Tusun 69 - Bejual Barang Nengah eBay.com

Selamat tengahari serta tabi basa ngagai peninga.

Selamat kitai begulai baru dalam program Randau ICT. Saritu Program kitai ba Tusun 69.

Dalam program kitai ba Tusun 68 nyin kemari kitai sama ngenang bakani kitai ulih bejual barang nengah internet ngena cara ngada ka website kitai empu.

Taja pia enda semua orang ulih ngada ka website kediri empu. Bisi nya enda nemu sekali ngaga website tauka blog. Bisi nya sigi enda ulih ngena computer lama- lama. Mudah sebening pala enti ngena computer lebih ari sejam. Bisi nya enda sanggup ngeluar ka belanja meli domain name enggau web hosting sereta mayar orang bukai ngaga website tauka blog. Maioh mega macam penanggul bukai enti kitai deka ngaga website kitai empu.

Taja pia ukai reti ia kitai enda ulih bejual ka barang kitai nengah internet. Kitai agi ulih nyual barang kitai nengah internet taja pan kitai nadai website tauka blog kitai empu. Kitai ulih nyual barang kitai nengah website orang bukai.

Maioh website nyendia ka servis ti bansa tu. Website tu ngada ka palan endor orang bejual beli barang lalu sida ia ngambi komisyen udah pengawa bejual beli nya mujur dikereja.

Antara website ti tebilang bendar dikena ngereja pengawa bejual beli barang nengah internet ianya eBay.com. Website tu kala dikenang kitai dalam program ti dulu suba. Pia mega bisi website bukai baka Overstock.com, lalu di menua kitai empu bisi siti kompeni ti udah mujur bendar nyendia ka palan orang bejual beli barang nengah internet ianya Lelong.com.

Tuju sereta cara sida tu nyendia ka servis tu nyau ka sama magang. Saritu aku ngenang siti website ti ulih alai kitai nyual barang kitai ianya eBay.com.

Kitai ulih ngerejister diri ba website eBay.com enggau enda bebayar. Kitai dipinta meri penerang pasal kitai baka nama enggau address ti lengkap sereta mega eMail address ti dikena kitai. Pia mega kitai dipinta meri penerang pasal kad kredit ti dikena kitai mayar eBay.com. Kitai mega dipinta meri penerang pasal akaun PayPal kitai.

Anang irau, penerang ti diberi kitai dia sigi likun. eBay udah lebih 10 taun ngereja pengawa tu. Enti enda cukup pengelikun, tentu meh kompeni tu udah lama ditutup. Kitai semina ulih belabuh ngelaku ka barang kitai ba website eBay.com udah penerang ti diberi kitai nya tadi diperesa eBay.com lalu diaku sigi penerang ti meruan. Udah nya baru kitai tau belabuh ngelaku ka barang kitai ba website eBay.com.

Sebedau kitai belabuh ngelaku ka barang kitai nengah eBay.com, kitai patut bendar berati ka atur ti bisi. eBay.com bisi atur ti terit dikena nyaga pemanah nama kompeni tu. Sida ia mega nadai tentu meri peluang alai kitai ngapil enti akaun kitai kena tutup. Ari nya, pekara ti terubah patut dikereja kitai ianya nentu ka kitai mereti ka atur ti udah ditetap ka.

Antara atur eBay.com ti terit ianya kitai enda tau engkah barang kitai ba sengapa kategori. Kitai mesti deka mereti ka bakani eBay nentu ka kategori barang ngambi ka kitai enda saru dalam pekara tu.

Pia mega kitai patut nemu nama barang ti enda dikemendar ka dijual nengah website eBay.com. Kitai enggai ka barang ti dijual kitai tau ngujung ka akaun kitai kena tutup.

Enti akaun kitai kena tutup kitai enda ulih muka akaun baru laban eBay.com bisi atur ti cukup terit dalam pekara tu. Nya alai kitai patut berati ka atur ti bisi enggau manah.

Semua penerang pasal atur tu bisi diayan ka ba webpage “Help“ alai kitai ulih nemu maioh pekara sereta atur bedagang nengah website eBay.com.

Kitai tau milih cara kitai deka ngelaku ka barang kitai.

Kesatu, kitai ulih ngelaku ka barang kitai ngena cara lelong. Kitai ngeletak rega ti pemadu baruh dulu. Ari nya orang ulih ngeletak penyampau rega sida ia sanggup mayar barang kitai nya. Penyampau rega ti diletak kitai dulu nentu ka penyampau eBay.com ngambi komisyen ari kitai. Tinggi agi rega barang nya diletak kitai, tinggi agi ga komisyen diambi eBay.com ari kitai. Kitai mega ulih milih pengelama barang kitai nya tadi dipandang ka ba website eBay.com. Bisi tempoh sehari, 3 hari, 5 hari, seminggu enggau sebulan. Lama agi barang nya dipandang ka dia, tinggi agi ga komisyen diambi eBay.com ari kitai. Enti kitai meda barang ti dipandang ka ba website eBay.com ditanda “Place Bid“ barang tu dijual ngena cara lelong.

Udah barang kitai laku sereta dibeli orang, eBay sekali agi ngambi komisyen ari rega barang nya ti bendar. Selalu ia rega barang dijual tinggi agi ari rega ia leboh mula kitai mandang ka barang nya ba website eBay.com. Penyampau semua komisyen diambi eBay.com ari kitai dalam sekali kitai mandang ka barang kitai dia antara RM12 ngagai RM20.

Siti agi cara ianya kitai nentu ka rega tetap barang kitai. Sapa dulu mutus ati deka meli barang kitai nya tadi, ia meh bempu barang nya. Ngena cara nya kitai ulih ngurang ka komisyen diambi eBay.com ari kitai laban pandak agi tempoh barang nya dipandang ka, kurang agi komisyen eBay.com. Enti kitai meda barang ti dipandang ka ba eBay.com bisi tanda “Buy Now” tu meh barang dijual ngena cara tu.

Cara ti ketiga ianya kitai ulih meli ruang iklan ba eBay.com. Ruang iklan tu ulih alai kitai engkah backlink ngagai website kitai enti kitai engkah barang kitai ba website kitai empu.

Rega barang ti deka dijual kitai nengah website eBay.com sigi ditentu ka kitai empu. Taja pia kitai patut berati ka rega barang ti sama bisi dijual nengah eBay.com. Enti kelalu mar, nyangka tusah kitai ka nyual barang nya. Enti kelalu murah ari rega orang bukai, rugi ga kitai. Enti ulih tentu ka rega barang kitai nya tadi antara 5% ngagai 10% murah ari barang orang bukai. Taja pia kitai patut ngira ungkus ngirum ka barang nya ngena kurier servis.

Pengelaku barang kitai mega bepanggai ba pengelandik kitai nerang ka guna barang kitai nya. Pia mega, gambar barang nya ti manah sereta terang dipeda mega ulih nyaup ngelaku ka barang kitai besemekih enggau barang orang bukai.

Penutup

Peninga ti dipebasa, nitih ka pansik pasal pengawa dagang internet taun 2008 nyin kemari, bisi 6 millions orang melayar website eBay.com dalam sehari. Pia mega bisi enda kurang ari 20 Ribu iko orang bepanggai ba eBay.com nyadi ka pun penatai pemisi sida ia ngena cara bejual barang nengah website eBay.com tu. Tu mandang ka pemesai guna eBay.com dalam pengawa dagang internet.

Diatu eBay.com udah bisi pampang kompeni sida ia di menua kitai di Malaysia ditu. Kitai patut nguna peluang ti bansa tu dikena kitai nyadi ka internet siti ari pun penatai pemisi kitai. Kitai tau nyual barang ti udah enda diguna kitai agi. Ari 6 millions orang ti melayar website eBay.com genap hari, tentu meh bisi sida tu tekuing hati deka meli barang kitai nya tadi.

Dalam program kitai ti deka datai aku deka ngenang siti agi cara kitai ulih ngereja pengawa dagang internet ngambi ka kitai tebuka runding ka cara pengawa dagang ti ulih dikereja kitai. Ari nya kitai ulih ngemanah ka pendiau pengidup kitai enggau kitai sebilik.

Kena nutup randau ICT kitai ba Tusun 69 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.
Enggau nya, mupok aku. Terima kasih.

Tusun 41 - Ebay.com

Selamat tengahari serta tabi basa ngagai peninga.

Selamat kita begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 41.

Dalam Randau kitai ba Tusun 39 enggau Tusun 40 nyin kemari aku mai peninga sama berati ka website rasmi perintah di menoa kitai ditu ianya perintah negeri Sarawak ba www.sarawak.gov.my enggau perintah Menua Malaysia ba www.gov.my.

Aku arap ka peninga bisi udah ngabas dua iti website tu lalu bulih penerang ti ulih pulai ka penguntung kitai. Pia mega aku ngarap ka peninga udah ngerejister diri ba website tu ngambi ka kitai ulih nerima penerang ba email kitai.

Saritu kitai ngenang siti agi website ti dipelaba ka aku beguna ba kitai kelebih agi enti kitai deka bedagang dalam internet tang kitai enggai kiroh ngada ka website kitai empu.

Suba aku kala ngenang enti kitai deka ngereja pengawa dagang internet kitai patut bisi website kitai empu. Tang saritu aku deka ngenang siti cara kitai ulih sama bulih penguntung ari internet taja pan kitai nadai website kitai empu. Taja pan nadai website, baik nya ketegal kitai ti enggai kiroh tauka kitai enda nemu ngaga website kitai empu, kitai agi ulih sama besemekih dalam pengawa dagang internet.

Website ti deka dikenang aku saritu ianya ebay.com. Ebay tu nyadi ka palan orang bejual beli barang ngena cara lelong. Anang saru peninga reti jako lelong ti dikena aku tu ukai reti ia bejual barang murah enggau barang “second hand” aja.

Cara bedagang lelong ti ko aku tu bakatu: Kitai mandang ka barang ti deka dijual kitai ba wesite ebay.com tu. Udah nya orang ti bisi ati deka meli barang nya tadi lalu ngeletak rega berapa sida ia sanggup mayar rega barang nya tadi. Udah nya tentu meh kitai milih orang ti ngeletak rega ti pemadu tinggi antara sida ka sama berebut ka barang ti dipandang ka kitai nya tadi. Pengawa ti bansa tu meh dikereja orang ba website ebay.com tu.

Ebay.com tu ditumbuh ka 3/9/1995 ba San Jose, California. Orang ti ngepun ka ebay.com tu ianya Piere Omidyar, siko computer programmer ti berasal ari France.

Ebay tu diberi nama asal ari virus ebola ti benung ngerampit orang di serata dunya leboh taun nya suba.

Barang ti terubah dijual ari website tu ianya laser pointer ti udah jai berega $14.83 tauka RM50 duit kitai. Gaga ndar meh tudah Omidyar tu tadi laban ti bulih hasil ti terubah ia ari website nya tadi. Ia lalu ngirum ka email ngagai orang ti udah sanggup meli laser pointer confirm baru ngagai ia madah ka laser printer nya sigi udah jai. Orang ti udah nyanggup meli laser printer nya tadi madah ia sigi rindu begumpul ka laser pointer ti udah jai.

Ari nya Omidyar tu tadi bulih peransang ngada ka website ti alai orang bebeli ka barang ti udah jai. Nyentok ka saritu, nyau udah 15 taun website tu udah bisi, agi maioh orang begiga ka barang ti udah jai dalam website tu. Bisi siti kompeni kasino semampai bebeli ka barang ti udah jai dikena ngias kasino sida ia. Asal bisi barang udah jai dilelong ba ebay.co tu, kompeni kasino tu bisi aja enggau betuie.

Dalam taun 1996, ianya 6 bulan udah ditumbuh ka, dia omidyar tu lalu ngambi orang bekerja enggau ia ngadu ka website tu. Pia mega dalam taun ti sama ebay bekerjasama enggau kompeni bukai nyual tiket bilun ngena internet. Udah nya dagang internet ebay tu ngerembai ngagai pengawa dagang ti bukai mega baka booking bilik hotel nengah internet mega. Maya nya nama ebay tu agi AuctionWeb.

Dalam taun 1997 Omidyar nukar nama AuctionWeb tu ngagai nama echobay.com. Taja pia maya nya domain name echobay.com tu udah dibeli orang bukai. Nya alai Omidyar tu lalu milih nama eBay.com.

Ebay.com tu jampat bendar mansang. Dalam taun 1998 Omidyar tu lalu begelar billionaires. Udah nya dalam taun 2002, kompeni ebay.com tu meli siti kompeni alai orang ulih bebayar nengah internet ianya PayPal.com. Nyentok ka saritu, PayPal.com tu agi diempu ebay.com. Pia mega pemujur paypal.com tu mega nadai ulih ditanding orang bukai dalam pengawa Merchant account.

Diatu ebay.com bisi 15,000 orang ti bekerja enggau sida ia. Revenue sida ia dalam taun 2008 bisi $8.5 Billions, lalu untung beresi company tub a taun 2008 nyin kemari bisi $348 Millions.
Diatu ebay.com bisi pampang ofis enggau website sida ia ba 32 iti menua ba serata dunya. Ba menua kitai Malaysia eBay.com tu ditumbuh ka 1/12 2004 ngena url www.ebay.com.my . Enti peninga muka website tu, ia sama sebaka enggau website ebay.com ti asal. Ia semina berat ka market ba menua kitai Malaysia ditu.

Maioh macam barang bisi dijual orang nengah website tu. Perengka rumah, computer, kerusi meja, perengka injin nyentok ka kereta mega bisi dijual ditu. Berengkah ari taun 2005 pemaioh barang dijual manggai bemilions iti dalam sehari. Pia mega ukai semina barang aja dijual tang orang ti ngereja pengawa mega bisi ngada ka service sida ia nengah ebay.com.

Ebay mega belaboh ngada ka palan ngambi ka orang ulih ngada ka pengawa dagang sebaka enggau sida ia empu nengah program ti dikumbai eBay Developers Program. Ketebal agi sida ia tu ngada ka software dikena mantu orang ti bedagang nengah ebay enggau mega orang ti ngelaku ka barang ebay ngena cara affiliate oprogram. Dalam taun 2005 ebay bisi 15,000 raban ebay Developers Program. Tu nguat ka agi pengering ebay.com dalam pengawa lelong nyentok ka saritu.

Cara pengawa lelong dalam ebay tu mega bisi maioh macam nitih ka gaya barng ti deka dijual kitai dia. Maioh orang rindu meda barang sida ia diperebut ka orang maioh, sida ia engkah barang sida ba Auction-Style-Listing ianya netap ka rega pemadu baruh dulu. Orang ti deka meli barang nya tau ngeletak rega tinggi ari nya. Cara tu maioh dikena orang enti barang nya siti aja tauka unik.

Cara ti kedua ianya rega mati. Ngena cara tu barang ti deka dijual udah diletak rega sereta enda tau diubah agi. Cara tu maioh dikena orang enti bisi stok barang maioh.

Klitai dipinta mayar service charge ngagai ebay eti kitai deka engkah barang kitai dilelong ditu. Penyampau bayar mega nitih ka penyampau rega barang diletak kitai. Mar agi rega barang tinggi agi meh service charge sida ia. Taja pia kitai mayar leboh maya orang ti meli barang ari kitai mayar kitai, service charge lalu diambi ebay maya nya.

Belaboh ari taun 2007 ebay ngada ka siti system alai sida ia meri rating ngagai orang ti nyual barang sida ia nengah ebay.com. Rating tu nitih ka komen ari orang ti meli barang. Antara komen ti digiga ianya komen pasal penyampat barang datai, penyampat orang ti nyual barang nya tadi nyaut Tanya ti besangkut paut enggau barang sida sereta meka pengamat barang ti dijual disbanding ka enggau barang ti dipandang ka ba website tu. Manah agi rating orang ti nyual barang nya tadi maioh agi orang berani mel barang ari sida ia.

Pia mega enti orang bisi nguji deka nipu orang bukai nengah website tu, ebay lalu madam ka nama orang nya tadi lalu enda ulih ngerejister diri agi. Ebay.com bisi system sida ia empu dikena nagang pekarati bansa tu nyadi.

Enda semua barang ulih dijual nengah ebay.com. Antara barang ti enda tau dijual ba enbay.com baka cigarette, Arak, Dadah, senjata api, enggau maioh mega barang ti bisi dalam list barang ti enda tau dijual nengah ebay.com

Kitai ulih ngerejister diri ba ebay.com enggau nadai bebayar. Kitai mega tau bejual ka barang kitai nitih ka cara ti udah ditetap ka ebay.com.

Munyi ka udah kala dikenang aku suba, enti kitai bisi barang ka dijual tentu bisi aja orang deka meli. Ebay.com tu siti ari palan orang maioh begiga ka barang ketebal agi barang ti nyelai sereta jarang dipeda.

Penutup

Ebay.com tu siti ari website ti manah alai kitai neleba ka diri dalam pengawa dagang internet. Kitai ulih belajar sereta ngasai ka bakani kitai ulih bejual barang ngagai orang ti enda kala betemu enggau kitai.

Kitai mega tau ngiga barang ti bisi dijual ba ebay.com, dibeli kitai lalu dijual ba menua kitai ditu. Kebuah pia enti kitai benasib manah, kitai tau tetemu ka barang ti murah lalu enti dijual di menua kitai ditu kitai ulih nyual ia enggau rega ti tinggi.

Ebay.com mega siti palan ti manah alai kitai ngiga penerang pasal barang ti laku digiga orang kemaya ari tu. Enti kitai bisi barang ti digiga orang tentu meh mudah kitai ulih nyual barang nya nengah ebay.com.

Nya alai peninga, aku arap ka kitai ulih ngerejister diri ba ebay.com lalu berati ka caa sida ia ngereja pengawa dagang dia. Udah nya kitai nguji enggau orang bebeli ka barang dia. Nyau kitai udah teleba sereta udah bisi rating kitai tau enggau orang bejual barang dia. Belaboh ari barang ti murah dulu.

Kitai enda tau enda ngasai sereta ngereja pengawa dagang internet. Siti ari website ti manah endor kitai neleba ka diri ianya ba ebay.com.

Kena nutup randau ICT kitai ba Tusun 41 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.