Tusun 67 - Pengawa Dagang Internet

Selamat tengahari serta tabi basa ngagai peninga.

Selamat kita begulai baru dalam program Randau ICT. Saritu Program kitai ba Tusun 66.

Dalam program kitai ari Tusun 62 nyentok ka Tusun 66 nyin kemari kitai sama ngenang pasal pekara pengelikun leboh ti ngena internet. Taja pan bisi penusah tau nyadi ketegal kitai ngena internet, nadai penusah tu tau nuntung kitai enti kitai bisi nyikap diri ngena penemu pasal pengelikun internet. Kitai enda patut takut ngena internet laban penguntung ti tau datai ari internet jauh lebih enti dibanding ka enggau penusah ti tau datai. Aku selalu nyema ka pemerani ngena internet patut baka pemerani kitai driba kereta. Kitai enda takut driba genap hari taja pan bisi penusah tauka orang bukai accident leboh ti driba kereta. Bakanya mega pemerani kitai ngena internet.

Lengka ka dulu kenang pasal pengelikun ngena internet. Saritu aku deka belaboh ngenang pengawa dagang internet. Aku maioh nerima peminta ari peninga ti deka nemu enggau silik agi pasal pengawa dagang internet. Maioh nya madah ka diri baru nemu kitai ulih ngereja pengawa dagang dalam internet. Ngelama tu sida ia semina ngena internet maca berita, maca blog, ngena email enggau ngena social networking baka Facebook.com. Bisi mega mansang sesingkang agi bekena ka online telephone service baka Skypee.com. Tang penemu pasal pengawa dagang internet tu agi baru kelebih agi di menua kitai ditu.

Taja pia ukai reti kitai jauh tinggal dalam penemu ICT. Pengawa dagang internet, kelebih agi pengawa dagang internet ti mit, ianya pengawa dagang internet ti enda ngena modal ti maioh baru ngerembai bepun ari taun 2005. Sebedau nya, pengawa dagang internet semina dikereja kompeni ICT ti besai aja. Kitai semina bebeli aja nengah internet tang nadai tentu maioh peluang bejual dia. Nya alai enti udah 4 taun kitai baru nemu pekara tu, enda kitai kelalu jauh tinggal dalam pekara tu.

Diatu maioh bendar orang ngena peluang dalam pengawa dagang internet. Maioh bendar orang udah bisi pun penatai pemisi ti stabil bepun ari pengawa dagang internet. Peluang dalam pengawa dagang internet mega makin sehari makin maioh tebuka. Pia mega makin sehari makin maioh cara pengawa dagang internet bisi digaga ngambi ka ulih dikena kitai dalam pengawa dagang internet kitai.

Kitai patut beterima kasih ngagai kompeni baka Google.com, Paypal.com enggau ClickBank.com ti ngada ka servis ti ulih endor kitai ngeeja pengawa dagang internet ngena cara ti mit. Taja cara kitai bedagang dalam internet tu mit, ukai reti penatai pemisi ulih kitai mit mega. Pengawa dagang internet dikereja kitai enggau mit laban ungkos ngereja pengawa tu jauh mimit enti dibanding ka enggau ungkos ngaga pengawa dagang cara bukai.

Berindik ari nya aku ngasai ka patut bendar kitai berandau ka pengawa dagang internet enggau silik agi dalam Program Randau ICT kitai. Aku berati ka peluang ditu mega semampai agi maioh tebuka. Aku mega deka meri contoh kompeni tauka orang dagang ti udah mujur dalam pengawa dagang internet lalu bakani sida ia tu ngereja pengawa dagang internet sida ia.

Munyi ka udah dikenang aku dulu tadi, maioh macam pengawa dagang internet ti ulih dikereja kitai. Kitai ulih ngeklaku ka barang kitai empu nengah internet. Taja pan kitai nadai barang dijual kitai, kitai ulih ngelaku ka barang orang bukai lalu nerima komisyen ari nya. Aku empu ngereja pengawa dagang internet ngena cara bakatu.

Kitai mega ulih ngada ka ruang iklan ba wesite tauka blog kitai lalu kitai berunding enggau orang ti bempu barang. Ari nya kitai minta orang ti bempu barang nya mayar kitai.

Maioh penguntung kitai ngereja pengawa dagang internet.

Kesatu, pengawa dagang kitai mudah agi ditemu orang serata dunya. Diatu bisi nyau ka manggai 1.8 billions orang ngena internet dalam dunya tu. Tu nyau ka manggai 20% ari mensia di dunya tu bisi ngena internet.

Kedua, pengawa dagang kitai nadai ngetu. Ia bekerja 24 jam sehari, 7 hari seminggu, 3o hari sebulan, 365 hari setaun. Kebuah pia maioh pekara ulih dikereja kitai enggau cara automatik. Kitai semina kiruh ngada ka setting dalam website tauka blog kitai ba pun pengawa dagang aja.

Ketiga, pengawa dagang internet jauh murah enti dibanding ka enggau pengawa dagang di luar din. Semina ngena RM500 setaun kitai ulih belabuh ngereja pengawa dagang internet kitai. Enti ngereja pengawa dagang bukai kitai beguna ka modal bepuluh ribu ringgit dikena ngepun ka pengawa dagang kitai.

Keempat, kitai nerima bayar ngena cara automatik. Orang bebeli dalam internet bebayar tekala nya. Nadai ulih diutang. Kebuah pia laban sistem dalam merchant account tu sigi digaga bakanya. Nya alai kitai nadai kiruh berunding ka pengawa nagih utang tauka bayar ari orang ti meli barang kitai. Enti peninga bisi muka kedai tentu nemu reti pemesai guna pekara tu. Duit sigi di jari kitai enti orang bisi meli barang ari website kitai.

Kelima, maioh macam barang sereta maioh macam cara kitai ulih ngereja pengawa dagang internet. Pekara tu deka dikenang aku enggau silik agi dalam program kitai ti deka datai. Orang ti ngereja pengawa dagang internet diatu ngaku pengawa sereta cara dagang tu agi baru lalu agi ngerembai. Reti ia peluang kitai besemekih sigi enda ulih ditutup. Bisi aja barang baru ulih dijual kitai. Bisi aja cara baru ulih dikena kitai. Bisi aja pengawa dagang baru ulih diguna kitai. Nadai orang ulih nyekat kitai ngereja pengawa dagang internet.

Keenam, pengawa dagang internet ulih dikereja kitai enda ngira dini alai kitai maya nya, asal aja bisi internet. Kitai ulih ngereja pengawa dagang internet di rumah, di ofis, di restoran, airport tauka leboh kitai benong becuti di Hawaii. Nya alai kitai ulih bekerja sambil bercuti tauka becuti sambil bekerja.

Ketujuh, maioh bendar perengka kelebih agi software ti bisi digaga sereta dijual dikena ngerembai ka pengawa dagang kitai. Bisi mega software ti beguna ulih dikena kitai enggau cara enda bebayar. Nya alai pengawa dagang internet kitai ulih mansang enggau jampat taja semina ngena ungkos ti murah.

Maioh mega penguntung bukai enti kitai ngeeja pengawa dagang internet. Nya alai kitai deka berandau ka pekara tu dalam program kitai ti deka datai.

Penutup

Peninga ti dipebasa,

Pengawa dagang internet agi baru di menua kitai. Taja pia kitai patut ngambi peluang tu ngereja pengawa dagang internet ngambi ka kitai bisi penatai pemisi.

Kena nutup randau ICT kitai ba Tusun 67 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku. Terima kasih.

Tusun 66 - Pengelikun Ngena Social Networking

Selamat tengahari serta tabi basa ngagai peninga.

Selamat kita begulai baru dalam program Randau ICT. Saritu Program kitai ba Tusun 66.

Dalam program kitai ba Tusun 65 nyin kemari kitai sama ngenang bakani kitai ulih nyaga pengelikun kitai leboh kitai ngena Merchant Account. Diatu Merchant Account makin maioh dikena orang kelebih agi dalam pengawa Dagang Internet. Kitai patut merani sereta neleba ka diri ngena servis Merchant Account laban pengawa tu deka nyadi siti cara pengidup kitai ti baru. Lama laun cara tu tetap dikena orang dudi ari ila.

Lengka ka dulu kenang pasal pengelikun ngena Merchant Account. Saritu kitai deka ngenang siti agi pekara pengelikun internet ianya pengelikun ngena “Social Networking“.

Social Networking tu ianya website endor orang maioh begiga sereta betemu enggau pangan diri dalam dunya siber. Ditu kitai ulih ngiga kaban baru enggau orang ti udah ngerejister diri dalam website nya. Kitai mega ulih mai kaban kitai ngerejister diri dalam website nya. Ari nya kitai ulih berandau ka maioh macam pekara dalam website tu, enda iboh betemu moa enggau pangan diri.

Social Networking website tu sigi udah lama ditumbuh ka. Siti ari tuju internet diada ka di menua Amerika dulu suba ianya nyadi ka palan alai pengawa Social Networking tu. Antara Social Networking website ti terubah ia ianya baka AOL enggau Yahoo! Massenger. Taja pia pengawa Social Networking tu enda tentu nyulut dikena maioh orang maya nya.

Bepun ari taun 2005 Social Networking website tu nyau tebilang sereta dikerindu ka maioh orang ukai semina di menua Amerika din tang mega serata dunya. Pekara tu nyadi laban pemansang website ti baru ti lebih dikerindu ka orang ti biak agi. Website ti nyulut maya nya baka MySpace.com enggau Friendster.com bisi ngada ka service ti dikerindu ka bala anembiak. Nya alai website ti bansa tu nambah maioh agi.

Dalam taun 2007 siti website ti ngada ka service Social Networking ditumbuh ka. Website tu ianya Facebook.com, jampat bendar ngerembai nyentok ka ia nyadi website ti tebilang nyentok ka saritu. Di menua kitai Malaysia ditu bisi 4 Juta orang ngerejister diri dalam Facebook.com. Dipelaba ka aku, kitai ti bisi ngena internet tentu bisi udah ngerejister diri dalam Facebook.com. Dalam taun 2008, di serata dunya bisi 600 juta orang bisi ngerejister diri dalam Facebook.com. Reti ia nyau ka 40% orang ti ngena internet bisi ngerejister diri dalam Facebook.com. Tu nanda sereta nerang ka pemesai reti sereta guna Social Networking website dalam pengidup kitai kemaia hari tu.

Ari pemaioh orang ti ngena social networking website nya, tentu meh bisi aja ti enda tentu manah tuju. Taja pia tebal agi orang ti ngena website tu ngibun tuju ati ti manah baka pengerindu sida ia bekelala sereta bekaban enggau orang baru.

Kitai patut nemu pekara pengelikun ti besangkut paut enggau Social Networking ngambi ka kitai enda kena penusah leboh ti ngena servis tu. Enti kitai ngerejister diri dalam Social Networking website, penerang pasal kitai sigi mudah ditemu mensia maioh di serata dunya.

Bisi penusah ulih nuntung kitai enti kitai enda cukup bejaga leboh ti ngena social networking website baka Facebook.com. Antara penusah ti ulih nyadi ianya penerang pasal kitai ulih dicuri sereta dikena orang enggau tuju ti enda manah. Pekara tu dikumbai “identity teft”. Orang ngena penerang kitai ngisi form baka loan duit ba bank, lalu enti loan nya diterima, bank minta kitai bebayar.

Siti agi penusah tau nyadi ianya pengawa orang ti mejal tauka ngemeli ka orang dalam internet. Pekara tu mega dikumbai orang “bully” nengah internet. Pengawa tu maioh bendar udah ngenusah ka orang bukai sampai ka bisi orang ti dibuli dalam internet bisi munuh diri. Pekara tu bisi udah nyadi di Amerika enggau di Philipines.

Siti agi penusah ti tau nuntung kitai enti kitai enda bejimat leboh ngena social networking website ianya ngenyamai ka pengawa orang ti deka ngemedis kitai. Kebuah pia ia bulih penerang ari posting kitai enti kitai enda bejimat pasal pekara ti ditulis kitai dalam website tu. Antara penerang ti ulih diguna orang ti bansa tu ianya penerang pasal pengawa kitai besehari- sehari. Ari penerang ti bansa tu, nyamai bendar orang nya ulih ngipa kitai laban ia nemu kuing pejalai kitai. Pekara tu mudah bendar nyadi ba anembiak. Nya alai kitai patut nemu bakani kitai ulih nyeliah ka pekara ti bansa tu.

Pekara pengelikun ti kesatu, anang meri semua penerang ti bendar pasal kitai dalam website tu. Antara penerang ti patut dilalai ka kitai ianya taun kitai ada sereta Address ti lengkap dini alai kitai diau. Penerang ti bendar pasal kitai ulih dikena orang ti enda manah penemu ngereja pengawa ti enda manah lalu ditanggung kitai.

Pekara pengelikun ti kedua, ianya anang nerima sebarang orang ti enda dikelala kitai dalam list kaban kitai. Kitai enda nemu tuju orang nya tadi. Manah agi semina ngemendar ka orang ti dikelala kitai aja dalam list kaban kitai ngambi ka kitai enda kena buli dalam internet. Orang ti buli orang bukai dalam internet tu ngena cara Psikology, nyentok ka kitai enda nemu diri kena bully ia. Pekara bully dalam internet tu tebal agi nyadi ba orang ti biak. Nya alai bepekat manah enggau diri sebilik pasal social networking website tu.

Pekara pengelikun ti ketiga ianya kitai anang selalu nulis pekara pasal kitai empu dalam social networking website. Anang madah ka tuju pejalai kitai. Anang madah ka penatai kitai. Anang madah ka kitai kediri aja di rumah. Anang madah ka diri sunyi tauka boring. Anang madah ka diri nganjung anak tusyen. Anang madah ka diri benong di rantau jalai ari kini nuju kini. Penerang ti bansa tu enti ditulis kitai genap hari, mudah bendar orang ngipa kitai. Pia mega enti anembiak nulis penerang ti bansa tu, mudah bendar orang ti jai ngulih ka sida laban bisi penerang ti beguna ba sida ia.

Aku berati ka posting bala kitai ba Facebook.com, maioh bendar penerang ti ditulis di meri peluang penusah tau nyadi. Bisi nya madah ka diri benong di rantau jalai ari Kuching ka Sri Aman. Bisi madah ka diri benong diau ba hotel ni leboh ti travelling. Penerang tu enda patut diayan ka ba social networking website.

Penutup

Peninga ti dipebasa,

Makin sehari, makin maioh orang ngena social networking website. Nya alai kitai patut berati ka pengelikun leboh ngena social networking website. Anembiak rindu bendar ngena social networking website. Kitai ka apai indai patut berati sereta bepekat manah enggau diri sebilik ngambi ka pengelikun ngena social networking website ulih diperati sereta dijaga kitai. Terang ka ngagai sida ia penusah ti tau nyadi.

Social Networking website beguna bendar enti dikena kitai enggau betul. Enda ngira dini kitai diau, kitai ulih berandau enggau bala kaban kitai tauka kitai sebilik. Ari nya kitai semampai semak enggau bala kaban kitai. Taja pia, ia ulih mai penusah ka kitai enti kitai enda cukup bejaga. Nya alai kitai patut berat ka pengelikun leboh kitai ngena social networking website.

Kena nutup randau ICT kitai ba Tusun 66 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku. Terima kasih.

Tusun 65 - Pengelikun Ngena Merchant Account

Selamat tengahari serta tabi basa ngagai peninga.

Selamat kita begulai baru dalam program Randau ICT. Saritu Program kitai ba Tusun 65.

Dalam program kitai ba Tusun 64 nyin kemari kitai sama ngenang bakani kitai ulih nyaga pengelikun kitai leboh kitai ngena email. Enti peninga agi ingat, email tu nyadi ka wakil kitai dalam dunya internet. Semua pekara ti datai ari email kitai endang tanggungjawab kitai 100%. Pengelikun ngena email nyamai diperati ka kitai enti kitai nemu ngibun password kitai enggau “Security Question”, enda forward sebarang email ti dikirum ka kitai lalu enda muka sebarang email ti nyangka bisi ngundan spyware enggau virus.

Lengka ka dulu kenang pasal pengelikun ngena email. Saritu aku deka ngenang siti agi pekara pengelikun internet ianya pengelikun ngena “Merchant Account“.

Saritu maioh bendar pengawa bejual beli dikereja dalam internet. Pengawa tu mega deka nambah hari siti ngagai hari siti. Maioh penguntung kitai enti kitai bebeli nengah internet. Kesatu, kitai ulih meli barang enggau murah agi enti dibanding ka enggau meli barang ati kedai. Kedua, maioh kompeni ti nyual barang nengah internet bisi ngada ka jamin tauka warranty barang ti dijual sida. Ketiga, barang ti nadai ba menoa alai kitai diau ulih dibeli kitai nengah internet asal barang nya tadi enda salah dibeli kitai ari segi undang-undang menoa kitai. Keempat, kitai enda iboh masau hari kitai nurun ka kedai bebeli ka barang laban pekara tu ulih dikereja kitai ari rumah asal kitai bisi internet.

Di menoa kitai empu, siti ari pengawa bebeli nengah internet ti tebilang bendar ianya meli tiket AirAsia. Kompeni AirAsia ngerembai enggau jampat bepun ari pengawa sida ti bejual ka tiket nengah internet. Kitai patut beterima kasih ka kompeni AirAsia tu ti udah muka jalai dalam pengawa bebeli nengah internet.

Di menoa ti udah maju baka Amerika enggau Britain, barang ti diguna genap hari baka sayur enggau dagin sereta mega perengka dapur ti bukai ulih dibeli nengah internet. Order diambi pagi lalu barang dianjung datai ba rumah moa ka lemai. Siti ari kompeni ti mujur bendar dalam pengawa dagang supermarket nengah internet ianya Wall Mart.

Kitai bejual beli barang nengah internet ngena kad kredit, charge card, debit card serta mega baru diatu, ngena ATM card kitai. Semua transaction antara kitai enggau orang ti bempu barang ti dibeli kitai dikereja nengah “Merchant Account“. Merchant Account tu ianya siti kompeni ti dikumbai kitai third party company. Ia nerima bayar ari kitai lalu ngirum ka bayar nya tadi ngagai kompeni ti bempu barang ti dibeli kitai. Udah pekara tu dikereja nya baru orang ti bempu barang nya tadi ngirum ka barang ngagai kitai.

Diatu maioh bendar kompeni ti ngada ka merchant accout dalam internet. Siti ari kompeni tu kala dikenang aku dalam program ti dulu suba ianya PayPal.com. Kelimpah ari paypal maioh agi kompeni ti bukai. Taja pia cara kompeni tu bekerja nyau deka sama. Pengelikun ngena merchant account tu mega nyau deka sama magang.

Keterubah ia kitai ngena merchant account kitai dipinta ngerejister akaun kitai. Udah nya kitai diberi nama akaun enggau password. Baka pengelikun ngena email ti udah dikenang aku kemari, nama akaun enggau password tu patut disimpan serta dilalai ka kitai enggau manah. Enti nama akaun enggau password kitai ulih ditemu orang, akaun kitai nya tadi ulih dikena orang bebeli ka barang nengah internet lalu kitai bebayar ketegal nya tadi. Tentu meh pekara tu pulai ka pengerugi ngagai kitai.

Enti kitai meri akaun enggau password kitai nya ngagai orang bukai, reti ia kitai meri duit kitai ngagai orang nya ntadi. Nya alai password merchant akaun kitai patut disimpan enggau manah.

Enti kitai bebayar nengah internet ianya, tentu ka address box kitai bepun ari https://. Enti address box kitai enda bepun bakatu, kitai nyangka benong ngena webpage ti segaja dikena orang ngumpan kitai ngayan ka nama akaun enggau password kitai. Semina address box ti ngena https:// aja likun dikena laban semina kitai siko aja ngena webpage nya maya nya. Enti address box nya bepun ngena http:// aja, bisi orang bukai ulih sama meda penerang di ayan ba webpage nya. Nya alai tentu ka pekara tu dulu sebedau kitai meri penerang pasal merchant account kitai.

Diatu bisi website digaga nyaru baka website merchant account ti bendar. Taja pia website tu enda ulih ngaga ka address ti bepun ngena https:// laban website ti ngena https:// enda ulih direjister sebarang. Semina kompeni ti bendar aja ulih ngerejister webpage ngena https:// laban bisi cara orang ti ngatur pengawa tu napis kompeni merchant account ti bendar.

Anang ngena maioh kad kredit. Siti aja umbas dikena kitai bebeli ka barang nengah internet. Manah agi enti kitai ulih ngena debit card. Facility ia sama baka kad kredit tang debit card tu baka ATM card, duit dalam nya deka diisi kitai dulu sebedau kad nya ulih dikena. Ngena cara nya kitai enda kena penusah ti tau bepun ari hutang kad kredit.

Pia mega kitai ngena kad kredit ti enda kelalu besai kredit limit. Manah agi ngena kad kredit ti ngena kredit limit enda lebih ari RM5,000. Kebuah pia, taja pan kitai udah cukup bejaga tang nasib nadai, orang agi ulih ngena duit dalam kad kredit kitai, kitai enda lenyau maioh duit. Taja pia peninga, pengawa lenyau duit ketegal kitai ti bebayar nengah internet tu jauh kurang enti dibanding ka enggau kitai ti ngena kad kredit kitai di luar din. Aku empu udah lebih ari 5 tahun bebeli barang nengah internet ngena kad kredit. Nadai sekali udah bisi penanggul. Pengawa tu sigi likun enti kitai cukup bejaga.

Kitai mega patut nemu sereta pecaya ka kompeni ti ngada ka service merchant account. Kompeni baka PayPal sigi udah ditemu sereta tebilang dalam ngada ka service ti bansa tu. Tambah mega maioh kompeni nerima bayar nengah PayPal dalam website sida. Ari nya tentu meh PayPal tu ulih diarap ka kitai. Kadang- kadang bisi meh penanggul mimit tang kompeni tu bisi team ti ulih mantu kitai enti kitai bisi penanggul ngena service sida ia.

Tentu ka kitai nemu pekara ti patut enggau enda patut dikereja ngena merchant account kitai. Kebuah pia enti kitai ngereja pekara ti enda dikemendar ka ngena akaun kitai, akaun kitai nya tadi tau kena tutup. Tu siti ari cara kompeni ti bansa tu nyaga pengelikun ngena servis sida ia. Tentu meh pekara tu enda manah.

Penutup

Peninga ti dipebasa,

Makin sehari, pengawa bebayar nengah internet makin maioh dikereja. Kitai enda patut takut bebeli nengah internet laban pekara tu ulih mai penguntung ka kitai. Nya alai kitai patut berati ka pengelikun leboh kitai bebayar nengah internet baka ti udah dikenang aku tadi.

Kebendar ia, pengawa bebayar nengah internet ngena servis ari maioh merchant account ti bisi jauh lebih likun enti dibanding ka enggau kitai ti ngena kad kredit kitai di luar din. Nya alai kitai enda patut takut ngena servis ti bansa tu. Tambah mega tu deka nyadi siti ari jalai pengidup kitai.

Kena nutup randau ICT kitai ba Tusun 64 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku. Terima kasih.

Tusun 64 - Pengelikun Ngena eMail

Selamat tengahari serta tabi basa ngagai peninga.

Selamat kita begulai baru dalam program Randau ICT. Saritu Program kitai ba Tusun 64.

Dalam program kitai ba Tusun 63 nyin kemari kitai sama ngenang bakani kitai ulih nyaga pengelikun kitai leboh kitai melayar internet. Enti peninga agi ingat, pengelikun melayar internet bepanggai bendar ba cara runding kitai ti betul serta mega penampak tuju kitai ngena internet. Manah agi tuju kitai melayar internet, likun agi ga kitai. Pia mega enti tuju kitai melayar internet enda tentu manah, bisi agi ga peluang kitai kena penusah ari webpage di dilayar kitai.

Lengka ka dulu kenang pasal pengelikun kitai ngelayar internet. Saritu aku deka ngenang siti agi pekara pengelikun internet ianya pengelikun ngena email kitai.

Saritu email nyau nyadi ka perengka ti enda tau nadai dikembuan kitai. Ia nyadi ka siti perengka ti nyamai bendar dikena kitai. Email mega mudah dikena diatu. Maioh kitai bisi lebih ari siti email.

Email tu siti ari cara orang ulih ngenatai ka maioh pekara ngagai kitai. Kitai ulih nerima berita nengah email kitai. Kitai ulih nerima report nengah email kitai. Kitai ulih nerima gambar, klip video enggau lagu nengah email kitai. Kitai mega ulih nerima link ngagai website tauka webpage nengah email kitai.

Pia mega kitai ulih nganjung semua pekara ti ulih diterima kitai ti udah disebut aku nya tadi ngagai orang bukai baka orang ti ulih nganjung semua utai tu tadi ngagai kitai.

Ari nya besai bendar reti sereta guna email dalam pengidup kitai. nya alai kitai patut nemu sereta mereti ka pekara pengelikun leboh kitai ngena email.

Email tu nyadi pengari kitai. Nama- nama pekara ti ayan dalam email kitai sigi pekara ti datai ari runding kitai. Enti pekara ti datai ari email kitai tau ngenusah orang bukai kitai meh betanggungjawab ka pekara nya. Kitai enda ulih nyalam ka pekara ti ayan ba email kitai ukai pengawa kitai. Taja pan kitai semina ngirum tauka “forward” email ari orang bukai ngagai email bala kaban kitai, tanggungjawab nya agi pulai ka kitai laban email nya datai ari email kitai. Enti pekara ti dikirum ka kitai tauka email orang bukai di”forward” ngagai email address ti bisi dalam list kitai bisi ngelanggar undang-undang, kitai tau kena dakwa di court. Tusah kitai deka nyalam ka pekara nya ukai dikereja kitai tang kitai semina forward email nya aja. Court meda pekara tu datai ari kitai lalu betanggungjawab lalu tau kena ukum.

Ari nya tadi kitai patut nyaga akaun email kitai enggau manah. Anang meri akaun email kitai ngagai orang bukai. Nadai kebuah kitai meri akaun email kitai ngagai orang bukai laban semua orang ti be-umur 18 taun ka atas tau ngerejister akaun email enggau enda bebayar. Tambah mega pemaioh akaun email ti tau dibuka kitai nadai disekat.

Jaga akaun email kitai baka kitai nyaga akaun bank kitai. Tentu ka Password tauka jako lalai ti dikena kitai muka email kitai enda ditemu orang bukai. Pia mega tentu ka kitai nukar password kitai enda kurang ari sekali dalam 3 bulan. Diatu udah bisi software ti dikena muka password ti lama enda ditukar. Enti password kitai ulih ditemu orang bukai, nasib kitai teserah ngagai orang nya tadi. Enti ia ngibun penemu ti jai ngena password nya tadi, jai meh nasib kitai. Bisi meh penusah tau datai nuntung kitai.

Taja pia, enti password email kitai ulih ditemu orang bukai, ukai reti ia email kitai nya tadi terus lenyau. Kitai agi ulih muka email kitai nya baru lalu nukar password nya ngagai password ti baru. Enti password nya tadi udah ditukar orang bukai ti muka email kitai nya tadi kitai ulih minta bantu ari website ti ngada ka service email tu tadi baka Google.com enti kitai ngena @gmail.com tauka Yahoo.com enti kitai ngena @yahoo.com. Cara ia bakatu:

Leboh kitai ngerejister email akaun kitai, kitai dipinta ngisi penerang ti besangkut paut enggau kitai ti bempu email. Siti ari penerang ti patut diisi kitai dia ianya “Security Question“. Kitai dipinta milih jako Tanya, lalu udah nya kitai meri saut kitai dia. Security Question tu deka ditanya ngagai kitai enti kitai minta Bantu ari email service provider tu nyidi password kitai. Nya alai kitai mesti deka ngingat ka “Security Question”. Enti kitai enda ulih ingat ka “Security Question” tu nya baru kitai nadai jalai ulih muka akaun email kitai.

Email mega siti ari cara orang ulih ngirum sereta ngerembai ka virus enggau spyware dalam internet. Maioh macam cara pekara tu ulih dikereja. Kesatu, ngena cara ngelalai ka virus tauka spyware dalam file ti disangking ka dalam email ti dikirum ka kitai. Taja pia virus ti dikirum ka email ti bansa tu ulih ditemu anti-virus ti bisi disedia ka website ti nyendia ka service internet. Nya alai pekara ti bansa tu jarang bendar tau nyadi.

Spyware mudah agi tama ngagai akaun email kitai enti dibanding ka enggau virus. Email ti dikirum ngena cara berantai tauka email ti dikirum ari siti email ngagai siti email ti bukai suah bendar bisi ngundan spyware. Spyware tu tau ngenusah ka kitai laban ia ulih ngambi penerang pasal akaun email kitai sereta mega penerang pasal akaun email ti bisi dalam list kitai. Penerang tu tadi lalu dikirum ka ngagai orang ti bempu spyware tu tadi. Nya ngujung ka kitai nerima maioh macam email genap hari.

Nya alai peninga, enti kitai maioh nerima macam-macam email genap hari, email baka promosi enggau email ti enda bebatang, pekara tu nyadi laban bisi spyware dalam email kitai.

Kena kitai nyeliah ka pekara ti bansa tu nyadi, kitai anang muka email ti datai tang simpan ia dalam folder “Spam“. Email dalam folder spam tu deka dipadam ka udah sebulan.

Kitai mega anang forward email sebarang ngagai bala kaban kitai. Tentu ka kitai mereti sereta setuju enggau isi sereta pekara ti ditulis dalam email nya tadi sebedau kitai ngirum ka ia kebukai. Tentu ka mega email nya tadi bisi beguna ba orang ti nerima email kitai laban kitai enggai direport orang ngirum ka email enggau sebarang. Orang ti bansa tu dikumbai “Spammer”. Enti kelalu maioh report “spammer” diterima pasal email kitai, akaun email kitai nya tadi tau ditutup terus.

Penutup

Peninga ti dipebasa,

Email tu siti ari perengka ti beguna bendar kemaya hari tu. Ia nyadi ka wakil kitai dalam dunya ICT. Kitai betanggungjawab ka semua pekara ti datai ari email kitai. Nya alai kitai patut berat ka pengelikun kitai ngena email kitai. Kitai mega patut nyaga password email kitai enggau manah laban enti ia ulih ditemu orang bukai kitai tau kena penusah.

Taja pia pengelikun ngena email tu nyamai diperati sereta dikereja kitai. asal kitai ngibun password kitai enggau manah, ingat ka “security Question” serta nemu sereta setuju enggau isi email ti di”forward” kitai ngagai orang bukai, serta mega enda muka sebarang email ti datai ngagai kitai, kitai semampai likun enti kitai ngena email.

Kena nutup randau ICT kitai ba Tusun 64 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku. Terima kasih.

Tusun 63 - Pengelikun Melayar Internet

Selamat tengahari serta tabi basa ngagai peninga.

Selamat kita begulai baru dalam perogram Randau ICT. Saritu Program kitai ba Tusun 63.

Saritu aku deka belaboh ngenang pengelikun ngena internet. Pekara ti deka dikenang kitai saritu ianya bakani kitai ulih nyaga pengelikun kitai leboh ti melayar internet.

Tuju kitai melayar internet ianya dikena ngiga penerang pasal pekara ti deka ditemu kitai. Kitai melayar internet dikena nambah ka penemu kitai enggau dalam agi pasal siti – siti pekara ti deka ditemu kitai. Pia mega kitai melayar internet dikena ngiga penerang ti tau nyukong penerang di deka dikenang kitai ngambi ka buah kenang kitai enda sebubu ngapa tang bisi disukong enggau penerang ti bendar. Ari internet semua penerang tu ulih diambi kitai enggau manah.

Taja pia ukai semua penerang ti bisi ayan ba internet ulih diarap ka kitai magang. Kitai enda tau nerima penerang ti ayan dia enggau seratus peratus pengarap kitai. Nya alai kitai mesti nemu ni bagi penerang ti tau diguna. Kitai enggai nyadi penyukong sereta ngerembai ka penerang ti enda betul ngagai orang bukai berindik ari kitai ti tetemu ka penerang ti salah nya tadi. Nya alai kitai patut nemu pemendar penerang ti diterima kitai ngambi ka kitai enda kena penusah dudi ari. Kelebih agi, kitai enggai enda nemu diri tau kena penusah ari pekara ti bansa tu.

Siti ari cara kitai nemu penerang ti ayan dia bisi diguna ianya penerang ti datai ari website ti bisi kredibiliti. Antara website ti bisi kredibiliti ianya baka Google.com, Yahoo.com, Amazon.com, Wikipedia.com, Pcworld.com enggau eHow.com. Pia mega penerang ari Ezine.com ulih diarap kitai laban penerang dia ditapis orang ti nyadi moderator website tu tadi.

Nya alai enti kitai ngiga penerang pasal pekara ti deka ditemu kitai, kitai tau muka website tu dulu lalu giga penerang ti deka digiga kitai dalam website ti udah dipadah ka aku dulu tadi. Kadang- kadang penerang ti digiga kitai enda maioh ayan tauka nadai ayan sekali. Enti bakatu, kitai tau ngiga penerang ari website bukai. Enti ulih giga penerang ari enda kurang ari 10 iti website ti bukai lalu banding ka semua penerang dia tadi. Ari nya kitai bulih siti genturung penerang ti sama nerang ka pekara ti deka ditemu kitai.

Tentu meh maioh penerang tu nyau deka nerang ka pekara ti sama. Nya alai enti bisi penerang ti becanggah enggau penerang maioh ti bukai, penerang tu tau dikumbai kitai penerang ti enda tentu betul. Kitai mega tau enda iboh ka penerang ti bansa tu.

Kitai mega patu berati ka penerang ti disukong enggau contoh tauka data ti betul. Enti penerang nya enda disukong enggau data tauka contoh ti betul, penerang nya tadi enda tegap lalu tau dikelaung ka kitai. Ari nya kitai nemu penerang tu enda tentu ulih diguna.

Tu siti ari cara kitai nyaga pengelikun kitai melayar internet, kelebih agi bakani kitai ulih milih penerang ti betul.

Bisi mega website ti ngada ka pop-up ianya window page ti mit ti bisi ngundan iklan. Pop-up tu bisi maioh macam tuju. Bisi nya tuju ti manah sereta bisi mega tuju ti enda manah. Bisi pop-up tu ngumpan kitai klik ba link ti bisi dia lalu mai kitai ngaga webpage ti bukai. Bisi mega pop –up tu ngundan spyware dipindah ka ngagai computer kitai lalu ngumpul penerang dalam computer kitai. Udah nya spyware tu ngirum ka penerang pasal computer kitai ngagai computer orang ti bempu spyware tu tadi. Bisi mega pop – up tu ngundan virus computer ti tau ngerusak computer kitai.

Nya alai enti ulih anang peduli ka pop – up tu. Anang ulih diumpan enggau maioh macam semaia ti bula. Antara semaia ti bula nya ia madah ka kitai bisi bulih perais. Pekara ti bansa tu tusah bendar dipecaya ka kitai. Pia mega manah agi enti kitai ngalih ngagai website bukai. Website ti meruan jarang ngada ka pop –up ba webpage sida laban sida ia nemu cara ti bansa tu enda tentu dikerindu ka maioh orang.

Bisi mega website ti enda tentu manah dipeda kitai kelebih agi bala anak kitai. Website ti bansa tu sigi maioh bendar diatu lalu majak nambah genap hari. Enda iboh aku ngenang enggau nyentok reti website ti ko aku nya tadi. Website ti bansa tu sigi nadai pulai ka pemanah ka kitai. Ia ukai semina tau ngerusak runding kitai engau kitai sebilik aja. Ia mega masau jam kitai lalu ngelepas ka peluang kitai dalam pengawa dagang internet.

Siti ari cara kitai nyeliah ka website ti bansa tu ianya ngena cara engkah komputer kitai ba tempat ti tebuka baka bilik besai rumah kitai. Ngena cara tu kitai ulih meda webpage ti dilayar anak kitai. Pia mega kitai empu enda tekuing ati deka muka webpage ti enda manah laban skrin computer kitai ulih dipeda kitai sebilik ti bukai. Nya alai kurang agi penguji kitai ti deka muka website tauka webpage ti bansa tu. Webpage serta website ti enda manah tu mega tau ngasoh kitai gian deka meda website nya belama. Ari nya tadi rugi bendar kitai laban enda ulih ngena peluang bisi perengka serta pemansang ICT pulai ka penguntung kitai kelebih agi dalam pengawa dagang internet.

Penutup

Peninga ti dipebasa,

Penemu pengelikun internet sigi patut dikembuan kitai. Tu siti ari penemu ti asas serta patut diibun lalu dikerembai ka ngagai bala kaban kitai. Kesatu, kitai enggai ka enda nemu diri diumpan orang ngujung ka kitai ulih kena penusah. Kedua, kitai enggai kelalu takut ngena internet laban ti enda nemu bakani penusah tau nuntung kitai.

Pengelikun ngelayar internet patut ditemu kitai. Kitai patut ulih berati ka ni website ti ngundan penerang ti beguna ba kitai. Kitai mega patut ulih milih penerang ti deka diambi sereta dikena kitai nambah ka penerang pasal pekara ti deka dikenang kitai.

Pia mega penguji ti datai ari website ti enda manah mega maioh. Kitai patut engkah computer kitai ba tempat ti mudah dipeda baka ba bilik besai, lalu skrin computer nya enda lindung ari dipeda kitai ngambi ka kitai tauka bala kitai sebilik ti bukai enda tekuing ati deka muka website ti enda manah tu.

Aum sereta pekat diri sebilik mega beguna bendar dikena nagang penusah ari pengingin ngena internet meda serta melayar website tauka webpage ti enda manah. Anang enda madah serta nerang ngagai bala anak kitai tuju kitai ngada ka internet ba rumah kitai. Anang enggai ngerara enti sida ia bisi muka website ti enda manah tit au ngerugi sida ia. Bisi meh software ti tau nagang website ti enda manah tu dipeda, tang makin sehari, webswite ti bansa tu makin landik nyeliah ka sistem pengelikun ti bisi. Nadai lebih ari runding kitai ti betul ti ulih nagang pekara bansa tu nyadi. Software ti bisi diada ka semina ulih mantu aja tang runding ti betul nya meh nentu ka penguntung kitai dalam nguna internet enggau manah.

Ba Tusun program ti deka datai aku deka mai peninga ngenang pasal pengelikun ngena email. Tu mega penting bendar ditemu kitai ngambi ka kitai ulih berati ka pekara tu lalu enda ngereja pengawa ti tau ngerugi kitai leboh ti ngena email enda ngira public email tauka private email.

Kena nutup randau ICT kitai ba Tusun 62 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku. Terima kasih.

Tusun 62 - Pengelikun internet

Selamat tengahari serta tabi basa ngagai peninga.

Selamat kita begulai baru dalam perogram Randau ICT.

Dalam program kitai ari Tusun 57 nyentok ka Tusun 61 nyin kemari kitai sama berandau ka bakani kitai ulih ngaga blog kitai ba blogspot.com. Kitai mega berandau ka bakani kitai ulih ngena blog kitai dikena ngereja pengawa dagang enggau bakani kitai ulih ngada ka penatai pemisi ari blog kitai.

Taja aku ngenang enggau silik bakani kitai ulih ngaga blog kitai ba Blogspot.com, ukai reti ia kitai semina ulih ngada ka blog kitai ditu aja. Maioh mega website ti bukai bisi ngada ka peluang kitai ngada ka blog kitai enggau cara ti enda bebayar. Aku ngambi contoh Blogspot.com laban enti dibanding ka enggau website bukai, cara ngadu ka blog ditu jauh mudah agi. Aku empu belabuh enggau dalam pengawa dagang internet ngena cara ngada ka blog. Tu siti ari cara ti mudah alai kitai neleba ka diri dalam pengawa dagang internet. Tambah mega Blogspot.com tu diempu Google.com, nya alai mudah agi blog kitai ditemu orang laban Google.com tu siti ari search engine ti pemadu besai sereta tebilang. Nya alai manah agi peluang blog kitai ditemu serta dibaca orang maioh.

Lengka ka kitai dulu kenang pasal blog. Kitai deka ngenang maioh agi pekara pasal blog ba program kitai ti deka datai.

Saritu aku deka ngenang siti agi pekara dalam dunya internet ianya nyaga pengelikun kitai enggau kitai sebilik leboh kitai ngena internet. Suah bendar kitai maca ba surtatkhabar tauka ninga nengah radio tauka meda ba TV, kenang pasal pengelikun kitai ti ngena internet semampai dipadah ka belama. Enti kitai enda nemu reti pengelikun internet, tusah mega kitai deka mereti ka nama penusah ti tau dibai internet enti kitai enda ngena internet ngena cara ti likun. Tambah mega enti kitai enda mereti ka pekara ti besangkut paut enggau pengelikun internet, tu tau ngujung ka kitai takut ngena internet. Ari ti takut ngena internet kitai lalu ngelepas ka peluang kitai ti ulih ngemanah ka pendiau pengidup kitai laban kitai enda berani ngereja pengawa dagang internet.

Ari nya pengerugi pulai ka kitai empu laban ti enda ngambi peluang ari internet ti udah bisi di moa kitai. Berindik ari tu aku ngasai ka patut bendar kitai berandau ka nama reti pengelikun internet lalu bakani kitai ulih nyeliah ka diri enggau kitai sebilik ari kena penusah ketegal ti enda cukup bejaga leboh ti ngena internet.

Makin sehari makin maioh guna internet. Makin sehari makin maioh pekara ulih dikereja kitai nengah internet. Pemaioh orang ngena internet mega makin nambah genap hari.

Diatu bisi 1.6 Billions orang ngena internet serata dunya. Reti ia 20% orang di dunya tu tauka 1/5 ari populasi dunya tu bisi ngena internet. Pemesai guna internet dalam pengidup kitai besari –sehari sigi enda ulih disalam ka agi.

Pengeran ati perintah menoa enggau perintah negeri Sarawak ngemansang ka infrastructure internet mega sigi kering. Genap hari kitai ninga bisi aja pemansang dalam pekara ICT kelebih agi ia ti besangkut paut enggau internet. Tu nanda ka pemesai guna internet sigi nadai endor mantah.

Taja pia, ketegal ti besai guna sereta mega pemaioh orang ngena internet, tentu meh bisi orang ngembuan tuju ti enda manah leboh ti ngena internet. Tuju ti enda tentu manah tu, enti enda ngenusah orang bukai nadai ngawa. Tang enti tuju orang nya tadi enda manah, tentu meh bisi orang bukai kena penusah. Bakatu mega penusah ti dibai orang ti ngembuan tuju ti enda manah dalam internet.

Maioh macam cara penusah ulih datai nuntung kitai enti kitai kurang penemu serta kurang pemereti dalam pengelikun internet. Bisi nya semina ngenusah kitai mimit aja baka penusah ti tau ngasoh komputer kitai jem. Pia mega bisi penusah ti enda tentu besai baka penusah ti tau ngujung ka akaun email kitai dikinsel tauka ditutup. Penusah ti besai agi tau ngasoh kitai rugi duit tauka reta tengkira. Diatu, bisi udah nyadi di menua Amerika, Jipun enggau Philipines, penusah ketegal internet tau mega naban ka nyawa.

Pengelikun internet patut bendar diperati serta ditemu kitai ari pun kitai nyambung komputer kitai ngagai internet nyentok kia kitai madam ka komputer kitai. Leboh komputer kitai aktif ba internet, bisi aja cara orang bukai ti sama ngena internet tau ngacau pengelikun kitai.

Orang ulih ngacau pengelikun kitai leboh kitai melayar webpage. Orang ulih ngacau pengelikun kitai leboh kitai ngena email. Orang ulih ngacau pengelikun kitai leboh kitai negena social networking. Orang ulih ngacau pengelikun kitai leboh kitai ngena Skypee. Orang mega ulih ngacau pengelikun kitai leboh kitai ngena merchant account. Orang mega ulih ngacau pengelikun kitai leboh kitai download file ari internet, kelebih agi file ti enda bebayar.

Taja pan maioh macam cara orang bukai ulih ngacau pengelikun kitai nengah internet, nadai siko sida tu ulih ngacau kitai enti nadai pemendar ari kitai empu. Sistem dalam internet sigi bakatu. Enti nadai pemendar ari kitai, tuju orang ti deka ngacau kitai tu tadi sigi enda nyadi.

Taja pia bakani kitai meri pemendar ngagai orang nya tadi? Maioh kitai enda nemu diri meri pemendar ngagai orang bukai ngacau kitai. Maioh cara dikena orang tu ngumpan kitai nyentok ka kitai empu enda nemu diri. Kitai enda berasai diumpan ngujung ka kitai meri pemendar ngagai orang nya tadi ngambi ulih ari kitai.

Pekara tu meh deka dikenang aku dalam program kitai ti deka datai. Saritu, cukup meh ktai nemu, dalam internet bisi aja orang ngembuan penemu ti enda manah. Taja pia orang tu enda ulih sebarang ia ulih ngenusah kitai enti nadai pemendar ari kitai. Tang kitai enda nemu diri meri pemendar nya tadi. Kitai selalu diumpan ngena ngena maioh macam cara. Cara orang ti ngumpan tu meh patut ditemu kitai. Pekara tu mega deka dikenang aku dalam Tusun program kitai ti deka datai.

Penutup

Peninga ti dipebasa,

Penemu pengelikun internet sigi patut dikembuan kitai. Tu siti ari penemu ti asas serta patut diibun lalu dikerembai ka ngagai bala kaban kitai. Kesatu, kitai enggai ka enda nemu diri diumpan orang ngujung ka kitai ulih kena penusah. Kedua, kitai enggai kelalu takut ngena internet laban ti enda nemu bakani penusah tau nuntung kitai.

Suba aku kala ngenang, penemu internet tu baka penemu kitai driba kereta. Taja pan bisi penusah Accident ngena kereta, kitai enda ulih nyeliah ka diri ari ngena kereta genap hari. Reti ia guna kereta dalam pengidup kitai semampai ngeluie ari penakut kitai ka bisi peluang accident. Runding kitai ngena internet patut mega sama bakatu. Pemesai guna internet patut ngeluie ari penakut kitai ti irau ka pengelikun internet.

Kitai berani driba kereta laban kitai nemu bakani penusah accident tau nyadi. Ari nya kitai naka ulih nyeliah ka peluang penusah accident. Kitai mega patut semampai berani ngena internet laban kitai patut nemu bakani penusah internet tau nyadi. Ari nya kitai nemu ngada ka pengelikun internet. Pekara tu deka dikenang aku enggau silik dalam program kitai ti deka datai. Kitai ngenang pengelikun melayar webpage. Udah nya kitai ngenang pengelikun ngena email, disambung ngagai pengelikun ngena social networking enggau pengelikun ti bukai.

Kena nutup randau ICT kitai ba Tusun 62 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku. Terima kasih

Tusun 61 - Public Blog – Bagi 6

Selamat tengahari serta tabi basa ngagai peninga.

Selamat kita begulai enggau aku Kassim Jeritan dalam program Randau ICT. Saritu program kitai ba Tusun 61.

Saritu kitai nyambung kenang kitai ba ari Tusun 56 nyentok ka Tusun 60 nyin kemari ianya Public Blog. Ba program kitai Tusun 60 nyin kemari kitai sama ngenang bakani kitai ulih netap ka layout tauka corak blog kitai ngambi ka blog kitai kemas dipeda. Pia mega kitai nentu ka blog kitai enda ngundan sebarang link ti enda sama tema enggau blog kitai laban link ti bansa tu tau mai blog kitai nurun ranking ba search engine. Nadai guna blog kitai enti enda tinggi ranking ba search engine laban enda ulih dipeda serta dibaca orang bukai. Lelak meh kitai ngaga blog lalu nulis article tauka posting tang nadai orang maca. Enda salah baka ngetan bubu ba endor nadai ikan.

Saritu kitai nambah ka penemu kitai dalam public blog alai kitai ngenang siti agi pekara saritu ianya bakani kitai ulih ngada ka ruang iklan ngena program Adsense.

Program Adsense tu siti ari program ti diada ka Google.com alai kitai ulih ngiga penatai pemisi enggau enda bebayar. Blogspot.com tu mega siti ari kompeni ti udah dibeli Google.com. Ia ti bendar ia, tuju Google.com tu meli blogspot.com tu ianya alai ngada ka peluang ngagai maioh agi orang ulih enggau dalam program Adsense. Program Adsense tu bakatu:

Orang ti bisi website tauka blog ti deka ngelaku ka website sida ia milih genteran jako ti dikena lalu mayar ngagai Google.com. Sida ia tu ngerejister diri dalam siti agi program ti diada ka Google.com ianya Adwords. Google.com lalu ngada ka siti link ngagai website orang ti mayar nya tadi. Link tu diengkah ka dalam website tauka blog orang ti bisi ngerejister diri dalam program Adsense.

Taja pia link nya enda diengkah ba sebarang website tauka blog. Ia semina ayan ba website tauka blog ti sama tema enggau tema website orang nya tadi. Contoh, enti website A betema ka kereta, lalu website B betema ka spare part kereta, udah nya siti agi website C betema ka Fesyen baju. Enti A ngerejister diri dalam program Adwords, B enggau C sama bisi ngerejister diri dalam program Adsense, link ngagai website A bisi peluang ayan ba website B tang nadai peluang sekali ayan ba website C.

Nya alai penting bendar blog kitai bisi tema ti terang sereta nyentok. Anang ngenang kelalu maioh pekara dalam blog kitai. Enti kitai nulis article kitai berandau ka pengawa pelajar, anang ngenang pasal pengawa nginti. Enti kitai deka nulis pasal pengawa nginti, kitai ngerejister blog baru. Terang agi tema blog kitai, manah agi kualiti link ti diengkah Google.com dalam blog kitai.

Enti orang ti maca blog kitai bisi klik ba link website nya tadi, kitai bulih komisyen ari Google.com. Komisyen kitai nya direkod dalam akaun Adsense kitai. Udah cukup maioh komisyen kitai dia, nyau lebih ari penyampau ti minimum, Google.com lalu ngirum ka cek duit ngagai kitai. Tu meh cara kitai tau bulih penatai pemisi ari program Adsense.

Taja pia kitai enda tau klik ba link ari website kitai empu. Kitai mega enda tau nesau bala kaban belayan ngasoh sida ia klik ba link dalam website kitai genap hari. Enda tau lebih ari sekali. Google.com ulih nyidi pekara tu. Sida ia bisi software ulih nemu pekara tu nyadi. Enti kitai ngereja pengawa bakatu, akaun Adsense kitai lalu ditutup terus. Kitai mega enda ulih ngerejister akaun baru laban nama kitai udah kena blacklist Google.com. Rugi meh kitai enti pekara bakatu nyadi.

Kitai dulu ngerejister diri dalam program Google Adsense. Siti ari pemanah perengka ti diada ka Google.com ianya sida ia mudah dikena kitai. Enti kitai bisi akaun gmail, kitai enda iboh ngerejister akaun baru tang kitai tau ngena akaun ti sama enggau akaun gmail kitai. Udah kitai ngerejister diri dalam program Adsense, kitai lalu deka ngada ka ruang alai iklan Adsense tu tau ayan ba blog kitai.

Ba control panel blog kitai kitai klik ba link “Monetize“. Dia kitai ulih milih dini alai ruang iklan patut ayan ba website kitai. Kitai enda ulih ngayan ka lebih ari dua iti ruang dikena iklan Adsense tu.

Kitai mesti nemu dini ruang iklan ti ulih narit ati orang ti maca blog kitai. Nitih ka pansik orang ti landik dalam pengawa dagang internet, ruang ti mudah narit ati orang meda skrin computer ianya ba atas, tengah enggau tisi ari kiba skrin computer kitai. Tauka baka huruf “F” ba mua skrin computer kitai. Ditu meh kitai patut ngada ka ruang iklan Adsense kitai.

Kitai mega ulih milih pemesai ruang iklan ti deka diada ka kitai. Tentu ka ruang iklan kitai nya tadi enda kelalu besai tauka kelalu mit. Enti ruang iklan kitai kelalu besai, blog kitai nyau baka webpage iklan. Orang enda tentu rindu ka webpage tauka blog ti bansa tu. Enti ruang iklan kitai kelalu mit, orang enda tepeda ka iklan kitai ngujung ka nadai orang klik ba link Adsense kitai. Rugi ga bakatu.

Kitai mega ulih milih iklan dalam genteran jako aja tauka iklan ngena gambar. Manah kitai ngena kedua dua cara tu. Anang enda ingat, kitai tau engkah ruang iklan ba dua iti tempat ba blog kitai. Siti ruang ngena gambar, siti ngena genteran jako. Iklan ti ngena gambar engkah kitai ba atas blog kitai ianya sebedau article kitai ti terubah. Iklan ngena genteran jako engkah kitai ba sidebar tauka di baruh article kitai.

Penutup

Peninga ti dipebasa,

Saritu kitai berandau ka bakani kitai ulih ngada ka ruang iklan Adsense dalam blog kitai. Program Adsense tu siti ari cara kitai ulih ngiga penatai pemisi ari internet. Bisi orang udah nerima bayar ti cukup maioh ari Google.com ari Program Adsense tu. Di menua kitai Malaysia tu udah bisi orang bepanggai ba Program Adsense tu nyadi ka penatai pemisi sida ia.

Taja pia ukai reti ia kitai enda tau enda bulih belanja semina nyendia ka ruang iklan Adsense dalam blog kitai. Peninga anang enda ingat, nadai jalai singkat bulih pengaya. Ia beguna ka pengering ati enggau pengerajin. Blog kitai mesti deka selalu ditambah enggau penerang ti beguna. Munyi ka udah disebut aku dalam Tusun program ti dulu, kitai patut nulis article lalu posting ngagai blog kitai enda kurang ari 2 kali seminggu.

Program Adsense ukai semina cara kitai tau bulih penatai pemisi dalam blog kitai. Maioh cara bukai, nanya ka pengerajin kitai ngiga peluang dagang dalam internet. Kitai tau ngerejister diri dalam Affiliate Program.

Peluang dagang internet ti bukai enggau contoh website ti ulih dikena kitai deka dikenang aku dalam program kitai ti deka datai.

Peninga ti dipebasa,

Kena nutup randau ICT kitai ba Tusun 60 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku. Terima kasih.

PR: wait... I: wait... L: wait... LD: wait... I: wait... wait... Rank: wait... Traffic: wait... Price: wait... C: wait...

Tusun 60 - Public Blog – Bagi 5

Selamat tengahari serta tabi basa ngagai peninga.

Selamat kita begulai enggau aku Kassim Jeritan dalam program Randau ICT. Saritu program kitai ba Tusun 60.

Saritu kitai nyambung kenang kitai ba Tusun 59 nyin kemari ianya Public Blog. Ba program kitai Tusun 59 nyin kemari kitai sama ngenang bakani kitai ulih netap ka setting dalam blog kitai ngambi ka blog kitai kemas dipeda. Pia mega kitai nentu ka blog kitai enda nyadi ka palan alai orang nulis sebarang komen dalam blog kitai ti tau ngujung ka kitai kena penusah ari orang ti bansa tu. Pia mega kitai ulih netap ka blog kitai ulih ditulis orang bukai enti kitai deka mai orang bukai bekunsi penerang dalam blog kitai.

Saritu kitai nambah ka penemu kitai dalam public blog alai kitai ngenang siti agi pekara saritu ianya bakani kitai ulih ngadu ka layout tauka corak blog kitai. Blog ti ngibun corak ti manah tau narit ati orang ti maca blog kitai lalu narit ia maca blog kitai baru. Ditu mega kitai ulih ngambi peluang ari blog kitai ngiga penatai pemisi enggau cara ngada ka link ti ulih alai kitai nerima komisyen.

Ba control panel blog kitai kitai klik ba link “Layout“. Udah nya kitai lalu dibai ngagai webpage ti bisi ngayan ka pekara ti besangkut paut enggau corak blog ti ulih diubah kitai.
Bisi empat iti pekara ulih diubah kitai enti kitai deka ngubah corak blog kitai nitih ka pemanah asas\i ba ati kitai.

Kesatu ianya bakani gaya atur penerang ti deka dipandang ka kitai. Dini alai kitai engkah posting tauka article ti ditulis kitai. Pia mega dini kitai deka engkah penerang pasal kitai ti bempu blog ngambi ka orang nemu serta ngelala kitai. Mudah agi orang bulih penerang pasal kitai, mudah agi kitai ngelaku ka barang kitai dalam blog kitai.

Enti kitai bisi lambang ti deka dikena kitai, manah agi kitai mandang ka ia ba heading ianya ba atas blog kitai. Heading ti manah serta besangkut paut enggau blog kitai ulih ninggi ka ranking kitai ba search engine.

Ba sidebar kitai ulih mandang ka link ari website tauka blog orang bukai ti bisi besangkut paut enggau pekara ti dikenang dalam blog kitai. Contoh, enti blog kitai ngenang pasal cara ngintu pengerai, kitai tau engkah link bolg tauka website ari opis pengerai tauka gerempung ngintu pengerai ti bukai. Ngena cara ti bansa tu, blog kitai ulih bulih ranking ti tinggi laban blog kitai nya tadi bisi besangkut paut enggau blog ti sama tema.

Kitai mega ulih nambah ka penerang ti mit ba sidebar ngena cara “Add Gadget”. Gadget tu ianya siti coding ti mit dalam php file tauka java script. Ia dikena ngena cara ditambah dalam blog kitai, selalu ia diengkah kitai ba tisi tauka sidebar. Diatu bisi lebih 6,000 macam gadget ulih dikena kitai ba blog kitai. Kitai patut milih gadget ti beguna aja. Nadai guna ga enti blog kitai nyau penuh laban gadget aja tang nadai ngundan penerang ti beguna. Kitai patut ngena gadget ba ti bisi ba basic aja. Tambah mega maioh macam gadget tu bisi ngundan link ngagai website orang ti ngada ka gadget nya tadi. Enti kelalu maioh link keluar ari blog kitai lalu website orang ti bempu link nya tadi enda sama tema enggau blog kitai, ranking kitai ba search engine deka nurun.

Antara gadget ti tau dikena dalam blog kitai ianya “text” alai kitai ulih ngada ka penerang ti pandak tauka jako gerah, HTML/JavaScrfipt alai kitai ngayan ka affiliate link tauka coding ti bukai. Kitai mega tau ngada ka “Video Bar” alai kitai ngayan ka video ari Youtube.com tauka Google Video. Kitai mega tau ngena Gadget “Blog list” enggau “link list” dikena ngayan ka link ngagai website tauka webpage orang bukai.

Kitai mega ulih ngubah corak blog kitai baka huruf ti dikena. Semua tu ulih diubah kitai enti kitai klik ba link “ Fonts and Colors”.

Enti kitai nemu programming kelebih agi dalam php, kitai tau ngubah coding dalam blog kitai enti kitai klik ba “Edit HTML”. Pia mega ditu kitai ulih ngena template corak ti bukai kelimpah ari corak ti bisi disedia ka ba blogspot.com. Taja pia diatu kitai anang guai negu dulu area tu laban kitai patut ngena perengka ti udah disedia ka ditu.

Enti kitai deka nukar template blog kitai enggau template ti bukai kitai klik ba link “Pick New Template”. Ditu kitai ulih milih corak baru nitih ka pemanah ba ati kitai.

Genap kali kitai ngubah corak blog kitai ngagai corak ti baru, kitai anang enda ingat klik ba link “Save Changes”. Enti enda pia, semua pekara ti udah diubah kitai nya tadi enda ulih ayan. Pekara tu patut diperati ka kitai genap kali kitai bisi ngubah blog kitai. Tu siti cara blogger.com nyaga pengelikun kitai ngena blog kitai.

Penutup

Peninga ti dipebasa,

Saritu kitai berandau ka bakani kitai ulih netap ka layout dalam blog kitai. Tu dikena nentu ka corak blog kitai kemas serta manah dipeda. Blog ti kemas tentu meh ngerindu ka ati orang ti maca article tauka posting dalam blog kitai.

Pia mega dalam layout tu kitai nentu ka semina link ari website bukai ti bisi besangkut paut enggau tema blog kitai aja bisi ayan dia. Kitai enggai ka blog kitai enda bulih ranking ti tinggi dalam search engine ketegal kitai ti ngayan ka link ti enda patut dalam blog kitai.

Udah tu ila kitai berandau ka bakani kitai ulih ngaga blog kitai nyadi ka palan kitai ngada ka penatai pemisi kitai. Pekara tu penting bendar laban taja pan maioh orang datai maca blog kitai, nadai meh guna enti nadai ngenatai ka pemisi ngagai kitai. Nadai guna ga kitai bisi blog tang nadai ngenatai ka hasil.

Kenang pasal blog Bagi 5 dilengka ka aku naka tu dulu. Kitai nyambung kenang pasal blog enggau silik agi ba Tusun program ti deka datai.

Peninga ti dipebasa,

Kena nutup randau ICT kitai ba Tusun 60 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.
Enggau nya, mupok aku. Terima kasih.