Tusun 9 - Internet Provider

Selamat kitai begulai baru dalam program Randau ICT. Saritu tu Randau ICT kitai ba Tusun 9. Kita begulai enggau aku, Kassim Jeritan ngenang pekara ICT.

Ba program tu kitai ngenang pasal internet provider ti bisi di menua kitai.
4 minggu ti udah kitai berandau pasal pekara ti patut diperati ka kitai enti kitai deka meli komputer enggau perengka komputer ti bukai. Diatu kitai ngenang pekara ICT enggau dalam agi alai kitai sama berati ka internet services ti bisi ba menua kitai.

Dial-up Package
Pakej internet ti pemadu asas sereta mega pemadu murah ianya Dial-up package. Enti kitai ngena pakej tu kitai beguna ka line telefon disambung ngagai komputer kitai. Enti kitai deka besambung ngagai internet kitai dial nombor ti nyambung ngagai internet. Nya meh kebuah ia dikumbai kitai Dial – up Package.

Speed dial-up pakej tu ianya 56kbps. Reti nya paling laju dalam sa second ia ulih transfer file pemesai 56 kb. Kadang – kadang kurang ari nya nitih ka factor ti bukai baka gaya ari enggau kabel telefon ti dikena kitai.

Dalam pakej tu bayar bulan ia belabuh ari RM5. Taja pia pengelama kitai ngena internet dibayar kediri dalam bil telefon kitai. Reti ia lama agi kitai ngena internet maioh agi ga bayar kitai, nambah ka bayar bulan tu tadi.

Bisi mega pakej tu dijual ngena cara prepaid. Kitai deka meli dulu reload card sebedau ulih ngena internet. Cara tu sama baka reload kad ba prepaid handphone kitai.
Dial up pakej tu ulih dikena kitai asal meh kitai bisi line telefon. Maioh bengkah kompeni bisi nyendia ka pakej tu. Ambi ka contoh Jaring enggau tmnet.

Wired Broadband
Broadband selalu dikumbai high speed internet laban ia laju agi enti dibanding enggau dial-up package. Enti pakej nya ulih transfer data 256kbps tauka laju agi ia tau dikumbai broadband internet.

Pakej broadband tu nyau makin popular. Siti kebuah ia makin dikerindu laban speed ia laju agi ianya manggai ngagai 1Mbps (1,000 kbps). Reti nya paling laju ia ulih transfer file 1Mb dalam sa second. Tentu meh bisi kurang ari nya laban bisi factor ti bukai mega. Wired broadband tu ianya computer kitai disambung ngagai line telefon baik nya ari modem terus sambung ngagai computer kitai tauka ngena wireless Adaptor.

Wired broadband ulih dikena enti line telefon kitai tu ngena fibre optic aja. Tu beda ia enti dibanding enggau dial-up pakej ti ulih ngena sebarang line telefon. Nya alai taja pan bisi line telefon, ukai reti ia kitai bisi wired broadband.

Cellular Broadband
Cellular broadband tu dipancar ka ari tower sama enggau tower ti mancar ka signal ngagai handphone kitai. Ia nyau makin popular laban ukai semina speed ia laju tang mega mobile serta enda iboh beguna ka line telefon baka wired broadband enggau dial-up package. Tambah mega ia ulih dikena ba handphone, ukai semina ngena computer aja. Di menua kitai cellular broadband tu selalu agi dikumbai 3G. Pakej ti laju agi speed dikumbai 3.5G.

Speed cellular broadband tu antara 384kbps ngagai 1Mbps (1,000 kbps) nitih ka pakej dipilih kitai. Laju agi speed ia mar agi meh kitai mayar tiap-tiap bulan.
Nyau ka semua kompeni telekomunikasi ba menua kitai bisi nyendia ka pakej cellular broadband. Tentu ka ni pakej ti ulih dikena enggau terang ba alai kita diau.

Bakani deka milih internet service provider?

Enti kitai diau di menua pesisir, asal kitai bisi line telefon kitai ulih ngena internet tang nyangka ulih ngena dial-up pakej aja. Tang enti kitai diau di nengeri baka Kuching, Sibu, Bintulu enggau Miri kitai bisi maioh agi endor milih pakej ni ti deka diguna kitai.

Kitai milih pakej internet service nitih ka guna kitai. Tentu meh kitai ka ka pakej ti pemadu laju laban nyamai agi dikena. Tang laju agi speed ia mar agi meh bayar bulan kitai.
Enti kitai milih pakej broadband kitai mayar sebulan enda kurang ari RM40. Taja pia tentu ka pakej nya nadai bayar service ti bukai baka bayar bil telefon ti dikena kitai leboh ngena internet (unlimited access).

Pilih pakej internet ti ngena computer, ukai ngena handphone. Skrin handphone tu mit, medis ka mata nya alai tusah kitai deka ngena ia enggau lama. Tentu ka support service kompeni alai kitai melanggan internet service nya manah. Enti selalu system down rugi ga kitai. Dalam pengelama aku dah ngena internet, nadai ga aku bisi penangul dalam pekara tu. Support service internet provider di menua kitai ditu manah.

Bisi pakej nya datai enggau kontrak 2 taun. Reti ia kitai enda ulih mutus ka line dalam tempoh kurang ari 2 taun. Enti kitai mutus ka line kurang ari 2 taun kitai deka dipinta mayar penalty. Tentu ka agreement kita terang dalam pekara tu. Kontrak ti baka tu selalu dikena enti kitai ngena broadband pakej.

Penutup
Enggau naka ulih meh kitai ngada ka internet ba rumah kitai. Enti kitai bisi line telefon di rumah sayau ga enti nadai internet. Enti ulih kitai ngena pakej ti laju ngambi ka kitai ransing agi ngena internet. Manah bendar enti kitai ulih ngada ka bajet dikena kitai ngena internet.

Kena nutup randau ICT kitai ba Tusun 9 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog http://kjict.blogspot.com alai kita ulih ngenatai ka komen tauka tanya kita.
Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Mupok aku.

Terima kasih.