Tusun 10 - Ngiga Penerang Ngena ICT

Selamat ngalih hari. Terubah ia aku meri tabi basa ngagai kita peninga. Selamat Taun baru Taun 2009.

Selamat kitai begulai baru dalam program Randau ICT. Saritu tu Randau ICT kitai ba Tusun 10. Kita begulai enggau aku, Kassim Jeritan ngenang pekara ICT.

Ba program tu kitai berandau ka bakani ngiga penerang ngena ICT.

Enda berasai nyau dah 2 bulan kitai berandau ka pekaa ICT. Kitai dah berandau ka reti ICT, asal komputer serta enggau asal internet. Pia mega kitai sama dah berandau ka pekara ti patut diperati ka kitai enti kitai deka meli computer enggau perengka computer ti bukai. Ujung minggu nyin kemari kitai sama ngenang pakej internet ti bisi disedia ka ba menua kitai.

Bulan tu kitai ngenang pekara ICT enggau dalam agi. Diatu kitai sama ngenang bakani kitai ulih ngena ICT dalam pengidup kitai. Kena kitai mungkal kenang ba tuju ti kedua Randau ICT kitai aku mai kitai berandau ka bakani kitai ulih ngiga penerang (information) ari internet.

Tebal agi orang ngena internet laban deka ngiga penerang. Bisi meh nya ngena internet enggau tuju ti bukai baka pemerindang, games enggau networking. Tang lebih ari 90% orang ngena internet ngiga penerang.

Orang ngena penerang maioh tuju. Siti ari guna penerang ti pemadu besai ianya dikena mutar ka penanggul. Ia bisi penanggul, suntuk runding tauka malu nanya tauka maioh mega penanggul ti bukai. Sida ti bansa tu ti maioh bendar ngena internet ngiga penerang bakani deka mutar ka penusah sida.

Pia mega orang ngga penerang dikena nambah ka penemu. Ambi ka contoh, student ngiga penerang dikena assignment sida.

Nasib bendar diatu maioh penerang ulih diambi kitai ari internet. Cara ngulih ka penerang tu mega bisi maioh macam.

Siti ari cara ti pemadu mudah serta mega pemadu maioh dikena orang ianya ngena search engine baka Google enggau Yahoo!. Enti kitai muka komputer, lalu komputer kitai disambung ngagai internet, ba address box kitai naip “Google“ tekan “enter“ kitai lalu meda webpage Google. Ba search box kitai naip nama penerang ti digiga kitai lalu enti kitai tekan “enter” dia kitai meda result page ianya list webpage ti bisi penerang ti besangkut paut enggau penerang ti digiga kitai.

Ambi ka contoh, enti kitai naip “guitar” dia kitai meda list webpage ti bisi penerang pasal guitar dalam internet. Diatu bisi 200 millions webpage bisi penerang pasal guitar ba internet.
List webpage nya ukai ditusun sebarang. Webpage ti maioh agi penerang pasal pekara ti digiga kitai ditusun ba list ti pemadu tinggi. Webpage ti kurang agi penerang pasal pekara ti digiga kitai ditusun ba list ti baruh agi. Tu dikumbai Page Ranking. Anang irau, pekara tu deka dikenang kitai ba program ti deka datai.

Enti kitai berati ka webpage nya, enti ujung ia ngena .com, .net, .biz enggau .info webpage tu dikumbai commercial webpage. Webpage ti bansa tu dikena orang bedagang tauka e-commerce website.

Enti ia ngena .org ia dikumbai community webpage tauka webpage gerempong ti ukai dikuasa perintah.

Enti ia ngena .gov webpage tu webpage perintah, ofis perintah tauka agensi ti dikuasa perintah.
Enti ia ngena .edu ia nya webpage tempat belajar baka skula, kolej enggau universiti.

Diatu bisi mega webpage ngena .tv alai ia ulih dipeda ngena TV enggau caa ti bebayar. Pia mega bisi webpage ngena .mobi alai ia ulih dipeda ngena handphone.

Diatu mega bisi webpage ngena .me tebal agi dikena blogger laban ia lebih personal agi munyi ia.
Kitai ulih milih ni webpage ti deka dibuka kitai dulu. Enti kitai klik ba webpage ti udah dipilih kitai ia lalu ayan lalu penerang ti diguna kitai nyangka bisi dia. Enti penerang nya enda cukup ba ati kitai kitai tau nambah ka jako penerang nya panjai agi. Ambi ka contoh “guitar” nyangka kelalu general, kitai nyangka deka ngiga “electric guitar” tauka “fender electric guitar”.

Penutup
Maioh cara kitai ulih ngiga penerang ari internet. Kitai patut nyadi ka internet siti ari endor kitai ngiga penerang dikena mutar ka penanggul kitai serta mega nambah ka penemu kitai. Kenang pasal Ngiga Penerang Ngena Internet Bagi 1 dilengka ka aku naka tu dulu.

Minggu dudi kitai berandau ka pekara tu ka ujung ka agi ngenang website ti patut selalu dilayar kitai.

Kena nutup randau ICT kitai ba Tusun 10 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog http://kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Mupok aku.

Terima kasih.