Tusun 50 - youtube.com

Selamat tengahari serta tabi basa ngagai peninga.

Selamat kita begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 50.

Bulan nyin kemari kitai udah ngenang website tauka kompeni ti tebilang nama dalam internet. Pia mega kitai bisi ngenang website ti beguna bendar ba menua kitai empu ianya website perintah menua kitai.

Saritu aku agi nyambung kenang pasal website ti patut ditemu kitai ianya youtube.com.
Youtube.com tu ianya website ti ngada ka palan alai kitai ulih bekunsi ka video. Kitai ulih mandang ka video kitai. Kitai mega ulih meda video orang bukai. Nya alai website tu dikumbai orang “Video Sharing” website.

Video ari website youtube.com tu mega ulih dipandang ka kitai ba website bukai. Tu dikumbai orang “Video Streaming”.

Youtube ditumbuh ka dalam taun 2005. Orang ti numbuh ka company tu ianya Chad Hurley, Steve Chen enggau Jawed Karim. Sebedau numbuh ka company tu sida tiga tu bekerja enggau PayPal, siti ari website ti udah dikenang aku ba Tusun Program kitai ti dulu.

Runding numbuh ka youtube.com tu bepun ari penusah Chad Hurley seduai Steve Chen bekunsi ka video ti diambi seduai ia leboh maya pengerami ba rumah Chen. Opis sida terubah ia ba San Mateo, California. Video ti terubah dipandang ka ba website tu ianya “me at the zoo” mandang ka Jawed Karim ba Zoo San Diego dalam taun 2005.

Youtube.com belabuh ngerembai ka pengawa dagang sida ia leboh sida ia bulih Bantu ari Sequoia Capital penyampau $11.5 Millions dalam taun ti sama. Enti peninga ingat, Sequoia Capital tu mega kompeni ti terubah ia mantu google.com ngerembai ka pengawa dagang sida ia.
Website tu jampat bendar mansang. Dalam taun 2006 bisi 65,000 video baru bisi dipandang ka genap hari ba website youtube.com. Pemaioh orang meda video nengah website tu bisi 100 millions sehari. Nitih ka pansik bulan 1/2009 bisi 6 billions video dipeda orang dalam sebulan nya.

Dalam taun 2006 Google.com meli website tu enggau rega $1.65 Billions. Dagang youtube.com majak nambah sereta ngerembai agi. Dalam taun 2008 pengawa dagang sida ia manggai $200 Millions. Ketebal agi penatai pemisi sida ia datai ari program iklan.

Youtube.com balat bendar ngubah cara orang ngiga penerang enggau pemerindang. Kitai kala ninga bisi orang temu tak niki nama dikelala orang ketegal ti ngada ka video sida ari youtube.com.

Ba menua kitai Malaysia empu bisi siko anembiak ti niki nama dikelala orang serata dunya ketegal ti mantai ka cara ngaga speed boat ngena remote control. Cara ia ngaga speedboat nya dipantai ka ba video ba youtube.com. Maioh bendar orang rindu meda video ia nya tadi ngujung ka nama ia laku.

Maioh mega orang udah tebilang nama ari ka ngada ka video sida ia ba youtube.com. Sida ka benasib tampak nama serata dunya ketegal ti ngada ka video ba youtube.com sereta video nya dikerindu ka orang maioh.

Ongkos ngada ka video nya tadi jauh murah enti dibanding ka enggau ongkos ngada ka filem tauka drama ti bisi ba tv. Taja pia pemaioh orang ti meda video nengah youtube.com tu enda ulih disema ka enggau tv. Cukup maioh. Nya meh, dalam taun 2006 aja udah manggai 100 millions sehari.

Video ti dipandang ka ba youtube.com ngena format Adobe Flash Player tauka MPEG-4. Pemaioh siti fail ti ulih dipandang ka ba youtube.com disekat naka 10 minit aja tauka pemesai fail 1GB.

Siti ari pengering youtube.com ianya video ti dipandang ka dia ulih dipeda kitai ba website bukai. Video ti udah dipasuk ka ngagai youtube.com bisi diberi coding ti dikumbai “embedded code” lalu ngena code tu ia ulih diengkah ba website kitai. teknologi tu meh mai youtube.com tu jampat bendar ngerembai.

Dalam taun 2007 video ti ayan ba website youtube.com tu ulih dipeda ba handphone leboh youtube.com ngada ka Youtube Mobile. Tu nambah ka pengering kompeni ti bempu youtube.com ianya Google.co besemekih enggau Yahoo Mobile maya nya.

Kitai ulih ngerejister diri ba website youtube.com tu enda bebayar. Udah kitai ngerejister diri kitai ulih mandang ka video kitai ba youtube.com. Video kitai nya bisi peluang dipeda 100 millions orang genap hari. Peluang bakatu patut dikena kitai dalam pengawa dagang kitai. Enti kitai nadai website pan, kitai ulih ngelaku ka barang kitai enggau video.

Pemesai peluang pengawa dagang ba youtube.com tu patut dikena kitai ngemansang ka pendiau diri. Tentu meh maioh orang ari menua bukai rindu ka pengawa sereta adapt asal di menua kitai. Semua tu tau nyadi ka pekara ti narit ati orang meda video kitai nengah youtube.com.
Pia mega youtube.com tu tau dikena mandang ka barang ti dijual kitai enggau silik agi enti dibanding ka enggau gambar aja. Nya alai peluang ti baka tu meh ngasoh pengawa dagang kitai ulih besemekih enggau ransing agi.

Leboh kitai ngada ka video kitai ba youtube bisi meh cara kitai ulih ngelaku ka video kitai ngambi ka maioh orang ulih nemu sereta meda video kitai.

Taja pia kitai enda ulih mandang ka sebarang video ba website tu. Video ti ulih kitai ngupi ari orang bukai enda tau diayan ka ditu. Pia mega video ti enda tau dipeda orang maioh enda tau dipandang ka dia. Enti kitai majak deka ngayan ka video tu ditu, video nya tadi tau dikeluar ka team sida youtube.com

Penutup

Youtube.com tu balat bendar ngubah cara penerang enggau pemerindang kelebih agi nengah internet. Maioh orang nydi tebilang nama ketegal pengelandik sida ia meda peluang dalam internet nengah youtube.com.

President Amerika, Barrack Obama balat bendar bepanggai ba youtube leboh ia bekempen ka penuduk President suba. Sebedau taun 2006 nadai maioh orang ngelala ia. Tang ia pandai meda peluang nengah internet, kelebih agi youtube.com dikena ia nyungkak nama diri. Nyentok ka diatu ia enda ninggal ka youtube.com dalam pengawa ia laban ia nemu semina ngena youtube.com aja ia ulih mandang ka diri ngagai serata dunya.

Enti orang ti baka Barrack Obama tu nemu sereta agi ngena peluang ari youtube.com tu, tentu meh ia manah. Nya alai kitai patut ngena peluang tu ngada ka pengering kitai besemekih dalam pengawa dagang.

Nya alai peninga,
Kena nutup randau ICT kitai ba Tusun 47 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.