Tusun 59 - Public Blog – Bagi 4

Selamat tengahari serta tabi basa ngagai peninga.

Selamat kita begulai enggau aku Kassim Jeritan dalam program Randau ICT. Saritu program kitai ba Tusun 59.

Saritu kitai nyambung kenang kitai ba Tusun 58 nyin kemari ianya Public Blog. Ba program kitai Tusun 58 nyin kemari kitai sama ngenang bakani kitai ulih ngada ka posting tauka nulis article dalam blog kitai. Aku arap ka peninga udah bisi nulis article dalam blog kita. Maioh agi posting kitai manah agi laban search engine meda blog kitai bisi kualiti ari ti ngundan maioh penerang. Pia mega orang bukai tentu meh rindu maca blog kitai enti maioh penerang ulih digiga dia.

Enti ulih kitai ngatur diri ngambi ka kitai ulih ngada ka enda kurang ari 2 iti posting dalam seminggu. Kebuah pia laban crawler tauka spider search engine mansa nginau dalam internet antara 2 enggau 3 hari sekali. Enti ia mansa blog kitai lalu tetemu ka penerang ti baru belama, blog kitai bisi peluang diberi ranking ti tinggi dalam search engine result page.

Saritu kitai nambah ka penemu kitai dalam public blog alai kitai ngenang siti agi pekara saritu ianya bakani kitai ulih ngadu ka setting blog kitai. Pekara tu penting bendar ngambi ka blog kitai kemas serta manah dipeda.

Ba control panel blog kitai kitai klik ba link “settings“. Udah nya kitai lalu dibai ngagai webpage ti bisi ngayan ka pekara ti deka diubah kitai.

Ba link “Basic Setting” kitai ulih nukar nama blog kitai. Nama blog ti ayan dia ianya nama blog ti ditaip kitai leboh kitai baru ngerejister blog suba. Diatu kitai tau nukar nama blog nya enti ka. Pia mega kitai ulih nerang ka tuju blog kitai ba “Description”. Pekara tu mega beguna bendar diatur kitai enggau manah laban search engine ngena genteran jako ditu dikena ngayan ka penerang pasal blog kitai.

Ba link “Publishing” kitai ngena setting tu enti kitai deka engkah blog kitai kelimpah ari blogspot. Tang diatu kitai nadai ngubah setting ditu laban kitai agi deka engkah blog kitai ba Blogger.com.

Enti kitai klik ba link “formatting” kitai dibai ngagai webpage alai kitai ulih nentu ka berapa posting patut ayan ba lambar depan blog kitai. Enti kitai meda blog kjict.blogspot.com, dia aku ngayan ka 2 iti posting ti pemadu baru laban dalam setting tu aku netap ka 2 iti posting ba lambar depan. Ba webpage tu siti ari pekara patut diperati ka kitai ianya “time zone”. Enti kitai di Menua Malaysia tu time zone kitai ianya GMT+8. Enti kitai ngena time zone bukai, lalu enda sama enggau jam dalam komputer kitai, kadang kadang kitai bisi penanggul dalam blog kitai laban pekara ti bansa tu dikumbai spamming dalam pekara pengelikun dalam internet. Nya alai tentu ka jam ba computer kitai sama enggau jam dini alai kitai diau, lalu time zone dalam blog kitai sama enggau time zone ba menua alai kitai diau mega. Pekara tu ukai semina nyadi dalam control panel blog aja. Ia mega nyadi enti kitai ngena email kitai serta mega pekara bukai ti beguna ka login username enggau password.

Enti kitai klik ba link “comments” kitai dibai ngagai webpage alai kitai ulih ngadu ka setting pasal orang bukai ti maca blog kitai. Ditu kitai ulih netap ka sapa orang ti tau meri komen dalam blog kitai. Anang ngemendar ka semua orang ulih komen sebarang dalam blog kitai. Manah agi kitai minta orang ti deka meri komen dalam blog kitai ngerejister diri dulu dalam blog kitai. Ngena cara nya kitai ulih nagang komen ti sebarang tulis ayan dalam blog kitai. Pia mega kitai ulih ngada ka pengelikun ruang komen ngena cara napis dulu komen ti datai sebedau ngayan ka komen nya dalam blog kitai. Kitai enggai sebarang orang nulis sebarang komen ti enda besangkut paut enggau pekara ti dikenang dalam blog kitai. Tambah mega komen ti sebarang tulis tauka spamming tau ngasoh ranking kitai ba search engine result nyadi baruh. Pekara tu enda manah pulai ka blog kitai.

Enti kitai klik ba link “Archiving“ kitai dibai ngagai webpage alai kitai ullih netap ka bakani posting kitai disimpan dalam blog kitai. Ngena cara tu blog kitai kemas serta beresi dipeda laban posting di disimpan enggau manah.

Enti kitai klik ba “site feed“ kitai dibai ngagai webpage alai kitai netap ka bakani posting kitai ulih diambi orang bukai lalu diayan ka ba website tauka blog sida ia. Ditu penting bendar kitai netap ka enda semua posting tauka article ti ditulis kitai nya tadi ayan ba blog tauka website orang bukai. Dia kitai milih “short“ ba “allow blog feed“ ngambi ka enda semua article kitai nya tadi ulih diambi orang bukai ngena cara blog feed. Ari nya enti orang ka maca article kitai enggau silik agi, ia ulih dibai ngagai blog kitai.

Siti agi setting ti penting bendar dalam blog ianya ba link “Permission”. Ditu kitai ulih netap ka sapa orang ti tau nulis posting tauka article dalam blog kitai. Enti kitai deka nambah orang bukai nyadi penulis dalam blog kitai, kitai tau klik ba button “Add Authors”. Orang ti direjister kitai nya tadi ulih nulis article tauka posting dalam blog kitai, sama baka kitai empu. Kitai ulih ngerejister sampai 100 iko orang bukai nyadi penulis dalam blog kitai.

Penutup

Peninga ti dipebasa,

Saritu kitai berandau ka bakani kitai ulih netap ka setting dalam blog kitai. Tu dikena nentu ka blog kitai kemas serta manah dipeda. Blog ti kemas tentu meh ngerindu ka ati orang ti maca article tauka posting dalam blog kitai.

Pia mega dalam setting tu kitai deka nyaga pengelikun dalam blog kitai. Kitai enggai blog kitai nyadi ka palan alai orang nulis sebarang komen ti tau ngenatai ka pengerusak ukai aja ngagai blog kitai tang mega tau ngenusah kitai empu. Blog kitai ngayan ka penemu serta runding kitai. Kitai enda patut orang bukai ngayan ka sebarang penemu serta runding ti enda menuku dalam blog kitai.

Udah tu ila kitai berandau ka bakani kitai ulih ngemanah ka blog kitai agi ngambi ka ia manding dipeda serta nyamai dibaca. Penerang enggau tusun penerang dalam nya mudah dibaca orang bukai. Enti blog kitai manah pendiau, orang pan rindu maca ia. Enti maioh orang maca blog kitai, kitai ulih ngena peluang tu dalam pengawa dagang.

Kenang pasal blog Bagi 3 dilengka ka aku naka tu dulu. Kitai nyambung kenang pasal blog enggau silik agi ba Tusun program ti deka datai. Agi panjai kenang kitai pasal blog tu peninga laban aku maioh nerima tanya pasal ngaga blog, nya alai aku ngasai ka patut bendar pekara tu dikenang enggau silik agi.

Peninga ti dipebasa,

Kena nutup randau ICT kitai ba Tusun 59 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku. Terima kasih.

Tusun 58 - Public Blog – Bagi 3

Selamat tengahari serta tabi basa ngagai peninga.

Selamat kita begulai enggau aku Kassim Jeritan dalam program Randau ICT. Saritu program kitai ba Tusun 58.

Saritu kitai nyambung kenang kitai ba Tusun 57 nyin kemari ianya Public Blog. Ba program kitai Tusun 57 kemari aku mai peninga ngerejister blog ba Blogger.com. Enti peninga bisi sama nunda padah aku dia, peninga patut udah bisi blog diatu. Blog nya ulih ayan dipeda orang bukai nengah internet.

Saritu kitai nyambung randau bakani kitai ulih ngemanah ka blog kitai ngambi ka ia dikerindu ka orang. Munyi ka udah dipadah aku suba, blog ti manah tau nyadi ka peluang kitai ngada ka penatai pemisi kitai.

Terubah ia kitai deka muka control panel blog kitai. Enti kitai muka blog kitai, ba sudut atas kanan kitai meda link “sign in”. Kitai klik ba link nya kitai dibai ngagai webpage ti dikenang aku ba Tusun 57 nyin kemari, ianya webpage ti sama alai kitai ngerejister blog kitai suba. Ba Box “username” kitai ngisi nama email kitai. Ditu kitai tau enda iboh ngena @gmail.com di belakang dia. Udah nya kitai ngisi “password” tauka jako lalai ba petak corak putih ngimbai username nya tadi.

Enti dua iti penerang tu sama enggau penerang ti diberi kitai leboh kitai ngerejister blog kitai suba, kitai dibai ngagai control panel blog kitai. Enti penerang nya enda sama, kitai enda ulih muka control panel kitai. Taja pia kitai diberi peluang baru meri penerang ti betul nyentok ka penerang nya tadi sama nitih ka penerang ti udah direjister kitai.
Ba webpage control panel kitai, dia kitai ulih milih blog ti deka diubah kitai. Enti peninga berati ka control panel nya, kitai ulih ngada ka lebih ari siti blog. Ba list aku bisi 9 iti blog direjister aku ngena blogger.com.

Enti kitai deka nulis article tauka posting, kitai klik ba link “new post”. Enti kitai deka ngubah article tui udah ditulis kitai ba blog, kitai klik ba link “ Edit Post”. Enti kitai deka nukar nama enggau maioh macam pekara dalam blog kitai blog kitai, kitai klik ba link “ Settings”. Enti kitai deka nukar corak tauka pattern blog kitai, kitai klik ba link “layout” . Enti kitai deka ngatur iklan adsense ba blog kitai, kitai klik ba link “ monetize”.

Saritu kitai berati ka bakani kitai ulih nulis article tauka posting dalam blog kitai. Kita klik ba link “Posting”. Kitai lalu dibai ngagai webpage alai kitai ulih nulis article kitai.
Ba box “Title” tu ianya nama article ti deka ditulis kitai. Title tu mega ayan ba result page search engine enti orang bisi ngiga penerang pasal pekara ti ditulis kitai. Nya alai penting bendar kitai ngena genteran jako ti betul nyadi nama article kitai. Enti kitai ngena genteran jako ti enda besangkut paut enggau pekara ti deka ditulis kitai, searh engine enda ngayan ka article kitai ba ranking ti tinggi.

Ba baris ti kedua, baruh title box kitai bis meda box “link”. Tu diguna kitai enti pekara ti ditulis kitai bisi besangkut paut enggau pekara ti ditulis orang bukai dalam internet. Kitai enda tau ngupi terus article ti udah ditulis orang bukai laban pengawa tu salah dalam etika internet. Tambah mega enti kitai ngupi article orang bukai, search engine ulih nemu pekara tu enggau mudah. Ari nya kitai diukum ngena cara nurun ka ranking blog kitai jauh kebaruh. Ari nya nadai orang tetemu ka blog kitai. Nya alai kena nyeliah ka kitai ngupi webpage orang bukai, blogger.com bisi ngada ka link ngagai webpage orang nya tadi.

Udah kitai meri nama article kitai, diatu kitai tau belaboh nulis article kitai. Cara ia mudah, baka kitai ti naip ngena Microsoft Words. Kitai ulih ngubah pemesai huruf ti deka dikena kitai. Udah nya kitai mega ulih ngubah corak huruf dikena kitai ngena corak bukai, ukai semina corak celum aja.

Kitai mega ulih link genteran jako ti ditulis kitai ngagai webpage bukai ngena button “link”.

Kitai mega ulih mandang ka gambar digital dalam blog kitai ngena cara klik ba “ Add Image“ Button. Taja pia tentu ka saiz file gambar kitai nya tadi enda lebih ari 8MB sebedau kitai mandang ka gambar kitai ba blog kitai nya. Besai agi file gambar nya, lubah agi ia dibuka. Kadang- kadang gambar ti ngena file ti kelalu besai enda ulih ayan terus leboh orang muka blog kitai. Saiz gambar ti umbas ia dikena ianya antara 1MB ngagai 1.5 MB.

Kitai mega ulih ngada ka video ba blog kitai. Enti kitai bisi video ti deka dipandang ka kitai ba blog kitai, kitai tau klik ba link “Add Video” . Baka file gambar mega, file video mega bisi disekat. Semina video dalam file ti enda lebih ari 100MB aja ulih dipandang ka dalam blog kitai. Taja pia kitai tau magi video kitai ngagai dua tiga iti file ti enda lebih ari 100 MB genap iti lalu ngayan ka video nya betangkan- tangkan.

Siti agi cara kitai ulih ngada ka video dalam blog kitai ianya ngena cara Video streaming ari Youtube.com. Cara tu manah agi dikena laban video ari Youtube.com jampat agi dibuka nengah internet enti disbanding ka enggau software video ti bukai. Enti kitai deka ngayan ka video ari Youtube.com ba blog kitai, kitai ngambi coding ari video nya tadi ba webpage youtube.com. Ba posting box kitai, klik ba link “edit html” . Ari nya kitai lalu ngupi coding ti diambi kitai ari youtube.com nitih ka dini alai kitai deka ngayan ka video nya dalam article kitai.

¬ Ba baruh posting box kitai nya kitai lalu naip genteran jako ti bisi dikena kitai. Genteran jako tu nyadi ka label. Leboh orang ngiga penerang ngena genteran jako ti bisi dalam label kitai, blog kitai bisi peluang ayan ba ranking ti tinggi dalam result page. Ngena cara tu blog kitai mudah agi ditemu orang dalam internet.

Udah kitai puas ati enggau article ti ditulis kitai, diatu kitai tau ngayan ka posting kitai ba blog kitai enggau cara klik ba button “ Publish Post“. Udah nya article kitai nya tadi ayan ba internet lalu ulih dibaca orang bukai nengah internet.

Penutup

Peninga ti dipebasa,

Saritu kitai berandau ka bakani kitai ulih nulis article dalam blog kitai. Baka ka udah dikenang aku dulu suba, blog tau dikena kitai pulai ka penguntung kitai. Kitai ulih ngada ka peluang dagang nengah blog.

Ngena peluang tu aku enggai enda ngelalau, tulis article ti beguna pulai ka penemu ngagai orang bukai. Enti peninga landik serta rindu nulis, peninga tau ngena blog tu nulis pasal pekara ti tau nguntung ka orang bukai ti maca blog kitai.

Enti orang rindu ka penemu ti diayan ka kitai ba blog, mudah agi alai kitai ngelaku ka barang dagang nengah blog kitai. Pia mega enti kitai mai penemu sebubu dalam blog kitai, orang pan meda pendiau kitai sebubu baka article ti ditulis kitai. Nya alai penting bendar kitai berunding dulu sebedau ngada ka article dalam blog kitai.

Udah tu ila kitai berandau ka bakani kitai ulih ngemanah ka blog kitai agi ngambi ka ia manding dipeda serta nyamai dibaca. Penerang enggau tusun penerang dalam nya mudah dibaca orang bukai. Enti blog kitai manah pendiau, orang pan rindu maca ia. Enti maioh orang maca blog kitai, kitai ulih ngena peluang tu dalam pengawa dagang.

Kenang pasal blog Bagi 3 dilengka ka aku naka tu dulu. Kitai nyambung kenang pasal blog enggau silik agi ba Tusun program ti deka datai. Agi panjai kenang kitai pasal blog tu peninga laban aku maioh nerima tanya pasal ngaga blog, nya alai aku ngasai ka patut bendar pekara tu dikenang enggau silik agi.

Peninga ti dipebasa,

Kena nutup randau ICT kitai ba Tusun 58 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku. Terima kasih.

Tusun 57 - Public Blog – Bagi 2

Selamat tengahari serta tabi basa ngagai peninga.

Selamat kita begulai enggau aku Kassim Jeritan dalam program Randau ICT. Saritu program kitai ba Tusun 57.

Saritu kitai nyambung kenang kitai ba Tusun 56 nyin kemari ianya Public Blog. Kitai berandau ka bakani kitai ngerejister blog kitai ba Blogger.com.

Baka ka udah dikenang aku ba program kitai ba Tusun 56 nyin kemari, Ngada ka blog ba blogger.com jauh mudah enti dibanding ka enggau website bukai ti bisi nyendia ka servis alai kitai ngada serta mandang ka blog kitai.

Sebedau kitai ulih ngerejister blog kitai ba Blogger.com, kitai mesti ka bisi email akaun kitai ba Google ngena @gmail.com. Enti kitai bedau bisi email akaun ba gmail, kitai patut ngerejister email akaun kitai dulu. Anang irau peninga, semua tu nadai bebayar.

Pia mega tentu ka kitai bisi internet laban pengawa ngerejister blog tu dikumbai orang real time tauka enti genteran jako ti selalu dikena kitai, siaran langsung.

Kitai belaboh diatu, peninga. Enti kita bisi komputer lalu ngena internet kita tau sama enggau aku diatu. Terubah ia kitai muka website blogger.com ba url www.blogger.com ba address box. Ari nya kitai dibai ngagai webpage blogger.com. Dia kitai meda button sign in enggau create new blog. Enti kitai udah bisi blog lalu deka muka control panel blog kitai, kitai lalu ngisi penerang pasal nama email kitai lalu naip password dia. Kitai lalu dibai ngagai control panel blog kitai.

Tang saritu kitai baru deka ngerejister blog kitai, nya alai kitai klik ba Button Create New Account. Pia mega enti kitai deka berati ka dulu bakani kitai deka ngaga blog kitai tau klik ba quick tour. Enti ka meda cara ti mudah agi kitai tau mega klik ba Video Tutorial. Semua tu ngundan penerang bakani kitai ulih ngerejister blog kitai dia.

Enti kitai klik ba button create new account kitai dibai nggai webpage alai kitai ulih ngisi penerang pasal blog ti deka digaga kitai. Peninga patut berati ka address box ngena “https:// ukai semina “http:// aja. Enti enda pia kitai ukai dibai ngagai webpage blogger.com. Pengelikun tu beguna bendar laban penerang ditu dikena kitai muka control panel blog kitai. Enti enda ngena “https:// penerang ti diisi kitai dia ulih dipeda orang bukai. Control panel blog kitai mega ulih dibuka orang bukai. Reti ia tadi orang bukai ulih nulis sebarang pekara dalam blog kitai.

Langkah 1 madah ka kitai muka akaun baru. Terubah ia kitai naip email address kitai. email address tu mesti udah bisi lalu ia ngena @gmail.com, baka ka udah dikenang aku dulu tadi. Ba baris ti kedua kitai naip email address nya baru.

Enti kedua – dua mail tu sama baru kitai ulih mansang ngagai baris ti ketiga ianya naip password kitai. Password tu ianya genteran jako lalai ti semina ditemu kitai aja. Ia deka dikena kitai genap kali kitai muka control panel kitai. Password tu patut enda kelalu mudah ditemu orang. PAsswod ti manah, ianya tusah ditemu orang bukai ianya password ti bisi ngundan huruf abc begulai enggau numbor. Ambi ka contoh abcdef1234.

Anang ngena nombor ti bisi besangkut paut enggau kitai baka no plat kereta tauka no telefon kitai tauka no I.C kitai. Password ti bansa tu mudah dijangka serta mudah ditemu orang. Pekara tu mega beguna ba password ti bukai baka password ti dikena muka email kitai. Taja pia kitai mesti ingat ka password nya tadi enggai ka kitai enda ulih muka control panel blog kitai empu.

Ba baris ti keempat kitai dipinta naip baru password nya tadi. Enti ia sebaka enggau password ti udah ditaip kitai ba baris ti ketiga tadi nya baru kitai ulih mansang ngagai baris ti kelima, ianya Display name. Ditu kitai naip nama ti dikena kitai. Nama tu ayan genap kali kitai ngada ka posting ba blog kitai. Ia nyadi ka signature kitai ba genap iti posting ba blog kitai. Kitai tau ngena nama kitai empu tauka nama lalai tang anang ngayan ka password kitai ditu.

Ba baris keenam kitai dipinta naip huruf ti ayan dia dikena nentu ka kitai tu amai mensia, ukai software tauka robot. Tu siti ari cara blogger.com nyaga pengelikun ba website sida ia.

Udah semua penerang nya diisi kitai, kitai lalu klik ba button continue. Ari nya kitai dibai ngagai webpage ba langkah ti kedua. Ditu kitai milih nama bloh enggau url address kitai

Ba baris blog title, kitai dipinta naip nama blog ti deka dikena kitai. Contoh ia dalam blog ti dikena aku ba kjict.blogspot.com, blog title tu ianya Randau ICT WaiFM 101.3 – ICT For All. Nama blog tu tau ditukar kitai dudi ari. Nya alai anang kelalu iau ka nama blog ti patut dikena kitai.

Nama blog tu mega nama ti ayan ba search engine leboh orang ngiga penerang pasal pekara ti besangkut paut enggau blog kitai. Nya alai penting bendar kitai milih nama blog ti patut dikena kitai. Manah kitai milih nama blog ti suah dikena orang ngiga penerang dalam internet ngambi ka blog kitai mudah agi ayan ba search engine. Ari nya mudah agi ia ditemu orang bukai.

Ba baris ti kedua kitai dipinta milih url blog kitai. Ia sama baka nama domain ba website mega. Ia mesti unik lalu enti udah dikena orang bukai kitai enda ulih ngena nama nya tadi. url tu ayan baka kjict.blogspot.com.

Udah nya kitai klik ba button Continue, ari nya kitai dibai ngagai webpage ba langkah ti ketiga ianya milih template. Template tu ianya corak webpage ti deka dikena kitai. Maioh template bisi dia lalu kitai ulih milih ni corak di dikerindu ka kitai. Taja pia peninga anang kelalu irau enti nadai corak ti ngemuas ka ati kitai. Kitai ulih nukar corak tu dudi ari. Maioh mega corak ti bukai bisi dia udah blog kitai ulih dikena.

Udah kitai milih template nya tadi blog kitai udah sedia dikena. Kitai diatu tau belaboh ngada ka posting ba blog kitai nya tadi.

Penutup

Peninga ti dipebasa,

Saritu kitai berandau ka bakani kitai ulih ngerejister blog kitai. Baka ka udah dikenang aku dulu tadi, pengawa tu mudah dikereja. Ia beguna ka 3 pekara aja ianya ngisi penerang pasal kitai ti bempu blog, milih nama blog enggau url, lalu penujung ia kitai milih corak blog ti bisi disedia ka blogger.com.

Udah tu ila kitai berandau ka bakani kitai ulih ngemanah ka blog kitai agi ngambi ka ia manding dipeda serta nyamai dibaca. Penerang enggau tusun penerang dalam nya mudah dibaca orang bukai. Enti blog kitai manah pendiau, orang pan rindu maca ia. Enti maioh orang maca blog kitai, kitai ulih ngena peluang tu dalam pengawa dagang.

Kenang pasal blog Bagi 2 dilengka ka aku naka tu dulu. Kitai nyambung kenang pasal blog enggau silik agi ba Tusun program ti deka datai. Agi panjai kenang kitai pasal blog tu peninga laban aku maioh nerima tanya pasal ngaga blog, nya alai aku ngasai ka patut bendar pekara tu dikenang enggau silik agi.

Peninga ti dipebasa,

Kena nutup randau ICT kitai ba Tusun 57 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku. Terima kasih.

Tusun 56 - Public Blog – Bagi 1

Selamat tengahari serta tabi basa ngagai peninga.

Selamat kita begulai enggau aku Kassim Jeritan dalam program Randau ICT. Saritu program kitai ba Tusun 56.

Saritu aku deka ngenang siti agi pekara ICT enggau dalam agi ianya Public Blog.

Penerang pasal Blog kala dikenang aku dalam Program kitai ba Tusun 30 suba. Enti peninga agi ingat, asal blog tu ianya ari leka jako weblog, tauka diary dalam komputer.

Maioh macam blog bisi dalam website. Ia ti selalu dipeda kitai ianya blog ti ngena webpage baka blog ti dikena aku ba kjict.blogspot.com. Kelimpah ari nya bisi mega photoblog alai nyimpan serta mandang ka gambar, vlog, alai nyimpan serta mandang ka video, MP3blog, alai nyimpan serta mandang ka lagu, serta mega microblog alai nyimpan serta mandang ka tuils ti pandak.

Blog mega dikena dalam pengawa dagang. Blog bansa tu dikumbai corporate blog. Ia dikena ngada ka penerang pasal kompeni tauka penerang pasal barang ti dijual.

Blog mega dikena enggau maioh macam tuju. Political Blog dikena dalam pengawa politik. Travel blog dikena ngelaku ka pengawa dagang temuai. Fashion blog dikena ngelaku serta ngayan ka fesyen ti baru. Education blog dikena nerang ka pengawa pelajar. Pia mega orang bisi ngada ka Family Blog dikena nyidi tusut diri sebilik tauka pendiau penatai diri.

Sebedau blog tebilang nama, komuniti digital berandau enggau pangan diri nengah maioh macam media baka Usenet, servis bebayar nengah internet baka Genie, BiX, Compuserve, e-mail, Bulletin Board System (BBS), enggau internet Forum ti disedia ka WebEx.

Udah nya dalam taun 1990 bisi siti pengerindu ti baru dalam dunya internet ianya pengerindu nulis pekara dalam runding diri, tauka dalam jako english, Personal Journalist. Reti ia orang nyau rindu nulis penemu tauka buah runding sida ia baka orang ti bekerja nulis ba suratkhabar tauka majalah.

Orang ti terubah ia ngepun ka pengawa personal journalist tu ianya Justin Hall, siko pelajar ari Swarthmore College, orang ti terubah ia ngepun ka pengawa nulis blog. Maya nya suba blog tu enda tentu bisi beda ari website. Ia nadai Control Panel baka blog ti kemaya hari tu.

Pengerembai pengawa ngemansang ka perengka ti dikena ngada ka blog kelebih agi pengawa bala computer programmer ti ngaga script ti mit baka java script enggau php, blog nyau makin mudah dikena sereta diada ka orang bukai ti kurang penemu teknikal enggau programming.

Nama weblog tu dipun ka John Barger dalam taun 1997. Taja pia nama nya diubah nyadi blog olih Peter Merholtz enggau enda sengaja leboh ia engkah sidebar we blog dalam website ia. Udah nya Pyra Labs nyendia ka website ti diberi nama Blogger.com dalam taun 1999 ti nyendia ka website alai orang ulih ngada ka diary sida dalam internet ngena cara bebayar. Belabuh ari nya Blogger.com makin sehari makin dikerindu ka orang laban ia mudah dikena.

Dalam taun 1999 mega pemaioh orang ngada ka blog mega nyau makin nambah. Pemansang serta pengerindu orang ngena blog makin betambah di serata dunya udah kompeni ICT ti pemadu besai, Google.com meli Blogger.com dalam taun 2003. Bepun ari nya mega kitai ulih ngada ka blog ngena Blogger.com enggau enda bebayar.

Diatu Blogger.com tu nyadi siti ari palan ngada ka blog ti tebilang bendar nama. Ia nyadi palan ti ngada ka blog ti pemadu maioh serta pemadu besai enti dibanding ka enggau website ti bukai. Report dalam taun 2007 madah ka bisi 60 millions orang ngena blogger.com alai ngada serta mandang ka blog sida.

Dalam taun 2004 Google.com meli siti agi website, ianya picasaweb alai nyimpan gambar dalam internet. Belaboh ari tu, kitai ulih nyimpan gambar kitai ba picasaweb lalu mandang ka gambar nya dalam blog kitai. Ngena cara tu kitai ulih mandang ka gambar kitai ba blog kitai baka kitai ti mandang ka photo album. Kitai enda iboh upload semua gambar nya dalam blog kitai. Tentu meh cara tu nyamai agi dikena serta jampat enti disbanding ka enggau cara kitai ti upload gambar kitai siti – siti ngagai blog kitai.

Ngena blog ti diadaka Blogger.com kitai mega ulih ngerejister diri dalam program Adsense. Tu siti ari program iklan google.com alai kitai tau bulih komisien. Enti kitai bisi ngerejister diri dalam program Adsense, kitai ulih ngada ka siti ruang dalam blog kitai alai google.com ngayan ka link website bukai ti bisi mayar google.com mandang ka link sida ia. Enti bisi orang klik ba link ari website kitai, kitai bulih komisyen ari google.com.

Blog ti ngena blogger.com mega mudah ditemu spider tauka crawler google laban ia endang siti ari perengka ti diada ka google.com empu. Nya alai mudah agi blog kitai ayan ba search engine kelebih agi ba google.com empu. Ari nya blog kitai mudah agi ditemu orang bukai leboh sida ia ngiga penerang ari search engine baka google.com. Pekara tu penting bendar laban enti nadai orang bukai tetemu ka blog kitai dalam internet, nadai meh orang maca penerang tauka buah runding ti ditulis kitai ba blog kitai. Tambah mega search engine google.com tu dikena lebih ari 80% orang ti ngiga penerang nengah internet.

Penutup

Peninga ti dipebasa,

Saritu kitai ngenang public blog ti bisi disedia ka dalam internet. Peninga tentu deka nemu nama beda antara blog enggau website?

Dikena nerang ka pekara tu aku ngambi contoh rumah. Website tu baka rumah ti digaga kitai empu. Kitai ngaga plan, kitai ngupah orang ngaga, kitai meli perengka dikena ngaga rumah nya baka batu, pasir, semin enggau ramu. Kitai nyambung ai enggau elektrik. Semua pekara besangkut paut enggau rumah nya diada ka kitai empu magang.

Blog tu baka rumah ti digaga developer, tauka rumah ti digaga orang bukai enggau tuju nyual rumah nya tadi udah rumah nya tembu. Kitai semina meli rumah nya lalu enda iboh ngereja semua pekara ti udah dikenang aku tadi. Udah rumah nya tembu kitai semina pindah diau dia.

Tang seduai ia tu sama, rumah ga. Tuju ia alai kitai diau beteduh ari panas enggau ujan.

Bakanya ga website enggau blog tu tadi. Tuju ia sama, alai kitai ngayan ka penerang nengah internet.

Kenang pasal blog Bagi 1 dilengka ka aku naka tu dulu. Kitai nyambung kenang pasal blog enggau silik agi ba Tusun program ti deka datai. Agi panjai kenang kitai pasal blog tu peninga laban aku maioh nerima tanya pasal ngaga blog, nya alai aku ngasai ka patut bendar pekara tu dikenang enggau silik agi.

Peninga ti dipebasa,

Kena nutup randau ICT kitai ba Tusun 56 tu aku enda leju ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku. Terima kasih.