Tusun 12 - Mayar Bill Ngena Internet

Selamat tengah hari. Terubah ia aku meri tabi basa ngagai kita peninga.

Selamat kitai begulai baru dalam program Randau ICT. Saritu tu Randau ICT kitai ba Tusun 12. Kita begulai enggau aku, Kassim Jeritan ngenang pekara ICT.

Ba program tu kitai berandau ka bakani kitai ngena ICT bebayar ka bill tiap-tiap bulan.
Kitai udah berandau ka tuju Program Randau ICT ti kedua ianya ngena ICT dalam pengidup kitai. Dua minggu ti udah kitai berandau pasal bakani deka ngiga penerang ngena internet. Maioh meh pekara bedau dikenang kitai pasal bakani kitai ulih ngiga penerang ngena internet.
Tentu meh dalam program kitai ti deka datai kitai ulih berandau baru ka pekara tu.

Saritu kitai berandau ka siti agi guna internet ti ulih ngaga pengidup kitai nyamai agi ianya bakani kitai ulih bebayar ka bil baka bil elektrik, bil ai, bil telefon, engau bil Astro.

Diatu kitai ulih mayar semua bil tu ngena macam cara. Kitai ulih datai terus ngagau kaunter kompeni tu. Kitai mega ulih mayar semua bil tu ba pos ofis. Tang ia ti manah agi, kitai ulih mayar semua bil tu ari rumah, enti kitai bisi internet.

Maioh meh penguntung kitai enti kitai ulih mayar bil tu ari rumah. Belanja minyak tauka belanja tambang kitai dah selamat. Rega minyak diatu ukai murah. Kitai enda iboh irau ka ngiga alai parking kereta. Kitai enda irau ka kereta kitai kena kacau.

Enti kitai kurang ngena jalai raya, kurang meh risiko accident. Tang paling penting bendar, ari kitai enda tebasau ngapa. Enti kitai nyau nurun ka pasar tegal ti deka mayar bil aja, senang- senang kitai masau setengah ari. Di rantau jalai kitai tentu deka ngirup kopi, ka makai mi. Datai bala kaban nyau berandau. Sejam dah mansa bakanya aja. Dalam setengah ari tu maioh bendar pekara ti beguna ulih dikereja kitai. Sebulan setengah hari. Setaun dah 6 hari tebasau. 10 taun dah 60 hari. Bedau agi ari ti tebasau tegal pengawa bukai.

Enti kitai mayar semua bil tu ngena internet kitai ulih ngereja pengawa tu kurang ari setengah jam. Pia mega kitai ulih mayar semua bil tu enda ngira ari, enda ngira jam. Nitih ka penyamai kitai empu. Malam hari udah makai lemai, kitai ulih mayar bil kitai. Kaunter bil ba internet nadai kala tutup. Pia mega leboh ujung minggu kitai ulih mayar bil kitai.

Di menua kitai bisi dua iti website alai kitai ulih mayar bil ianya www.posonline.com.my enggau www.paybillsmalaysia.com

www.posonline.com.my tu website rasmi Pos Malaysia tauka pos ofis kitai. Enti kitai ngena website tu dikena mayar semua bil nya tadi kitai ngerejista diri dulu enggau enda bebayar. Kitai dipinta meri nama, password enggai email kitai. Nama enggau password tu dikena kitai masuk ngagai account kitai. email dikena sida ia ngirum ka berita pasal service sida. Pia mega sida deka madah ka kitai ngena email tu enti bisi bil baru datai. Nya alai kitai enda irau ka bil kitai nadai datai tauka lenyau.

Udah nya kitai dipinta ngerejista semua bil ti deka dibayar kitai. Semua bil elektrik, bil ai, bil telefon, bil Astro, handphone ulih direjista kitai ditu.

Sebedau nya kitai mesti deka bisi muka akaun ba bank ti bisi enggau dalam program tu baka Hong Leong Bank, CIMB Bank, Bank Rakyat, RHB Bank enggau Bank Islam. Tentu meh makin sari makin maioh bank ulih alai kitai mayar bill ngena posonline. Tentu ka dulu akaun bank kita ulih dikena sereta bisi balance ti cukup dalam nya dikena mayar bill kita.

www.paybillsmalaysia.com tu website ari menua kitai empu. Webmaster tu di Kuching. Sida mega meri service ti nyau deka sebaka enggau posonline. Kitai sama dipinta ngerejista diri ngena nama enggau password kitai. Udah nya kitai ngerejista bil ti deka dibayar kitai. Enti bil baru bisi datai kitai bisi nerima email. Nya alai kitai enda irau ka diri enda nerima bil. Pia mega sida ia bisi bank ti participate. Enda semua bank ulih dikena. Nya alai tentu ka dulu bank ti ulih dikena enti kitai deka ngena website tu.

Kitai ulih milih ni nyamai agi dikena. Service tu nadai bebayar lebih. Aku empu ngena kedua- dua iti website tu. Nadai kala aku bisi penanggul laban website tu sigi website ti professional.
Kelimpah ari dua iti website tu, nyau ka semua bank di menua kitai bisi online service alai kitai ulih mayar bil kitai ngena internet. Tanya ba bank alai kitai muka akaun kitai pasal pekara tu.

Penutup

Kompeni baka Pos Malaysia enggau maioh bank di menua kitai udah bebelanja maioh bendar dikena ngada ka system online sida. Semua tu nyadi ka penyamai kitai ngena ICT dalam pengidup kitai. Kena facility tu enggau enda nangi ati laban enti bisi penanggul kitai semampai ulih minta Bantu ari sida ia. Anang takut ngena perengka ICT ti bisi ngelingi kitai. Kena kitai bepun, nguji mayar bil kita bulan tu ngena internet. Taip aja address www.posonline.com.my tauka www.paybillsmalaysia.com , ngerejista diri dia udah nya titih ka padah sida dia. Instruction dia terang dipeda aku, nyamai dititih kitai. Atur bank akaun kitai ngambi ka ulih dikena mayar bil kitai ngena internet belaboh ari bulan tu. Bulan nyin ila enda sabar kitai nganti bil kitai datai laban ransing dah nemu ngena internet mayar bil.

Kena nutup randau ICT kitai ba Tusun 12 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog http://kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.