Social Icons

twitterfacebookgoogle pluslinkedinrss feedemail

Pages

February 7, 2009

Tusun 16 - Bakani Ngepun ka Dagang Internet (Bagi 1)

Selamat tengah hari. Sekali agi aku meri tabi basa ngagai peninga maioh.

Selamat kitai begulai baru dalam program Randau ICT. Saritu tu Randau ICT kitai ba Tusun 16. Kita begulai enggau aku, Kassim Jeritan ngenang pekara ICT.

Ba program tu kitai berandau ka bakani kitai ulih bedagang ngena internet. Dipandak ka aku nama “Dagang Internet.“

Dalam program ti udah kitai ngenang buah runding ti patut dikembuan kitai enti kitai deka ngereja pengawa Dagang Internet.

Enti peninga udah sedia serta mega udah nyikap diri enggau buah runding ti betul serta tegap kitai tau belaboh ka pengawa kitai ti nyingkang ke moa agi dalam pengidup kitai ianya ngereja Dagang Internet.

Dagang Internet ulih dikereja kitai ngena maioh macam cara. Nadai jalai kitai ulih ngenang pekara tu dalam siti program aja. Tang bisi cara ti suah bendar dikereja orang dalam Dagang Internet ti deka dikenang aku ditu.

Sebedau kitai berandau jauh agi pasal pekara tu aku mai peninga ngenang barang ti ulih dijual dalam internet. Barang ulih dijual kitai dalam internet bisi dua macam.

Terubah nya tangible products. Dalam jako kitai barang ti ulih dipegai baka pen, kertas, buku, pua kumbu, barang kraftangan. Maioh mega barang ti bukai ngelingi kitai. Enda semua barang ulih dijual kitai ngena internet. Barang ti jampat jai baka sayur, nasi lemak tauka mi enda tentu ulih jual ba internet. Bedau dibeli orang dah jai ia.

Kedua ianya intangible products , suah mega dikumbai kitai information products. Dalam jako kitai barang ti enda ulih dipegai kitai baka lagu ulih didinga aja, movie ulih dipeda enggau didinga serta mega information product ti ulih dipeda kitai dalam komputer baka ebooks enggau software dalam computer kitai.

Dalam program kitai sekali tu aku ngenang pasal barang ti terubah ianya barang ti ulih dipegai kitai, tangible products.

Cara ti terubah, nuan bisi barang lalu ngaga website dikena nuan madah ngagai internet community nuan bisi barang nya. Ba website nuan nya nuan bisi engkah gambar barang nya, madah ka guna barang nuan, pemesai ia, serta mega maioh penerang bukai ti ulih narit ati orang ti meda website nuan meli barang nya ari nuan. Anang enda ingat madah ka rega barang nya dia. Dalam website nuan mega madah ka cara orang ulih mayar nuan. Nuan mega madah ka berapa lama nuan ulih ngirum ka barang nya ngagai ia ti meli. Udah nuan nerima bayar ari ia nuan lalu ngirum ka barang nya ngagai address ti diberi ia. Maioh cara kitai ulih ngirum. Maioh courier service bisi di menoa kitai. Cara tu digaga nuan kediri. Barang nuan empu, website nuan empu.

Cara kedua, nuan bisi barang nuan ngiga orang bukai ngelaku ka barang nuan ngena website sida empu. Nuan enda iboh bisi website. Tau ga enti deka bisi website kediri. Enti barang nuan laku dijual sida nuan meri sida komisyen nitih ka udah semaia. Anang ngakal pangan diri. Anang ngiga siko aja ngelaku ka barang nuan. Maioh agi orang ngelaku ka barang nuan manah agi. Siti ari kompeni ti besai ba dunya tu ngena cara tu ianya amazon.com. semua orang ulih ngelaku ka barang amazon.com. Munyi ti dipadah aku tadi, tu laveraging.

Cara ti ketiga nuan bisi barang tang tusah dikirum tauka mar rega ulih dijual dalam internet ngena cara advertisement. Sema jako nuan ka nyual rumah, ni ulih kirum ngena poslaju. Tang nuan ulih ngena meri penerang pasal rumah ti deka dijual nuan. Ulih engkah gambar, video rumah nuan, ngambi ka narit ati orang ti deka meli.

Penutup

Kitai nyambung randau kitai pasal bakani kitai ulih ngereja dagang internet ngenang cara ti ulih dikena kitai ba program ti deka datai.

Kena nutup randau ICT kitai ba Tusun 16 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka forum alai kitai berandau ba www.kassimjeritan.com/forum alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

No comments:

 

Sample text

Sample Text

Sample Text