Youtube Video demo

Trial post for youtube thumbnail

Pemindah Blog Tu

Diatu blog tu mindah ngagai www.kassimjeritan.com.
Maioh agi pekara dikenang aku dalam blog tu. Aram meh sama nemuai ngagai blog aku nya, lalu lantang ka ati enti kita bisi komen deka diayanka dia. 

Klik Ditu diatu

Terima kasih. 

Tusun 69 - Bejual Barang Nengah eBay.com

Selamat tengahari serta tabi basa ngagai peninga.

Selamat kitai begulai baru dalam program Randau ICT. Saritu Program kitai ba Tusun 69.

Dalam program kitai ba Tusun 68 nyin kemari kitai sama ngenang bakani kitai ulih bejual barang nengah internet ngena cara ngada ka website kitai empu.

Taja pia enda semua orang ulih ngada ka website kediri empu. Bisi nya enda nemu sekali ngaga website tauka blog. Bisi nya sigi enda ulih ngena computer lama- lama. Mudah sebening pala enti ngena computer lebih ari sejam. Bisi nya enda sanggup ngeluar ka belanja meli domain name enggau web hosting sereta mayar orang bukai ngaga website tauka blog. Maioh mega macam penanggul bukai enti kitai deka ngaga website kitai empu.

Taja pia ukai reti ia kitai enda ulih bejual ka barang kitai nengah internet. Kitai agi ulih nyual barang kitai nengah internet taja pan kitai nadai website tauka blog kitai empu. Kitai ulih nyual barang kitai nengah website orang bukai.

Maioh website nyendia ka servis ti bansa tu. Website tu ngada ka palan endor orang bejual beli barang lalu sida ia ngambi komisyen udah pengawa bejual beli nya mujur dikereja.

Antara website ti tebilang bendar dikena ngereja pengawa bejual beli barang nengah internet ianya eBay.com. Website tu kala dikenang kitai dalam program ti dulu suba. Pia mega bisi website bukai baka Overstock.com, lalu di menua kitai empu bisi siti kompeni ti udah mujur bendar nyendia ka palan orang bejual beli barang nengah internet ianya Lelong.com.

Tuju sereta cara sida tu nyendia ka servis tu nyau ka sama magang. Saritu aku ngenang siti website ti ulih alai kitai nyual barang kitai ianya eBay.com.

Kitai ulih ngerejister diri ba website eBay.com enggau enda bebayar. Kitai dipinta meri penerang pasal kitai baka nama enggau address ti lengkap sereta mega eMail address ti dikena kitai. Pia mega kitai dipinta meri penerang pasal kad kredit ti dikena kitai mayar eBay.com. Kitai mega dipinta meri penerang pasal akaun PayPal kitai.

Anang irau, penerang ti diberi kitai dia sigi likun. eBay udah lebih 10 taun ngereja pengawa tu. Enti enda cukup pengelikun, tentu meh kompeni tu udah lama ditutup. Kitai semina ulih belabuh ngelaku ka barang kitai ba website eBay.com udah penerang ti diberi kitai nya tadi diperesa eBay.com lalu diaku sigi penerang ti meruan. Udah nya baru kitai tau belabuh ngelaku ka barang kitai ba website eBay.com.

Sebedau kitai belabuh ngelaku ka barang kitai nengah eBay.com, kitai patut bendar berati ka atur ti bisi. eBay.com bisi atur ti terit dikena nyaga pemanah nama kompeni tu. Sida ia mega nadai tentu meri peluang alai kitai ngapil enti akaun kitai kena tutup. Ari nya, pekara ti terubah patut dikereja kitai ianya nentu ka kitai mereti ka atur ti udah ditetap ka.

Antara atur eBay.com ti terit ianya kitai enda tau engkah barang kitai ba sengapa kategori. Kitai mesti deka mereti ka bakani eBay nentu ka kategori barang ngambi ka kitai enda saru dalam pekara tu.

Pia mega kitai patut nemu nama barang ti enda dikemendar ka dijual nengah website eBay.com. Kitai enggai ka barang ti dijual kitai tau ngujung ka akaun kitai kena tutup.

Enti akaun kitai kena tutup kitai enda ulih muka akaun baru laban eBay.com bisi atur ti cukup terit dalam pekara tu. Nya alai kitai patut berati ka atur ti bisi enggau manah.

Semua penerang pasal atur tu bisi diayan ka ba webpage “Help“ alai kitai ulih nemu maioh pekara sereta atur bedagang nengah website eBay.com.

Kitai tau milih cara kitai deka ngelaku ka barang kitai.

Kesatu, kitai ulih ngelaku ka barang kitai ngena cara lelong. Kitai ngeletak rega ti pemadu baruh dulu. Ari nya orang ulih ngeletak penyampau rega sida ia sanggup mayar barang kitai nya. Penyampau rega ti diletak kitai dulu nentu ka penyampau eBay.com ngambi komisyen ari kitai. Tinggi agi rega barang nya diletak kitai, tinggi agi ga komisyen diambi eBay.com ari kitai. Kitai mega ulih milih pengelama barang kitai nya tadi dipandang ka ba website eBay.com. Bisi tempoh sehari, 3 hari, 5 hari, seminggu enggau sebulan. Lama agi barang nya dipandang ka dia, tinggi agi ga komisyen diambi eBay.com ari kitai. Enti kitai meda barang ti dipandang ka ba website eBay.com ditanda “Place Bid“ barang tu dijual ngena cara lelong.

Udah barang kitai laku sereta dibeli orang, eBay sekali agi ngambi komisyen ari rega barang nya ti bendar. Selalu ia rega barang dijual tinggi agi ari rega ia leboh mula kitai mandang ka barang nya ba website eBay.com. Penyampau semua komisyen diambi eBay.com ari kitai dalam sekali kitai mandang ka barang kitai dia antara RM12 ngagai RM20.

Siti agi cara ianya kitai nentu ka rega tetap barang kitai. Sapa dulu mutus ati deka meli barang kitai nya tadi, ia meh bempu barang nya. Ngena cara nya kitai ulih ngurang ka komisyen diambi eBay.com ari kitai laban pandak agi tempoh barang nya dipandang ka, kurang agi komisyen eBay.com. Enti kitai meda barang ti dipandang ka ba eBay.com bisi tanda “Buy Now” tu meh barang dijual ngena cara tu.

Cara ti ketiga ianya kitai ulih meli ruang iklan ba eBay.com. Ruang iklan tu ulih alai kitai engkah backlink ngagai website kitai enti kitai engkah barang kitai ba website kitai empu.

Rega barang ti deka dijual kitai nengah website eBay.com sigi ditentu ka kitai empu. Taja pia kitai patut berati ka rega barang ti sama bisi dijual nengah eBay.com. Enti kelalu mar, nyangka tusah kitai ka nyual barang nya. Enti kelalu murah ari rega orang bukai, rugi ga kitai. Enti ulih tentu ka rega barang kitai nya tadi antara 5% ngagai 10% murah ari barang orang bukai. Taja pia kitai patut ngira ungkus ngirum ka barang nya ngena kurier servis.

Pengelaku barang kitai mega bepanggai ba pengelandik kitai nerang ka guna barang kitai nya. Pia mega, gambar barang nya ti manah sereta terang dipeda mega ulih nyaup ngelaku ka barang kitai besemekih enggau barang orang bukai.

Penutup

Peninga ti dipebasa, nitih ka pansik pasal pengawa dagang internet taun 2008 nyin kemari, bisi 6 millions orang melayar website eBay.com dalam sehari. Pia mega bisi enda kurang ari 20 Ribu iko orang bepanggai ba eBay.com nyadi ka pun penatai pemisi sida ia ngena cara bejual barang nengah website eBay.com tu. Tu mandang ka pemesai guna eBay.com dalam pengawa dagang internet.

Diatu eBay.com udah bisi pampang kompeni sida ia di menua kitai di Malaysia ditu. Kitai patut nguna peluang ti bansa tu dikena kitai nyadi ka internet siti ari pun penatai pemisi kitai. Kitai tau nyual barang ti udah enda diguna kitai agi. Ari 6 millions orang ti melayar website eBay.com genap hari, tentu meh bisi sida tu tekuing hati deka meli barang kitai nya tadi.

Dalam program kitai ti deka datai aku deka ngenang siti agi cara kitai ulih ngereja pengawa dagang internet ngambi ka kitai tebuka runding ka cara pengawa dagang ti ulih dikereja kitai. Ari nya kitai ulih ngemanah ka pendiau pengidup kitai enggau kitai sebilik.

Kena nutup randau ICT kitai ba Tusun 69 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.
Enggau nya, mupok aku. Terima kasih.

Tusun 68 - Bejual Barang Nengah Website Diri Empu

Selamat tengahari serta tabi basa ngagai peninga.

Selamat kita begulai baru dalam program Randau ICT. Saritu Program kitai ba Tusun 68.

Munyi ka udah dipadah ka aku dalam program kitai ba Tusun 67 nyin kemari, saritu kitai deka ngenang pasal pengawa dagang internet enggau silik agi. Kebuah pia laban aku maioh nerima komen sereta Tanya ari peninga ti deka nemu enggau silik agi bakani pengawa dagang internet ulih dikereja kitai.

Maioh cara kitai ulih ngereja dagang internet. Kitai ulih ngereja pengawa dagang internet enti kitai bisi barang dijual. Kitai mega ulih ngereja pengawa dagang internet enti kitai nadai barang dijual tang kitai ulih ngelaku ka barang orang bukai.

Saritu kitai ngenang pengawa dagang internet enti kitai bisi barang dijual. Pengawa nyual barang nengah internet mega ulih dikereja ngena maioh macam cara.

Kesatu, ianya kitai ngada ka website kitai empu. Kita ngelaku ka barang kitai nengah website kitai empu. Kitai ngerejister domain name tauka nama website kitai nengah domain registration services. Enti domain name ngena .com, ungkus ngerejister domain name tu ianya antara RM20 ngagai RM30 setaun. Antara domain service provider ti manah sereta ulih diarap ka ianya GoDaddy.com enggau NameCheap.com Pengawa ngerejister domain name kitai ulih dikereja dalam 15 minit.

Udah nya kitai ngerejister web hosting alai kitai nyewa ruang dalam internet dikena engkah semua penerang enggau data website kitai. Web hosting ti manah baka Hostgator.com nyendia ka service hosting ti nadai disekat enggau ungkus RM270 setaun.

Udah kitai ngerejister domain name enggau web hosting kitai ulih belaboh ngaga website kitai. Siti cara ti mudah ngaga website ianya ngena Wordpress blog laban maioh setting udah disedia ka magang. Tambah mega diatu maioh corak blog ti manah sereta mudah dikena kitai. Giga aja ngena google.com ngena genteran jako “Wordpress Theme” dia kitai ulih milih corak wordpress ti dikedeka ka kitai. Tambah mega hosting service baka Hostgator.com sigi digaga dikena blog baka Wordpress laban sida ia nemu orang diatu maioh rindu agi ngena wordpress enti disbanding ka enggau website ti digaga ari pun.

Enti kitai enda nemu ngaga website tauka blog kediri empu, kitai tau ngiga nengah Google.com nanya ka genteran jako “blog tutorial” tauka “wordpress tutorial” tauka “build a website tutorial”. Dia kitai dibai ngagai webpage ti ngayan ka website ti bisi ngajar kitai cara ngaga Wordpress Blog tauka website. Kitai ulih milih ni cara tutorial ti ulih sereta mudah diterima kitai. Kitai mega tau ngupah orang bukai ngaga website tauka blog ka kitai. Kitai ulih ngiga orang ti ngaga website tauka blog ka kitai ba Elance.com tauka RentACoder.com. Ba 2 iti website tu kitai ulih minta orang ngeletak rega penyampau kitai mayar sida ia enti kitai deka ngasoh sida ia ngaga website kitai.

Udah website tauka blog kitai digaga lalu ulih ayan ba internet kitai deka nentu ka kitai ulih nerima bayar enti orang tekuing ati deka meli barang dijual kitai ba website kitai nya tadi. Ditu kitai beguna ka merchant account. Siti ari merchant account ti ulih dikena kitai ianya PayPal.com. Kitai ulih ngerejister diri nengah PayPal.com tu enggau enda bebayar. Sida ia semina ngambi komisyen enti bisi orang meli barang kitai lalu bebayar nengah merchant account tu.

Udah website kitai ulih dikena kitai nerima bayar kitai deka nentu ka barang kitai datai ngagai orang ti meli barang kitai nya tadi. Ingat peninga, orang ti meli barang kitai nya tadi datai ari serata dunya. Nya alai kitai mesti bisi cara ngirum ka barang kitai ngagai dini-dini alai di serata dunya tu. Ari nya kitai beguna ka kurier servis ti bisi. Antara kurier servis ti ulih dikena kitai ianya baka UPS enggau DHL. Tanya ngagai sida ia ungkus ngirum ka barang kitai lalu ungkus nya tadi nentu ka rega barang ti patut dijual kitai. kitai ulih nemu penerang tu ari website sida ia baka ups.com.

Kitai mega patut nentu ka menua alai barang kitai enda tau dijual. Kebuah pia kitai ulih nyeliah ka orang ari menua nya meli barang kitai enggai ka kitai sama kena disalah ka.

Diatu website kitai udah ulih ayan ba internet. Kitai mega ulih nerima bayar nengah merchant account kitai ba PayPal.com. Udah nya kitai mega ulih ngirum ka barang kitai nengah kurier servis. Nya alai website kitai udah sedia dikena kitai ngereja pengawa dagang internet.

Taja pia ukai reti ia website kitai nya tadi udah ulih ditinggal ka pia aja lalu ngarap ka orang datai lalu terus meli barang kitai. Taja pan maioh orang ngelayar internet, nadai meh guna enti orang enda tetemu ka website tauka blog kitai.

Ari nya kitai patut ngelaku ka website kitai. Kitai patut nulis article pasal barang ti dijual kitai dalam website kitai. Kitai patut minta tulong orang bukai ti bisi website engkah link ngagai website kitai ngambi ka bisi backlink ngagai website kitai. Maioh agi backlink manah agi ranking website kitai ba search engine, sereta manah agi peluang website kitai dipeda orang. Kitai mega patut ngirum ka email ngagai bala kaban kitai madah ka pasal website kitai. Pia mega kitai patut ngena peluang ari Social Networking baka Facebook.com dikena nesau orang maioh pasal website kitai. Ari nya baru bisi peluang orang datai sereta maca website kitai. Ngena cara nya baru barang ti dijual kitai ulih laku.

Kitai mega patut mandang ka gambar barang ti dijual kitai enggau terang sereta ngerindu ka ati. Gambar ti manah sereta terang bisi bendar peluang narit ati orang ti maca website kitai. Anang ngena gambar kelalu besai enggai ka lubah ayan ba website. Kadang- kadang fail gambar ti kelalu besai enda ulih ayan sekali.

Pia mega kitai tau ngambi video klip pasal barang kitai nya tadi lalu dipandang ka kitai ba Youtube.com. Kitai ngaga video klip enda lebih ari 5 minit nerang ka guna barang ti dijual kitai nya. Video klip nya tadi lalu diayan ka kitai ba Youtube.com. Udah nya kitai lalu ngadu ka setting dalam website kitai ngambi ka video klip nya tadi ulih ayan ba website kitai. Proses tu dikumbai orang “Video Streaming”.

Website kitai patut ditambah kitai enggau penerang ti baru enda kurang ari seminggu sekali. Nya nentu ka robot tauka spider search engine semampai tetemu ka penerang baru leboh ia datai ngagai website kitai. Ari nya baru website kitai bulih ranking ti tinggi dalam search engine ngujung ka ia mudah ditemu orang dalam internet.

Penutup

Peninga ti dipebasa, Enti kitai bisi barang deka dijual nengah internet, siti ari cara ulih dikena kitai ianya kitai ngada ka website tauka blog kitai empu. Ngena modal dalam RM500 setaun, kitai ulih ngada ka website kitai empu. Penguntung kitai ngena cara tu ianya kitai ulih ngaga sereta ngubah website kitai nitih ka peneka hati kitai. Kitai mega ulih ngelaku ka barang bukai dalam siti website aja.

Dalam program kitai ti deka datai aku deka ngenang bakani kitai ulih ngelaku ka barang kitai enggau cara enda ibuh bisi website kediri empu. Kitai ulih ngelaku ka barang kitai nengah website orang bukai.

Kena nutup randau ICT kitai ba Tusun 68 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku. Terima kasih.

Tusun 67 - Pengawa Dagang Internet

Selamat tengahari serta tabi basa ngagai peninga.

Selamat kita begulai baru dalam program Randau ICT. Saritu Program kitai ba Tusun 66.

Dalam program kitai ari Tusun 62 nyentok ka Tusun 66 nyin kemari kitai sama ngenang pasal pekara pengelikun leboh ti ngena internet. Taja pan bisi penusah tau nyadi ketegal kitai ngena internet, nadai penusah tu tau nuntung kitai enti kitai bisi nyikap diri ngena penemu pasal pengelikun internet. Kitai enda patut takut ngena internet laban penguntung ti tau datai ari internet jauh lebih enti dibanding ka enggau penusah ti tau datai. Aku selalu nyema ka pemerani ngena internet patut baka pemerani kitai driba kereta. Kitai enda takut driba genap hari taja pan bisi penusah tauka orang bukai accident leboh ti driba kereta. Bakanya mega pemerani kitai ngena internet.

Lengka ka dulu kenang pasal pengelikun ngena internet. Saritu aku deka belaboh ngenang pengawa dagang internet. Aku maioh nerima peminta ari peninga ti deka nemu enggau silik agi pasal pengawa dagang internet. Maioh nya madah ka diri baru nemu kitai ulih ngereja pengawa dagang dalam internet. Ngelama tu sida ia semina ngena internet maca berita, maca blog, ngena email enggau ngena social networking baka Facebook.com. Bisi mega mansang sesingkang agi bekena ka online telephone service baka Skypee.com. Tang penemu pasal pengawa dagang internet tu agi baru kelebih agi di menua kitai ditu.

Taja pia ukai reti kitai jauh tinggal dalam penemu ICT. Pengawa dagang internet, kelebih agi pengawa dagang internet ti mit, ianya pengawa dagang internet ti enda ngena modal ti maioh baru ngerembai bepun ari taun 2005. Sebedau nya, pengawa dagang internet semina dikereja kompeni ICT ti besai aja. Kitai semina bebeli aja nengah internet tang nadai tentu maioh peluang bejual dia. Nya alai enti udah 4 taun kitai baru nemu pekara tu, enda kitai kelalu jauh tinggal dalam pekara tu.

Diatu maioh bendar orang ngena peluang dalam pengawa dagang internet. Maioh bendar orang udah bisi pun penatai pemisi ti stabil bepun ari pengawa dagang internet. Peluang dalam pengawa dagang internet mega makin sehari makin maioh tebuka. Pia mega makin sehari makin maioh cara pengawa dagang internet bisi digaga ngambi ka ulih dikena kitai dalam pengawa dagang internet kitai.

Kitai patut beterima kasih ngagai kompeni baka Google.com, Paypal.com enggau ClickBank.com ti ngada ka servis ti ulih endor kitai ngeeja pengawa dagang internet ngena cara ti mit. Taja cara kitai bedagang dalam internet tu mit, ukai reti penatai pemisi ulih kitai mit mega. Pengawa dagang internet dikereja kitai enggau mit laban ungkos ngereja pengawa tu jauh mimit enti dibanding ka enggau ungkos ngaga pengawa dagang cara bukai.

Berindik ari nya aku ngasai ka patut bendar kitai berandau ka pengawa dagang internet enggau silik agi dalam Program Randau ICT kitai. Aku berati ka peluang ditu mega semampai agi maioh tebuka. Aku mega deka meri contoh kompeni tauka orang dagang ti udah mujur dalam pengawa dagang internet lalu bakani sida ia tu ngereja pengawa dagang internet sida ia.

Munyi ka udah dikenang aku dulu tadi, maioh macam pengawa dagang internet ti ulih dikereja kitai. Kitai ulih ngeklaku ka barang kitai empu nengah internet. Taja pan kitai nadai barang dijual kitai, kitai ulih ngelaku ka barang orang bukai lalu nerima komisyen ari nya. Aku empu ngereja pengawa dagang internet ngena cara bakatu.

Kitai mega ulih ngada ka ruang iklan ba wesite tauka blog kitai lalu kitai berunding enggau orang ti bempu barang. Ari nya kitai minta orang ti bempu barang nya mayar kitai.

Maioh penguntung kitai ngereja pengawa dagang internet.

Kesatu, pengawa dagang kitai mudah agi ditemu orang serata dunya. Diatu bisi nyau ka manggai 1.8 billions orang ngena internet dalam dunya tu. Tu nyau ka manggai 20% ari mensia di dunya tu bisi ngena internet.

Kedua, pengawa dagang kitai nadai ngetu. Ia bekerja 24 jam sehari, 7 hari seminggu, 3o hari sebulan, 365 hari setaun. Kebuah pia maioh pekara ulih dikereja kitai enggau cara automatik. Kitai semina kiruh ngada ka setting dalam website tauka blog kitai ba pun pengawa dagang aja.

Ketiga, pengawa dagang internet jauh murah enti dibanding ka enggau pengawa dagang di luar din. Semina ngena RM500 setaun kitai ulih belabuh ngereja pengawa dagang internet kitai. Enti ngereja pengawa dagang bukai kitai beguna ka modal bepuluh ribu ringgit dikena ngepun ka pengawa dagang kitai.

Keempat, kitai nerima bayar ngena cara automatik. Orang bebeli dalam internet bebayar tekala nya. Nadai ulih diutang. Kebuah pia laban sistem dalam merchant account tu sigi digaga bakanya. Nya alai kitai nadai kiruh berunding ka pengawa nagih utang tauka bayar ari orang ti meli barang kitai. Enti peninga bisi muka kedai tentu nemu reti pemesai guna pekara tu. Duit sigi di jari kitai enti orang bisi meli barang ari website kitai.

Kelima, maioh macam barang sereta maioh macam cara kitai ulih ngereja pengawa dagang internet. Pekara tu deka dikenang aku enggau silik agi dalam program kitai ti deka datai. Orang ti ngereja pengawa dagang internet diatu ngaku pengawa sereta cara dagang tu agi baru lalu agi ngerembai. Reti ia peluang kitai besemekih sigi enda ulih ditutup. Bisi aja barang baru ulih dijual kitai. Bisi aja cara baru ulih dikena kitai. Bisi aja pengawa dagang baru ulih diguna kitai. Nadai orang ulih nyekat kitai ngereja pengawa dagang internet.

Keenam, pengawa dagang internet ulih dikereja kitai enda ngira dini alai kitai maya nya, asal aja bisi internet. Kitai ulih ngereja pengawa dagang internet di rumah, di ofis, di restoran, airport tauka leboh kitai benong becuti di Hawaii. Nya alai kitai ulih bekerja sambil bercuti tauka becuti sambil bekerja.

Ketujuh, maioh bendar perengka kelebih agi software ti bisi digaga sereta dijual dikena ngerembai ka pengawa dagang kitai. Bisi mega software ti beguna ulih dikena kitai enggau cara enda bebayar. Nya alai pengawa dagang internet kitai ulih mansang enggau jampat taja semina ngena ungkos ti murah.

Maioh mega penguntung bukai enti kitai ngeeja pengawa dagang internet. Nya alai kitai deka berandau ka pekara tu dalam program kitai ti deka datai.

Penutup

Peninga ti dipebasa,

Pengawa dagang internet agi baru di menua kitai. Taja pia kitai patut ngambi peluang tu ngereja pengawa dagang internet ngambi ka kitai bisi penatai pemisi.

Kena nutup randau ICT kitai ba Tusun 67 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku. Terima kasih.

Tusun 66 - Pengelikun Ngena Social Networking

Selamat tengahari serta tabi basa ngagai peninga.

Selamat kita begulai baru dalam program Randau ICT. Saritu Program kitai ba Tusun 66.

Dalam program kitai ba Tusun 65 nyin kemari kitai sama ngenang bakani kitai ulih nyaga pengelikun kitai leboh kitai ngena Merchant Account. Diatu Merchant Account makin maioh dikena orang kelebih agi dalam pengawa Dagang Internet. Kitai patut merani sereta neleba ka diri ngena servis Merchant Account laban pengawa tu deka nyadi siti cara pengidup kitai ti baru. Lama laun cara tu tetap dikena orang dudi ari ila.

Lengka ka dulu kenang pasal pengelikun ngena Merchant Account. Saritu kitai deka ngenang siti agi pekara pengelikun internet ianya pengelikun ngena “Social Networking“.

Social Networking tu ianya website endor orang maioh begiga sereta betemu enggau pangan diri dalam dunya siber. Ditu kitai ulih ngiga kaban baru enggau orang ti udah ngerejister diri dalam website nya. Kitai mega ulih mai kaban kitai ngerejister diri dalam website nya. Ari nya kitai ulih berandau ka maioh macam pekara dalam website tu, enda iboh betemu moa enggau pangan diri.

Social Networking website tu sigi udah lama ditumbuh ka. Siti ari tuju internet diada ka di menua Amerika dulu suba ianya nyadi ka palan alai pengawa Social Networking tu. Antara Social Networking website ti terubah ia ianya baka AOL enggau Yahoo! Massenger. Taja pia pengawa Social Networking tu enda tentu nyulut dikena maioh orang maya nya.

Bepun ari taun 2005 Social Networking website tu nyau tebilang sereta dikerindu ka maioh orang ukai semina di menua Amerika din tang mega serata dunya. Pekara tu nyadi laban pemansang website ti baru ti lebih dikerindu ka orang ti biak agi. Website ti nyulut maya nya baka MySpace.com enggau Friendster.com bisi ngada ka service ti dikerindu ka bala anembiak. Nya alai website ti bansa tu nambah maioh agi.

Dalam taun 2007 siti website ti ngada ka service Social Networking ditumbuh ka. Website tu ianya Facebook.com, jampat bendar ngerembai nyentok ka ia nyadi website ti tebilang nyentok ka saritu. Di menua kitai Malaysia ditu bisi 4 Juta orang ngerejister diri dalam Facebook.com. Dipelaba ka aku, kitai ti bisi ngena internet tentu bisi udah ngerejister diri dalam Facebook.com. Dalam taun 2008, di serata dunya bisi 600 juta orang bisi ngerejister diri dalam Facebook.com. Reti ia nyau ka 40% orang ti ngena internet bisi ngerejister diri dalam Facebook.com. Tu nanda sereta nerang ka pemesai reti sereta guna Social Networking website dalam pengidup kitai kemaia hari tu.

Ari pemaioh orang ti ngena social networking website nya, tentu meh bisi aja ti enda tentu manah tuju. Taja pia tebal agi orang ti ngena website tu ngibun tuju ati ti manah baka pengerindu sida ia bekelala sereta bekaban enggau orang baru.

Kitai patut nemu pekara pengelikun ti besangkut paut enggau Social Networking ngambi ka kitai enda kena penusah leboh ti ngena servis tu. Enti kitai ngerejister diri dalam Social Networking website, penerang pasal kitai sigi mudah ditemu mensia maioh di serata dunya.

Bisi penusah ulih nuntung kitai enti kitai enda cukup bejaga leboh ti ngena social networking website baka Facebook.com. Antara penusah ti ulih nyadi ianya penerang pasal kitai ulih dicuri sereta dikena orang enggau tuju ti enda manah. Pekara tu dikumbai “identity teft”. Orang ngena penerang kitai ngisi form baka loan duit ba bank, lalu enti loan nya diterima, bank minta kitai bebayar.

Siti agi penusah tau nyadi ianya pengawa orang ti mejal tauka ngemeli ka orang dalam internet. Pekara tu mega dikumbai orang “bully” nengah internet. Pengawa tu maioh bendar udah ngenusah ka orang bukai sampai ka bisi orang ti dibuli dalam internet bisi munuh diri. Pekara tu bisi udah nyadi di Amerika enggau di Philipines.

Siti agi penusah ti tau nuntung kitai enti kitai enda bejimat leboh ngena social networking website ianya ngenyamai ka pengawa orang ti deka ngemedis kitai. Kebuah pia ia bulih penerang ari posting kitai enti kitai enda bejimat pasal pekara ti ditulis kitai dalam website tu. Antara penerang ti ulih diguna orang ti bansa tu ianya penerang pasal pengawa kitai besehari- sehari. Ari penerang ti bansa tu, nyamai bendar orang nya ulih ngipa kitai laban ia nemu kuing pejalai kitai. Pekara tu mudah bendar nyadi ba anembiak. Nya alai kitai patut nemu bakani kitai ulih nyeliah ka pekara ti bansa tu.

Pekara pengelikun ti kesatu, anang meri semua penerang ti bendar pasal kitai dalam website tu. Antara penerang ti patut dilalai ka kitai ianya taun kitai ada sereta Address ti lengkap dini alai kitai diau. Penerang ti bendar pasal kitai ulih dikena orang ti enda manah penemu ngereja pengawa ti enda manah lalu ditanggung kitai.

Pekara pengelikun ti kedua, ianya anang nerima sebarang orang ti enda dikelala kitai dalam list kaban kitai. Kitai enda nemu tuju orang nya tadi. Manah agi semina ngemendar ka orang ti dikelala kitai aja dalam list kaban kitai ngambi ka kitai enda kena buli dalam internet. Orang ti buli orang bukai dalam internet tu ngena cara Psikology, nyentok ka kitai enda nemu diri kena bully ia. Pekara bully dalam internet tu tebal agi nyadi ba orang ti biak. Nya alai bepekat manah enggau diri sebilik pasal social networking website tu.

Pekara pengelikun ti ketiga ianya kitai anang selalu nulis pekara pasal kitai empu dalam social networking website. Anang madah ka tuju pejalai kitai. Anang madah ka penatai kitai. Anang madah ka kitai kediri aja di rumah. Anang madah ka diri sunyi tauka boring. Anang madah ka diri nganjung anak tusyen. Anang madah ka diri benong di rantau jalai ari kini nuju kini. Penerang ti bansa tu enti ditulis kitai genap hari, mudah bendar orang ngipa kitai. Pia mega enti anembiak nulis penerang ti bansa tu, mudah bendar orang ti jai ngulih ka sida laban bisi penerang ti beguna ba sida ia.

Aku berati ka posting bala kitai ba Facebook.com, maioh bendar penerang ti ditulis di meri peluang penusah tau nyadi. Bisi nya madah ka diri benong di rantau jalai ari Kuching ka Sri Aman. Bisi madah ka diri benong diau ba hotel ni leboh ti travelling. Penerang tu enda patut diayan ka ba social networking website.

Penutup

Peninga ti dipebasa,

Makin sehari, makin maioh orang ngena social networking website. Nya alai kitai patut berati ka pengelikun leboh ngena social networking website. Anembiak rindu bendar ngena social networking website. Kitai ka apai indai patut berati sereta bepekat manah enggau diri sebilik ngambi ka pengelikun ngena social networking website ulih diperati sereta dijaga kitai. Terang ka ngagai sida ia penusah ti tau nyadi.

Social Networking website beguna bendar enti dikena kitai enggau betul. Enda ngira dini kitai diau, kitai ulih berandau enggau bala kaban kitai tauka kitai sebilik. Ari nya kitai semampai semak enggau bala kaban kitai. Taja pia, ia ulih mai penusah ka kitai enti kitai enda cukup bejaga. Nya alai kitai patut berat ka pengelikun leboh kitai ngena social networking website.

Kena nutup randau ICT kitai ba Tusun 66 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku. Terima kasih.

Tusun 65 - Pengelikun Ngena Merchant Account

Selamat tengahari serta tabi basa ngagai peninga.

Selamat kita begulai baru dalam program Randau ICT. Saritu Program kitai ba Tusun 65.

Dalam program kitai ba Tusun 64 nyin kemari kitai sama ngenang bakani kitai ulih nyaga pengelikun kitai leboh kitai ngena email. Enti peninga agi ingat, email tu nyadi ka wakil kitai dalam dunya internet. Semua pekara ti datai ari email kitai endang tanggungjawab kitai 100%. Pengelikun ngena email nyamai diperati ka kitai enti kitai nemu ngibun password kitai enggau “Security Question”, enda forward sebarang email ti dikirum ka kitai lalu enda muka sebarang email ti nyangka bisi ngundan spyware enggau virus.

Lengka ka dulu kenang pasal pengelikun ngena email. Saritu aku deka ngenang siti agi pekara pengelikun internet ianya pengelikun ngena “Merchant Account“.

Saritu maioh bendar pengawa bejual beli dikereja dalam internet. Pengawa tu mega deka nambah hari siti ngagai hari siti. Maioh penguntung kitai enti kitai bebeli nengah internet. Kesatu, kitai ulih meli barang enggau murah agi enti dibanding ka enggau meli barang ati kedai. Kedua, maioh kompeni ti nyual barang nengah internet bisi ngada ka jamin tauka warranty barang ti dijual sida. Ketiga, barang ti nadai ba menoa alai kitai diau ulih dibeli kitai nengah internet asal barang nya tadi enda salah dibeli kitai ari segi undang-undang menoa kitai. Keempat, kitai enda iboh masau hari kitai nurun ka kedai bebeli ka barang laban pekara tu ulih dikereja kitai ari rumah asal kitai bisi internet.

Di menoa kitai empu, siti ari pengawa bebeli nengah internet ti tebilang bendar ianya meli tiket AirAsia. Kompeni AirAsia ngerembai enggau jampat bepun ari pengawa sida ti bejual ka tiket nengah internet. Kitai patut beterima kasih ka kompeni AirAsia tu ti udah muka jalai dalam pengawa bebeli nengah internet.

Di menoa ti udah maju baka Amerika enggau Britain, barang ti diguna genap hari baka sayur enggau dagin sereta mega perengka dapur ti bukai ulih dibeli nengah internet. Order diambi pagi lalu barang dianjung datai ba rumah moa ka lemai. Siti ari kompeni ti mujur bendar dalam pengawa dagang supermarket nengah internet ianya Wall Mart.

Kitai bejual beli barang nengah internet ngena kad kredit, charge card, debit card serta mega baru diatu, ngena ATM card kitai. Semua transaction antara kitai enggau orang ti bempu barang ti dibeli kitai dikereja nengah “Merchant Account“. Merchant Account tu ianya siti kompeni ti dikumbai kitai third party company. Ia nerima bayar ari kitai lalu ngirum ka bayar nya tadi ngagai kompeni ti bempu barang ti dibeli kitai. Udah pekara tu dikereja nya baru orang ti bempu barang nya tadi ngirum ka barang ngagai kitai.

Diatu maioh bendar kompeni ti ngada ka merchant accout dalam internet. Siti ari kompeni tu kala dikenang aku dalam program ti dulu suba ianya PayPal.com. Kelimpah ari paypal maioh agi kompeni ti bukai. Taja pia cara kompeni tu bekerja nyau deka sama. Pengelikun ngena merchant account tu mega nyau deka sama magang.

Keterubah ia kitai ngena merchant account kitai dipinta ngerejister akaun kitai. Udah nya kitai diberi nama akaun enggau password. Baka pengelikun ngena email ti udah dikenang aku kemari, nama akaun enggau password tu patut disimpan serta dilalai ka kitai enggau manah. Enti nama akaun enggau password kitai ulih ditemu orang, akaun kitai nya tadi ulih dikena orang bebeli ka barang nengah internet lalu kitai bebayar ketegal nya tadi. Tentu meh pekara tu pulai ka pengerugi ngagai kitai.

Enti kitai meri akaun enggau password kitai nya ngagai orang bukai, reti ia kitai meri duit kitai ngagai orang nya ntadi. Nya alai password merchant akaun kitai patut disimpan enggau manah.

Enti kitai bebayar nengah internet ianya, tentu ka address box kitai bepun ari https://. Enti address box kitai enda bepun bakatu, kitai nyangka benong ngena webpage ti segaja dikena orang ngumpan kitai ngayan ka nama akaun enggau password kitai. Semina address box ti ngena https:// aja likun dikena laban semina kitai siko aja ngena webpage nya maya nya. Enti address box nya bepun ngena http:// aja, bisi orang bukai ulih sama meda penerang di ayan ba webpage nya. Nya alai tentu ka pekara tu dulu sebedau kitai meri penerang pasal merchant account kitai.

Diatu bisi website digaga nyaru baka website merchant account ti bendar. Taja pia website tu enda ulih ngaga ka address ti bepun ngena https:// laban website ti ngena https:// enda ulih direjister sebarang. Semina kompeni ti bendar aja ulih ngerejister webpage ngena https:// laban bisi cara orang ti ngatur pengawa tu napis kompeni merchant account ti bendar.

Anang ngena maioh kad kredit. Siti aja umbas dikena kitai bebeli ka barang nengah internet. Manah agi enti kitai ulih ngena debit card. Facility ia sama baka kad kredit tang debit card tu baka ATM card, duit dalam nya deka diisi kitai dulu sebedau kad nya ulih dikena. Ngena cara nya kitai enda kena penusah ti tau bepun ari hutang kad kredit.

Pia mega kitai ngena kad kredit ti enda kelalu besai kredit limit. Manah agi ngena kad kredit ti ngena kredit limit enda lebih ari RM5,000. Kebuah pia, taja pan kitai udah cukup bejaga tang nasib nadai, orang agi ulih ngena duit dalam kad kredit kitai, kitai enda lenyau maioh duit. Taja pia peninga, pengawa lenyau duit ketegal kitai ti bebayar nengah internet tu jauh kurang enti dibanding ka enggau kitai ti ngena kad kredit kitai di luar din. Aku empu udah lebih ari 5 tahun bebeli barang nengah internet ngena kad kredit. Nadai sekali udah bisi penanggul. Pengawa tu sigi likun enti kitai cukup bejaga.

Kitai mega patut nemu sereta pecaya ka kompeni ti ngada ka service merchant account. Kompeni baka PayPal sigi udah ditemu sereta tebilang dalam ngada ka service ti bansa tu. Tambah mega maioh kompeni nerima bayar nengah PayPal dalam website sida. Ari nya tentu meh PayPal tu ulih diarap ka kitai. Kadang- kadang bisi meh penanggul mimit tang kompeni tu bisi team ti ulih mantu kitai enti kitai bisi penanggul ngena service sida ia.

Tentu ka kitai nemu pekara ti patut enggau enda patut dikereja ngena merchant account kitai. Kebuah pia enti kitai ngereja pekara ti enda dikemendar ka ngena akaun kitai, akaun kitai nya tadi tau kena tutup. Tu siti ari cara kompeni ti bansa tu nyaga pengelikun ngena servis sida ia. Tentu meh pekara tu enda manah.

Penutup

Peninga ti dipebasa,

Makin sehari, pengawa bebayar nengah internet makin maioh dikereja. Kitai enda patut takut bebeli nengah internet laban pekara tu ulih mai penguntung ka kitai. Nya alai kitai patut berati ka pengelikun leboh kitai bebayar nengah internet baka ti udah dikenang aku tadi.

Kebendar ia, pengawa bebayar nengah internet ngena servis ari maioh merchant account ti bisi jauh lebih likun enti dibanding ka enggau kitai ti ngena kad kredit kitai di luar din. Nya alai kitai enda patut takut ngena servis ti bansa tu. Tambah mega tu deka nyadi siti ari jalai pengidup kitai.

Kena nutup randau ICT kitai ba Tusun 64 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku. Terima kasih.

Tusun 64 - Pengelikun Ngena eMail

Selamat tengahari serta tabi basa ngagai peninga.

Selamat kita begulai baru dalam program Randau ICT. Saritu Program kitai ba Tusun 64.

Dalam program kitai ba Tusun 63 nyin kemari kitai sama ngenang bakani kitai ulih nyaga pengelikun kitai leboh kitai melayar internet. Enti peninga agi ingat, pengelikun melayar internet bepanggai bendar ba cara runding kitai ti betul serta mega penampak tuju kitai ngena internet. Manah agi tuju kitai melayar internet, likun agi ga kitai. Pia mega enti tuju kitai melayar internet enda tentu manah, bisi agi ga peluang kitai kena penusah ari webpage di dilayar kitai.

Lengka ka dulu kenang pasal pengelikun kitai ngelayar internet. Saritu aku deka ngenang siti agi pekara pengelikun internet ianya pengelikun ngena email kitai.

Saritu email nyau nyadi ka perengka ti enda tau nadai dikembuan kitai. Ia nyadi ka siti perengka ti nyamai bendar dikena kitai. Email mega mudah dikena diatu. Maioh kitai bisi lebih ari siti email.

Email tu siti ari cara orang ulih ngenatai ka maioh pekara ngagai kitai. Kitai ulih nerima berita nengah email kitai. Kitai ulih nerima report nengah email kitai. Kitai ulih nerima gambar, klip video enggau lagu nengah email kitai. Kitai mega ulih nerima link ngagai website tauka webpage nengah email kitai.

Pia mega kitai ulih nganjung semua pekara ti ulih diterima kitai ti udah disebut aku nya tadi ngagai orang bukai baka orang ti ulih nganjung semua utai tu tadi ngagai kitai.

Ari nya besai bendar reti sereta guna email dalam pengidup kitai. nya alai kitai patut nemu sereta mereti ka pekara pengelikun leboh kitai ngena email.

Email tu nyadi pengari kitai. Nama- nama pekara ti ayan dalam email kitai sigi pekara ti datai ari runding kitai. Enti pekara ti datai ari email kitai tau ngenusah orang bukai kitai meh betanggungjawab ka pekara nya. Kitai enda ulih nyalam ka pekara ti ayan ba email kitai ukai pengawa kitai. Taja pan kitai semina ngirum tauka “forward” email ari orang bukai ngagai email bala kaban kitai, tanggungjawab nya agi pulai ka kitai laban email nya datai ari email kitai. Enti pekara ti dikirum ka kitai tauka email orang bukai di”forward” ngagai email address ti bisi dalam list kitai bisi ngelanggar undang-undang, kitai tau kena dakwa di court. Tusah kitai deka nyalam ka pekara nya ukai dikereja kitai tang kitai semina forward email nya aja. Court meda pekara tu datai ari kitai lalu betanggungjawab lalu tau kena ukum.

Ari nya tadi kitai patut nyaga akaun email kitai enggau manah. Anang meri akaun email kitai ngagai orang bukai. Nadai kebuah kitai meri akaun email kitai ngagai orang bukai laban semua orang ti be-umur 18 taun ka atas tau ngerejister akaun email enggau enda bebayar. Tambah mega pemaioh akaun email ti tau dibuka kitai nadai disekat.

Jaga akaun email kitai baka kitai nyaga akaun bank kitai. Tentu ka Password tauka jako lalai ti dikena kitai muka email kitai enda ditemu orang bukai. Pia mega tentu ka kitai nukar password kitai enda kurang ari sekali dalam 3 bulan. Diatu udah bisi software ti dikena muka password ti lama enda ditukar. Enti password kitai ulih ditemu orang bukai, nasib kitai teserah ngagai orang nya tadi. Enti ia ngibun penemu ti jai ngena password nya tadi, jai meh nasib kitai. Bisi meh penusah tau datai nuntung kitai.

Taja pia, enti password email kitai ulih ditemu orang bukai, ukai reti ia email kitai nya tadi terus lenyau. Kitai agi ulih muka email kitai nya baru lalu nukar password nya ngagai password ti baru. Enti password nya tadi udah ditukar orang bukai ti muka email kitai nya tadi kitai ulih minta bantu ari website ti ngada ka service email tu tadi baka Google.com enti kitai ngena @gmail.com tauka Yahoo.com enti kitai ngena @yahoo.com. Cara ia bakatu:

Leboh kitai ngerejister email akaun kitai, kitai dipinta ngisi penerang ti besangkut paut enggau kitai ti bempu email. Siti ari penerang ti patut diisi kitai dia ianya “Security Question“. Kitai dipinta milih jako Tanya, lalu udah nya kitai meri saut kitai dia. Security Question tu deka ditanya ngagai kitai enti kitai minta Bantu ari email service provider tu nyidi password kitai. Nya alai kitai mesti deka ngingat ka “Security Question”. Enti kitai enda ulih ingat ka “Security Question” tu nya baru kitai nadai jalai ulih muka akaun email kitai.

Email mega siti ari cara orang ulih ngirum sereta ngerembai ka virus enggau spyware dalam internet. Maioh macam cara pekara tu ulih dikereja. Kesatu, ngena cara ngelalai ka virus tauka spyware dalam file ti disangking ka dalam email ti dikirum ka kitai. Taja pia virus ti dikirum ka email ti bansa tu ulih ditemu anti-virus ti bisi disedia ka website ti nyendia ka service internet. Nya alai pekara ti bansa tu jarang bendar tau nyadi.

Spyware mudah agi tama ngagai akaun email kitai enti dibanding ka enggau virus. Email ti dikirum ngena cara berantai tauka email ti dikirum ari siti email ngagai siti email ti bukai suah bendar bisi ngundan spyware. Spyware tu tau ngenusah ka kitai laban ia ulih ngambi penerang pasal akaun email kitai sereta mega penerang pasal akaun email ti bisi dalam list kitai. Penerang tu tadi lalu dikirum ka ngagai orang ti bempu spyware tu tadi. Nya ngujung ka kitai nerima maioh macam email genap hari.

Nya alai peninga, enti kitai maioh nerima macam-macam email genap hari, email baka promosi enggau email ti enda bebatang, pekara tu nyadi laban bisi spyware dalam email kitai.

Kena kitai nyeliah ka pekara ti bansa tu nyadi, kitai anang muka email ti datai tang simpan ia dalam folder “Spam“. Email dalam folder spam tu deka dipadam ka udah sebulan.

Kitai mega anang forward email sebarang ngagai bala kaban kitai. Tentu ka kitai mereti sereta setuju enggau isi sereta pekara ti ditulis dalam email nya tadi sebedau kitai ngirum ka ia kebukai. Tentu ka mega email nya tadi bisi beguna ba orang ti nerima email kitai laban kitai enggai direport orang ngirum ka email enggau sebarang. Orang ti bansa tu dikumbai “Spammer”. Enti kelalu maioh report “spammer” diterima pasal email kitai, akaun email kitai nya tadi tau ditutup terus.

Penutup

Peninga ti dipebasa,

Email tu siti ari perengka ti beguna bendar kemaya hari tu. Ia nyadi ka wakil kitai dalam dunya ICT. Kitai betanggungjawab ka semua pekara ti datai ari email kitai. Nya alai kitai patut berat ka pengelikun kitai ngena email kitai. Kitai mega patut nyaga password email kitai enggau manah laban enti ia ulih ditemu orang bukai kitai tau kena penusah.

Taja pia pengelikun ngena email tu nyamai diperati sereta dikereja kitai. asal kitai ngibun password kitai enggau manah, ingat ka “security Question” serta nemu sereta setuju enggau isi email ti di”forward” kitai ngagai orang bukai, serta mega enda muka sebarang email ti datai ngagai kitai, kitai semampai likun enti kitai ngena email.

Kena nutup randau ICT kitai ba Tusun 64 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku. Terima kasih.

Tusun 63 - Pengelikun Melayar Internet

Selamat tengahari serta tabi basa ngagai peninga.

Selamat kita begulai baru dalam perogram Randau ICT. Saritu Program kitai ba Tusun 63.

Saritu aku deka belaboh ngenang pengelikun ngena internet. Pekara ti deka dikenang kitai saritu ianya bakani kitai ulih nyaga pengelikun kitai leboh ti melayar internet.

Tuju kitai melayar internet ianya dikena ngiga penerang pasal pekara ti deka ditemu kitai. Kitai melayar internet dikena nambah ka penemu kitai enggau dalam agi pasal siti – siti pekara ti deka ditemu kitai. Pia mega kitai melayar internet dikena ngiga penerang ti tau nyukong penerang di deka dikenang kitai ngambi ka buah kenang kitai enda sebubu ngapa tang bisi disukong enggau penerang ti bendar. Ari internet semua penerang tu ulih diambi kitai enggau manah.

Taja pia ukai semua penerang ti bisi ayan ba internet ulih diarap ka kitai magang. Kitai enda tau nerima penerang ti ayan dia enggau seratus peratus pengarap kitai. Nya alai kitai mesti nemu ni bagi penerang ti tau diguna. Kitai enggai nyadi penyukong sereta ngerembai ka penerang ti enda betul ngagai orang bukai berindik ari kitai ti tetemu ka penerang ti salah nya tadi. Nya alai kitai patut nemu pemendar penerang ti diterima kitai ngambi ka kitai enda kena penusah dudi ari. Kelebih agi, kitai enggai enda nemu diri tau kena penusah ari pekara ti bansa tu.

Siti ari cara kitai nemu penerang ti ayan dia bisi diguna ianya penerang ti datai ari website ti bisi kredibiliti. Antara website ti bisi kredibiliti ianya baka Google.com, Yahoo.com, Amazon.com, Wikipedia.com, Pcworld.com enggau eHow.com. Pia mega penerang ari Ezine.com ulih diarap kitai laban penerang dia ditapis orang ti nyadi moderator website tu tadi.

Nya alai enti kitai ngiga penerang pasal pekara ti deka ditemu kitai, kitai tau muka website tu dulu lalu giga penerang ti deka digiga kitai dalam website ti udah dipadah ka aku dulu tadi. Kadang- kadang penerang ti digiga kitai enda maioh ayan tauka nadai ayan sekali. Enti bakatu, kitai tau ngiga penerang ari website bukai. Enti ulih giga penerang ari enda kurang ari 10 iti website ti bukai lalu banding ka semua penerang dia tadi. Ari nya kitai bulih siti genturung penerang ti sama nerang ka pekara ti deka ditemu kitai.

Tentu meh maioh penerang tu nyau deka nerang ka pekara ti sama. Nya alai enti bisi penerang ti becanggah enggau penerang maioh ti bukai, penerang tu tau dikumbai kitai penerang ti enda tentu betul. Kitai mega tau enda iboh ka penerang ti bansa tu.

Kitai mega patu berati ka penerang ti disukong enggau contoh tauka data ti betul. Enti penerang nya enda disukong enggau data tauka contoh ti betul, penerang nya tadi enda tegap lalu tau dikelaung ka kitai. Ari nya kitai nemu penerang tu enda tentu ulih diguna.

Tu siti ari cara kitai nyaga pengelikun kitai melayar internet, kelebih agi bakani kitai ulih milih penerang ti betul.

Bisi mega website ti ngada ka pop-up ianya window page ti mit ti bisi ngundan iklan. Pop-up tu bisi maioh macam tuju. Bisi nya tuju ti manah sereta bisi mega tuju ti enda manah. Bisi pop-up tu ngumpan kitai klik ba link ti bisi dia lalu mai kitai ngaga webpage ti bukai. Bisi mega pop –up tu ngundan spyware dipindah ka ngagai computer kitai lalu ngumpul penerang dalam computer kitai. Udah nya spyware tu ngirum ka penerang pasal computer kitai ngagai computer orang ti bempu spyware tu tadi. Bisi mega pop – up tu ngundan virus computer ti tau ngerusak computer kitai.

Nya alai enti ulih anang peduli ka pop – up tu. Anang ulih diumpan enggau maioh macam semaia ti bula. Antara semaia ti bula nya ia madah ka kitai bisi bulih perais. Pekara ti bansa tu tusah bendar dipecaya ka kitai. Pia mega manah agi enti kitai ngalih ngagai website bukai. Website ti meruan jarang ngada ka pop –up ba webpage sida laban sida ia nemu cara ti bansa tu enda tentu dikerindu ka maioh orang.

Bisi mega website ti enda tentu manah dipeda kitai kelebih agi bala anak kitai. Website ti bansa tu sigi maioh bendar diatu lalu majak nambah genap hari. Enda iboh aku ngenang enggau nyentok reti website ti ko aku nya tadi. Website ti bansa tu sigi nadai pulai ka pemanah ka kitai. Ia ukai semina tau ngerusak runding kitai engau kitai sebilik aja. Ia mega masau jam kitai lalu ngelepas ka peluang kitai dalam pengawa dagang internet.

Siti ari cara kitai nyeliah ka website ti bansa tu ianya ngena cara engkah komputer kitai ba tempat ti tebuka baka bilik besai rumah kitai. Ngena cara tu kitai ulih meda webpage ti dilayar anak kitai. Pia mega kitai empu enda tekuing ati deka muka webpage ti enda manah laban skrin computer kitai ulih dipeda kitai sebilik ti bukai. Nya alai kurang agi penguji kitai ti deka muka website tauka webpage ti bansa tu. Webpage serta website ti enda manah tu mega tau ngasoh kitai gian deka meda website nya belama. Ari nya tadi rugi bendar kitai laban enda ulih ngena peluang bisi perengka serta pemansang ICT pulai ka penguntung kitai kelebih agi dalam pengawa dagang internet.

Penutup

Peninga ti dipebasa,

Penemu pengelikun internet sigi patut dikembuan kitai. Tu siti ari penemu ti asas serta patut diibun lalu dikerembai ka ngagai bala kaban kitai. Kesatu, kitai enggai ka enda nemu diri diumpan orang ngujung ka kitai ulih kena penusah. Kedua, kitai enggai kelalu takut ngena internet laban ti enda nemu bakani penusah tau nuntung kitai.

Pengelikun ngelayar internet patut ditemu kitai. Kitai patut ulih berati ka ni website ti ngundan penerang ti beguna ba kitai. Kitai mega patut ulih milih penerang ti deka diambi sereta dikena kitai nambah ka penerang pasal pekara ti deka dikenang kitai.

Pia mega penguji ti datai ari website ti enda manah mega maioh. Kitai patut engkah computer kitai ba tempat ti mudah dipeda baka ba bilik besai, lalu skrin computer nya enda lindung ari dipeda kitai ngambi ka kitai tauka bala kitai sebilik ti bukai enda tekuing ati deka muka website ti enda manah tu.

Aum sereta pekat diri sebilik mega beguna bendar dikena nagang penusah ari pengingin ngena internet meda serta melayar website tauka webpage ti enda manah. Anang enda madah serta nerang ngagai bala anak kitai tuju kitai ngada ka internet ba rumah kitai. Anang enggai ngerara enti sida ia bisi muka website ti enda manah tit au ngerugi sida ia. Bisi meh software ti tau nagang website ti enda manah tu dipeda, tang makin sehari, webswite ti bansa tu makin landik nyeliah ka sistem pengelikun ti bisi. Nadai lebih ari runding kitai ti betul ti ulih nagang pekara bansa tu nyadi. Software ti bisi diada ka semina ulih mantu aja tang runding ti betul nya meh nentu ka penguntung kitai dalam nguna internet enggau manah.

Ba Tusun program ti deka datai aku deka mai peninga ngenang pasal pengelikun ngena email. Tu mega penting bendar ditemu kitai ngambi ka kitai ulih berati ka pekara tu lalu enda ngereja pengawa ti tau ngerugi kitai leboh ti ngena email enda ngira public email tauka private email.

Kena nutup randau ICT kitai ba Tusun 62 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku. Terima kasih.

Tusun 62 - Pengelikun internet

Selamat tengahari serta tabi basa ngagai peninga.

Selamat kita begulai baru dalam perogram Randau ICT.

Dalam program kitai ari Tusun 57 nyentok ka Tusun 61 nyin kemari kitai sama berandau ka bakani kitai ulih ngaga blog kitai ba blogspot.com. Kitai mega berandau ka bakani kitai ulih ngena blog kitai dikena ngereja pengawa dagang enggau bakani kitai ulih ngada ka penatai pemisi ari blog kitai.

Taja aku ngenang enggau silik bakani kitai ulih ngaga blog kitai ba Blogspot.com, ukai reti ia kitai semina ulih ngada ka blog kitai ditu aja. Maioh mega website ti bukai bisi ngada ka peluang kitai ngada ka blog kitai enggau cara ti enda bebayar. Aku ngambi contoh Blogspot.com laban enti dibanding ka enggau website bukai, cara ngadu ka blog ditu jauh mudah agi. Aku empu belabuh enggau dalam pengawa dagang internet ngena cara ngada ka blog. Tu siti ari cara ti mudah alai kitai neleba ka diri dalam pengawa dagang internet. Tambah mega Blogspot.com tu diempu Google.com, nya alai mudah agi blog kitai ditemu orang laban Google.com tu siti ari search engine ti pemadu besai sereta tebilang. Nya alai manah agi peluang blog kitai ditemu serta dibaca orang maioh.

Lengka ka kitai dulu kenang pasal blog. Kitai deka ngenang maioh agi pekara pasal blog ba program kitai ti deka datai.

Saritu aku deka ngenang siti agi pekara dalam dunya internet ianya nyaga pengelikun kitai enggau kitai sebilik leboh kitai ngena internet. Suah bendar kitai maca ba surtatkhabar tauka ninga nengah radio tauka meda ba TV, kenang pasal pengelikun kitai ti ngena internet semampai dipadah ka belama. Enti kitai enda nemu reti pengelikun internet, tusah mega kitai deka mereti ka nama penusah ti tau dibai internet enti kitai enda ngena internet ngena cara ti likun. Tambah mega enti kitai enda mereti ka pekara ti besangkut paut enggau pengelikun internet, tu tau ngujung ka kitai takut ngena internet. Ari ti takut ngena internet kitai lalu ngelepas ka peluang kitai ti ulih ngemanah ka pendiau pengidup kitai laban kitai enda berani ngereja pengawa dagang internet.

Ari nya pengerugi pulai ka kitai empu laban ti enda ngambi peluang ari internet ti udah bisi di moa kitai. Berindik ari tu aku ngasai ka patut bendar kitai berandau ka nama reti pengelikun internet lalu bakani kitai ulih nyeliah ka diri enggau kitai sebilik ari kena penusah ketegal ti enda cukup bejaga leboh ti ngena internet.

Makin sehari makin maioh guna internet. Makin sehari makin maioh pekara ulih dikereja kitai nengah internet. Pemaioh orang ngena internet mega makin nambah genap hari.

Diatu bisi 1.6 Billions orang ngena internet serata dunya. Reti ia 20% orang di dunya tu tauka 1/5 ari populasi dunya tu bisi ngena internet. Pemesai guna internet dalam pengidup kitai besari –sehari sigi enda ulih disalam ka agi.

Pengeran ati perintah menoa enggau perintah negeri Sarawak ngemansang ka infrastructure internet mega sigi kering. Genap hari kitai ninga bisi aja pemansang dalam pekara ICT kelebih agi ia ti besangkut paut enggau internet. Tu nanda ka pemesai guna internet sigi nadai endor mantah.

Taja pia, ketegal ti besai guna sereta mega pemaioh orang ngena internet, tentu meh bisi orang ngembuan tuju ti enda manah leboh ti ngena internet. Tuju ti enda tentu manah tu, enti enda ngenusah orang bukai nadai ngawa. Tang enti tuju orang nya tadi enda manah, tentu meh bisi orang bukai kena penusah. Bakatu mega penusah ti dibai orang ti ngembuan tuju ti enda manah dalam internet.

Maioh macam cara penusah ulih datai nuntung kitai enti kitai kurang penemu serta kurang pemereti dalam pengelikun internet. Bisi nya semina ngenusah kitai mimit aja baka penusah ti tau ngasoh komputer kitai jem. Pia mega bisi penusah ti enda tentu besai baka penusah ti tau ngujung ka akaun email kitai dikinsel tauka ditutup. Penusah ti besai agi tau ngasoh kitai rugi duit tauka reta tengkira. Diatu, bisi udah nyadi di menua Amerika, Jipun enggau Philipines, penusah ketegal internet tau mega naban ka nyawa.

Pengelikun internet patut bendar diperati serta ditemu kitai ari pun kitai nyambung komputer kitai ngagai internet nyentok kia kitai madam ka komputer kitai. Leboh komputer kitai aktif ba internet, bisi aja cara orang bukai ti sama ngena internet tau ngacau pengelikun kitai.

Orang ulih ngacau pengelikun kitai leboh kitai melayar webpage. Orang ulih ngacau pengelikun kitai leboh kitai ngena email. Orang ulih ngacau pengelikun kitai leboh kitai negena social networking. Orang ulih ngacau pengelikun kitai leboh kitai ngena Skypee. Orang mega ulih ngacau pengelikun kitai leboh kitai ngena merchant account. Orang mega ulih ngacau pengelikun kitai leboh kitai download file ari internet, kelebih agi file ti enda bebayar.

Taja pan maioh macam cara orang bukai ulih ngacau pengelikun kitai nengah internet, nadai siko sida tu ulih ngacau kitai enti nadai pemendar ari kitai empu. Sistem dalam internet sigi bakatu. Enti nadai pemendar ari kitai, tuju orang ti deka ngacau kitai tu tadi sigi enda nyadi.

Taja pia bakani kitai meri pemendar ngagai orang nya tadi? Maioh kitai enda nemu diri meri pemendar ngagai orang bukai ngacau kitai. Maioh cara dikena orang tu ngumpan kitai nyentok ka kitai empu enda nemu diri. Kitai enda berasai diumpan ngujung ka kitai meri pemendar ngagai orang nya tadi ngambi ulih ari kitai.

Pekara tu meh deka dikenang aku dalam program kitai ti deka datai. Saritu, cukup meh ktai nemu, dalam internet bisi aja orang ngembuan penemu ti enda manah. Taja pia orang tu enda ulih sebarang ia ulih ngenusah kitai enti nadai pemendar ari kitai. Tang kitai enda nemu diri meri pemendar nya tadi. Kitai selalu diumpan ngena ngena maioh macam cara. Cara orang ti ngumpan tu meh patut ditemu kitai. Pekara tu mega deka dikenang aku dalam Tusun program kitai ti deka datai.

Penutup

Peninga ti dipebasa,

Penemu pengelikun internet sigi patut dikembuan kitai. Tu siti ari penemu ti asas serta patut diibun lalu dikerembai ka ngagai bala kaban kitai. Kesatu, kitai enggai ka enda nemu diri diumpan orang ngujung ka kitai ulih kena penusah. Kedua, kitai enggai kelalu takut ngena internet laban ti enda nemu bakani penusah tau nuntung kitai.

Suba aku kala ngenang, penemu internet tu baka penemu kitai driba kereta. Taja pan bisi penusah Accident ngena kereta, kitai enda ulih nyeliah ka diri ari ngena kereta genap hari. Reti ia guna kereta dalam pengidup kitai semampai ngeluie ari penakut kitai ka bisi peluang accident. Runding kitai ngena internet patut mega sama bakatu. Pemesai guna internet patut ngeluie ari penakut kitai ti irau ka pengelikun internet.

Kitai berani driba kereta laban kitai nemu bakani penusah accident tau nyadi. Ari nya kitai naka ulih nyeliah ka peluang penusah accident. Kitai mega patut semampai berani ngena internet laban kitai patut nemu bakani penusah internet tau nyadi. Ari nya kitai nemu ngada ka pengelikun internet. Pekara tu deka dikenang aku enggau silik dalam program kitai ti deka datai. Kitai ngenang pengelikun melayar webpage. Udah nya kitai ngenang pengelikun ngena email, disambung ngagai pengelikun ngena social networking enggau pengelikun ti bukai.

Kena nutup randau ICT kitai ba Tusun 62 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku. Terima kasih