Tusun 64 - Pengelikun Ngena eMail

Selamat tengahari serta tabi basa ngagai peninga.

Selamat kita begulai baru dalam program Randau ICT. Saritu Program kitai ba Tusun 64.

Dalam program kitai ba Tusun 63 nyin kemari kitai sama ngenang bakani kitai ulih nyaga pengelikun kitai leboh kitai melayar internet. Enti peninga agi ingat, pengelikun melayar internet bepanggai bendar ba cara runding kitai ti betul serta mega penampak tuju kitai ngena internet. Manah agi tuju kitai melayar internet, likun agi ga kitai. Pia mega enti tuju kitai melayar internet enda tentu manah, bisi agi ga peluang kitai kena penusah ari webpage di dilayar kitai.

Lengka ka dulu kenang pasal pengelikun kitai ngelayar internet. Saritu aku deka ngenang siti agi pekara pengelikun internet ianya pengelikun ngena email kitai.

Saritu email nyau nyadi ka perengka ti enda tau nadai dikembuan kitai. Ia nyadi ka siti perengka ti nyamai bendar dikena kitai. Email mega mudah dikena diatu. Maioh kitai bisi lebih ari siti email.

Email tu siti ari cara orang ulih ngenatai ka maioh pekara ngagai kitai. Kitai ulih nerima berita nengah email kitai. Kitai ulih nerima report nengah email kitai. Kitai ulih nerima gambar, klip video enggau lagu nengah email kitai. Kitai mega ulih nerima link ngagai website tauka webpage nengah email kitai.

Pia mega kitai ulih nganjung semua pekara ti ulih diterima kitai ti udah disebut aku nya tadi ngagai orang bukai baka orang ti ulih nganjung semua utai tu tadi ngagai kitai.

Ari nya besai bendar reti sereta guna email dalam pengidup kitai. nya alai kitai patut nemu sereta mereti ka pekara pengelikun leboh kitai ngena email.

Email tu nyadi pengari kitai. Nama- nama pekara ti ayan dalam email kitai sigi pekara ti datai ari runding kitai. Enti pekara ti datai ari email kitai tau ngenusah orang bukai kitai meh betanggungjawab ka pekara nya. Kitai enda ulih nyalam ka pekara ti ayan ba email kitai ukai pengawa kitai. Taja pan kitai semina ngirum tauka “forward” email ari orang bukai ngagai email bala kaban kitai, tanggungjawab nya agi pulai ka kitai laban email nya datai ari email kitai. Enti pekara ti dikirum ka kitai tauka email orang bukai di”forward” ngagai email address ti bisi dalam list kitai bisi ngelanggar undang-undang, kitai tau kena dakwa di court. Tusah kitai deka nyalam ka pekara nya ukai dikereja kitai tang kitai semina forward email nya aja. Court meda pekara tu datai ari kitai lalu betanggungjawab lalu tau kena ukum.

Ari nya tadi kitai patut nyaga akaun email kitai enggau manah. Anang meri akaun email kitai ngagai orang bukai. Nadai kebuah kitai meri akaun email kitai ngagai orang bukai laban semua orang ti be-umur 18 taun ka atas tau ngerejister akaun email enggau enda bebayar. Tambah mega pemaioh akaun email ti tau dibuka kitai nadai disekat.

Jaga akaun email kitai baka kitai nyaga akaun bank kitai. Tentu ka Password tauka jako lalai ti dikena kitai muka email kitai enda ditemu orang bukai. Pia mega tentu ka kitai nukar password kitai enda kurang ari sekali dalam 3 bulan. Diatu udah bisi software ti dikena muka password ti lama enda ditukar. Enti password kitai ulih ditemu orang bukai, nasib kitai teserah ngagai orang nya tadi. Enti ia ngibun penemu ti jai ngena password nya tadi, jai meh nasib kitai. Bisi meh penusah tau datai nuntung kitai.

Taja pia, enti password email kitai ulih ditemu orang bukai, ukai reti ia email kitai nya tadi terus lenyau. Kitai agi ulih muka email kitai nya baru lalu nukar password nya ngagai password ti baru. Enti password nya tadi udah ditukar orang bukai ti muka email kitai nya tadi kitai ulih minta bantu ari website ti ngada ka service email tu tadi baka Google.com enti kitai ngena @gmail.com tauka Yahoo.com enti kitai ngena @yahoo.com. Cara ia bakatu:

Leboh kitai ngerejister email akaun kitai, kitai dipinta ngisi penerang ti besangkut paut enggau kitai ti bempu email. Siti ari penerang ti patut diisi kitai dia ianya “Security Question“. Kitai dipinta milih jako Tanya, lalu udah nya kitai meri saut kitai dia. Security Question tu deka ditanya ngagai kitai enti kitai minta Bantu ari email service provider tu nyidi password kitai. Nya alai kitai mesti deka ngingat ka “Security Question”. Enti kitai enda ulih ingat ka “Security Question” tu nya baru kitai nadai jalai ulih muka akaun email kitai.

Email mega siti ari cara orang ulih ngirum sereta ngerembai ka virus enggau spyware dalam internet. Maioh macam cara pekara tu ulih dikereja. Kesatu, ngena cara ngelalai ka virus tauka spyware dalam file ti disangking ka dalam email ti dikirum ka kitai. Taja pia virus ti dikirum ka email ti bansa tu ulih ditemu anti-virus ti bisi disedia ka website ti nyendia ka service internet. Nya alai pekara ti bansa tu jarang bendar tau nyadi.

Spyware mudah agi tama ngagai akaun email kitai enti dibanding ka enggau virus. Email ti dikirum ngena cara berantai tauka email ti dikirum ari siti email ngagai siti email ti bukai suah bendar bisi ngundan spyware. Spyware tu tau ngenusah ka kitai laban ia ulih ngambi penerang pasal akaun email kitai sereta mega penerang pasal akaun email ti bisi dalam list kitai. Penerang tu tadi lalu dikirum ka ngagai orang ti bempu spyware tu tadi. Nya ngujung ka kitai nerima maioh macam email genap hari.

Nya alai peninga, enti kitai maioh nerima macam-macam email genap hari, email baka promosi enggau email ti enda bebatang, pekara tu nyadi laban bisi spyware dalam email kitai.

Kena kitai nyeliah ka pekara ti bansa tu nyadi, kitai anang muka email ti datai tang simpan ia dalam folder “Spam“. Email dalam folder spam tu deka dipadam ka udah sebulan.

Kitai mega anang forward email sebarang ngagai bala kaban kitai. Tentu ka kitai mereti sereta setuju enggau isi sereta pekara ti ditulis dalam email nya tadi sebedau kitai ngirum ka ia kebukai. Tentu ka mega email nya tadi bisi beguna ba orang ti nerima email kitai laban kitai enggai direport orang ngirum ka email enggau sebarang. Orang ti bansa tu dikumbai “Spammer”. Enti kelalu maioh report “spammer” diterima pasal email kitai, akaun email kitai nya tadi tau ditutup terus.

Penutup

Peninga ti dipebasa,

Email tu siti ari perengka ti beguna bendar kemaya hari tu. Ia nyadi ka wakil kitai dalam dunya ICT. Kitai betanggungjawab ka semua pekara ti datai ari email kitai. Nya alai kitai patut berat ka pengelikun kitai ngena email kitai. Kitai mega patut nyaga password email kitai enggau manah laban enti ia ulih ditemu orang bukai kitai tau kena penusah.

Taja pia pengelikun ngena email tu nyamai diperati sereta dikereja kitai. asal kitai ngibun password kitai enggau manah, ingat ka “security Question” serta nemu sereta setuju enggau isi email ti di”forward” kitai ngagai orang bukai, serta mega enda muka sebarang email ti datai ngagai kitai, kitai semampai likun enti kitai ngena email.

Kena nutup randau ICT kitai ba Tusun 64 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku. Terima kasih.