai sama udah ngenang bakani kitai milih batang pengawa dagang ti deka dikereja kitai. Enti peninga agi ingat, kitai ulih milih maioh macam batang pengawa dagang ti ulih dipilih kitai. Kitai ulih nyual barang ti digaga kitai. Kitai mega tau nyual barang ti digaga orang bukai. Kitai mega ulih nyual penerang ti dipelaba ka kitai ulih diguna orang bukai.

Saritu aku deka ngenang siti agi pekara ti ulih nambah ka penyakah kitai dalam dagang internet laban ba asai ati aku pekara tu patut bendar dikenang ngambi ka kitai enda kelalu jauh tinggal dalam pengawa dagang internet.

Pekara ti deka dikenang aku ianya pengawa ngelaku ka barang orang bukai. Sama baka orang ti ngereja pengawa dagang di luar din, kedai tauka supermarket ukai semina nyual barang sida ia empu aja tang sida mega nyual sereta ngelaku ka barang orang bukai mega.

Enti kitai berati ka supermarket, maioh bendar macam barang dijual sida ia. Taja pia barang dia ditusun enggau manah nitih ka guna ia. Enti sayur, ia ditusun begulai enggau sayur bukai. Enti gari ia dijual ba alai siti begulai enggau gari bukai. Nya alai taja pan maioh barang dijual ia ukai semina ditugung sengapa tang bisi endor sida ia empu.

Baka nya mega dalam pengawa dagang internet. Kitai enda ulih semina ngarap ka siti aja barang ti dijual kitai tang kitai deka gelaku ka naka pemaioh barang ti ulih. Enti kitai semina ngarap ka siti aja barang dijual kitai, tusah kitai deka besemekih enggau orang bukai.

Saritu aku ngenang bakan kitai ulih besemekih dalam dagang internet enti kitai nyual information products baka ebooks, video tauka lagu. Ba program ti deka datai aku ngenang bakani kitai ulih ngelaku ka barang bukai. Kebuah pia laban diatu website kitai agi baru sereta nadai maioh penerang. Diatu kitai patut ngisi website kitai enggau naka maioh penerang ti ulih ngambi ka ia jampat niki dalam ranking ba search engine.

Ambi ka contoh, kitai rindu ka pengawa main Badminton lalu deka ngaga website kitai nya ngelaku ka perengka badminton. Maioh pekara ulih dikenang kitai pasal badminton dalam website kitai. Taja pia kitai nyangka enda ulih ngada ka penerang pasal semua pekara ti besangkut paut enggau badminton. Kesatu, kitai nadai cukup ari dikena kitai mansik semua penerang pasal badminton. Kedua, penemu kitai pasal badminton sigi bisi takat ia. Enda kitai ulih nemu semua pekara. Ketiga, kitai ka website kitai meri penatai pemisi ngagai kitai enggau jampat. Enti ulih enda lebih ari 3 bulan.

Nya alai kena kitai nangkup pekara tu kitai deka ngiga penerang ti bisi dalam internet ngambi ka ulih dikena kitai. Ditu meh kitai beguna ka website baka ClickBank.com .
ClickBank.com tu siti ari alai orang ngelaku ka information products baka books, movie enggau lagu.

Orang ti ngaga information products maioh engkah barang sida ia ba ClickBank.com ngambi ka ulih dipedagang ka orang bukai. ClickBank.com tu nyadi orang tengah antara orang ti empu barang enggau kitai ti deka ngelaku ka barang orang nya tadi. Kitai ngelaku ka barang orang nya dalam website kitai bulih komisyen ari rega barang ti dijual nya tadi. Komisyen tu dibayar ClickBank.com ngagai akaun kitai enti kitai bisi ngerejister diri dia.

Terubah ia kitai ngerejister diri ba www.ClickBank.com . Udah register kitai diberi siti password dikena kitai muka webpage ti bisi ngundan penerang pasal akaun clickbank kitai. Ari nya kitai diberi nama akaun tauka nickname dikena kitai genap kali kitai ngelaku ka barang ti bisi dalam list ClickBank.com.

Udah nya kitai ngiga webpage ti diberi nama “MarketPlace”. Ditu meh endor kitai ulih ngiga information products ti bisi dijual nengah ClickBank.com.

Pulai ngagai contoh website kitai ti ngelaku ka perengka badminton, dia ba marketplace nya kitai lalu naip keyword “Badminton”. Dia kitai dibai ngagai website ti ngayan ka list information product ti bisi ngundan penerang pasal badminton. Diatu bisi siti ebook pasal badminton bisi dijual nengah ClickBank.com ianya Badminton Secrets ti dijual enggau rega USD37, tauka RM100 duit kitai. Komisyen ti dibayar ngagai kitai enti ngelaku ka ebook tu ianya USD16.32 tauka RM50 duit kitai.

Enti kitai udah mutus ati deka ngelaku ka ebook tu dalam website kitai, kitai lalu click ba “Create hoplink”. Dia kitai dipinta ngisi form. Enda maioh penerang ti diguna dia, semina nama akaun ti diberi ka kitai leboh kitai ngerejister diri dulu tadi.

Udah kitai ngisi form nya tadi kitai diberi siti coding. Coding tu nyadi link dikena kitai mai orang ti mansa website kitai ngagai webpage ti ngelaku ka ebook tu tadi. Enti orang nya tadi nyadi meli ebook nya tadi, kitai lalu bulih komisyen. Komisyen nya tadi lalu dipasuk ka ngagai akaun kitai ba ClickBank.com . Setiap 2 minggu sekali clickbank ngirum ka cek ngagai kitai enti bisi barang laku dijual kitai.

Enti orang ti mansa website kitai nya tadi enda meli ebook nya tekala nya, ia meli maia bukai, agi meh kitai ulih nerima komisyen laban ClickBank.com bisi ngada ka siti coding dikena nyidi penatai orang nya ari website kitai.

Komisyen ti dibayar nengah ClickBank.com tu maioh. Antara 65% ngagai 75%. Information products ti dijual dia mega berega antara RM30 ngagai RM1,000. Enti dikira, kitai ulih nerima komisyen antara RM20 ngagai RM500 ari siti ebook ti laku dijual kitai. Nya alai enti kitai berati ka pekara tu, ClickBank.com tu siti ari endor kitai ulih ngiga penatai pemisi kitai ari internet.
Ia mega jampat sereta nadai maioh pengiroh. Ebook sigi udah ditulis orang bukai. Kitai semina ngelaku ka ebook nya tadi enggau leka jako kitai empu ba website nya.

Enti kitai bisi information product kitai empu kitai ulih mega nyual ia nengah ClickBank.com. Oang bukai ulih ngelaku ka barang kitai. Kitai empu nentu ka berapa kitai meri komisyen ngagai orang ti ngelaku ka barang kitai nya tadi. Udah nya pengawa bebayar ka komisyen nya kitai enda iboh irau laban semua nya dikereja ClickBank.com magang. Ngena cara nya kitai enda iboh kelalu kiruh ngelaku ka barang nya tadi laban maioh orang bukai ngelaku ka barang nya ka kitai.

Penutup

Enti kitai deka besemekih dalam dagang internet, ClickBank.com tu meh siti ari website ti patut selalu diperati ka kitai. Maioh orang bulih penatai pemisi semina ngelaku ka barang ti bisi dijual ba ClickBank.com aja. Kitai mega ulih nambah ka penatai pemisi kitai ngena cara ti sama.
Enti dagang internet kitai udah maju lalu kitai nyau ulih ngaga information product kitai empu, kitai beguna ka ClickBank.com nyadi ka palan endor orang bukai ulih sama ngelaku ka barang kitai.

Kena nutup randau ICT kitai ba Tusun 36 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.
Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.