Tusun 47 - Aweber.com

Selamat tengahari serta tabi basa ngagai peninga.

Selamat kita begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 47.

Saritu kitai ngenang siti agi website ti besai bendar guna dalam pengawa dagang internet. Sebedau aku madah ka nama website ti deka dikenang aku manah agi kitai ngenang tuju website tu.

Ba Tusun program kitai ti dulu suba aku kala ngenang siti ari komponen pengawa dagang internet ianya Autoresponder. Tuju Autoresponder tu ianya nerima email ti ditinggal ka orang ti bisi ngelayar website kitai. Udah kitai bulih email orang nya tadi kitai ulih nganjong penerang dalam email ngagai ia sereta mega email ti bukai nangkan ka nya.

Jarang bendar orang ti datai ngagai website kitai bisi datai baru dudi hari ila. Semadi meh website kitai tebilang nama baka google.com, yahoo.com, facebook.com, airasia.com. Taja pia enti kitai bisi email orang ti kala ngelayar website kitai, nyamai meh kitai madah ka penerang pasal pengawa dagang kitai ngagai orang nya tadi.

Pia mega jarang bendar orang ti terubah ia datai ngagai website kitai lalu terus meli barang di dijual kitai tekala nya. Semadi meh nyau beberapa kali udah nerima email ari kitai nya baru hati ia bisi tekuing deka meli barang kitai. Nya alai kitai beguna ka perengka tauka sistem ti ulih ngirum ka email ngagai orang ti udah melayar website kitai. Sistem tu dikumbai orang Autoresponder.

Nitih ka nama ia mega, autoresponder tu ianya sistem ti malas email orang bukai ngena cara automatik. Semina leboh kitai baru ngena ia kitai deka ngada ka setting dulu. Udah semua setting tembu dikereja kitai baru autoresponder kitai ulih bekerja enggau cara automatik.

Bisi dua macam bansa autoresponder.

Kesatu ianya autoresponder ti dibeli kitai lalu dipasang kitai dalam komputer kitai tauka upload kitai ngagai hosting. Autoresponder tu baka software ti bukai ti dikena dalam komputer kitai. Kitai meli autoresponder tu ari vendor lalu dikena kitai udah kitai ngada ka setting. Autoresponder ti bansa tu dikumbai stand alone autoresponder.

Siti agi bansa autoresponder tu ianya autoresponder ti diada ka kompeni bukai. Sida ia ngada ka sistem ti ulih dikena kitai tang semua nya dikemata ka kompeni tu tadi ari website sida ia empu. Autoresponder kitai enda dipasang dalam komputer kitai tang dipasang ba hosting kompeni tu tadi. Kitai semina ngada ka setting lalu engkah coding dalam website kitai. Autoresponder tu dikumbai Third Party Autoresponder.

Kompeni ti deka dikenang aku saritu ianya kompeni ti ngada ka third party autoresponder ianya Aweber.com.

Aweber.com tu kompeni ti nyulut bendar dalam nyendia ka servis autoresponder.
Aweber.com ditumbuh ka dalam taun 1998 di Newtown, USA. Orang ti numbuh ka kompeni tu ianya Tom Kulzer. Tom bulih runding ngada ka aweeber.com tu leboh ia berati ka pengawa ia empu ti bejual ka perengka komputer dalam pun taun 1990. Pekara ti diperati ka ia ianya taja pan maioh orang ti ngerejister diri dalam kompeni sida ia maya nya, pemaioh perengka komputer dijual enda ngemuas ka ati laban nadai orang ulih ngerandau semua orang ti bisi ngerejister diri maya nya suba.

Udah nya bisi siko pangan Tom Kulzer tu tadi nanya ia enti ia sanggup meli software dikena ngelaku ka barang nengah email. Tom lalu berunding bakani deka ngemanah ka software nya tadi ngambi ka ulih dikena ngirum ka email ti betangkan- tangkan ngena cara automatik. Kebuah pia laban Tom Kulzer tu nemu orang ti nerima email nya enda mudah meli barang ngapa semadi meh ia udah nerima maioh email.

Udah nya dalam taun 1998 Tom mujur ngaga software nya manah agi. Siti ari pekara ti ulih dikereja software nya tadi ianya nganjung email ti betangkan nitih ka hari di kedeka ka ia. Taja pan nadai nerima bantu ari orang bukai Tom ulih ngepun ka kompeni Aweber.com ti meri service ngagai orang bukai ti beguna ka autoresponder.

Aweber.com makin sehari makin ngerembai. Orang ti diambi Tom Kulzer bekerja enggau ia pan nyau makin nambah maioh. Diatu bisi 40 iko orang bekerja ba Aweber.com. taja pia akaun orang ti ngena service website sida tu manggai 60,000. Pemaioh orang ti ngena service tu mega makin sehari makin nambah laban pemanah servis ti disedia ka team sida Tom Kulzer tu sigi udah maioh ditemu orang bukai.

Diatu aweber.com tu dipadu ka nyadi autoresponder ti pemadu nyulut enti dibanding ka enggau autoresponder bukai . Orang ti ngereja pengawa dagang internet maioh sanggup bebayar mar agi ngena aweber.com enti dibanding ka enggau autoresponder ti bukai ti murah agi.

Enti kitai deka ngena servis aweber.com kitai dipinta mayar $19 sebulan tauka RM70 sebulan. Enti orang ti register ba list kitai ngeluah 500 iko kitai dipinta mayar tinggi agi.

Enti disbanding ka enggau stand alone autoresponder, third party autoresponder tu mar agi rega ia. Taja pia servis ti disedia ka third party autoresponder baka aweber.com tu jauh manah agi ari stand alone autoresponder ti murah agi.

Siti ari cabaran orang ti ngada ka email marketing ianya email ti dikirum ka sida ia kena sekat ba spam filter. Spam filter tu ianya siti ari perengka ti diada ka kompeni ti meri servis email baka google.com enggau @gmail.com enggau Yahoo! enggau @yahoo.com.

Spam filter tu napis email ti dikirum ka ngagai email orang ditu kelebih agi email ti dikirum ka ngena software tauka ngena cara automatic. Enti email ti dikirum ka kitai nya kena sekat ba spam filter, email kitai nya tadi enda diterima orang ti dikirum ka kitai tauka masuk folder spam filter dalam email akaun ia.

Third party software baka aweber.com bisi peluang ti manah agi ngelepas ka email kitai ari spam filter tu. Bisi meh email disekat spam filter taja pan ngena aweber.com tang peluang ia ulih lepas manah agi enti dibanding ka enggau stand alone autoresponder ti murah agi.

Nya alai peninga, enti kitai deka meli servis autorsponder, ukai reti servis ti murah nya manah agi. Enti kitai amai deka besemekih dalam pengawa dagang internet, kitai patut ngada ka bajet dikena meli autoresponder.

Penutup

Autoresponder tu siti ari teknologi ti mai pemgawa bedagang ngena internet maju sereta jampat bendar ngerembai. Pun autoresponder tu diada ka sigi dikena nyatup penusah betalipun ka orang ti bisi dalam list siti – siti kompeni ti dipelaba ka ulih sereta deka meli barang ari kompeni tu tadi.

Diatu maioh bendar kompeni bisi ngada ka autoresponder. Bisi nya ngada ka stand alone autoresponder serta bisi mega ngada ka third party autoresponder.

Nya alai peninga,
Kena nutup randau ICT kitai ba Tusun 46 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.