Tusun 8 - Bakani Meli Perengka Komputer (Bagi 2)

Ba program tu kitai sama ngenang bakani kitai deka meli perengka komputer ti bukai ka ujung ka agi.

Minggu ti udah ianya ba Tusun 7 kitai ngenang pasal pekara ti patut diperati leboh kitai meli monitor, keyboard, mouse enggau printer.

Diatu aku deka nyambung kenang pasal meli perengka komputer ti bukai ti sama beguna bendar dikena napi penemu kitai dalam pekara ICT ba taun 2009.

Scanner

Scanner tu beguna bendar dikena kitai mindah ka printed materials baka gambar, certificate, surat tauka dokumen bukai ngagai komputer kitai. Guna scanner tu tebalit enggau guna printer. Enti

Scaner tu beguna bendar. Kitai ulih scan surat ti beguna baka I.C, surat beranak, pala tanah, insurance cover, surat nikah sereta maioh dokumen penting ti bukai ulih discan kitai lalu disimpan dalam computer. Enti surat asal lenyau kitai nyamai ngaga baru laban bisi rekod ba komputer kitai.

Dua pekara patut diperati ka kitai enti meli scanner ianya speed enggau quality. Dua pekara tu mega nentu ka rega scanner ti dijual.

Quality scanner tu ditentu ka resolution dalam unit dpi (dot per inch). Resolution tu nentu ka berapa silik imej nya diterima. Low resolution bisi 100 – 300 dpi dikena scan text. Imej ia enda tentu terang tang agi ga ulih dikena. Semina kitai tusah deka ngaga imej nya besai agi.

Medium resolution ianya 600 dpi udah cukup manah dikena scan gambar enggau dokumen ti bukai. Tang ia agi enda tentu manah enti kitai ngaga gambar nya besai agi.

Enti ulih meli resolution ti tinggi baka 2400 dpi ngambi ka kualiti scan kitai nya tadi manah. Taja pia tinggi agi dpi lama agi ga ia scan.

Pilih scanner ti ngena USB port laban ia laju agi speed enti disbanding enggau parallel port.

Pilih scanner ti ngena enda kurang ari 36-bit color depth enti kitai deka ngena scanner kitai scan gambar. Color depth tu reti ia penyampau curak ti ulih diambi scanner tu tadi. Tinggi agi color depth tajam agi imej ti diambi scanner tu tadi.

Tentu ka mega scanner nya ulih dikena ba computer kita. Tentu ka software scanner kitai ulih dikena ba komputer kitai.

Scanner diatu bisi macam utai ditambah tang anang irau, pekara patut diperati ka kitai ianya resolution, speed, enggau color depth. Lebih penting agi kitai nemu nama guna scanner kitai, nyimpan gambar ka nyimpan text maioh agi.

LCD Projector

LCD projector tu manah dikena leboh maia kitai bisi meeting ngambi ka kitai ulih bekunsi pekara ti enda ulih dipadah kitai ngena leka jako aja. Kadang – kadang kitai beguna ka gambar enggau chart dikena nerang ka siti-siti pekara dalam meeting. Maia tu meh LCD Projector tu beguna bendar.

Leboh aku agi kerja di Saratok suba aku bisi dibai ngintu ari pengada siko ari bala kaban aku ti cukup umur 55 taun. Siti ari program maia nya ianya mantai ka gambar ari maia kaban aku nya agi biak nyentok ka umur ia 55 taun. Pengerami tu digaga ba rumah panjai. Rindu bendar aku meda slide show nya tadi. Orang ti datai pan tepegun magang. Nadai kala meda teknologi ti baka nya.

Diatu maioh macam bansa LCD bisi dijual. Nya alai maioh alai kitai milih nitih ka guna kitai. Rega ia pan nyau jauh lebih murah ari 3 taun ti udah. Enti kitai meli LCD projector baruh ari RM3,000 kualiti gambar ia manah mega.

Tentu ka LCD projector ti deka dibeli kitai ulih nangkup guna ia. LCD 1,000 ngagai 2,000 lumen machine dah lebih ari cukup enti dikena kitai ba bilik ti umbas ia pemesai. Enti kitai ngena dewan tentu meh kitai beguna ka lumen machine ti tinggi agi.

Portable LCD projector mar agi rega tang nyamai dibai mindah kin kitu.

Banding ka pengelama mentol LCD nya ulih dikena. Pengelama mentol LCD tu ulih dikena dikira dalam berapa ratus jam sebedau ia patut diganti baru tauka sebedau ia angus. Ungkus nganti mentol ti jai mar, nyau ka sama enggau ungkus meli LCD projector ti baru. Tanya dulu warantty ba pekara tu sebedau mutus ka penemu deka meli LCD projector.

Perati ka LCD ti enda nyarih munyi laban ia tau ngenusah ka kitai.

Pen Drive

Pen drive mega dikumbai flash drive, keychain drive, key drive, USB key, USB stick tauka memory key. Semua nya sama magang.

Pen Drive tu nyau makin maioh dikena diatu. Siti ari kebuah ia makin popular laban ia mit nyamai dibai kitai mindah kin kitu. Pia mega kapasiti pen drive diatu nyau makin besai sampai 8GB ngagai 16GB.

Besai agi storage capacity ia, mar agi meh rega pen drive nya tadi. Pia mega pen drive ti popular brand mega mar agi ari ti kurang popular.

Kitai meli pen drive enti kitai ngena lebih ari siti computer ngambi ka nyamai dikena bepindah ka file. Pia mega kitai nguna pen drive dikena nyadi ka back up baka CD.

Tentu ka pen drive ti deka dibeli kita ulih dikena ba computer kita. Enda semua pen drive ulih dikena ba semua computer. Tu begantung ba Operating System ba computer kitai.

Tentu ka pen drive nya bisi security baka password. Tu beguna bendar enggai ka leboh maia pen drive nya berayan, ditemu orang bukai file kitai enda ulih dibuka orang sebarang.

Banding ka rega ari siti brand enggau brand ti bukai. Nadai tentu beda antara brand. Semadi meh kitai enda tentu manah nasib tebeli ka unit ti jai tang selalu ia bisi warranty setaun.

Microphone

Komputer microphone tu beguna dikena kitai berandau enggau orang bukai ngena internet tauka enti kitai deka ngerekod jako kitai. Maioh macam microphone bisi dijual. Bisi mega microphone dijual sama enggau headphone dikena kitai ninga.

Tentu ka jack microphone nya sama enggau jack port ti bisi ba konputer kitai. Nadai guna kitai meli microphone dah nya enda ulih dikena ketegal jack port ti enda sama.

Speaker

Kitai beguna ka speaker computer dikena kitai ninga ka audio tutorial tauka ninga lagu tauka meda movie ba computer kitai. Diatu maioh file ba internet ngena audio file.

Diatu maioh macam speaker computer bisi dijual. Speaker ti berega Dalam RM200 lebih ari cukup dikena kitai. Nadai guna bebelanja meli speaker computer ti kelalu mar.

Penutup

Empat minggu kita udah berandau ka bakani kitai deka meli computer enggau perengka computer ti bukai ngambi ka kitai ulih ngena computer enggau ransng agi. Leboh aku ngenang pasal meli computer enggau computer ti bukai aku mai peninga sama berati ka pekara ti patut ditemu kitai. Aku enda rekomen ka brand siti siti laban nya enda tentu penting iga.

Taja pia kitai patut nyikap diri enggau penemu pasal computer laban teknologi computer tu jampat bendar berubah. Baca penerang pasal computer. Enti kita ngena internet tau ngabas website pcworld.

Anang enda nanya ka warranty barang ti deka dibeli kita. Maioh perengka tu mar rega, patut bisi warranty. Pia mega enti ulih, beli polisi insurance ka perengka computer kita ngambi ka nyamai diganti enti jai tauka lenyau.

Kena nutup randau ICT kitai ba Tusun 8 tu aku sekali agi ngelalau, randau ICT tu randau kitai. Aku ngelalu ka Tanya sereta komen peninga, nya alai aku bisi nyendia ka blog http://kjict.blogspot.com alai kita ulih ngenatai ka komen tauka tanya kita.    

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Mupok aku.

Terima kasih.

Tusun 7 - Bakani Meli Perengka Komputer (Bagi 1)

Ba program tu kitai sama ngenang bakani kitai deka meli perengka komputer ti bukai.

Dua minggu ti udah ianya ba Tusun 5 enggau Tusun 6 kitai sama ngenang pasal bakani deka meli komputer. Enti kitai sama ngingat ka baru enda kurang ari 11 pekara patut diperati tauka ditemu kitai sebedau kitai mutus ka runding deka meli komputer.

Diatu aku deka nyambung kenang pasal meli perengka komputer ti bukai ti sama beguna bendar dikena napi penemu kitai dalam pekara ICT ba taun 2009.

Monitor

Enti nadai monitor, komputer kitai nadai ulih dikena. Enti kitai meli komputer monitor tu sigi bisi sama bisi dalam pakej komputer nya tadi. Tang kadang – kadang kitai enda puas ati enggau monitor ti sama dalam pakej komputer nya tadi kita tentu tepikir deka meli monitor baru.

Diatu maioh macam monitor bisi dijual. Tube monitor jarang agi bisi dijual. Maioh orang diatu nyau ngena LCD monitor.

Tiga iti prkara patut diperati ka kita leboh deka milih monitor ianya pemesai, resolution enggau response.

Besai agi monitor mar agi meh rega ia. Taja pia besai saiz empai temu manah ka guna kitai.

Resolution nentu ka terang tauka kabur monitor kitai nya. Enti resolution kitai tinggi imej ba monitor kitai nya tajam agi sereta manah agi dipeda. Resolution 1024X768 monitor tu paling manah enti ngena resolution 1024X768 taja ulih ngena resolution bukai.

LCD computer dijual enggau response time ti enda sama. Response time tu ianya penyampat imej betukar ari siti page ngagai page ti bukai. Response time tu dikira dalam milliseconds. Laju agi response time jampat agi imej betukar. Pia mega mar agi meh rega monitor nya tadi.

Monitor ti baru diatu ianya LCD monitor kurang agi radiation enti disbanding enggau tube monitor tauka CRT monitor. Reti ia ia kurang agi ngemedis mata kitai. Nya alai enti bisi belanja lebih mimit manah meh kitai nukar monitor mitai ngagai LCD monitor.

Keyboard

Keyyboard computer beguna bendar ngambi ka kitai ulih naip ngena computer. Diatu maioh macam keyboard bisi dijual.

Enti kitai meli computer baru keyboard sigi bisi dalam pakej computer kitai. Jarang bendar bisi kedai komputer nyual komputer enda sama enggau keyboard.

Enti kitai milih keyboard tentu ka ia nyamai dikena. Diatu maioh macam keybaord sereta maioh macam gamal. Semua nya digaga bakanya laban lain orang lain ga penyamai ngena keyboard. Asai ka ngam ba jari kitai. Uji ka keybaord nya sebedau kitai meli. Rega siti macam keyboard enda tentu jauh enggau keyboard ti bukai. Anang kelalu berati ka rega tang tentu ka penyamai ia ba jari kitai (egronomic).

Diatu mega bisi wireless keyboard tang rega ia tentu meh mar agi. Tentu ka computer kita ulih ngena wireless keyboard sebedau kita meli ia.

Laptop mega ulih ngena external keyboard. Nyangka kitai pedis deka ngena keyboard ba laptop kitai, kitai ulih meli external keyboard nitih ka egronomic kitai empu.

Pilih bansa keyboard ti sensitive sereta senyap agi ditaip ngambi ka nyamai agi dikena kitai.

Mouse

Mouse tu beguna bendar ngambi ka kitai nyamai agi scroll tauka mindah ka cursor ba screen computer kitai.

Baka monitor enggau Keyboard, diatu macam bansa mouse bisi dijual. Pia mega enti kitai meli computer baru sigi bisi mouse dalam pakej computer kitai.

Taja pia kitai tentu deka bebeli ka mouse, ambi ka contoh, enti mouse kitai nya jai kitai deka meli baru, nya alai kitai patut nemu pekara ti patut diperati ka kitai leboh deka meli mouse.

Baka keyboard, mouse tu mega patut dibeli nitih ka penyamai jari kitai ngena ia tauka egronomic. Maioh macam bentuk mouse bisi dijual. Semua tu ngambi ka kitai nyamai milih ni ka nyamai dikena kitai.

Anang kelalu masau duit kitai meli mouse ti mar. Mouse ti pemadu murah pan ulih dikena enggau nadai penanggul.

Tentu ka mouse nya bisi dua button enggau siti roller laban tu bansa mouse ti standard.

Diatu bisi mouse ngena wireless. Tentu meh rega ia mar agi. Kitai meli mouse bansa tu enti kitai bisi ngaga presentation. Tang dalam pengawa ti bukai mouse ti bansa tu tau enda iboh dibeli.

Printer

Printer beguna bendar dikena kitai print ba kertas. Bisi orang enda ulih maca ba skrin komputer lama. Nya alai manah agi kitai print ba kertas.

Bisi maioh macam printer dijual ari rega RM100 lebih ngagai RM30, 000 lebih. Kitai meli komputer nitih ka guna kitai.

Diatu bisi printer inkjet, laser printer enggau maioh macam brand mega.

Beli komputer ti ngena inkjet enti kita enda kelalu maioh printing. Ambi ka contoh, beli printer inkjet enti kita print kurang ari 3,000 lambar kertas saiz A4 sebulan. Enti lebih ari nya manah agi meli laser printer laban taja pan mar agi, ungkus kitai ngena ia murah agi ba jangka panjai.

Kena ink celum, ukai ink ti becurak enti kita semina printing text aja. Ink ti becurak jauh mar agi rega ia enti dibanding enggau ink celum.

Diatu bisi multifunction printer. Reti ia printer tu mega bisi scanner. Kadang kadang bisi mega fax machine. 2 dalam 1 tauka 3 dalam 1. Printer ti bansa tu tau dibeli kitai enti kitai enda kelalu irau ka kualiti print nya tadi serta mega enda kelalu irau ka kualiti scanner nya laban printer ti bansa tu nadai printing kualiti ti tinggi sereta mega nadai scanning quality ti tinggi. Nya alai enti rega multifunction printer ti bansa tu murah agi ari rega kitai meli printer enggau scanner kediri kediri tau ga kitai berunding ka meli ia. Ba penemu aku kediri, manah kitai meli printer kediri, scanner kediri pia mega fax machine kediri.

Enda baka perengka computer ti bukai, printer tu bisi operating cost. Reti ia kitai agi bisi bebelanja dikena meli ink. Tentu ka ungkus nganti tauka ngisi ink nya baru laban lain lain printer lain ga ungkus tu. Bisi printer murah rega tang ungkus ink ia mar. Pia mega bisi printer mar rega tang ungkus ink ia murah. Prkara tu patut diperati ka kitai. Tanya ba kedai alai kitai meli. Anang berumban mutus ka runding.  

 

Penutup

Kenang pasal meli perengka komputer ba Bagi 1 dilengka ka aku naka tu dulu. Kitai nyambung randau kitai pasal meli perengka computer  ba Tusun 8. Penting bendar kita nemu nama perengka komputer ti patut dibeli kitai sereta pekara ti patut diperati ka kitai leboh meli perengka komputer tu.

Kena nutup randau ICT kitai ba Tusun 7 tu aku sekali agi ngelalau, randau ICT tu randau kitai. Enti bala peninga bisi komen tauka Tanya besangkut paut enggau randau ICT kitai, aku bisi nyendia ka blog http://kjict.blogspot.com alai kita ulih ngenatai ka Tanya kita.    

Leboh kitai berandau ka pekara ICT aku arap ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Mupok aku.

Terima kasih.

Tusun 6 - Bakani Meli Komputer (Bagi 2)

Ba program tu kitai sama ngenang bakani kitai deka meli komputer ka ujung ka agi.

Minggu nyin kemari kitai bisi ngenang pasal bakani kitai berati ka pekara ti patut ditemu kitai baka Processor, RAM, Hard Drive enggau Software.

Diatu aku deka nyambung kenang pasal meli komputer enggau dalam agi ngambi ka kitai nyamai agi deka nentu ka komputer ti deka dibeli kitai.

Conectivity / Penyambung

Kemaia hari tu, komputer nadai tentu guna enti enda ulih disambung ngagai internet. Tentu ka komputer kitai bisi dikena kitai nyambung ngagai internet enggau wireless baka wifi.

Pia mega kitai beguna ka bluetooth ngambi ka kitai kurang agi beguna ka wayar maia kitai download file ari handphone kitai ngagai komputer

Maioh komputer baru diatu bisi internal modem. Tanya dulu enti komputer nya bisi dikena nyambung ka internet laban enti nadai kitai tepaksa meli.

Sound Card

Sound card tu dipasang ba komputer ngambi ka kitai ulih ninga audio file. Reti nya enti komputer kitai bisi sound card kitai ulih ninga radio ba internet. Pia mega kitai ulih ninga lagu ba CD.

Komputer ka baru diatu maioh bisi sound card. Enggai ka kitai nyau mayar lebih ketegal ka bisi sound card.

 Video Card

Baka Sound Card, Video Card mega bisi dipasang dalam komputer ti baru. Video card tu beguna bendar ngambi ka kitai ulih meda video ba komputer kitai. Video Card tu beguna bendar laban diatu maioh video tutorial dalam internet.

 USB

Tentu ka komputer ti deka dibeli kitai bisi enda kurang ari 3 iti USB laban maioh perengka ti deka disambung kitai ngagai komputer ngena USB. Komputer ti baru diatu bisi 2 iti USB di depan enggau siti di belakang komputer.

CD/ DVD Rewritable

Komputer ti deka dibeli kitai mega patut ulih dikena kita mindah ka file tauka data kitai ngagai CD tauka DVD. Tu beguna bendar dikena kitai nyimpan backup file. Enti kitai bisi backup file kitai enda irau ka data kitai lenyau enti komputer bisi penanggul.

Waranty

Anang enda nentu ka komputer ti deka dibeli kita bisi waranty. Waranty tu dikena nentu ka enti komputer kita bisi penanggul, ia ulih dianjung ka kedai endor kita meli lalu ungkus ngadu ka komputer nya tadi enda dibayar kita.

Bisi dua macam waranty. Satu nya shop waranty tauka waranty kedai. Reti nya semina kedai ti alai kitai meli komputer nya ulih ngadu ka komputer kitai enggau enda bebayar.

Siti agi manufacturer waranty tauka waranty kilang ti ngeluar ka komputer ti dibeli kitai.

Tentu ka mega limit ba waranty sida. Enda semua bisi warranty magang.

Selalu ia warranty diberi setaun.

Laptop Vs Desktop

Komputer tu bisi dua bansa ianya laptop tauka computer pangku enggau Desktop tauka computer mija.

Enti dibanding ka rega, laptop tu mar agi ari desktop. Taja pia laptop lempung agi sereta nyamai dibai mindah kin kitu.

Enti kitai selalu mindah sereta beguna ka computer manah kitai meli laptop. Tentu ka bateri laptop nya ulih dikena enda kurang ari 2 jam.

Penutup

Kenang pasal meli computer dilengka ka aku naka tu dulu. Kitai nyambung randau kitai pasal meli perengka computer ti bukai ngambi ka kitai ulih bebeli ngena cara ti patut. Penting bendar kita nemu nama perengka komputer ti patut dibeli kitai.  

Kena nutup randau ICT kitai ba Tusun 5 tu aku sekali agi ngelalau, randau ICT tu randau kitai. Enti bala peninga bisi komen tauka Tanya besangkut paut enggau randau ICT kitai, aku bisi nyendia ka blog http://kjict.blogspot.com alai kita ulih ngenatai ka Tanya kita.    

Leboh kitai berandau ka pekara ICT aku arap ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Mupok aku.

Terima kasih.

Tusun 5 - Bakani Meli Komputer (Bagi 1)

Ba program tu kitai sama ngenang bakani kitai deka meli komputer.

Diatu ujung taun. Bisi nya nerima duit lebih ari bonus, dividen, overtime ti dibayar, penatai pemisi ti datai maia ujung taun. Pia mega sekeda kitai bisi duit belanja ti lebih.

Pia mega maia ujung taun bakatu maioh bendar kedai, supermarket sereta mega company ngada ka jual murah (cheap sale). Maioh barang dijual jauh murah agi ari rega ngelama tu. Dipelaba ka aku bisi bala peninga berunding deka meli komputer.

Nya alai patut bendar asai ba ati aku, bulan tu kitai berandau ka pasal meli komputer enggau perengka komputer ti bukai ngambi ka kitai siap sedia nerima taun baru 2009 enggau penemu ict ti dalam agi.

Leboh aku pulai ka rumah panjai ujung minggu tu tadi, benung aku duduk di ruai udah ka tembu makai tengahari, dia aya bilik sepiak ti duduk ba ruai ia empu lalu nanya penemu aku bakani deka meli komputer.

“Nya meh wat, jang bisi ngirum belanja ari KL . Ba runding aku ka kena meli komputer kena Dom belajar.“ Ko aya nya tadi. “Nanya ka penemu nuan, bakani kitai ka meli komputer wat?“ Nya meh enggai meli utai sebarang enggai ka enda ulih kena sayau ga duit. Ukai baka nama ngiga duit diatu.“ Ko tudah tuai nambah baru. “Pulai aku ka Kuching ila ngiga ka nuan komputer ti ulih dikena Dom ngambi ka nuan ulih meli enggau rega ti patut.“ Ko aku nyaut ia. Ukai nama, ka aku nerang ngagai aya nya tadi enggai ka ia enda nemu reti padah jako aku. Taja pia aku gaga bendar ati, taja pan enda nemu ngena komputer, aya nya tadi nemu pemesai reti sereta guna komputer kemaia ari tu. Maioh utai bukai ka dibeli tang laban ti rindu ka pemansang anak ia Dom, aya nya tadi milih deka meli komputer.

Dipelaba ka aku maioh peninga baka aya aku nya tadi. Bisi ati deka meli komputer tang enda nemu bagi komputer ti deka dibeli. Nya alai ngena peluang tu kitai sama bekunsi ka penemu bakani deka meli komputer.

Sigi muda meh nyebut. Ta tama ngagai kedai komputer lalu madah ka sida ia dia nuan deka meli komputer. Enti pia nama guna kitai berandau ka cara meli komputer?

Selalu ia enti nuan tama ngagai kedai komputer, nuan madah ka diri deka meli komputer, sida lalu nanya nuan “ berapa bajet nuan? Kurang ari RM2000, RM2,000 lebih? RM3,000? Semua kami bisi magang.“

Selalu endar aku ninga sida ba kedai komputer nanya munyi nya. Baik nya kedai komputer ti mit tauka kedai komputer besai ba supermarket.

Nya alai sebedau kita tama ngagai kedai komputer alai kitai ngiga komputer ti patut dibeli, kitai patut nyikap diri ngena penemu pasal komputer. Enda iboh maioh, asal kitai nemu bakani komputer ti diguna kitai.

Sebedau meli komputer, terubah ia kitai nanya diri:“Nama kebuah aku beguna ka komputer?“

Maioh orang meli komputer dikena melayar internet, nganjung sereta nerima email, naip ngena wordprocessor, bekira ka belanja sehari hari ngena spreadsheet sereta mega ngaga website enggau blog. Kemaia hari tu, komputer ti pemadu murah pan ulih dikena ngereja semua pekara nya tadi.

Diatu bisi kedai komputer alai kitai customise serta upgrading komputer kita nitih ka guna kitai.

Enti ulih kitai meli komputer nitih ka guna kitai. Tang enti belanja kitai bisi tau ga kitai meli komputer ti ulih dikena sampai 3 taun. Reti tu tadi, mar agi rega komputer kitai lama agi ia ulih dikena laban teknologi semampai berubah. Enti kitai meli komputer ti murah agi ia nyangka ulih kena setaun dua aja. Jarang bendar komputer kemaia hari tu ulih dikena lebih ari 3 taun.

Processor

Processor tauka microprocessor tauka CPU semua sida tu sama magang. Processor tu nyadi ka central controller komputer.Enti baka kereta ia nyadi ka enjin kereta kitai. Processor tu nentu ka speed komputer ti dikena kitai. Ia mega nentu ka rega komputer ti deka dibeli kitai. Bisi dua brand processor ti bisi dijual ianya Intel enggau siti agi AMD.

Enti processor tu laju agi speed ia, maioh agi pengawa ulih dikereja kitai sekali. Enti kitai ngena computer semina dikena casual aja, computer ti berega lebih mimit ari RM1,000 pan cukup laju. Tang teknologi nyau makin maju, fail dalam internet pan nyau makin besai, kitai beguna ka computer ti ulih muka fail nya laju agi. Nya alai, target processor ti ulih dikena sampai 3 taun. Nya alai beli processor 3 tingkat baruh ari ia ti pemadu tinggi speed.

Enti ulih meli bansa dual core enda ngira Intel tauka AMD. Nadai tentu beda antara dua bansa processor tu semadi meh high end processor intel bisi nyulut agi.

RAM

RAM tauka Random Access Memory tu dikena computer ngingat ka data ti udah disimpan. Tinggi agi RAM maioh agi program ulih dibuka kitai sekali. Enti kitai melayar internet, kitai ulih muka maioh agi webpage, enda iboh nutup webpage dulu.

Tinggi agi RAM, mar agi meh rega computer. Enti computer kitai dikena melayar internet, manah agi kitai ngena RAM ti tinggi.

Diatu RAM 1GB ulih dikena kitai enti kitai ngena Windows XP. Semadi kitai ngena Windows Vista kitai beguna ka RAM 2GB.

Hard Drive

Hard drive tu alai computer nyimpan data kitai. Besai agi kapasiti Hard Drive nya tadi maioh agi data ulih disimpan kita dalam computer nya. Semua file baka operating system enggau software, files download kitai disimpan dalam Hard Drive magang. Hard Drive 160GB enggau 200GB lebih ari cukup enti dikena kitai ngereja pengawa ofis tauka melayar internet.

Komputer ti ngena Hard Drive 160GB diatu berega RM1,800 ngagai RM2,000. Ia ti ngena Hard Drive 200GB berega ari RM2,000 ngagai RM3,000.

Enti bisi belanja lebih, nguji meli computer ti bisi 320GB ngambi ka ulih dikena lama agi.

Software

Software ti bisi dalam computer mega deka nentu ka bansa computer ti patut dibeli kitai. Operating system ti selalu bendar dikena diatu ianya baka Windows XP enggau Windows Vista. Bisi mega Operating System ti bukai baka Mac.

Kitai enda tau enda nentu ka operating system kitai bisi office application baka word processor enggau spreadsheet, web browser baka internet explorer.

Maioh kedai computer diatu udah install semua software ti diguna kitai dalam computer. Tentu ka software nya bisi lesen. Ngena software ti nadai lesen salah ari segi undang-undang. Tambah mega software ti nadai lesen mudah diserang virus komputer.

Beli software ti dikena kitai aja. Software ti enda diguna masau ruang dalam hard disk kitai lalu. Nya ngujung ka speed komputer kitai lubah agi.

Anang enda meli anti-virus software dikena nyaga komputer kitai ari virus komputer. Nadai siti anti-virus ulih ngelaban semua virus komputer. Nya alai anang kiruh deka milih anti-virus ti ulih ngelaban semua virus komputer.

Kenang pasal meli computer dilengka ka aku naka tu dulu. Kitai nyambung randau kitai pasal meli komputer tu minggu dudi laban agi maioh pekara patut ditemu kitai sebedau kitai mutus ka runding ni komputer ti deka dibeli.

Tusun 4 - Asal Internet

Ba program tu kitai sama ngenang asal tauka sejarah internet. Tuju kitai ngenang asal internet tu ngambi ka kitai nemu bakani internet tu bepun lalu dini endur kitai dalam era ICT tu.

Sebedau bisi internet, penyambung antara siti komputer enggau siti komputer ti bukai digaga ngena konsep central mainframe. Komputer disambung enggau pangan diri ngena cable. Contoh ia Project RAND dikena dalam research. Semina komputer ti bisi besambung enggau pangan diri aja ulih mindah ka data ngagai pangan diri.

• Dalam taun 1960s, Levi C. Finch enggau Robert W. Taylor, dua iko penyelidik komputer ari menua Amerika ngepun ka buah runding pasal global networking. Seduai ia berati ka penusah ketegal enda ngetu mindah napi penawa diri. Enti bisi global networking seduai ia enggau bala saintis bukai tentu jarang agi ninggal ka ofis sida.

• Tu ngepun ka networking antara komputer ngena Packet Switching ti digaga Paul Baran (RAND Corporation), Donald Davies (NPL) enggau Leonard Kleinrock(MIT).

• Antara Packet Switching ti digaga maia nya ianya APRANET (Advance Research Project Agency Network) ti nyambung University of California, LA enggau Stanford Research Institute dalam taun 1969. Packet Switching tu jampat bendar mansang. Dalam taun 1981 bisi 213 host Packet Switching. APRANET tu meh asal internet.

• Dalam taun 1978 British Post Office, Western Union enggau Tymnet ngepun ka Packet Switch Network antarabangsa ti terubah dikumbai International Packet Switch Service. Network nya ngerembai ngagai Europe, US, Canada, Hong Kong enggau Australia dalam taun 1981. Dalam taun 1990 ia udah mungkur serata dunya.

• X25 dikena di menua Europe ketegal bisi penemu politik ti enda tentu sebaka maia nya ngujung ka sida ia enggau ngena APRANET. X25 dikena dalam pengawa dagang. Telenet ianya email dalam X25 tu maioh dikena dalam pengawa dagang.

• CompuServe nya public network ti meri email service ngagai personal computer dalam taun 1979. Dalam taun 1980 ia nambah siti agi service ti popular kemaia ari tu ianya real time chatting.

• Siti agi public network ti popular nyentok ka diatu ianya American Online (AOL) mega ditumbuhka dalam taun 1980.

• Makin sari makin maioh macam networking digaga orang serata dunya. Robert E. Karn ari DARPA enggau APRANET ngambi Vinton Cerf ari Stanford University bekerja enggau ia sama mutar ka penusah ti kelalu maioh network ti enda sama. Dalam taun 1973 seduai tetemu ka cara asas mutar ka penusah tu ianya ngena internetwork protocol. Vinton lalu ngambi Hubert Zimmerman, Gerarrd LeLann enggau Louis Puozin design system tu. Tu meh terubah ia nama internet dikena. Orang ti ngepun ka nama internet tu ianya Vinton Cert.

Leboh aku berati ka sejarah internet, siti pekara ti nyata bendar ianya teknologi internet tu jampat bendar berubah. Nya bepun ari pengeliat ati mensia ti deka ngemansang ka diri dalam pengawa ti dikereja sida.

Taja pan bala saintis maioh enda sepenemu, tambah mega dalam taun 1960 ngagai taun 1980 maioh bendar penyarut politik antara menua tang bala saintis tu ulih begempung enggau pangan diri sama ngiga runding bakani deka ngemanah ka global networking.

Tu tau bendar nyadi ka teladan kitai. Pengeliat ati enggau serakup dalam napi penusah ti nuntung.

Tusun 3 - Asal Komputer

Ba program tu kitai sama ngenang asal tauka sejarah komputer. Tuju kitai ngenang asal computer tu ngambi ka kitai nemu bakani computer digaga dulu suba, sapa ti ngepun ka ngena computer lalu kitai mega deka nemu nama guna komputer maia nya suba.

Ari ti nemu asal komputer kitai ulih mega berati ka dini endor kitai dalam era ICT tu. Pia mega kitai deka ngenang pengering ati orang maia nya kelia deka ngemansang ka pengidup diri. Ari pengeran ati sida nya tadi meh kitai bulih pemansang dalam ICT baka ka diatu.

Asal komputer tu tusah deka ditentu ka laban nama komputer tu bisi maioh macam reti.

Asal nama komputer tu ianya nama pengawa. Dalam abad ka 17 orang ti ngereja pengawa ngira nitih ka formula matematik ti diberi ka sida tu dikumbai orang komputer.

Sejarah asal komputer moden bepun ari dua teknologi ianya:

• Ngira ngena cara automatik; enggau
• Programming

Perengka ti dikena ngira dulu kelia baka

• Abacus ti dikena orang cina ngira, nyentuk ka diatu agi dikena;
• Astrolable dikena orang berati ka bintang, bulan enggau matahari;
• Antikthera Mechanism ianya kalkulator lama ti mega dikumbai komputer mekanikal lama. Ia dikena ngira dalam pansik astronomi, ianya orang ti berati ka bintang, bulan enggau matahari;
• Castle Clock ti digaga Al-Jazari dalam taun 1206 dikumbai orang komputer analog ti terubah. Ia mega dikena dalam pansik astronomi;
• Dalam taun 1623 Wilherm Schickard, bansa German tu orang ti terubah ngaga mekanikal kalkulator dikena bala engineer maia nya.
• Dalam taun 1801 Joseph Marie Jacquard, bansa Perancis nambah ka pemanah injin dikena nenun kain ngena punch card awak ka pattern tenun nya sebaka nitih ka bungai ti udah ditusun. Tu meh keterubah pengawa ti dikumbai programming.
• Dalam taun 1837 Charles Babbage, ari London orang ti terubah ia ngena konsep programming ba mekanikal computer ti diberi ia nama The Analytical Engine. Taja pan Analythical Engine enda kala digaga tang buah runding Charles Babbage tu diterima nyadi ka asal pengawa programming baka programming ba computer moden diatu.
• Dalam taun 1890, menua Amerika terubah ia ngereja pengawa banci ngena tabulating machine ti digaga Herman Hollerth. Tabulating machine tu dikena ngira enggau jampat agi. Dalam taun 1880 pengawa banci menua Amerika tembu dalam 7 taun tang dalam taun 1890 pengawa banci tu tembu 18 bulan. Company Herman Holerth ti gaga Tabulating Machine tu ianya Computing Tabulating Record Corporation diatu dikumbai IBM, siti ari kompeni ti pemadu besai dalam dunya ICT.
• Dalam pun taun 1900 maioh agi pengawa programming ngena punch card, Boolean Algebra, vacuum tube enggau teleprinter.

Sejarah computer moden tu bepun ari taun 1930.

· Claude Shannon bansa Amerika orang ti terubah ngaga programming ti ulih ngaga macam macam pengawa nitih ka tusun program. Tu nyadi ka asas programming dalam computer moden. Konsep programming Shannon tu agi dikena nyentuk ka saritu.

· Dalam taun 1940, Konrad Zuse, Engineer bansa German ti terubah ia ngaga komputer moden. Komputer Konrad tu ngena binary arithmatic ianya Nombor 0 enggau 1 aja. dikena ia ngira kelebih agi pengawa ngira ti berulang. Maia nya kelia pengawa ngira formula engineering dikereja ngena cara manual. Maioh silap kira sereta masau jam. Elektromekanikal Z Machine Konrad Zuse tu ianya Z3 terubah ia ulih ngira sereta mega ulih diprogam. Mesin Z3 Zuse tu diuji dalam taun 1998 lalu ditabal ka nyadi computer moden ti terubah di dunya.

· Dalam taun 1941 Atanasoff –Berry Computer (ABC) ngira ngena vacuum tube dikena ngira binary arithmetic. ABC tu terubah ia komputer ti bisi memory.

· Dalam taun 1944 elektromekanikal komputer ti besai, Havard Mark I digaga. Tu terubah ia komputer digital ti digaga. Ia mega pun generasi komputer elektronik. Komputer tu mesai sebuah bilik.

· Komputer elektronik ti terubah ia digaga dalam taun 1946 ianya Electronic Numercal Integrator And Computer (ENIAC) dikena Soldadu Amerika ngira jadual timbak meriam (artillery firing table).

· Dalam taun 1960, vacuum tube diganti ngena transistor. Enggau nya computer ulih digaga mit agi.

· Dalam taun 1970 teknologi integrated circuit bepun ba Silicon Valley, Amerika. Nya nyadi ka komputer ulih digaga mit agi. Nya mega pun Personal komputer tauka PC.

· Dalam taun 1980 teknologi mikroprosesor ulih ngaga high speed komputer.

· Dalam taun 1990 teknologi Liquid Crystal. Tu pun technology laptop ti ulih ngaga computer mit agi sereta ulih di bai kin kitu.

· Dalam taun 2000 kitai diatu ngena teknologi wireless, broadband enggau wimax.

Peninga,

Leboh aku berati ka sejarah computer, bisi 3 pekara tau pulai ka teladan sereta mega nyadi ka lalau kitai:

· Kesatu, mensia enda ngetu ngiga cara dikena napi pemedis pengawa sida. Sida ia enda ngetu ngiga cara ngambi ka pengawa sida nyamai agi dikereja sereta kurang agi silap.;

· Kedua, Teknologi komputer tu enda ngetu ditu aja. Teknologi tu mega jampat bendar berubah. Tiap- tiap ari bisi aja penemu baru. Sapa dulu agi landik ngena teknologi nya, orang nya meh dulu bekuasa.

· Ketiga, kitai enda ulih enda nitih ka pemansang tu. Diatu, bakani kitai deka napi pemansang tu? Perintah ulih ngada ka facility tang ulih enda kitai ngena facility nya enggau cara ti patut sereta tau mai penguntung ka kitai?

Tusun 2 - Reti ICT

Ba program tu kitai sama ngenang reti ICT. Tuju kitai ngenang reti ICT tu ngambi ka kitai ulih mereti ka tiga iti komponen ICT.

ICT tu nama singkat bagi Information & Communication Technology. Ia bisi tiga iti komponen, ianya komponen Information, komponen Communication enggau komponen Technology.

Aram kitai sama berati ka tiga iti komponen ICT tu.

Komponen ti terubah ianya Information. Dalam jako kitai, information tu bisi dua reti ti nyau ka sebaka ianya pemadah enggau penerang. Dalam randau ICT kitai aku suah agi ngena reti penerang laban semak agi reti ia enggau reti information.

Sebedau ngenang reti penerang enggau jauh agi, kitai berati dulu ka siti konsep ti dikumbai aku 5 Tingkat Penemu.

Tingkat Penemu terubah ianya Data. Data tu nyadi ka pun penemu kitai. Kitai berati ka pekara ti nyadi ngelingi kitai, kitai bulih data. Enti kitai nadai data dikena nyukong penemu kitai, nya dikumbai orang bula. Bala saintis ngena data dikena nyukong pansik sida. Kitai di rumah panjai ngena data dikena nyukong peminta kitai ngagai perintah. Siti data aja nadai guna tang data ti maioh digumpul, diperati lalu dipejurai ka kitai nyadi penerang.

Tingkat Penemu ti kedua ianya Penerang (information). Kitai berati ka pekara ti nyadi laban kitai dah bisi data ti cukup dikena nyukong peragam ati kitai. Diatu kitai ulih nerang ka bakani pekara nya nyadi. Penerang mega datai ba kitai leboh kitai ninga radio, macha surat khabar, meda TV, melayar internet, ninga cikgu ngajar ba kelas semua nya alai kitai bulih penerang magang.

Tingkat penemu ti ketiga ianya Penemu (Knowledge). Kitai bulih penemu ari kitai berati ka penerang ti cukup maioh pasal pekara ti diperati ka kitai. Kitai lalu berati ka pekara nya dalam runding kitai lalu nusun penerang nya nitih ka leka jako ba runding kitai empu. Diatu kitai bisi siti genturung penerang ti nyadi penemu kitai.

Ambi ka banding anembiak ti belajar di Universiti. Lecturer ngajar sida meri penerang. Udah nya sida disuruh ngaga assignment alai student nya tadi ngena penerang ti diberi lecturer serta mega penerang bukai ari bup tauka giga ari internet ti bisi besangkut paut enggau assignment nya tadi. Diatu student nya dikira bisi penemu laban ia berati ka penerang ari lecturer nya serta ngeluar ka penemu nya baru atas kertas. Nya alai enti student nya tadi ngelakar tauka ngupi assignment orang bukai ia nadai bulih penemu. Rugi meh ia.

Tingkat penemu ti keempat ianya Peneleba (experience). Ari penemu ti dikembuan, kitai ngereja pengawa dia alai kitai bulih peneleba. Contoh, kitai nemu reti email, dah nya kitai ngena email dalam pengidup kitai besari- sari, kitai bulih peneleba ngena email.

Tingkat penemu ti kelima ianya tingkat penemu ti pemadu tinggi ianya Pengelandik (Wisdom). Kitai dikira landik laban kitai udah ulih ngajar orang bukai laban kitai dah nemu dini bulih data, kitai dah ngembuan maioh penerang nyadi ka penemu. Kitai mega udah ngena penemu kitai dalam pengidup kitai. Kitai nemu ngerembai ka penemu kitai enggau lebih tinggi agi. Diatu kitai dah bisi pengelandik.

Bah, nama sangkut paut 5 Tingkat Penemu enggau ICT? Aku deka nekan ka ditu, enti kitai ninga ari orang bukai, macha ba surat khabar, macha ari bup, ninga ari radio, meda tv, melayar internet, tingkat penemu ti pemadu tinggi ulih kitai naka tingkat kedua aja ianya penerang. Nama reti tu? Reti ia, enti kitai deka niki tinggi agi ba tingkat penemu kitai mesti deka ngereja lebih. Ukai semina ngena ICT ngiga penerang tang kitai meri penerang ka orang bukai ngena ICT. Nya meh reti pemansang. Tu mega siti ari tuju randau ICT kitai.

Komponen ICT ti kedua ianya Communication, dalam reti jako kitai, penyambung. Baka nama ia, penyambung tu ngenatai ka kitai ari siti tempat ngagai tempat ti bukai jauh tauka semak. Jalai raya tu penyambung. Sungai mega penyambung alai kitai ulih mindah ari ulu ka ili. Pejalai bilun mega penyambung.

Radio enggau tv mega penyambung laban ulih mai penerang ari stesen radio ngagai radio set kitai di rumah.

Telefon enggau internet tu penyambung ti deka dikenang kitai dalam randau ICT kitai.

Komponen ICT ti ketiga ianya teknologi. Reti teknologi ianya penemu sains begulai enggau penemu industri. Pansik bala saintis dikeluar ngena cara industri ngambi ka ulih dibeli lalu dikena mensia maioh. Contoh teknologi baka computer enggau handphone.

Diatu kitai udah nemu tiga iti komponen ICT. Bakani kitai deka ngena ia?

Aku enda tentu irau ka dua iti komponen ti bukai ianya penyambung enggau teknologi laban ia luar ari bidang kuasa kitai. Tang siti komponen ti patut diperati ka kitai ianya penerang. Kitai kala ninga information is money, money is information. Enti orang ulih nyual penerang ngagai kitai, kitai mega ulih nyual penerang ngagai orang bukai. Reti ti ko aku, penerang ti manah ti tau nguntung ka pengidup orang ti meli ari kitai.

Tingkat Penemu

Sebedau aku bekunsi penemu ICT enggau lebih panjai agi' aku deka' ngenang tentang beberapa pekara .

Kesatu, aku mai' kitai muka' runding kitai ti deka' nerima' penemu baru. Maioh penerang ti dibai' aku ditu ila' nya' baru ba' penemu kitai. Diatu kitai patut udah nerima' penemu ICT nyadi ka cara pengidup kitai tiap-tiap hari. Penemu ICT tu' patut ulih mai' pengelantang dalam pengidup kitai.

Kedua, Penemu ICT tu' dikena' serata dunya, ukai enggi' orang bukai aja' tang enggi' kitai mega'. Nadai orang dalam dunya tu' ulih ngambu' penemu ICT tu' enggi' ia aja'. Nadai mega' orang dalam dunya tu' ulih nyekat orang bukai ngena penemu ICT. Tang taja' pia', nadai mega orang ulih ngansak nuan ngena' penemu ICT enti' nuan enggai. Semina' aku enggai enda ngelalau, enti' kitai nadai penemu ICT, ketai enda' ulih enda' tinggal ari orang bukai.

Ketiga, leka jako dalam ICT maioh ngena' jako English. Enda' semua leka jako English ulih disalin ka ngagai jako kitai Iban. Pia' mega' bisi jako English nya udah diterima nyadi jako kitai. Asal disebut kitai lalu mereti. Bisi mega leka jako nya enti disalin ka ngagai jako kitai, ia enda ulih disebut enggau jako seleka aja. Nyadi, dalam pekara tu, aku agi nguna leka jako nya dalam jako English.

Keempat, aku ngena buku "Handy Reference Dictionary of Iban And English" ti dikeluarka Tun Jugah Foundation dikena aku nyalin ka reti jako English ngagai jako Iban. Ngena peluang tu aku meri besai terima kasih ngagai Tun Jugah Foundation ti udah ngeluar ka bup nya ti beguna bendar. Enti enda pia bisi endar penusah aku nyalin leka jako English ngagai jako kitai iban.
Tingkat penemu patut ditemu kitai sebedau kitai berandau pasal penemu ICT. Kebuah pia, laban kitai enggai enda nemu nama tingkat penemu kitai dalam setiap masa.

Tingkat penemu ti pemadu asas ianya DATA. Dalam jako iban data tu nadai ulih disalin ngagai seleka jako aja. Pia mega dalam Bahasa Malaysia, leka jako data tu agi dilkena. Ba runding aku leka jako DATA patut agi dikena. Reti data tu ianya penemu bendar ka tau dikena mereti utai ti nyadi. Ambi ka banding, urang ti datai ngaga pengawa banci ba rumah kitai. Sida bisi mai pom diisi baka berapa maioh dalam sepintu-sepintu bilik. Penerang dalam siti-siti pom nya tadi dikumbai kitai data. Dalam tingkat penemu, data tu meh pekara ti pemadu asas. Enti kitai ngambi contoh orang ti ngaga rumah, data tu baka batu, pasir, semin agi dalam beg, kayu baru dah ditebang, ai, besi, dawai enggau paku.
Siti data nadai tentu guna ba kitai. Semina sida ti landik aja nemu ngena data nya tadi. Baka sida ti ngereja pengawa banci tadi, ditelenga ka ia ba mua tua enda meh tua nemu reti sereta beguna ka DATA nya tadi. Pia mega becontoh ka pengawa ngaga rumah tadi, enda maioh kitai nemu beguna ka batu enggau pasir aja ditugong kediri. Baka nya reti data tu tadi.

Orang ti bisi pengelandik nusun data ti maioh begulai. Ari DATA ti cukup maioh, orang nya tadi ulih meri penerang. Dalam jako English dikumbai "information". Tu tingkat penemu ti kedua. Dalam jako kitai iban "information" tu selalu dikumbai kitai pemadah. Bisi dua iti leka jako nerang ka "information" dalam jako kitai iban: pemadah enggau penerang. Dalam program penemu ICT tu, aku milih reti penerang. Kebuah pia aku ngasai ka reti penerang semak agi enggau reti "information". Dalam contoh pengawa banci tadi, sida ia mai data pulai ngagai ofis sida lalu semua pom nya lalu dipegulai ka sida, lalu data nya lalu dibanding ka. Udah nya sida bisi dunjung data ti ulih diperati ka sida. Hasil ari sida ti merati ka data nya tadi, sida bulih penerang.
Pekara ti dibaca kitai ba surat kabar, didinga kitai ba radio, pia mega berita ti dipeda kitai ba TV, semua nya penerang magang. Enti tua muka komputer, meda internet, tua bulih penerang. Kadang-kadang kitai semina bulih data aja ba internet.
Enti dibanding ka pengawa ngaga rumah, penerang tu baka pasir digulai enggau batu, digaul enggau semin, campur ai lalu nyadi konkrit. Tauka baka kayu ti ditebang, disayat nyadi papan, tiang enggau beam.Pia mega ia baka besi ti udah ditempa nyadi atap.

Ari kitai ti bulih penerang, kitai ngena penerang nya berati ka pekara ti nyadi ngelingi kitai. Nuan berati ka penerang nya, merati ka ia dah nya nuan baru bisi penemu.Dalam jako English dikumbai kitai "knowledge". Tu tingkat penemu ti ketiga. Penemu tu datai ari nuan empu. Nuan semina ulih bulih DATA enggau penerang aja ari orang bukai. Nuan enda ulih ngambi penemu ari orang bukai. Anang saru dalam pekara tu. Kitai enda ulih madah "oh...aku bulih penemu tu ari internet." Tauka"aku bulih penemu ICT tu ari majalah. Nya enda tentu betul. Nuan semina bulih penerang. Orang ti pemadu landik ngajar pan, semina ulih meri nuan penerang aja. Aku ngulang, Penemu semina datai ari nuan empu aja.
Penemu tu datai ari nuan ti berati ka maioh penerang ti ngelingi nuan. Nuan ninga program ICT, nuan bulih penerang. Dah nya nuan maca pasal ICT ba suratkabar tauka majalah, nuan bulih penerang. Dah nya nuan muka internet ngiga penerang pasal ICT, nuan bulih siti agi penerang. Nuan nanya kaban nuan pasal komputer, nuan bulih siti agi penerang. Dah empat penerang ulih nuan pasal ICT. Empat iti penerang tu diproses nuan dalam runding nuan. Udah nya nuan bisi "vision" tauka runding nuan empu pasal ICT ari semua penerang ti diulih nuan tadi. Ari nuan ti berunding nya tadi, nuan bulih penemu.
Enti dibanding ka pengawa berumah, penemu tu baka tiang, lantai, atap, dinding, tangga, sapat, pintu enggau jendela. rumah nya tadi ulih ga endor beteduh tang bedau tau alai diau.

Dalam nuan bisi penemu, nuan lalu nguji tauka ngena penemu nya tadi. Diatu nuan ngereja perkara ti udah ditemu nuan. enti nuan dah bisi penemu pasal nginti, nuan dah sedia nikau ka mata ginti nuan ka tengah ai. Ari nuan ti nguji kapenemu nuan, diatu nuan bisi peneleba. Dalam jako English "Experience". Tu tingkat penemu ti keempat.
Enti dibanding ka pengawa berumah, peneleba ti baka rumah ti udah tembu. Tiang dah tegap. Atap dah dipasang lalu bisi syiling, lantai dah bisi "tile", pintu dah bisi kunci, jendela dah lekat ka cermin, asai ka tau endor diau.

Nuan ngerja pengawa nya dua tiga kali. Enti nginti nuan dah nemu bansa umpan ti patut dikena. Nuan nemu ba ai ni bisi ikan. Nuan mega nemu pukul berapa ikan keluar makai. Diatu nuan bisi pengelandik. Dalam jako English dikumbai kitai "wisdom". Nuan dah maioh bendar penemu, dah suah nguji ka penemu nuan, nuan belajar ka setiap pekara ti bisi sangkut paut. Nuan bulih pengelandik. Tu tingkat penemu ti kelima, tingkat penemu ti pemadu tinggi.
Enti dibanding ka pengawa berumah nya tadi, rumah nya dah bisi letrik, dah pasang paip ai, dah pasang telefon, dah bisi jemari, sofa, bangku, meja, kail, tilam. Rumah nya dah ulih endor diau.
Peninga ti dipebasa,

Nama kebuah aku ngenang pasal tingkat penemu, sedang ka program tu program ICT? Dini penemu ICT ti deka dibai aku? Nama penting tingkat penemu tu tadi?

Ari kitai ti nemu tingkat penemu diri, kitai nemu limit diri empu. Ari kitai ti nemu limit diri baru kitai nemu ni pekara ti patut dikemansang. Enti tingkat penemu kitai semina naka penerang aja, kitai ulih ngemansang ka diri enggau belajar sereta berati ka pekara ti dikereja kitai ngambi ka kitai bisi penemu. Enti kitai semina bisi penemu aja, kitai deka ngereja penemu nya ngambi ka kitai bisi peneleba lalu maju agi nyentok ka kitai bisi pengelandik. Orang ti landik nadai jalai ulih merinsa. Nya alai kitai mesti nemu tingkat penemu diri dalam macam pekara ti dikereja kitai.

Tusun 1 - Tuju Program ICT

Tabi peninga,
selamat kitai begulai dalam program ICT. Saritu tu program ICT kitai ti terubah.
Kita begulai enggau aku, Kassim Jeritan ngenang pekara ICT.

Ba program kitai ti terubah tu aku deka ngenang tuju kitai ngada ka program ICT ba WaiFM. Dalam sebarang macam pengawa ti dikereja kitai tentu bisi tuju. Pia mega Program ICT kitai. Program kitai tu bisi tiga iti tuju.

Kesatu, mai kitai peninga nemu enggau lebih terang agi reti ICT;
Kedua, ngambi ka kitai ulih ngena ICT dalam pengidup kitai; enggau
Ketiga, bekunsi penemu bakani cara kitai ulih nyadi ka ICT tu pun penatai pemisi, income generator. Bakani kitai ulih ngiga belanja ari ICT, bakani kitai nambah penatai pemisi kitai ngena ICT.

Aku arap ka dalam program ti ka datai kitai ulih berandau ngenang pekara ICT berindik ari 3 tuju ti udah dipadah ka aku tadi.

Tuju ti terubah, nemu sereta mereti pasal ICT.
Kena napi tuju tu aku deka bekunsi ka penemu ICT. Kitai sama ngenang pasal komponen ICT. Kitai deka sama ngenang sejarah ict, udah nya kitai ngenang pasal komputer. Kitai sama nemu komputer tu komponen ICT ti pemadu besai. Kitai ngenang sejarah komputer, sapa ti gepun ka pengawa beguna ka komputer dulu suba. Bakani cara kitai ti deka meli komputer. Kita mega deka berandau pasal komponen komputer baka Monitor, printer, keyboard, mouse, LCD projector, webcam, modem enggau perengka komputer ti bukai.
Pia mega aku ngenang pasal internet. Kitai berandau ka asal internet, reti perkara ti patut ditemu kitai pasal internet. Pakej internet ti bisi ba menoa kitai baka wifi, wiMAX, 3G, 3.5G enggau pakej ti bukai.
Kitai mega sama deka berandau ka pekara ti besangkut paut enggau software. Nama software ti patut bisi dalam komputer kitai.
Aku mega deka ngenang pasal email, blog, social networking ianya website ti alai kitai ulih berandau enggau pangan diri. Maioh mega pekara ti bukai dibai aku berandau enggau kita laban pekara ICT tu sigi semampai berubah nitih ka tuju pemansang dunya.

Tuju ti kedua, aku deka mai kitai ngena ICT. Udah kitai nemu reti ICT, kitai deka ngena ICT dalam pengidup kitai. Kitai berandau ka Internet Banking alai kitai ulih berati sereta ngadu ka akaun kitai enggau enda iboh datai ngagai bank laban ulih dikereja nuan ari rumah, ngena internet.
pia mega maioh kompeni diatu ngena ICT dalam pengawa dagang sida. Ambi ka banding Airasia enggau Mas alai kitai ulih meli tiket ari depan komputer kitai di rumah tauka dini-dini alai nuan ulih ngena internet. Bakani kitai deka meli bup online ari Amazon.com. Bakani kitai deka meli barang ti murah agi ari barang ti bisi ba kedai ari ebay.com. Aku mega mai kitai sama ngenang penyamai kitai ulih bebayar ka bill elektrik, bil ai, bil telefon semua ulih gaga ba internet magang. Kita mega deka berandau asal bakani ka jimat ka kos kitai baka ngena telefon internet, VOIP, Voice Over Internet Protocol. Peninga ka bisi anak belajar di luar nengeri tentu bisi ngena VOIP. Kitai mega deka berandau pasal email, blog enggau social networking. Kitai mega patut berandau pasal Search Engine baka Google, Yahoo enggau MSN. Bakani kitai bulih penerang ari Search Engin tu.

Tuju ti ketiga, udah kitai nemu reti ICT, kitai nyau nerima ICT dalam pengidup kitai, aku deka bekunsi penemu enggau peninga bakani kitai ulih nyadi ka ICT tu nyadi pun penatai pemisi. Maioh orang udah bisi penatai pemisi ari ICT. Perintah bebelanja bebillion Ringgit dikena ngemansang ka infrastructure ICT. Kitai mesti ngambi peluang ti bisi dikena ngemansang ka penatai pemisi kitai empu. Kitai sama ngenang pasal online marketting. Kitai berandau ka website enggau webpage alai kitai ulih mandang ka barang ti dipedagang ka kiai. Kitai mega deka berandau pasal domain enggau web hosting, alai kitai engkah website kitai, baka orang dagang ti nyewa kedai. Aku mega mai kitai berati ka cara kitai ngelaku ka barang dagang orang bukai lalu nerima komision. Tu dikumbi Affiliate Programe. Kitai mega deka bejurai Merchant Account, ianya bakani nuan ulih nerima bayar ari orang ti meli barang ti dipedagang ka nuan. Udah kitai sedia bedagang ba internet, aku deka mai kitai sama berandau ka cara kitai ngelaku ka barang kitai. Bakani kitai deka ngasoh website kitai ditemu orang. Kitai berandau ka Marketting tools, ngena Search Engines, email marketing enggau viral marketing. Anang irau enti kita bedau nemu reti semua utai tu diatu laban enti kita semampai enggau dalam program ICT, semua pekara tu deka dikenang enggau silik.

Kitai mega deka berandau ka pekara ti patut enggau ni pekara ti enda patut dikereja kitai dalam internet. Ambi ka banding, software ti nadai lesen, ngupi ari webpage orang bukai, cara bejaga ngena kredit kad, undang- undang ti besangkut paut enggau multimedia, bakani kitai apai indai ulih nyaga anak kitai ngambi ka enda salah guna internet. Kitai mega deka berandau pasal virus enggau bakani kitai ulih nyaga computer kitai ari virus.

Berindik ari 3 tuju kitai berandau ka pekara ICT aku arap ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban ICT UNGKUP KITAI SEMUA.
Mupok aku.
Terima kasih.