Tusun 30 - Blog

Terubah ia aku meri tabi basa ngagai peninga.

Selamat kitai begulai baru enggau aku Kassim Jeritan dalam program Randau ICT. Saritu tu Randau ICT kitai ba Tusun 30.

Saritu kitai berandau ka siti agi pekara dalam dunya ICT ianya blog. Diatu blog nyau makin dikerindu ka orang. Maioh orang nyau bisi blog sida ia empu.

Asal blog tu ianya ari leka jako weblog. Mula ia suba ia dikena nyimpan penerang ti diguna kediri empu. Ia sama baka kitai ti nulis bup diary. Tentu meh kitai ingat leboh maya agi skula suba kitai bisi nyimpan diary kitai. Kitai ngerekod nama pengawa kitai sari nya. Nama penemu ti ulih kitai. Sapa orang ti bekelala enggau kitai maya nya. Sapa orang ti dikerindu kitai sari nya. Sapa orang ti ngemedis ati kitai maya nya. Semua nya ditulis kitai dalam diary kitai magang. Orang indu silik agi diary ditulis sida.

Pun penatai blog tu pan sama baka bup diary kelia. Blog tu udah diprogram ka ngambi ka ulih ngerekod pekara ti ditulis kitai sehari nya. Enti kitai berati ka blog, ia bisi madah ka haribulan maia penerang nya ditulis. Blog tu diary dalam internet. Asal ia dikena kitai nyimpan penerang ti ditulis kitai empu.

Tang diatu blog tu udah balat ngerembai. Ia maioh dikena orang. Kebuah pia laban ia nyamai digaga. Senang dikena laban maioh perengka udah sedia enti dibanding ka enggau kitai ti ngaga website kediri empu aja. Blog mega mudah dibaca laban betusun enggau manah. Cara nusun blog sigi udah deprogram ka dulu.

Maioh website bisi ngada ka alai kitai ulih ngaga blog kitai. Bisi nya bebayar tang bisi mega ti enda bebayar. Siti ari website ti bisi ngada ka alai kitai ulih ngaga blog kitai ianya Google.com. Sida ia bisi siti pampang kompeni Blogger.com ti ngada ka alai kitai ngaga blog kitai. Enti kitai ngerejister blog kitai enggau Blogger.com, nama blog kitai ti ayan ba address box nya nama.blogspot.com. Enti peninga berati ka blog ti dikena aku ngenang pekara ICT ianya kjict.blogspot.com, nya siti ari blog ti diregister aku ba Blogger.com.

Mudah bendar kitai ngerejister blog kitai ba Blogger.com. Terubah ia kitai ngerejister Google account kitai. Enti kitai udah bisi akaun email ngena @gmail.com kitai tau enda iboh ngerejister Google account ti baru. Kitai tau terus ulih ngerejister nama blog ti deka dikena kitai. Contoh nama blog ianya kjict.

Enti nadai orang bukai udah ngerejister nama blog nya tadi, kitai dikemendar ka ngena nama ti dikedeka ka kitai. Tang enti nama digiga kitai bisi udah diregiser orang bukai kitai dipinta ngiga nama baru ti bedau dikena.

Udah kitai ngerejister nama blog, kitai dipinta milih corak blog ti bisi udah disedia. Pilih corak ti dikerindu ka kitai. Anang irau enti kitai enda puas ati ka corak nya tadi laban corak nya ulih diganti kitai enggau corak ti bukai. Kitai ulih nganti corak blog kitai sebarang maya dudi ari ila.
Udah kitai tembu milih corak blog kitai nya tadi, diatu kitai ulih nulis ba blog kitai lalu posting ngagai blog kitai nya tadi. Diatu blog kitai nya ulih dipeda orang bukai ngena internet.

Cara blog ngena Blogger.com tu siti ari cara kitai ngaga blog enggau mudah sereta jampat. Pia mega kitai ulih mandang ka gambar ba blog kitai. Enda cukup dia, kitai mega ulih mandang ka video clip dia. Kitai mega ulih mandang ka blog kaban kitai ti bukai. Maioh mega pekara bukai ulih dikereja kitai kena nambah ka penerang ba blog kitai nya tadi ngambi ka orang bukai rindu maca blog kitai.

Siti agi blog ti suah dikena orang diatu ianya wordpress. Enti kitai ngena wordpress kitai dipinta ngerejister nama domain kitai empu. Contoh nama domain tu baka kassimjeritan.com, radiokitai.com, AirAsia.com. kadang – kadang sida tu ngena .net, .info, .name enggau maioh mega nama iko ti bukai. Diatu ungkus ngerejister nama domain kitai nya bisi RM30 setaun. Maioh company dalam internet ulih alai kitai ngerejister nama domain kitai nya tadi. Kitai ulih goga ba Google ngena leka jako “domain”.

Udah nya kitai ngerejister web hosting account alai kitai engkah nama domain kitai nya tadi. Ungkus ngerejister web hosting diatu bisi enda kurang ari RM50 setaun. Dalam control panel web hosting nya tadi kitai ngiga Fantastico. Enti kitai klik ba Fantastico nya kitai meda maioh perengka udah sedia dia. Siti ari perengka ti bisi dia ianya wordpress. Ari nya meh kitai ulih ngadu ka blog kitai ngena wordpress. Blog kitai ayan ngena nama baka website nitih ka nama domain ti udah direjister kitai. Contoh wordpress blog ianya blog aku empu ba kassimjeritan.com. Kitai ngena wordpress enda bebayar. Kitai bebayar dikena meli nama domain enggau web hosting kitai.

Peninga anang irau enti kitai bedau nemu nama reti nama domain enggau web hosting laban pekara tu deka dikenang aku dalam program ti deka datai.

Diatu maioh orang bisi ngada ka blog diri empu. Blog tu bisi dua iti guna ti besai. Kesatu, dikena kitai nyimpan penerang ti diguna kitai empu. Penerang ti disimpan kitai dia ukai semina disimpan dalam computer kitai tang ia mega disimpan dalam computer besai alai kitai ngerejister blog kitai. Reti ia kitai ulih muka fail kitai taja pan kitai enda ngena computer kitai empu.

Kedua, kitai deka madah ka orang bukai runding ati kitai. Kitai nulis pekara dalam runding kitai lalu bekunsi enggau orang bukai ti sama ngiga penerang pasal pekara ti dirunding kitai. Enti kitai benasib, penerang ti dikunsi kitai diguna orang maioh nya ngujung ka blog kitai laku. Maioh orang datai maca penerang dalam blog kitai. Ditu meh alai kitai bepeluang ngelaku ka dagang internet kitai. Enti maioh orang maca blog kitai kitai mega bepeluang ngada ka ruang iklan. Ruang iklan tu nyadi ka siti agi pun penatai pemisi ari internet.

Enti kitai bisi pengerindu nulis, blog tu mega siti ari cara kitai ngepun sereta ngerembai ka pengawa nulis kitai. Kitai enda iboh nganti kompeni ngencelak tauka kompeni ti ngeluar ka bup meli hasil tulis kitai nya. Kitai tau nulis kediri dalam blog kitai lalu ngelaku ka hasil tulis kitai nya tadi kediri empu. Ari nya kitai bulih penatai pemisi.

Enti kitai enda tentu nemu ngaga website, blog tu siti nyadi ka palan ti manah nganti website. Pia mega bantu ari blogger ti bukai semampai bisi enti kitai bisi penanggul. Blog ari Blogger.com cukup mudah dikena. Nya alai kitai enda irau ka pekara teknikal laban semua nya udah diprogram ka magang.

Blog ti ditulis kitai ngayan ka buah runding kitai. Nya alai kitai anang enda bejimat enti nulis dalam blog kitai. Ia ngayan ka ulah kitai. Ia alai orang meda bakani gaya runding kitai. Tambah diatu orang nyau maioh ngiga penerang ngena internet sebedau ngiga penerang ngena cara bukai. Enti kitai bisi blog, penerang pasal kitai sigi udah ayan dalam internet.

Nyaga pemanah nama dalam internet sama besai reti enggau nyaga pemanah nama ba luar internet. Nya alai enti penerang ti ditulis kitai dalam internet ngayan ka runding ti enda manah, orang pan ulih nyagam gaya penemu sereta runding kitai. Nya alai taja pan kitai enda ngena nama kitai ti bendar, bisi maya kitai salah jaga penerang pasal kitai ulih ditemu orang. Taja kitai enda ngena nama ensumbar, lama laun kitai ditemu orang mega. Maioh penerang ti manah ulih dikunsi kitai dalam blog kitai. Enti penerang kitai nya tau ngemedis orang bukai tentu meh kitai patut berunding panjai sebedau mandang ka ia ba blog kitai. Kebuah pia, enti penerang nya udah ayan ba blog kitai ia enda ulih ditarit kitai pulai baru. Taja pan kitai delete penerang nya ari blog kitai, rekod ia agi bisi dalam komputer besai alai kitai ngerejister blog kitai nya tadi.

Penutup

Blog nyau makin maioh dikena orang diatu. Ia nyau ka sama popular enggau website. Blog jauh nyamai digaga enti dibanding ka enggau website. Pia mega ia jampat digaga sereta ulih ayan ba internet tekala nya.

Manah bendar enti peninga ulih ngada ka blog diri empu. Kitai bepun ngena cara ti mudah ianya ari blogger.com. Udah kitai nyau ransing pengelandik kitai nyau nambah, baru kitai tau ngena blog ti manah agi baka wordpress.

Tulis penerang dalam blog kitai baka kitai ti berandau enggau orang bukai. Kitai deka ngayan ka penemu kitai ngambi ka enggau pengelandik ti bisi kitai ulih sama besemekih dalam dagang internet enggau orang bukai. Anang guai berandau ka pekara ti tau ngenusah ka kitai dudi ari laban tuju kitai ngena internet patut pulai ka pemanah pengidup kitai, ukai ka ngiga penusah. Tambah mega maioh penemu ti manah tau dikunsi ka kitai enggau orang bukai ngena cara blog.
Kena nutup randau ICT kitai ba Tusun 30 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.