Tusun 26 - Nyaga Anembiak Ngena Internet

Terubah ia aku meri tabi basa ngagai peninga.

Selamat kitai begulai baru enggau aku Kassim Jeritan dalam program Randau ICT. Saritu tu Randau ICT kitai ba Tusun 26.

Saritu kitai berandau ka siti agi pekara ti beguna bendar ditemu kitai dalam pekara ICT ianya bakani kitai ulih nyaga anak kitai ti agi biak ngena internet ngena cara ti patut.

Berapa ari ti udah, leboh ngulu siti pengawa di Kuching ditu aku betemu enggau maioh bala kaban ti udah enggau begulai tang lama udah enda betemu. Sida semina bisi ninga nyawa aku leboh ka bekenang ka pekara ICT dalam program radio tu. Siko ari kaban aku nya tadi bisi ngenatai ka tanya bekaul enggau pekara ti deka dikenang aku ditu.

Ia madah ka diri enda tentu arap ka anak ia ulih nyaga disiplin diri leboh ngena internet. Ia takut ka anak ia tadi bepeda ka utai jai dalam internet lalu ngujung ka anak nya tadi nyadi liar lalu enda ninga jako ajar apai indai. Nya alai ko ia, manah agi enda iboh masang internet ba rumah taja pan diau ba nengeri Kuching. Taja pia ko ia, udah ti suah ninga program Randau ICT belaboh ari bulan 12 suba, diatu runding kaban aku nya tadi nyau tebuka mimit laban maioh pemanah ti dibai ICT dalam pengidup kitai baka tu udah dikenang aku dalam lebih 20 Tusun ti udah.

Pekara ti ditanya ia, bakani kitai ulih nyeliah ka anak biak ngena internet ngambi ka sida enda bepeda ka website ti enda patut. Bisi ka enda jalai tau nagang pekara tu nyadi. Bisi ka enda software ti ulih nutup website ti bakatu enti ia dibuka enggau sengaja tauka enda.

Mula ia aku berati ka tanya kaban aku nya tadi munyi tak mudah cara. Taja pia cara ti dipadah ka kaban aku nya enda patut dikena. Ketegal irau ka anak biak ia salah ngena internet, ia enggai masang internet ba rumah.

Maioh kitai agi bisi ngembuan penemu ti bansa tu. Takut ka anak kelalu maioh cara bulih penerang, kitai irau ka sida bulih penerang ti enda manah. Kitai takut ka sida nunda cara pengidup ari menoa luar ti enda sebaka sereta jauh nyelai ari pengidup kitai ditu. Nyamai agi nadai internet ngambi ka enda iboh kiroh berati ka sida. Enda iboh pedis pala irau ka sida nitih ka cara pengidup ti enda patut dititih ka.

Penemu ti bansa tu enda salah baka ringat ka nyamuk, kibong ditunu. Nangi ka anak enda ulih ajar, enda iboh bisi internet sekali.

Internet sigi ngundan maioh macam penerang. Penerang ti manah enggau penerang ti jai sama maioh magang. Nadai siko mensia dalam dunya tu ulih maca semua penerang ti bisi dalam internet. Empa pemaioh ia. Diatu bisi 1.5 billions tauka 1,500 juta orang ulih ngena internet dalam dunya tu. Semoa sida tu bisi peluang meri penerang sida dalam internet. Pia mega bisi enda kurang ari 500 juta website enggau lebih ari 10 billions webpage bisi dalam internet.

Penyampau nya nambah ninting ari. Nya alai enda iran ati kitai enti bisi penerang ti enda manah bisi dalam internet. Taja pia maioh mega penerang ti manah dalam internet. Bisi mega penerang ti ulih nyadi ka penatai pemisi kitai dalam internet. Nama kebuah kitai semina irau ka penerang ti jai aja sampai kitai enda tepeda ka peluang dagang ti ulih dikereja kitai ngena internet? Runding bakatu patut ditukar.

Anembiak sigi rajin bendar begiga ka penerang. Sida ia bisi ngembuan pengeran ati deka nemu maioh pekara, lebih agi pekara ti baru. Sida mega jampat mereti ka pekara ti baru ditemu sida. Internet nyamai bendar alai sida ngemuas ka ati sida. Penerang ti diguna sida bisi dia magang.
Pia mega maioh website ti ngasoh ati anembiak teperindang baka online games, Video clips, lagu, enggau social networking. Ketegal website ti bansa tu sida ia nyau masau jam ngena internet. Internet nyadi ka pemerindang, ukai alai ngiga penerang.

Maioh orang ti ngembuan ati ti enda manah dalam dunya internet nemu anembiak sigi mudah ngiga macam-macam penerang. Sida mega nemu anembiak ngena internet nyadi ka pemerindang. Sida ngena peluang tu ngambi ulih ari anembiak. Maioh pekara ti enda manah ulih nyadi bepun ari pekara ti bansa tu.

Contoh ia, bisi orang ngumpan anembiak ngena cara social networking, dibai berandau dalam internet dulu, dah nya semaia betemu belah pasar. Leboh ka betemu nya tadi pekara ti enda manah tau nyadi.

Pia mega diatu maioh komputer bisi webcam, ianya kamera ti dipasang ba komputer alai kitai ulih bepeda pangan diri ngena internet. Reti ia gambar anak kitai ulih diambi orang ti enggau ia berandau. Tentu meh gambar tu ulih dikena ngereja pengawa ti enda manah.

Maioh cara kitai ulih nyaga anak kitai ari ngena internet enggau cara ti salah sereta tau ngerugi sida.

Diatu aku deka ngerintai ka bakani kitai ulih ngada ka disiplin dalam ruang bilik kitai ngambi ka internet ulih dikena kitai pulai ka pemanah sereta pemansang dalam pengidup kitai.

Bisi empat pekara ti deka dikenang aku ngambi ka kitai ulih ngurang ka anak kitai ngena internet enggau cara ti tau ngerugi ka ia empu enggau kitai sebilik mega;

Kesatu, berandau enggau manah enggau anak kitai reti guna pengelikun internet. Kitai empu patut nyikap diri enggau penemu bakani internet ulih mai penusah ngambi ka kitai ulih nyikap diri enggau penemu bakani kitai ulih nyaga diri ari penusah ti ulih nuntung kitai. Reti ia, kitai empu mesti bisi penemu ti cukup pasal internet. Anang enda ingat, internet makin maioh diguna diatu. Nadai jalai kitai ulih nyeliah ka diri ngena internet. Nya alai manah agi kitai nyikap diri enggau penemu internet. Bakani kitai deka ngajar anak enti kitai empu enda nemu. Bakani kitai deka belajar pasal internet? Enda iboh jauh, ari internet nya empu. Siti website tau alai kitai bepun ianya ba www.ehow.com. Nyau ka semua penerang ti diguna kitai bisi dia laban website tu alai orang bekunsi penemu.

Kedua, dalam computer kita mesti bisi software ti ulih dkena nagang website ti enda patut dibuka ayan ba skrin computer kitai. Maioh software ti bansa tu bisi dalam internet. Giga “Child Proof Software” dalam Google, sida ia bisi ngayan ka maioh software ti bisi. Bisi software tu bebayar tang bisi mega free. Bepun ari sotware ti free dulu laban nadai tentu maioh beda antara ia ti free enggau ia ti bebayar. Baka antivirus ti udah dikenang aku suba, kenang pasal software ti bansa tu ulih dipeda kita ba www.pcworld.com . Dia kitai ulih nemu pasal software ti patut dipilih kitai laban sida ia berandau ka software dalam website tu enggau silik. Anang enda madah ka anak kitai enti kitai bisi masang software ti bansa tu dalam computer kitai. Sida mesti mereti tuju kitai masang software ti bansa tu dikena nyaga pengelikun, ukai dkena ngiga penyalah sida ia.

Ketiga, tanya ngagai kompeni ti ngada ka service internet kitai baka telekom. Sida ia bisi ngada ka perengka ti ulih napis tauka nyekat website ti enda patut dibuka enti kitai bisi ngada ka peminta. Sida mega ulih nyekat pemgelama siti website ulih dibuka. Tu beguna bendar dikena nagang internet kitai ari dikena main online games.

Keempat, engkah komputer ba ruang tebuka baka ba bilik besai kitai ngambi ka kitai tauka orang bukai ulih meda wesite ti dibuka anak kitai. Enti komputer nya disimpan dalam bilik maca tauka dalam bilik anak kitai, jauh ari peda kitai tauka orang bukai, mudah bendar ati sida ia tekuing deka muka website ti enda patut.

Penutup

Kitai enda ulih nagang penerang ti jai diada ka dalam internet. Kitai mega enda ulih nagang anak kitai ngiga penerang ari internet, baik nya penerang ti patut ditemu sida tauka enda. Pia mega kitai enda ulih nagang anak kitai ngiga penerang ti ulih ngemuas ka ati sida laban anembiak sigi maioh utai ti deka ditemu sida.

Taja pia kitai ulih ngada ka pengelikun ngena internet enti kitai nemu nama penusah ti ulih dibai internet enti ia salah dikena. Anang ketegal takut ka penusah ti tau datai kitai nyau enda berani ngada ka internet ba rumah kitai. Nya tau ngujung ka kitai sebilik rugi ari ti tinggal laban enda bulih penerang ti beguna ari internet. Enggau empat pekara ti udah dikenang aku, kitai ulih nyaga pengelikun diri sebilik ngena internet serta bulih penguntung ari pemaioh penerang ti bisi ti ulih dikena kitai ngemansang ka pengidup diri.

Pia mega sempekat diri sebilik mega beguna bendar dikena nyatup ubah pemansang ti datai enggau enda ulih ditagang bepun ari pemaju ICT. Berandau manah enggau anak kitai. Sida ia mesti mereti tuju kitai deka nyaga pengelikun sida, ukai nyekat sida ti deka ngiga penerang.
Kena nutup randau ICT kitai ba Tusun 26 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.