Social Icons

twitterfacebookgoogle pluslinkedinrss feedemail

Pages

April 27, 2009

Tusun 38 - Ngelaku ka Website (Bagi 2)

Terubah ia aku meri tabi basa ngagai peninga.

Selamat kitai begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 38.

Saritu kitai nyambung kenang pasal bakani kitai ulih ngelaku ka website kitai ngambi ka ulih ditemu orang dalam internet. Dalam program kitai ba Tusun 37 kemari kitai sama udah ngenang 4 cara kitai ulih ngelaku ka website kitai ianya ngena search engine baka google enggau yahoo!.

Pia mega kitai tau betukar link enggau orang bukai ka bisi website, lalu kitai mega ngada ka link ngagai website orang nya ba website kitai.

Cara ti ketiga dikenang aku ianya kitai meri ebook percuma ti bisi ngundan link ngagai website kitai. Kitai meransang orang nya bepasing ka ebook percuma nya tadi.

Cara ti keempat dikenang aku maya nya ianya ngada ka iklan pasal website kitai ba suratkhabar, majalah enggau radio tauka tv.

Email

Cara ti kelima alai kitai ulih ngelaku ka website kitai ianya ngena email. Kitai tentu maioh nerima business card ari orang ngelama kitai ka begulai bekaban enggau orang bukai. Maioh business card diatu bisi ngundan no. telefon enggau email address. Anang semina nyimpan kad nya bakanya aja tang email ngagai orang nya penerang pasal website kitai. Bisi meh orang enda peduli ka email kitai tang ari maioh email ka dikirum a kitai tentu meh bisi sida nya tekuing ati deka muka email kitai lalu mega muka website kitai nengah link ti diberi kitai tadi.

Dalam email kitai nya kitai enda tau enda madah ka penerang diri. Pia mega anang enda ingat madah ka diri kala betemu enggau ia, nya alai nuan bisi ngibun business card orang nya tadi. Kebuah pia, enti orang nya enda nemu sapa kitai, ia enda iboh ka email kitai, lalu enda dibuka terus. Pia mega ia au ngeriput kitai ngereja pengawa spamming. Enti kitai dituduh spamming, email address kitai tau kena blacklist tauka dipadam ka terus ari servis email nya tadi.

Tu siti ari cara google tauka yahoo! Nerit ka undang- undang siber dalam internet.
Email kitai mega tentu meh bisi ngundan penerang pasal pekara ti dikenang kitai dalam website kitai. Nama guna penerang kitai nya dalam pengidup orang ti nerima email kitai. Kitai enda patut terus nguji ngelaku ka barang kitai dalm email kitai.

Ba ujung email kitai anang enda ngada signature ngena “sig file” ti nerang enggau ringkas batang pengawa dagang kitai. Signature tu mega dikena kitai engkah link ngagai website kitai tauka website kitai ti bukai. Sig file tu digaga kitai sekali aja dalam email kitai, udah nya ia ayan belama genap kali kitai nganjung email kitai.

Networking

Maioh pengawa networking ulih dikereja kitai dalam internet. Kitai tau ngiga orang bukai ti ngenang pekara ti sama dalam internet lalu betukar link enggau pangan diri.

Kitai mega tau enggau dalam forum pasal penerang ti dipedagang ka kitai lalu ninggal ka link kitai ba ujung forum nya tadi. Bisi forum site ulih endor kitai ninggal ka link website kitai enti kitai udah lama enggau sida ia berandau dia. Perati ka dulu atur forum, laban enda semua forum site ngemendar ka kitai ninggal ka link ba website sida. Anang ngarap ka siti forum aja. Kena naka ka ulih forum ti bisi laban maioh agi backlink ngagai website kitai manah agi pulai ka ranking kitai dalam search engine.

Kitai mega ngerejister diri dalam social networking baka twitter enggau Facebook sereta maioh mega networking website ti bukai. Ari personal page ti diberi ka kitai, kitai ulih ngada ka link ngagai website kitai. Ngena peluang baka tu website kitai bulih backlink ari social networking tu tadi. Anang enda ingat, website social networking tu maioh orang datai dia lalu ranking ia pan tinggi.

Meri penerang ba media

Diatu maioh media baka suratkhabar enggau majalah ngiga orang meri penerang ngagai sida dikena ngisi sereta nambah ka penerang ti bisi dalam majalah sida ia. Kirum ka penerang kitai dalam article ngambi ka ulih dikeluar ka orang dalam majalah tauka suratkhabar. Ba ujung article nya kitai selalu diberi peluang ngada ka penerang pasal kitai empu ngambi ka orang ti maca article kitai ulih nemu sapa kitai ti bendar. Ditu kitai ulih ninggal ka address website kitai. Enti orang rindu maca article kitai tentu meh ia deka maca maioh agi penerang ti ditulis kitai. Enti sida ia tetemu ka address website kitai, popularity website kitai tau niki. Ukai semina nya aja, bisi mega suratkhabar enggau majalah mayar orang ti nulis article dalam majalah sida. Dia kitai bulih penatai pemisi baru.

Meli iklan ba website orang bukai

Bisi website ngada ka ruang iklan ngena cara bebayar. Siti ari website tu ianya enda lain ari google.com ngena program Adwords sida ia.

Enti kitai ngena program Adwords, kitai dipinta milih genteran jako ti dikena nerang ka website kitai. Setiap iti genteran jako nya tadi bisi rega ia empu nitih ka pemaioh orang bukai ti bisi sama ngena ngenteran jako nya tadi. Enggau reti jako bukai, orang ti sama besemekih enggau kitai. Google Adwords madah ka berapa rega kitai patut mayar genap kali bisi orang click ngagai website kitai nengah link ti disedia ka google adwords nya tadi. Enti kitai meri rega ti pemadu tinggi ari orang bukai, kitai bulih ranking ti tinggi mega dalam result page enti bisi orang ngiga penerang ngena genteran jako ti dikena nerang ka website kitai.

Link kitai dalam Adwords mega deka diengkah dalam webite orang bukai ti ngerejister diri dalam program Adsense Google. Enti kitai meda ba sekeda website bisi ngayan ka “Ads by Google” tu meh program Adsense ti disebut aku tadi. Nya alai ngena cara nya website kitai mudah ditemu orang bukai.

Kitai meli ruang iklan ngena maioh macam cara nitih ka atur dalam website orang ti ngada ka ruang iklan nya tadi.

Bisi website ngada ka ruang iklan nitih ka tempoh sehari, seminggu, tauka sebulan. Reti nya enti kitai engkah iklan kitai ba website sida sebulan, udah kitai mayar ongkos ti dipinta, penerang pasal website kitai ayan ba website nya dalam sebulan nya. Abis tempoh sebulan nya penerang nya nadai ayan agi.

Bisi mega sida ngada ka ruang iklan dalam pay per view. Website kitai ayan nitih ka berapa kali penerang pasal kitai dipeda orang nengah website orang ti ngada ka iklan nya tadi.

Penutup

Website kitai enti udah tembu ukai reti ia kitai goyang kaki pia aja nganti orang ti datai meli barang ari website kitai. Maioh agi pekara patut dikereja kitai dikena ngelaku ka website kitai. Enti enda pia nadai orang ulih nemu pasal website kitai, ngujung ka kitai lalu mantul ati dalam pengawa dagang internet.

Munyi ka udah dipadah aku dulu suba, dagang internet tu ukai pengawa dagang alai kitai goyang kaki nganti duit datai. Ia sama mega baka pengawa dagang di luar din alai kitai mesti deka ngereja maioh pengawa ngelaku ka website kitai ngambi ka orang ulih tetemu ka website kitai.

Diatu makin sehari makin maioh cara kitai ulih ngelaku ka website kitai ngambi ka dagang internet kitai ulih maju agi. Pia mega enti website kitai maioh orang datai, kitai mega tau ngada ka ruang iklan ngagai orang bukai ti deka ngelaku ka website sida. Ngena cara nya kitai bulih pun penatai pemisi kelimpah ari hasil kitai nyual barang nengah internet.

Enti website kitai agi baru, nadai maioh orang nemu website kitai. Tang enti kitai ngereja maioh pengawa ti ulih ngelaku ka website kitai, dia website kitai semampai aktif lalu ulih ranking ti tinggi dalam search engine. Bulih ranking tinggi dalam search engine tu baka kitai ti bulih lot kedai ti maioh datai orang enda salah baka kitai nyewa kedai ba tHe Spring.

Kena nutup randau ICT kitai ba Tusun 38 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.
Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

Tusun 37 - Ngelaku ka Website (Bagi 1)

Terubah ia aku meri tabi basa ngagai peninga.

Selamat kitai begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 37.

Saritu kitai ngenang siti agi website ti ulih dikena kitai ngereja pengawa dagang internet ianya bakani kitai ulih ngelaku ka website kitai ngambi ka ulih dipeda orang.

Nadai meh guna website kitai, taja naka ia pemanah digaga kitai tang nadai ulih ditemu orang bukai. Naka meh pengerugi kitai, masau jam, masau ari ngaga website kitai tang nadai orang meda. Pia mega naka meh pengerugi belanja ti udah dikena kitai ngada ka maioh macam perengka dalam website kitai tang nadai orang ngabas, mansa website kitai.

Diatu bisi enda kurang ari 500 millions website bisi dalam internet. Pia mega enda kurang ari 3 billions webpage bisi dalam internet. Penyampau tu nambah genap hari. Setiap hari bisi aja website ti baru digaga. Pia mega setiap hari bisi aja posting ti baru, serta mega webpage ti baru dalam internet.

Taja pia ukai reti ia dagang internet tu enda ulih dikereja kitai agi. Indah pia, dagang internet tu agi dikumbai kitai baru laban agi maioh pekara bedau diuji orang dalam internet. Bisi aja cara dikena ngerembai ka dagang internet bisi digaga orang. Semua tu ngambi ka kitai ulih besemekih, enti enda nyulut agi ari orang bukai dalam pengawa dagang internet kitai.
Nya meh kebuah dagang internet tu dikumbai orang “K-economy“ ianya pengawa dagang ti besabung ka pengelandik enggau pengering runding kitai.

Nadai siti – siti menoa ulih ngumbai diri kering sereta nyulut agi dalam dagang internet. Nadai siko orang ulih nguasa dagang internet lalu nagang orang bukai maju dalam pengawa tu. Peluang dalam dagang internet tu sama rata diberi ka kitai ti bisi internet enggau komputer. Nya alai kitai patut ngena peluang tu bisi tu.

Udah website kitai tembu digaga kitai, semua perengka ti diguna udah diatur kitai magang, ukai reti ia website kitai lalu tembu, kitai lalu begoyang kaki nganti duit ti datai. Enti kitai bisi ngibun penemu ti bansa tu, enda ulih enda kitai deka mantul ati dalam pengawa dagang internet kitai.
Indah enda salah baka orang ti bumai, udah nugal ukai reti ia umai nya tadi lalu ditinggal ka lalu enda iboh diintu kitai agi. Tentu meh padi nya deka dibaja kitai, rumput deka dipantun, indu utai deka dipancit enggai ka ngacau padi ka udah ditanam kitai.

Baka nya mega website kitai. Ia enda nemu ngiga orang datai kediri. Bisi aja pengawa patut diatur kitai ngambi ka orang ulih tetemu ka website kitai. Udah ia tetemu ka website kitai, nya baru kitai bisi peluang penatai pemisi dalam dagang internet kitai.

Ba randau kitai sekali tu aku ngenang 4 iti cara kitai ulih ngelaku ka website kitai ngambi ka ulih ditemu orang ti ngiga barang ti dijual kitai.

Search Engine

Siti ari cara orang ulih nemu pasal website kitai ianya ari search engine. Search Engine tu ianya siti ari directory, enda salah baka buku panduan telefon kitai ka tebal curak kuning. Diatu nyau jarang meda buku nya, tang baka tu meh gaya directory tu tadi.

Contoh search engine ti tebilang bendar ianya Google. Enti kitai kala ngena internet, kitai tentu kala meda google.com. Diatu Google.com tu siti ari kompeni ti pemadu besai ukai semina dalam dunya internet tang mega siti ari kompeni ti pemadu besai dalam dunya.

Bulih ranking ti tinggi dalam list search engine sigi nyadi ka juluk ati orang ti ngereja pengawa dagang internet. Enti ranking website kitai tinggi, kitai ulih ayan ba result page ti terubah dalam search engine. Enti kitai ba result page ti terubah reti ia maioh orang ulih tetemu ka website kitai.

Search engine tu nemu penerang pasal website kitai laban ia ngena software ti dikumbai “crawler” tauka selalu mega disebut spider. Robot tu ngabas website ti bisi. Ia mansa sekali dalam 4 tauka 5 ari.

Leboh ti ngabas website tauka webpage, robot tu ngiga penerang ti baru enti dibanding ka enggau leboh maya ia datai dulu suba. Enti bisi pekara baru, ia lalu meri ranking website kitai tinggi agi enti dibanding ka enggau website bukai ti besemekih enggau kitai.

Pia mega Robot tu ngiga enti penerang dalam website kitai sebaka bendar enggau penerang dalam website bukai. Enti robot nya tadi tetemu ka pekara tu bisi nyadi, ia manding ka penerang ni dulu agi di-upload. Enti enggi kitai dudi di-upload kitai, reti nya penerang dalam website kitai nya ulih kitai ngupi ari website orang bukai.

Search engine ngukum pengawa ti ngupi bakatu lalu nurun ka ranking kitai jauh kebaruh. Reti ia address website kitai enda ulih ayan ba result page ti terubah.

Nya alai kitai anang sekali ngupi penerang ari website bukai. Ukai semina kitai diukum search engine, kitai mega tau kena dawa orang ketegal ngupi.

Search engine mega meri ranking kitai tinggi enti maioh website bukai bisi back link ngagai website kitai.

Betukar Link enggau orang bukai

Kitai mega ulih ngelaku ka website kitai ngena cara betukar link enggau orang bukai. Link tu ianya siti coding ti mudah ti mai orang ngagai website kitai enti orang click ba link nya tadi.
Kitai patut nyendia ka siti ruang dalam website kitai endor kitai engkah link orang ti betukar link enggau kitai. Ngena cara nya orang pan sanggup ngada ka siti ruang alai sidai ia engkah link ngagai website kitai dalam website sida ia.

Ngena cara tu, orang ti mansa website orang ti bisi bekerjasama enggau kitai dalam pengawa betukar link nya tadi bisi peluang tetemu ka website kitai.

Viral tauka cara berampit

Viral tu datai ari nama virus, ianya kitai ngerembai ka penerang pasal website kitai sama sebaka enggau virus ngerampit penyakit ari orang siko ngagai orang bukai.

Cara tu ianya kitai meri barang free baka ebook tauka special report. Orang ti ninggal ka nama enggau email address sida dalam autoresponder kitai diberi kitai ebook percuma. Dalam ebook nya kitai ninggal ka link ngagai website kitai. Reti ia enti orang nya deka nemu enggau silik agi pasal penerang ti dikenang kitai dalam ebook kitai, ia ulih click ba link ti disedia ka kitai nya tadi.
Kitai mega mesan orang ti nerima ebook nya ngirum ka ebook nya ngagai bala kaban ia tang isi kandung ebook nya enda tau diubah. Nya alai link ngagai website kitai nya tadi sama enggau ebook ti percuma nya dipasing ka kin kitu. Ari nya maioh orang bisi peluang tetemu ka website kitai.

Ngena media

Taja pan kitai dalam dagang internet ukai reti ia kitai melakang ka pekara ukai internet tauka offline promotion. Kitai tau engkah address website kitai dalam suratkabar. Pia mega kitai ulih ngena majalah ti sama ngenang pekara ti dikenang kitai dalam website kitai. Ambi ka contoh, enti website kitai ngenang pasal badminton, kitai tau iklan ka website kitai dalam majalah sukan.

Pia mega kitai enda patut melakang ka stesen radio. Stesen radio bisi ngada ka slot iklan alai kitai ulih ngelaku ka website kitai. Ngena cara tu orang ulih nemu pasal website kitai.
Enti enda salah ingat aku, nyentok ka diatu aku jarang bendar ninga orang bisi ngena radio iklan ka website sida ia. Tang di menua luar din maioh orang ngena radio ngelaku ka website sida. Kitai patut ngena peluang ti bisi tu dikena ngelaku ka websiter kitai.


Penutup

Website kitai enti udah tembu ukai reti ia kitai goyang kaki pia aja nganti orang ti datai meli barang ari website kitai. Maioh agi pekara patut dikereja kitai dikena ngelaku ka website kitai. Enti enda pia nadai orang ulih nemu pasal website kitai, ngujung ka kitai lalu mantul ati dalam pengawa dagang internet.

Munyi ka udah dipadah aku dulu suba, dagang internet tu ukai pengawa dagang alai kitai goyang kaki nganti duit datai. Ia sama mega baka pengawa dagang di luar din alai kitai mesti deka ngereja maioh pengawa ngelaku ka website kitai ngambi ka orang ulih tetemu ka website kitai.

Kenang pasal 4 agi cara ngelaku ka website kitai deka disambung aku ba Tusun 38. Aku ngasai ka patut bendar kitai berandau ka pengawa ngelaku ka website tu enggau silik laban pengawa tu besai bendar reti enti kitai deka maju dalam dagang internet.

Kena nutup randau ICT kitai ba Tusun 37 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

April 20, 2009

Tusun 36 - ClickBank.com

Terubah ia aku meri tabi basa ngagai peninga.

Selamat kitai begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 36.

Belaboh ari program kitai ba Tusun 31 kemari nyentok ngagai Tusun 35 kemari kitai sama udah ngenang pekara ti patut bisi ba website kitai. Enti kitai sama berati sereta nitih ka pekara tu udah dikenang aku diatu kitai udah bisi website ti menyana sereta ulih dikena kitai belaboh ka dagang internet kitai.

Pia mega dalam program randau kitai ti dulu agi kitai sama udah ngenang bakani kitai milih batang pengawa dagang ti deka dikereja kitai. Enti peninga agi ingat, kitai ulih milih maioh macam batang pengawa dagang ti ulih dipilih kitai. Kitai ulih nyual barang ti digaga kitai. Kitai mega tau nyual barang ti digaga orang bukai. Kitai mega ulih nyual penerang ti dipelaba ka kitai ulih diguna orang bukai.

Saritu aku deka ngenang siti agi pekara ti ulih nambah ka penyakah kitai dalam dagang internet laban ba asai ati aku pekara tu patut bendar dikenang ngambi ka kitai enda kelalu jauh tinggal dalam pengawa dagang internet.

Pekara ti deka dikenang aku ianya pengawa ngelaku ka barang orang bukai. Sama baka orang ti ngereja pengawa dagang di luar din, kedai tauka supermarket ukai semina nyual barang sida ia empu aja tang sida mega nyual sereta ngelaku ka barang orang bukai mega.

Enti kitai berati ka supermarket, maioh bendar macam barang dijual sida ia. Taja pia barang dia ditusun enggau manah nitih ka guna ia. Enti sayur, ia ditusun begulai enggau sayur bukai. Enti gari ia dijual ba alai siti begulai enggau gari bukai. Nya alai taja pan maioh barang dijual ia ukai semina ditugung sengapa tang bisi endor sida ia empu.

Baka nya mega dalam pengawa dagang internet. Kitai enda ulih semina ngarap ka siti aja barang ti dijual kitai tang kitai deka gelaku ka naka pemaioh barang ti ulih. Enti kitai semina ngarap ka siti aja barang dijual kitai, tusah kitai deka besemekih enggau orang bukai.

Saritu aku ngenang bakan kitai ulih besemekih dalam dagang internet enti kitai nyual information products baka ebooks, video tauka lagu. Ba program ti deka datai aku ngenang bakani kitai ulih ngelaku ka barang bukai. Kebuah pia laban diatu website kitai agi baru sereta nadai maioh penerang. Diatu kitai patut ngisi website kitai enggau naka maioh penerang ti ulih ngambi ka ia jampat niki dalam ranking ba search engine.

Ambi ka contoh, kitai rindu ka pengawa main Badminton lalu deka ngaga website kitai nya ngelaku ka perengka badminton. Maioh pekara ulih dikenang kitai pasal badminton dalam website kitai. Taja pia kitai nyangka enda ulih ngada ka penerang pasal semua pekara ti besangkut paut enggau badminton. Kesatu, kitai nadai cukup ari dikena kitai mansik semua penerang pasal badminton. Kedua, penemu kitai pasal badminton sigi bisi takat ia. Enda kitai ulih nemu semua pekara. Ketiga, kitai ka website kitai meri penatai pemisi ngagai kitai enggau jampat. Enti ulih enda lebih ari 3 bulan.

Nya alai kena kitai nangkup pekara tu kitai deka ngiga penerang ti bisi dalam internet ngambi ka ulih dikena kitai. Ditu meh kitai beguna ka website baka ClickBank.com .
ClickBank.com tu siti ari alai orang ngelaku ka information products baka books, movie enggau lagu.

Orang ti ngaga information products maioh engkah barang sida ia ba ClickBank.com ngambi ka ulih dipedagang ka orang bukai. ClickBank.com tu nyadi orang tengah antara orang ti empu barang enggau kitai ti deka ngelaku ka barang orang nya tadi. Kitai ngelaku ka barang orang nya dalam website kitai bulih komisyen ari rega barang ti dijual nya tadi. Komisyen tu dibayar ClickBank.com ngagai akaun kitai enti kitai bisi ngerejister diri dia.

Terubah ia kitai ngerejister diri ba www.ClickBank.com . Udah register kitai diberi siti password dikena kitai muka webpage ti bisi ngundan penerang pasal akaun clickbank kitai. Ari nya kitai diberi nama akaun tauka nickname dikena kitai genap kali kitai ngelaku ka barang ti bisi dalam list ClickBank.com.

Udah nya kitai ngiga webpage ti diberi nama “MarketPlace”. Ditu meh endor kitai ulih ngiga information products ti bisi dijual nengah ClickBank.com.

Pulai ngagai contoh website kitai ti ngelaku ka perengka badminton, dia ba marketplace nya kitai lalu naip keyword “Badminton”. Dia kitai dibai ngagai website ti ngayan ka list information product ti bisi ngundan penerang pasal badminton. Diatu bisi siti ebook pasal badminton bisi dijual nengah ClickBank.com ianya Badminton Secrets ti dijual enggau rega USD37, tauka RM100 duit kitai. Komisyen ti dibayar ngagai kitai enti ngelaku ka ebook tu ianya USD16.32 tauka RM50 duit kitai.

Enti kitai udah mutus ati deka ngelaku ka ebook tu dalam website kitai, kitai lalu click ba “Create hoplink”. Dia kitai dipinta ngisi form. Enda maioh penerang ti diguna dia, semina nama akaun ti diberi ka kitai leboh kitai ngerejister diri dulu tadi.

Udah kitai ngisi form nya tadi kitai diberi siti coding. Coding tu nyadi link dikena kitai mai orang ti mansa website kitai ngagai webpage ti ngelaku ka ebook tu tadi. Enti orang nya tadi nyadi meli ebook nya tadi, kitai lalu bulih komisyen. Komisyen nya tadi lalu dipasuk ka ngagai akaun kitai ba ClickBank.com . Setiap 2 minggu sekali clickbank ngirum ka cek ngagai kitai enti bisi barang laku dijual kitai.

Enti orang ti mansa website kitai nya tadi enda meli ebook nya tekala nya, ia meli maia bukai, agi meh kitai ulih nerima komisyen laban ClickBank.com bisi ngada ka siti coding dikena nyidi penatai orang nya ari website kitai.

Komisyen ti dibayar nengah ClickBank.com tu maioh. Antara 65% ngagai 75%. Information products ti dijual dia mega berega antara RM30 ngagai RM1,000. Enti dikira, kitai ulih nerima komisyen antara RM20 ngagai RM500 ari siti ebook ti laku dijual kitai. Nya alai enti kitai berati ka pekara tu, ClickBank.com tu siti ari endor kitai ulih ngiga penatai pemisi kitai ari internet.
Ia mega jampat sereta nadai maioh pengiroh. Ebook sigi udah ditulis orang bukai. Kitai semina ngelaku ka ebook nya tadi enggau leka jako kitai empu ba website nya.

Enti kitai bisi information product kitai empu kitai ulih mega nyual ia nengah ClickBank.com. Oang bukai ulih ngelaku ka barang kitai. Kitai empu nentu ka berapa kitai meri komisyen ngagai orang ti ngelaku ka barang kitai nya tadi. Udah nya pengawa bebayar ka komisyen nya kitai enda iboh irau laban semua nya dikereja ClickBank.com magang. Ngena cara nya kitai enda iboh kelalu kiruh ngelaku ka barang nya tadi laban maioh orang bukai ngelaku ka barang nya ka kitai.

Penutup

Enti kitai deka besemekih dalam dagang internet, ClickBank.com tu meh siti ari website ti patut selalu diperati ka kitai. Maioh orang bulih penatai pemisi semina ngelaku ka barang ti bisi dijual ba ClickBank.com aja. Kitai mega ulih nambah ka penatai pemisi kitai ngena cara ti sama.
Enti dagang internet kitai udah maju lalu kitai nyau ulih ngaga information product kitai empu, kitai beguna ka ClickBank.com nyadi ka palan endor orang bukai ulih sama ngelaku ka barang kitai.

Kena nutup randau ICT kitai ba Tusun 36 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.
Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

April 18, 2009

Tusun 35 - Google Analytic

Terubah ia aku meri tabi basa ngagai peninga.

Selamat kitai begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 35.

Saritu kitai nyambung kenang pasal pekara ti patut bisi dalam website kitai enti kitai deka besemekih enggau cakah agi dalam dagang internet.

Belaboh ari program kitai ba Tusun 31 kitai sama udah nemu bakani kitai ulih ngerejister nama dagang internet kitai leboh aku ngenang pasal Domain name. Ia sama tuju enggau kitai ti ngerejister nama kompeni leboh kitai bedagang di luar din. Ungkus dikena ngerejister domain name tu dalam RM30 setaun.

Udah nya dalam program kitai ba Tusun 32 aku ngenang bakani kitai ulih nyewa endor kitai bedagang ianya Hosting. Ia mega selalu disebut orang server. Enti dibanding ka enggau nyewa kedai antara RM800 ngagai RM3,000 sebulan, sewa server tu antara RM50 ngagai RM300 sebulan nitih ka pakej ti dipilih kitai.

Kitai nerus ka randau kitai ba Tusun 33 kitai nemu kitai enda ulih enda beguna ka Autoresponder. Enti dibanding ka enggau dagang di luar din, Autoresponder tu baka orang ti jaga kedai. Enti ba supermarket, autoresponder tu baka salesgirl tauka promoter ti bekerja dia. Baka nya meh pengawa autoresponder dalam website kitai.

Kenang aku ti penudi bendar ianya ba Tusun 34 aku bisi ngenang Merchant Account. Enti dibanding ka enggau dagang di luar din, merchant account tu bekerja ka kitai baka tukang wang tauka cashier. Merchant account tu alai kitai nerima bayar ari orang ti meli barang kitai. Merchant account ti suah dikena orang dalam dagang internet tu ianya ba PayPal.com.

Nya alai peninga, enti website kitai udah bisi empat iti pekara ti udah dikenang aku 4 minggu tu ka udah, kitai ulih mupok ngereja dagang internet kitai. Kitai ulih belaboh ngelaku ka barang ti dijual kitai.

Taja pia, kitai deka nemu pengering dagang internet kitai. Kitai deka nemu bisi ka enda orang mansa website kitai. Enti bisi maioh ni orang ti datai ngagai website kitai dalam sehari, seminggu, sebulan tauka setaun.

Kitai mega deka nemu ari menoa ni penatai orang ti singgah ba website kitai. Ari kitai ti nemu penatai orang ngagai website kitai, kitai ulih ngaga website kitai enggau manah agi.

Nadai guna kitai ngaga website kitai enggau naka ia pemanah tang kitai enda nemu bisi ka enda orang datai ngagai website kitai. Pia mega nadai guna enti kitai semina nemu pemaioh orang bisi datai ngagai webite kitai tang kitai enda nemu ia datai ari menoa ni.

Seninjik bendar dalam pengawa dagang internet maioh pengawa ulih dikereja kitai. Kitai ulih nemu sapa orang ti datai ngagai website kitai. Kitai mega nemu menoa penatai orang nya tadi.

Cara tu ulih diperati ka kitai dalam website kitai. Pia mega cara tu ulih dikereja kitai enggau nadai bebayar. Cara ti dipadah ka aku nya tadi ianya ngena Google Analytics. Ia ulih digiga kitai ba url www.google.com/analytics .

Google analytics tu siti ari perengka ti disedia ka kompeni Google.com dikena mantu orang dalam dagang internet. Ia siti ari perengka ti enda tau nadai dalam website kitai.

Munyi ti dipadah ka aku dulu tadi, kitai ulih ngena google analytics enggau nadai bebayar. Kitai ngerejister akaun google analytics ba www.google.com/analytics . Enti kitai bisi ngena email ti ngena @gmail.com, kitai tau enda iboh ngerejister akaun ti baru. Kitai ulih ngena username enggau password ti sama leboh kitai ngerejister google analyctics kitai.

Udah kitai ngerejister akaun google analytics kitai dipinta meri url website kitai. Contoh ia http://www.kassimjeritan.com . Url ti terubah diregister kitai lalu secara automatic dikena nyadi ka nama akaun google analytics kitai. Nama tu enda ulih ditukar agi, semadi meh kitai nutup akaun nya tadi lalu ngerejister nama baru.

Udah nya kitai diberi lumor baka UA 1234567-1 ianya siti coding ti unik ka siti siti website ti dikena kitai. 1234567 tu lumor coding google analytics kitai. Lumor 1 tu diberi ngagai website kitai ti terubah. Enti kitai bisi maioh website lalu deka nambah website kitai dudi ari ia diberi lumor UA 1234567-2. Sereta baka nya mega enggau website ti bukai. Nya alai kitai enda iboh suah ngerejister akaun google analytic kitai taja pan kitai maioh website ti dikena.

Udah kitai ngerejister website kitai, kitai mega diberi coding dalam java script ti ulih di tambah ka kitai ba coding website kitai. Coding tu enda kelalu panjai sereta nyamai dikelala. Dalam setting google account kitai ia bisi madah dini alai kitai patut engkah coding nya tadi.

Enti kitai ngena website ti digaga kitai empu, kitai deka nambah ka coding nya dalam semua webpage dalam website kitai. Ia ulih dikereja kitai ngena cara ngupi java script ti diberi ka kitai leboh kitai ngerejister website ti dikena kitai. Semadi meh kitai enda iboh ngena google analyctics dalam webpage nya tadi baka webpage ti deka dilalai ka kitai nya baru kitai enda iboh nambah ka coding nya tadi.

Enti kitai ngena public blog baka blogspot.com kitai semina dipinta ngada ka Gadget Google analytic dalam blog kitai. Udah nya dalam setting gadget nya tadi kitai semina ngupi lumor UA ti udah diberi ka website kitai nya tadi. Udah setting tu dikereja kitai, google analyctics nya tadi lalu active dalam kandang 24 jam ari setting nya tadi.

Enti kitai ngena private blog baka wordpress kitai deka ngada ka plugin google analytics. Plugin nya tadi ulih diambi kitai ari control panel dalam wordpress blog kitai. Udah plugin nya active, kitai dipinta ngupi coding java script nya tadi dalam setting plugin google analytics kitai. Ngena cara tu google analytics kitai ulih dikena dalam tempoh 24 jam.

Google analytics tu siti ari perengka ti active dalam website kitai. Reti ia, google analytics ukai semina coding aja tang ia ngambi sereta nerima penerang ari website kitai. Nya alai ia enda ulih active tekala nya tang beri tempoh dalam 24 jam dikena google ngadu ka akaun kitai.

Dalam tempoh 24 jam kitai patut ulih meda report pasal orang ti bisi datai ngagai website kitai. Kitai mega ulih nemu pemaioh orang ti datai dalam sehari, seminggu, sebulan enggau setaun. Pia mega dalam penerang ti silik agi google analytics ulih madah ka kitai menoa penatai orang ti bisi singgah dalam website kitai. Kitai mega ulih nemu ngena cara ni orang ti datai ngagai website kitai nya nemu pasal website kitai sekali ka ngena search engine, ari link website bukai tauka terus ari Url kitai, ianya ngena cara terus naip nama website kitai nya tadi.

Ia mega ulih madah ka ari webpage ni orang datai ngagai website kitai laban setiap webpage kitai nya tadi bisi ngundan coding dikena kitai nyidi penatai orang ti singgah ba siti – siti webpage dalam website kitai. Ngena cara tu kitai ulih ngemanah ka agi webpage ti selalu ditengah orang ngambi ka orang tau tekuing ati deka datai baru ngagai webpage kitai dudi ari ila. Kitai mega tau nambah penerang ti baru dalam webpage nya tadi. Pia mega enti webpage kitai nya maioh dipeda orang, kitai ulih ngada ka ruang iklan. Kitai mega ulih nguji nyual barang kitai dalam webpage tu.

Penutup

Kitai patut ulih nemu penatai orang ti bisi meda website kitai. Pekara tu nyamai dikereja kitai ngena google analytics. Ari ka nemu penerang pasal orang ti datai ngagai website kitai, kitai ulih ngemanah ka website kitai. Enti website kitai manah sereta penuh enggau penerang ti beguna kitai ulih besemekih enggau manah agi dalam dagang internet kitai.

Kitai patut ngena peluang ti bakatu dikena ngemansang ka dagang internet kitai.

Kena nutup randau ICT kitai ba Tusun 35 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

April 12, 2009

Tusun 34 - Merchant Account

Terubah ia aku meri tabi basa ngagai peninga.

Selamat kitai begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 34.

Saritu kitai sama ngenang siti agi pekara dalam pengawa dagang internet ti enda kurang mega penting ianya Merchant Account. Merchant Account tu ianya endor kitai nerima bayar ari orang ti meli barang ari kitai. Ia mega alai kitai ulih mayar orang bukai enti kitai meli barang sida ia.

Dalam pengawa dagang ba luar din, kitai ulih nerima bayar ari orang ti meli barang kitai enggau besua duit pia aja laban kitai sama bisi semak pangan diri. Enti rega barang RM5, ia meri kitai RM10, udah nya kitai mulai kaRM5 ngagai ia baru. Dalam pekara tu kitai enda beguna ka Merchant Account.

Pia mega enti pengawa dagang kitai semina sama dalam menua Malaysia tu kitai ulih ngasoh orang ti meli barang kitai mayar ngagai akaun bank kitai. Ia semina ngirum ka cek tauka jako kemaia hari tu, “bank in” ngagai akaun kitai.

Pia mega kitai ulih nerima wang pos, nyau ka sama baka cek, semina kitai nerima duit tu ari pos ofis. Ngena cara nya kitai sama ulih nerima bayar ari orang ti meli barang ari kitai.

Tang dalam dagang internet orang ti ulih meli barang kitai ukai semina orang ti ngimbai kitai tauka ari menua Malaysia aja. Orang ti bedagang enggau kitai datai ari serata dunya. Orang ti maioh bendar bebeli ka barang ari internet maioh datai ari Amerika, Eropah, Australia, Canada enggau Menua Jepun.

Sida tu kelalu jauh ari kitai. Tentu meh sida ia enda ulih datai kitu semina deka nyua ka duit dikena meli barang kitai. Sida ia mega enda ulih bank in ngagai akaun kitai laban kitai enda sama menua, nyangka serice bank sida ia din enda ulih kena bekirum ka duit ngagai kitai. Bisi meh service baka “wire transfer” tang ungkus ia kelalu mar. Nyau mar agi ari rega barang ti dijual kitai.

Tambah mega enti kitai ngayan ka no.akaun bank kitai dalam internet, enda tentu manah pulai ka pengelikun kitai. Agi bisi orang dipeda aku ngayan ka no. akaun sida ia dalam internet dikena nerima bayar ari orang ti meli barang sida. Ba asai ati aku, pengawa tu tau bendar ngenatai ka penusah ngagai kitai.

Orang ti berati ka pengawa dagang internet nemu pemesai penanggul enti kitai bedagang enggau nadai sempadan menoa. Sida ia nemu enti deka ngemansang ka dagang internet pengawa bebayar dalam internet mega mesti deka mudah dikereja. Nya alai sida tu bisi ngada ka endor ngambi ka kitai ulih nerima bayar ari orang ti meli barang kitai.

Kompeni ti baka tu nyadi orang tengah antara kitai ti empu barang enggau orang ti meli barang kitai. Kitai ngerejister diri ba kompeni ti bakatu. Udah nya sida ia ngada ka akaun kitai alai ulih meri penerang ti diguna. Antara penerang ti enda tau salah ianya nama kitai mesti ka sama enggau dalam I.C kitai. Dalam akaun kitai nya tadi meh endor kitai ngadu ka setting barang ti dijual kitai. Ari nya mega kitai ulih ngada ka tanda rega barang ti dijual kitai.

Udah setting digaga serta ulih dikena, kitai lalu diberi siti coding alai kitai tau engkah payment button dalam website kitai. Orang ti meli barang kitai lalu klik ba payment button kitai nya tadi lalu sida ia dibai ngagai website merchant kompeni tu tadi. Ditu orang ti meli barang kitai nya tadi lalu ngisi penerang ti dipinta baka nama, address enggau lumor kredit kad ti dikena ia. Ari nya penyampau bayar ti diambi ari kad kredit orang nya tadi lalu dipindah ka ngagai akaun kitai ba merchant kompeni nya tadi.

Merchant kompeni tu ngambi komisyen ari pengawa jual beli tu tadi. Komisyen sida enda kelalu maioh, lebih kurang 1.5%. Contoh ia enti barang kitai berega RM10, kompeni tu ngambi komisyen antara RM0.15 Jauh lebih murah enti dibanding ka enggau ungkus “wire transfer”.

Bisi mega kompeni merchant account tu dulu nerima bayar leboh kitai ngerejister, nya alai kitai nadai dipinta mayar komisyen agi.

Siti ari kompeni ti ngada ka service Merchant Account ianya www.PayPal.com. Kompeni tu siti ari pampang kompeni ebay.com pia mega siti ari pampang kompeni Google.com. Kompeni tu antara kompeni ti besai dalam pengawa dagang internet. Kitai ulih ngerejister diri ba PayPal.com enggau enda bebayar. Sida semina ngambi komisien ari kitai enti bisi orang meli barang kitai. Nya alai nyamai bendar kitai ngereja pengawa dagang internet laban bisi kompeni baka PayPal.com tu. Taja pia kitai mesti ka bisi kad kredit dikena muka akaun tu.

Enti kitai bisi PayPal Account, kitai mega nyamai bebeli barang ari internet. Kitai enda iboh suah ngisi penerang baka lumor kad kredit kitai, nama enggau address kitai laban semua penerang tu udah bisi dalam PayPal account kitai. Enti penyampau duit kitai dalam nya enda cukup, ia ulih nambah ngena duit dalam kad kredit kitai ti dikena kitai muka akaun kitai nya tadi.

Kitai mega enda patut irau ngena service ari sida tu laban pengawa bebayar ngena PayPal.com account sigi likun. Sida ia ngada ka online security ti manah sereta udah lama dipecaya ka orang. Tambah mega kompeni baka PayPal.com tu ukai baru diatu dalam pengawa dagang internet. Sida ia udah ngereja pengawa tu lebih ari 10 taun.

Enti kitai ngena PayPal account orang mega bisi pengarap meli barang ari kitai laban PayPal button tu udah cukup dikelala orang lebih agi dalam pengawa dagang internet.

Penutup

Kitai patut ulih nerima bayar ari website kitai enggau mudah. Orang ti meli barang ari kitai pan patut ulih ngereja pengawa nya enggau mudah mega. Diatu pengawa bebayar enggau pengawa nerima bayar ari website mudah bendar dikereja laban bisi maioh kompeni ngada ka service Merchant Account.

Cara ngena payment button ari merchant account tu mega mudah digaga laban setting ia mudah dikereja. Pia mega enti kitai bisi penanggul ngena service sida tu kitai semampai ulih minta Bantu ari help service sida ia 24 jam.

Kitai patut ngena peluang ti bakatu dikena ngemansang ka dagang internet kitai.

Kena nutup randau ICT kitai ba Tusun 34 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

April 11, 2009

Tusun 33 - Autoresponder

Terubah ia aku meri tabi basa ngagai peninga.

Selamat kitai begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 33.

Siti agi pekara dalam pengawa dagang internet ti deka dikenang aku saritu ianya Autoresponder.

Autoresponder tu ianya siti ari program email ti ulih malas kitai enggau email enti kitai ngirum ka email kitai ngagai siti email address. Ia malas email kitai nya tadi enggau cara automatic, enda iboh ditaip laban semua tu udah digaga orang dulu dalam program email nya tadi.

Autoresponder tu meh nyaga dagang internet balat bendar ngerembai baka ka bisi kemaia hari tu. Semua kompeni enggau orang ti ngereja pengawa dagang internet enda ulih enda ngena autoresponder dalam website sida.

Enti disema ka kitai enggau pengawa dagang di luar din, autoresponder tu baka salesgirl ti nyaga kedai sereta melayan orang ti tama ngagai kedai nya. Ia nanya ka nama barang ti digiga orang nya tadi. Ia mega bisi madah ka penerang tentang barang ti bisi dijual ba kedai nya.

Dalam pengawa dagang internet, autoresponder tu bekerja ka kitai baka salesgirl nya tadi. Ia melayan orang ti bisi datai ngagai website kitai. Ia mega meri penerang ti bisi dalam sereta ngenatai ka penerang nya ngagai orang ti bisi ngerejister email address sida enggau kitai. Tang ungkus ngada ka autoresponder tu jauh lebih murah enti dbanding ka enggau gaji orang ti nyadi salesgirl ba supermarket.

Tuju autoresponder tu bisi dua iti.

Kesatu, ia ngada ka form alai orang ti bisi mansa website kitai ninggal ka nama enggau email address sida. Ngena cara nya orang ti datai ngagai website kitai enda semina mansa pia aja tang bisi mga ninggal ka nama enggau email address sida. Nya alai, taja orang tu enda datai ngagai website kitai baru, kitai ulih nganjung penerang pasal barang dagang kitai ngagai email ti udah diberi ia nya tadi. Enti ia bisi pengerindu ka penerang ti diberi kitai, ia nyangka deka datai baru ngagai website kitai. Ukai semina nya aja, ia mega nyangka tekuing ati meli barang ti dipedagang ka kitai. Tu meh cara kitai bulih penatai pemisi ari internet.

Tusah kitai bulih orang datai ngagai website kitai lalu deka meli barang kitai. Kadang kadang nyau bebelas kali ngabas website kitai baru meli sekali. Indah kitai enti tama ngagai supermarket ti besai jarang terus meli barang ti bisi dipandang ka dia. Nyau beberapa kali kitai ngundang ia baru kitai meli ia.

Bakatu mega gaya orang dalam internet. Kadang – kadang ia manding ka barang kitai enggau barang bukai. Nya alai kitai enda tau enda ngada ka tempat alai ia orang ulih ninggal ka nama enggau email address ba website kitai awak ka kitai ulih ngamjung penerang pasal barang dagang kitai taja pan orang nya tadi enda datai baru ngagai website kitai.

Enti siko aja orang datai ngagai website kitai nyamai meh kitai semina nanya ka nama enggau email ia, udah nya kitai lalu naip penerang pasal barang kitai lalu email ngagai ia. Enti agi lima iko, agi meh ulih gaga kitai kediri. Tang enti dah manggai 10 iko, nyau lembau kitai naip email kitai genap kali ngagai siko-siko sida tu.

Nya baru siti email. Kati baka emaiil ti dudi ila deh? Nya alai nadai jalai sekali kitai ulih nganjong email kitai ngagai setiap iko orang ti bisi ninggal ka nama enggau email sida. Tu meh maia kitai beguna ka autoresponder.

Tuju autoresponder ti kedua ianya tuju ti besai bendar, ia ulih nganjung email ngena cara ti betangkan – tangkan nitih ka penyuah ti udah diatur kitai. Enti kitai deka nganjung email genap 3 ari sekali, kitai lalu ngatur setting dalam autoresponder nya tadi lalu orang ti bisi ninggal ka email sida dalam form kitai nya tadi bisi nerima email kitai genap ari. Kitai semina ngada ka setting tu sekali aja, enda suah naip email.

Ari cara nya tadi kitai enda lenyau pelanggan. Kitai semampai ulih meri penerang ngagai orang ti udah mansa website kitai. Enti ia enda meli tekala nya, ia tentu deka tekuing ati dudi ari ila.

Nitih ka pansik orang dalam pengawa dagang internet, orang belaboh meli ari siti- siti website udah ia nerima enda kurang ari 7 email ti dikirum ka ngena autoresponder. Nya alai enti website kitai nadai autoresponder, tusah kitai deka besemekih dalam pengawa dagang internet.

Nya alai peninga, autoresponder enggau dagang internet sigi enda ulih diserara.
Diatu maioh kompeni sereta website ngada ka service autoresponder. Bisi nya enda bebayar tang bisi mega bebayar.

Autoresponder ti dikena kitai enggau enda bebayar tu ngada ka ruang iklan sida ia empu leboh kitai ngena sistem sida ia. Pekara tu enda tentu pulai ka pemanah ngagai website kitai laban kitai nyau ngelaku ka barang orang bukai. Pia mega kitai nadai penguntung ari ruang iklan nya tadi. Contoh autoresponder ti enda bebayar ianya freeautobot.com

Bisi autoresponder dibayar kitai dalam RM70 sebulan baka Aweber enggau Get Response. Dua iti bansa autoresponder tu balat bendar dikena orang dalam dagang internet. Taja pia peninga anang kelalu takut ka rega autoresponder dua iti tu mar. Makin sehari makin maioh website ngada ka autoresponder service. Kitai mesti rajin ngiga penerang dalam internet ngambi ka kitai ulih tetemu ka autoresponder ti ulih ditangkup kitai. Udah dagang internet kitai maju, kitai ulih ngena autoresponder ti udah disebut aku tadi.

Nyau ka semua autoresponder tu mudah dikena. Setting ia mudah digaga kitai. Pia mega sida ia bisi ngada ka bantu 24 jam enti kitai bisi penanggul ngena autoresponder sida.

Dalam tusun program kitai ti dulu suba, leboh aku ngenang pasal email, aku bisi madah ka kitai ulih ngereja dagang internet semina ngena email aja. Pekara tu ulih dikereja kitai begulai enggau autoresponder.

Cara ia bakatu; kitai ngerejister diri enggau clickbank.com. Udah nya kitai milih ebook ti deka dijual kitai. Dia kitai ngerejister diri nyadi affiliate ba orang ti empu ebook nya tadi. Udah nya kitai diberi link dikena kitai mai orang datai ngagai website orang tu tadi. Kitai lalu ngelaku ka barang nya dalam email kitai besereta enggau link ti udah diberi ka kitai tadi. Udah nya kitai nganjong email nya ngena autoresponder ngagai orang ti meri kitai email address nya tadi. Enti sida kilk ba link dalam email kitai nya tadi orang nya lalu dibai ngagai website orang ti empu barang ba clickbank.com. Enti orang nya meli barang ti dilaku ka kitai, kitai bulih komisien ari clickbank.com.

Penutup

Dagang internet maju sereta ngerembai mansang baka ka diatu laban bisi service baka autoresponder tu. Ia nyadi ka PR tauka pengantara ti nyambung ka kitai enggau orang ti bisi mansa website kitai. Enti bisi autoresponder dalam website kitai dagang internet kitai besai agi peluang maju.

Kena nutup randau ICT kitai ba Tusun 33 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

April 6, 2009

Tusun 32 - Hosting

Terubah ia aku meri tabi basa ngagai peninga.

Selamat kitai begulai baru enggau aku, Kassim Jeritan dalam program Randau ICT. Saritu tu Randau ICT kitai ba Tusun 32.

Saritu kitai berandau ka siti agi pekara ICT kelebih agi pekara internet ti patut bendar diperati ka kitai ianya Hosting. Hosting tu ianya endor kitai engkah website kitai ngambi ka ulih dipandang ka ngagai orang nengah internet.

Ba randau kitai ba Tusun 31 kemari kitai dah sama ngenang bakani kitai ulih ngada ka Domain Name. Enti Domain Name tu disema ka baka nama syarikat ti dikena kitai bedagang, Hosting tu tau disema ka kitai baka kedai tauka ofis endor kitai ulih ngereja pengawa dagang kitai. Enti kitai ngereja pengawa dagang internet kitai enda tau nadai Hosting.

Hosting tu sigi sebaka enggau ruang kedai orang ti bedagang. Enti nadai hosting, kitai nadai alai engkah website kitai. Pia mega enti nadai hosting kitai mega enda ulih engkah penerang ti ulih madah ka pengawa dagang kitai. Enti nadai Hosting kitai enda ulih nyimpan barang baka ebook enggau information product ti bukai. Nya alai kitai enda ulih ngereja pengawa dagang internet kitai enti nadai Hosting.

Diatu maioh kompeni sereta website ngada ka Hosting services. Web Hosting tu, selalu mega dikumbai orang Server enda lebih ari siti computer, tang ia besai agi. Ia mega semampai disambung enggau internet enda ngira jam tauka ari. Server tu Jauh lebih besai ari desktop tauka notebook kitai. Ia mega ngundan ruang ti jauh besai ari komputer ka bisi dipeda kitai. Nya alai ia ulih ngada ka maioh ruang ti ulih disewa kitai endor kitai nyimpan website kitai serta mega information products ti dipedagang ka kitai.

Baka ka udah dikenang aku tadi, diatu maioh kompeni ngada ka web Hosting service. Pia mega bisi web hosting company tu bisi ngada ka maioh macam pakej hosting. Bisi nya mar sereta bisi mega murah. Bisi mega web hosting tu free dikena kitai. Saritu aku mai kitai sama ngenang bakani kitai ulih milih web hosting ti tau dikena kitai. Enti kitai baru deka belabuh dalam dagang internet tentu meh kitai deka ngena hosting ti ulih ditangkup kitai.

Ruang disedia (Space)

Siti ari pekara ti deka ditemu kitai ianya ruang ti disedia ka kompeni ti ngada ka server. Ruang tu dikira dalam unit MegaByte. Ruang tu nentu ka berapa maioh file ulih disimpan kitai dalam server, tauka dikumbai kitai upload. Dikena kitai bepun ka pengawa dagang internet kitai tau ngena ruang antara 10 ngagai 20MB. Tang enti kitai bisi file ti besai baka MP3, Video Movies enggau software ti besai, tentu meh kitai beguna ka ruang ti besai agi nyentok ka ngagai 100MB.

Anang kelalu tumu ngambi ruang ti besai laban ongkos ia tinggi agi. Pia mega enti kitai baru bepun ka dagang internet kitai enda beguna ka ruang ti besai. Pilih pakej tu ulih ngemendar ka kitai nambah ka ruang kitai dudi ari ila ngambi ka kitai enda iboh betukar ngagai server ti bukai. Kebuah pia maioh pengawa deka dikereja kitai baru enti kitai betukar server. Tentu ka kitai nemu pemesai file website kitai ngambi ka kitai nyamai milih ruang ti diguna kitai.

Web Statistic

Web statistic tu ulih meri penerang orang ti datai meda webpage kitai. Penerang tu beguna bendar laban kitai ulih nemu sapa orang ti datai ngagai website kitai. Taja pan kitai enda nemu nama orang ti datai tang kitai ulih nemu menua penatai orang nya tadi. Ari nya kitai nemu ngaga website kitai nitih ka cara orang nitih ka pemaioh orang ti datai.

Bandwidth

Bandwith tu ianya pemaioh data ti tau keluar ari web server nya tadi. Tiap kali orang meda website kitai, data ti mesai file ti dipeda orang nya tadi dikeluar ngagai computer orang nya tadi. Genap kali orang bisi download information product ari website kitai, data sama pemesai enggau file nya tadi diproses server kitai. Reti ia enti bandwidth kitai nya 2GB sebulan, enti kitai bisi ebook ulih download bisi 200kb, reti nya ebook kitai nya tadi ulih didownload 10,000 kali sebulan. Bisi Hosting company ngada ka limit bandwith dalam sebulan. Bisi mega pakej ti nadai ngeletak limit pemesai bandwith nya tadi. Besai agi bandwith mar agi meh rega pakej hosting nya tadi.

Email

Maioh hosting company bisi ngada ka email. Nyadi email akaun nya ukai baka email Yahoo tauka Google. Enti public domain ngena @yahoo.com tauka @gmail.com tauka @hotmail.com, Email ari hosting company selalu ngena @namawebsite.com. Email ti bansa tu lebih professional. Orang pan pecaya agi ka kitai enti kitai bisi email address ti nitih ka nama website kitai. Tentu ka hosting company bisi ngada ka pakej bakatu. Pia mega bisi pakej hosting ti ngada ka limit pemaioh email tau dikena kitai. Pia mega bisi pakej ti nadai limit pemaioh email ulih dikena kitai. Pakej ti mar agi selalu nadai limit penyampau email ulih dikena kitai.

Scripts

Script tu ianya program tauka coding ti mit ti diselepak ka dalam file ba web hosting. Ia ngereja siti pengawa aja ti spesifik. Script tu nentu ka website kitai ulih dikena ngisi form, ngada ka affiliate program serta mega ngada ka alai orang ulih meli barang ari website kitai baka shopping cart. Diatu, script ti bansa tu bisi disedia ka dalam nyau ka semua web hosting company ti bisi. Bisi mega script ti maju agi disimpan dalam web hosting kitai dikena ngelaku ka agi wesite kitai ba search engines. Anang kelalu irau ka script ti patut diguna laban kitai agi baru bepun. Maioh script tu digaga ngambi ka kitai ulih ngereja pengawa kitai jampat agi.

Cpanel

Tentu ka web hosting kitai bisi ngada ka Cpanel. Cpanel tu ianya siti interface alai kitai ulih ngadu ka setting website kitai. Ngena cpanel tu mega kitai ulih ngada ka blog enggau forum ari fantastico. Cpanel tu mega mudah dikena laban semua pengawa ngadu ka setting website kitai dikereja enggau mudah.

Maioh mega pekara bukai bisi ditambah dalam web hosting service kitai. Taja pia anang irau dulu laban enti kitai udah bisi website lalu udah teleba ngena ia ila nya baru kitai ulih irau ka pekara bukai. Diatu semina cukup kitai irau ka ruang enggau bandwidth aja.

Web hosting tu dibagi kitai ngagai 3 bengkah. Keastu, free web hosting, kedua, Budget Hosting lalu ketiga Professional Hosting.

Free Hosting

Web hosting ti free tu selalu ia ngada ka ruang iklan ba website kitai. Kitai enda ulih muai iklan nya tadi. Enda semua ga baka tu.

Contoh ia www.DotEasy.com bisi nyendia ka 100MB ruang serta 1GB bandwidth sebulan. Web hosting tu manah dikena kitai belajar dulu tauka enti website kitai nya mit. Pia mega ia nadai ngada ka ruang iklan dalam website kitai. Peninga tau nguji ngena web hosting tu.

Budget Hosting

Budget Hosting tu bisi nyendia ka server ongkos antara RM4 ngagai RM24 sebulan. Taja pia kitai dipinta mayar tempoh enda kurang ari setaun. Reti nya Budget hosting tu nyendia ka server dalam ongkos antara RM50 ngagai RM250 setaun. Enti kitai bisi belanja mimit manah meh kitai ngena budget hosting laban sida ia bisi support service 24 jam. Ruang disedia ka sida dalam 300GB bandwidth dalam 3,000GB.

Professional Hosting

Professional hosting tu dikena orang ti udah maju agi dalam dagang internet. Kebuah pia laban ongkos ia pan tinggi, enda kurang ari RM500 setaun. Ruang sampai 500GB nyentok ka nadai limit. Bandwidth mega dalam 3,500GB nyentok ka nadai disekat mega.

Penutup

Kitai enda ulih nyeliah ka diri ngena web hosting enti kitai deka sama besemekih dalam dagang internet. Ngena web hosting mega enda kelalu mar. Maioh web hosting bisi ngada ka “step by step“ cara kitai ulih ngadu ka setting dalam nya. Pia mega maioh web hosting bisi ngada ka bantu 24 jam alai kitai ulih ngenatai ka tanya kitai.

Dikena ngepun ka website kitai, manah kitai ngerejister domain name nitih ka cara ti udah dipadah aku ba randau kitai ba Tusun 31 kemari. Udah nya register web hosting kita ngena www.DotEasy.com laban ditu free. Ari nya kitai belajar ngadu ka setting dalam nya.

Kena nutup randau ICT kitai ba Tusun 32 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

Tusun 31 - Domain Name

Terubah ia aku meri tabi basa ngagai peninga.

Selamat kitai begulai baru enggau aku Kassim Jeritan dalam program Randau ICT. Saritu tu Randau ICT kitai ba Tusun 31.

Saritu kitai berandau ka siti agi pekara ICT kelebih agi pekara internet ti patut bendar diperati ka kitai. Pekara tu besai bendar reti asai ba ati aku kelebih agi enti kitai deka sama besemekih dalam pengawa dagang internet. Perkara ti deka dikenang aku saritu ianya Domain Name.

Dalam jako kitai iban aku enda tetemu ka leka jako ti ulih nganti reti Domain Name tu. Taja pia dalam bahasa melayu leka jako Domain tu agi dikena, enda dikalih ngagai jako melayu. Dipelaba ka aku dalam jako kitai Domain Name tu agi dikena, anang guai nukar nama ia ngagai leka jako kitai iban. Kebuah pia dalam dunya internet Domain Name tu sigi udah ditemu reti ia.

Domain Name tu ianya nama website tauka blog ti dikena kitai. Enti kitai meda Address Box, Domain name tu ianya nama ti nangkan ka www. Ambi ka contoh www.radiokitai.com, Domain name tu ianya Radiokitai. .com tu dikumbai orang extension name. www.radiokitai.com enda sama enggau www.radiokitai.net serta enda sama mega enggau www.radiokitai.info laban extension name ia enda sama.

Enti dalam pengawa dagang di luar din, Domain Name tu tau disema ka kitai baka nama syarikat tauka nama kompeni. Nama kompeni tu direjister ba ofis pengeregister kompeni. Enti di Kuching ditu Ofis tu ba Bangunan LHDN tauka SSM ba Simpang Tiga dia. Sebedau kitai ulih ngerejister nama kompeni kitai, kitai dipinta ngiga nama ti bedau derejister orang bukai. Enti nama ti dikedeka ka kitai udah direjister orang bukai, kitai dipinta ngiga nama baru ti bedau dikena. Udah nama kompeni kitai direjister, baru kitai ulih ngepun ka pengawa dagang.

Dalam dagang internet, pekara tu pan nyau ka sebaka. Tentu meh bisi lain mimit tang reti asal ia sama. Sebedau kitai ulih belabuh ngereja dagang internet, kitai deka ngiga Domain Name ti deka dikena kitai.

Tang sebedau nya kitai deka nemu nama pemgawa dagang kitai. kitai enggai nyadi semina bisi website tauka blog tang nadai batang pengawa dagang. Kitai mesti deka bisi batang pengawa dagang. Enti nadai bakani ka bedagang? Bah, nama batang pengawa dagang kitai deh? Enti peninga agi ingat ka randau kitai ba bulan 2 suba, aku bisi ngenang maioh pengawa dagang ti ulih dikereja kitai. Kitai tau ngelaku ka barang kitai empu. Kitai mega tau ngelaku ka barang orang bukai. Maioh Contoh dipadah ka aku ngambi ka muka jalai dikena peninga ulih ngepun ka dagang internet.

Kena kitai berandau saritu aku ngambi dagang ti nyual pua kumbu nyadi ka contoh ngambi ka nyamai agi kitai berandau. Contoh ia kitai bisi maioh pua kumbu ti deka dijual lalu kitai udah milih pengawa bejual ka pua kumbu nyadi ka batang pengawa dagang kitai. Nya alai Domain Name kitai mesti besangkut paut enggau pua kumbu mega. Enggai nyadi enti kitai engkah domain name kitai ngena nama pemakai baka manok pansoh laban pua kumbu enggau manok pansoh tu nadai besangkut paut sekali. Domain Name kitai tu ulih ngait ka nama pua kumbu enti orang maca ia sekali pansa.

Kitai enggai nyadi terus ngerejister nama www.puakumbu.com . Kesatu, nama tu udah diregister orang bukai. Nya alai enda ulih direjister agi. Kedua, serta mega kebuah ti penting bendar ianya, nadai maioh orang nemu pua kumbu enti ukai bansa kitai iban. Bansa bukai mimit bendar nemu reti pua kumbu. Leboh aku berati ka pemaioh orang ti ngiga pua kumbu dalam internet, nadai penerang pasal orang ti ngiga pua kumbu. Enti pia tusah kitai. Nadai orang deka meli pua kumbu kitai. Ukai bakanya ia. Tiap-tiap barang ti dijual kitai, tentu meh bisi orang deka meli. Semina diatu, kitai mesti nemu ngiga orang ti deka meli. Kitai mesti ulih mantai ka dagang kitai ngagai orang ti bisi ati deka meli.

Bansa bukai tentu meh bisi rindu ka pua kumbu. Pua kumbu tu manah dipeda sereta mega jarang ditemu kelebih agi ba menoa barat, jauh ari menua kitai. Sida ia rindu ka pua kumbu dikena ngias dinding. Sida mega rindu ka pua kumbu laban ia digaga ngena jari, ukai ngena injin. Sida ia rindu meda pua kumbu laban pua kumbu tu siti ari perengka lama ti agi bisi nyentok ka saritu. Tang sida ia maioh enda nemu nama pua kumbu. Nya alai nama domain kitai mesti ulih nerang ka pua kumbu, ukai nama ia.

Kitai tau ngerejister nama www.BorneoTraditionalTextile.com . Penerang pasal menua Borneo maioh digiga orang. Tambah mega tebal agi orang ngiga penerang pasal Borneo ianya pelancung ti deka datai ngagai menua kitai. Nya alai enti orang ngiga penerang pasal Borneo, website kitai nyangka ulih ayan ba search engine result page. Nya tau mai orang nya tadi tetemu ka website kitai. Taja pan orang nya tadi empai temu lalu meli pua kumbu kitai, tang orang bisi meda website kitai.

Kitai ngerejister Domain Name kitai ngena cara berati ka genteran jako ti selalu dikena orang ngiga penerang dalam internet. Domain name ti manah ti ulih mai penguntung ngagai dagang internet kitai ianya Doamin Name ti ngena genteran jako ti maioh digiga orang. Ba contoh pua kumbu ti dkenang aku tadi, nama BorneoTraditionalTextile tu maioh agi digiga orang enti dibanding ka enggau puakumbu. Munyi ti udah dikenang aku, semina bansa kitai iban aja nemu nama pua kumbu. Orang ti enda nemu nama pua kumbu ngena genteran jako ia ngiga penerang ari internet, baka BorneoTraditionalTextile tauka IbanTraditionalTextile. Ngena penemu tu kitai ulih milih Domain Name ti patut dikena kitai.

Anang guai mutus ka runding Domain Name ti deka dipilih kitai. Pilih 5 ngagai 10 genteran jako ti ulih dipilih kitai nyadi ka Domain Name kitai. Genteran jako ti dipilih kitai nyangka ukai genteran jako ti digiga orang maioh. Kitai mesti ngiga pemaioh orang ngiga genteran jako nya. Cara tu ulih digiga kitai dalam internet. Siti ari website ulih dikena kitai enggau cara enda bebayar ianya ba www.goodkeywords.com. Enti bisi orang ngiga genteran jako nya dalam pemaioh enda kurang ari 500 sebulan, genteran jako nya tadi tau dikena.

Udah nya kitai deka ngiga berapa maioh webpage bisi ngena genteran jako ti sama enggau genteran jako ti deka dikena kitai tadi. Tu meh orang ti besemekih enggau kitai. Enti kitai ngena Google tauka Yahoo! Kitai ulih meda bisi lumor ba sudut atas kanan monitor komputer kitai. Nya meh pemaioh website ti bisi sama genteran jako enggau genteran jako ti dikena kitai. Enti webpage ti ngena genteran jako nya nyau kelalu maioh, kitai nyangka enda ulih besemekih enggau sida, laban website kitai agi baru. Nya alai kitai patut ngena genteran jako ti bukai. Nyadi ka lalau, enti pemaioh webpage bukai ti sama ngena genteran jako enggau kitai nya tadi kurang ari 100,000 genteran jako nya tau dikena kitai.

Pilih genteran jako ti bepun ari A enti dibanding ka enggau Z. Contoh ia, pilih BorneoTraditionalTextile enti dibanding ka enggau IbanTraditionalTextile laban search Engine maca Domain Name tu ari A dulu, ditangkan ka B, udah nya C lalu ujung sekali Z. Tang enti enda tau enda engkah nombor ba moa. Contoh ia 1IbanTraditionalTextile.com laban search engine tu maca lumor dulu ari ABC.

Udah kitai tetemu ka genteran jako ti manah, maioh orang ngiga sereta kurang orang enggau besemekih, nya baru kitai tau ngerejister Domain Name kitai. Maioh kompeni sereta website ngada ka service endor kitai ulih ngerejister Domain Name kitai. Giga aja dalam Google taip “Domain”, dia kitai ulih meda maioh website ulih endor kitai ngerejister Domain Name. Ongkos ia mega antara RM30 ngagai RM70 setaun.

Tadi aku bisi ngenang extension name baka .com, .net, .info, .biz, .tv, .mobi, .org enggau maioh mega extension name ti bukai. Search engine nadai meda beda extension name tu. Nya alai anang kelalu irau ka ni bagi extension name ti patut dipilih. Tang enti ulih uji ka ngena .com dulu laban .com tu extension name ti terubah ia dikena. Ari segi Psikologi, orang lancat agi ngena .com. Tang enti .com udah dikena orang kitai tukar ngena extension bukai.

Penutup

Domain Name ti ngena genteran jako ti maioh digiga tang kurang dikena orang bukai ditambah enggau website kitai ti cukup digaga ulih mai dagang internet kitai ngerembai enggau jampat. Nya alai enti kitai ngerejister Domain Name anang enda berati ka pekara ti udah dikenang aku tadi.

Kena nutup randau ICT kitai ba Tusun 31 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

Tusun 30 - Blog

Terubah ia aku meri tabi basa ngagai peninga.

Selamat kitai begulai baru enggau aku Kassim Jeritan dalam program Randau ICT. Saritu tu Randau ICT kitai ba Tusun 30.

Saritu kitai berandau ka siti agi pekara dalam dunya ICT ianya blog. Diatu blog nyau makin dikerindu ka orang. Maioh orang nyau bisi blog sida ia empu.

Asal blog tu ianya ari leka jako weblog. Mula ia suba ia dikena nyimpan penerang ti diguna kediri empu. Ia sama baka kitai ti nulis bup diary. Tentu meh kitai ingat leboh maya agi skula suba kitai bisi nyimpan diary kitai. Kitai ngerekod nama pengawa kitai sari nya. Nama penemu ti ulih kitai. Sapa orang ti bekelala enggau kitai maya nya. Sapa orang ti dikerindu kitai sari nya. Sapa orang ti ngemedis ati kitai maya nya. Semua nya ditulis kitai dalam diary kitai magang. Orang indu silik agi diary ditulis sida.

Pun penatai blog tu pan sama baka bup diary kelia. Blog tu udah diprogram ka ngambi ka ulih ngerekod pekara ti ditulis kitai sehari nya. Enti kitai berati ka blog, ia bisi madah ka haribulan maia penerang nya ditulis. Blog tu diary dalam internet. Asal ia dikena kitai nyimpan penerang ti ditulis kitai empu.

Tang diatu blog tu udah balat ngerembai. Ia maioh dikena orang. Kebuah pia laban ia nyamai digaga. Senang dikena laban maioh perengka udah sedia enti dibanding ka enggau kitai ti ngaga website kediri empu aja. Blog mega mudah dibaca laban betusun enggau manah. Cara nusun blog sigi udah deprogram ka dulu.

Maioh website bisi ngada ka alai kitai ulih ngaga blog kitai. Bisi nya bebayar tang bisi mega ti enda bebayar. Siti ari website ti bisi ngada ka alai kitai ulih ngaga blog kitai ianya Google.com. Sida ia bisi siti pampang kompeni Blogger.com ti ngada ka alai kitai ngaga blog kitai. Enti kitai ngerejister blog kitai enggau Blogger.com, nama blog kitai ti ayan ba address box nya nama.blogspot.com. Enti peninga berati ka blog ti dikena aku ngenang pekara ICT ianya kjict.blogspot.com, nya siti ari blog ti diregister aku ba Blogger.com.

Mudah bendar kitai ngerejister blog kitai ba Blogger.com. Terubah ia kitai ngerejister Google account kitai. Enti kitai udah bisi akaun email ngena @gmail.com kitai tau enda iboh ngerejister Google account ti baru. Kitai tau terus ulih ngerejister nama blog ti deka dikena kitai. Contoh nama blog ianya kjict.

Enti nadai orang bukai udah ngerejister nama blog nya tadi, kitai dikemendar ka ngena nama ti dikedeka ka kitai. Tang enti nama digiga kitai bisi udah diregiser orang bukai kitai dipinta ngiga nama baru ti bedau dikena.

Udah kitai ngerejister nama blog, kitai dipinta milih corak blog ti bisi udah disedia. Pilih corak ti dikerindu ka kitai. Anang irau enti kitai enda puas ati ka corak nya tadi laban corak nya ulih diganti kitai enggau corak ti bukai. Kitai ulih nganti corak blog kitai sebarang maya dudi ari ila.
Udah kitai tembu milih corak blog kitai nya tadi, diatu kitai ulih nulis ba blog kitai lalu posting ngagai blog kitai nya tadi. Diatu blog kitai nya ulih dipeda orang bukai ngena internet.

Cara blog ngena Blogger.com tu siti ari cara kitai ngaga blog enggau mudah sereta jampat. Pia mega kitai ulih mandang ka gambar ba blog kitai. Enda cukup dia, kitai mega ulih mandang ka video clip dia. Kitai mega ulih mandang ka blog kaban kitai ti bukai. Maioh mega pekara bukai ulih dikereja kitai kena nambah ka penerang ba blog kitai nya tadi ngambi ka orang bukai rindu maca blog kitai.

Siti agi blog ti suah dikena orang diatu ianya wordpress. Enti kitai ngena wordpress kitai dipinta ngerejister nama domain kitai empu. Contoh nama domain tu baka kassimjeritan.com, radiokitai.com, AirAsia.com. kadang – kadang sida tu ngena .net, .info, .name enggau maioh mega nama iko ti bukai. Diatu ungkus ngerejister nama domain kitai nya bisi RM30 setaun. Maioh company dalam internet ulih alai kitai ngerejister nama domain kitai nya tadi. Kitai ulih goga ba Google ngena leka jako “domain”.

Udah nya kitai ngerejister web hosting account alai kitai engkah nama domain kitai nya tadi. Ungkus ngerejister web hosting diatu bisi enda kurang ari RM50 setaun. Dalam control panel web hosting nya tadi kitai ngiga Fantastico. Enti kitai klik ba Fantastico nya kitai meda maioh perengka udah sedia dia. Siti ari perengka ti bisi dia ianya wordpress. Ari nya meh kitai ulih ngadu ka blog kitai ngena wordpress. Blog kitai ayan ngena nama baka website nitih ka nama domain ti udah direjister kitai. Contoh wordpress blog ianya blog aku empu ba kassimjeritan.com. Kitai ngena wordpress enda bebayar. Kitai bebayar dikena meli nama domain enggau web hosting kitai.

Peninga anang irau enti kitai bedau nemu nama reti nama domain enggau web hosting laban pekara tu deka dikenang aku dalam program ti deka datai.

Diatu maioh orang bisi ngada ka blog diri empu. Blog tu bisi dua iti guna ti besai. Kesatu, dikena kitai nyimpan penerang ti diguna kitai empu. Penerang ti disimpan kitai dia ukai semina disimpan dalam computer kitai tang ia mega disimpan dalam computer besai alai kitai ngerejister blog kitai. Reti ia kitai ulih muka fail kitai taja pan kitai enda ngena computer kitai empu.

Kedua, kitai deka madah ka orang bukai runding ati kitai. Kitai nulis pekara dalam runding kitai lalu bekunsi enggau orang bukai ti sama ngiga penerang pasal pekara ti dirunding kitai. Enti kitai benasib, penerang ti dikunsi kitai diguna orang maioh nya ngujung ka blog kitai laku. Maioh orang datai maca penerang dalam blog kitai. Ditu meh alai kitai bepeluang ngelaku ka dagang internet kitai. Enti maioh orang maca blog kitai kitai mega bepeluang ngada ka ruang iklan. Ruang iklan tu nyadi ka siti agi pun penatai pemisi ari internet.

Enti kitai bisi pengerindu nulis, blog tu mega siti ari cara kitai ngepun sereta ngerembai ka pengawa nulis kitai. Kitai enda iboh nganti kompeni ngencelak tauka kompeni ti ngeluar ka bup meli hasil tulis kitai nya. Kitai tau nulis kediri dalam blog kitai lalu ngelaku ka hasil tulis kitai nya tadi kediri empu. Ari nya kitai bulih penatai pemisi.

Enti kitai enda tentu nemu ngaga website, blog tu siti nyadi ka palan ti manah nganti website. Pia mega bantu ari blogger ti bukai semampai bisi enti kitai bisi penanggul. Blog ari Blogger.com cukup mudah dikena. Nya alai kitai enda irau ka pekara teknikal laban semua nya udah diprogram ka magang.

Blog ti ditulis kitai ngayan ka buah runding kitai. Nya alai kitai anang enda bejimat enti nulis dalam blog kitai. Ia ngayan ka ulah kitai. Ia alai orang meda bakani gaya runding kitai. Tambah diatu orang nyau maioh ngiga penerang ngena internet sebedau ngiga penerang ngena cara bukai. Enti kitai bisi blog, penerang pasal kitai sigi udah ayan dalam internet.

Nyaga pemanah nama dalam internet sama besai reti enggau nyaga pemanah nama ba luar internet. Nya alai enti penerang ti ditulis kitai dalam internet ngayan ka runding ti enda manah, orang pan ulih nyagam gaya penemu sereta runding kitai. Nya alai taja pan kitai enda ngena nama kitai ti bendar, bisi maya kitai salah jaga penerang pasal kitai ulih ditemu orang. Taja kitai enda ngena nama ensumbar, lama laun kitai ditemu orang mega. Maioh penerang ti manah ulih dikunsi kitai dalam blog kitai. Enti penerang kitai nya tau ngemedis orang bukai tentu meh kitai patut berunding panjai sebedau mandang ka ia ba blog kitai. Kebuah pia, enti penerang nya udah ayan ba blog kitai ia enda ulih ditarit kitai pulai baru. Taja pan kitai delete penerang nya ari blog kitai, rekod ia agi bisi dalam komputer besai alai kitai ngerejister blog kitai nya tadi.

Penutup

Blog nyau makin maioh dikena orang diatu. Ia nyau ka sama popular enggau website. Blog jauh nyamai digaga enti dibanding ka enggau website. Pia mega ia jampat digaga sereta ulih ayan ba internet tekala nya.

Manah bendar enti peninga ulih ngada ka blog diri empu. Kitai bepun ngena cara ti mudah ianya ari blogger.com. Udah kitai nyau ransing pengelandik kitai nyau nambah, baru kitai tau ngena blog ti manah agi baka wordpress.

Tulis penerang dalam blog kitai baka kitai ti berandau enggau orang bukai. Kitai deka ngayan ka penemu kitai ngambi ka enggau pengelandik ti bisi kitai ulih sama besemekih dalam dagang internet enggau orang bukai. Anang guai berandau ka pekara ti tau ngenusah ka kitai dudi ari laban tuju kitai ngena internet patut pulai ka pemanah pengidup kitai, ukai ka ngiga penusah. Tambah mega maioh penemu ti manah tau dikunsi ka kitai enggau orang bukai ngena cara blog.
Kena nutup randau ICT kitai ba Tusun 30 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

Tusun 29 - Forum Website

Terubah ia aku meri tabi basa ngagai peninga.

Selamat kitai begulai baru enggau aku Kassim Jeritan dalam program Randau ICT. Saritu tu Randau ICT kitai ba Tusun 29.

Saritu kitai berandau ka siti agi pekara dalam dunya ICT ianya Public Forum. Public forum tu alai orang berandau ka siti – siti pekara ti patut dikenang sida. Randau tu dikereja dalam internet.

Ba program randau ICT kitai ti udah kitai berandau ka social networking website alai kitai sama ngenang bakani social networking website ulih pulai ka penguntung kitai kelebih agi dalam pengawa dagang internet. Pia mega kitai sama berandau ka bakani social networking website tau pulai ka pengerugi enti kitai enda cukup jaga.

Baka social networking website, forum website mega maioh dikena orang dalam internet diatu. Forum websie mega nyau deka sebaka enggau social networking website. Semina forum website tu mit agi. Pekara ti dikerandau ka dalam forum website mega lebih nyentok sereta dalam agi.
Enti tuju social networking website tu dikena kitai nambah ka bala kaban, forum website tebal agi nyadi ka palan kitai berandau ka siti – siti pekara. Maioh forum webmaster enda ngemendar ka pengawa bukai dikereja ba website sida kelimpah ari berandau ka pekara ti udah ditetap ka. Nya alai kitai semina ulih nganjung posting dikena muka pun randau enggau komen kitai aja. Pia mega maioh webmaster napis dulu pekara ti ditulis kitai enggai ka enda nitih ka atur berandau dia.

Enti dibanding ka enggau social networking website, forum website nyamai agi digaga. Ungkus ngaga forum website mega jauh lebih murah. Maioh kitai ulih ngada ka forum website asal kitai bisi nama domain enggau web hosting. Ungkus ia enda datai RM100 setaun. Ia mega mudah dikeluar ka kitai ba internet enggau jampat laban semua perengka ti diguna kitai ngaga forum bisi dalam web hosting dia magang. Kenang pasal nama domain enggau web hosting deka dikerandau ka kitai enggau dalam agi ba randau ICT kitai ti deka datai.

Siti ari contoh forum website ti teleba dipeda kitai ianya www.radiokitai.com. Ia siti ari forum website alai peninga WaiFM ulih berandau enggau pangan diri. Ngena peluang tu aku meri besai terima kasih ngagai webmaster kitai ti ngada sereta ngatur forum nya alai peninga kitai ulih berandau enggau pangan diri. Tu mega nanda ka bansa kitai enda jauh tinggal dalam penemu ICT.

Berandau ngena cara forum website tu lebih jampat agi enti dibanding ka enggau email. Maioh forum website minta kitai ngerejister diri dulu enggau sida ia sebedau kitai ulih nganjong pun randau tauka komen kitai.

Forum website tu siti endor ti manah alai kitai ngiga penerang. Kitai tau betanya ka penerang ti deka ditemu kitai. Bala kaban forum ti bukai nguji deka bekunsi ka penemu sida pasal penerang ti digiga kitai. Ari nya kitai bulih penerang ti digiga kitai enggau jampat. Penerang ti diberi mega pandak sereta nyentok. Kitai ulih jimat ka jam kitai ari ti maca penerang ti panjai dalam website bukai.

Pia mega enti kitai bisi penemu deka dikunsi enggau orang bukai kitai ulih bekunsi ka penemu kitai dalam forum website. Ni nemu, kitai nyangka ulih mantu pangan diri mutar ka penusah ti nuntung ia. Pia mega enti kitai bisi pengelandik dalam pekara ti dikunsi kitai dalam forum nya orang rindu deka ngiga penerang nya ari kitai. Ari pengarap orang ka kitai, nyamai agi kitai ngereja pengawa dagang internet kitai.

Enti dibanding ka enggau social networking website, orang dalam forum website jarang ngena nama sida ti bendar. Sida ngena nama lalai tauka ensumbar. Nya alai kitai patut nemu ni bagi pekara ti patut dipecaya ka kitai sereta ni bagi ti enda patut. Nya alai leboh kitai ngena forum dalam internet kitai anang enda bejaga.

Kitai patut nyaga leka jako tauka genteran jako ti dikena kitai. Kitai enggai ngemedis ka ati orang bukai. Pia mega kitai anang enda bejimat ka leka kenang kitai enggai ka enda sejalai enggau undang-undang ti udah diletak perintah. Rugi bendar enti kitai nyau kena penusah ketegal ti gagit maya ngena forum.

Pia mega kitai anang enda bejaga sereta berati ka penerang ti diterima kitaiari forum nya. Anang kelalu mudah pecaya sampai kitai nyau enda camang- camang lalu ngerembai ka penerang nya ngagai orang bukai, kelebih agi penerang ti madah ka cerita ti sebubu ngapa. Enti penerang nya enda amat kitai nyangka tau mega kena penusah. Pia mega kitai sama enggau orang nya bebula berita dalam forum tu tadi. Pekara tu beguna bendar enti penerang nya besangkut paut enggau pengelikun menoa sereta mega penerang pekara politik. Maioh penerang bukai tau dikerembai ka kitai kelimpah ari penerang ti tau ngerugi sereta ngenusah ka kitai.

Selalu mega aku tebaca ka jako randau dalam forum ti mai penemu ti sebubu ngapa. Ulah ti bansa tu enda ngayan ka pendiau kitai ti udah maju. Ia ngayan ka pemandak runding kitai taja pan kitai baka ka udah mansang. Jako kenang ti bejai orang bukai tau enda iboh dibai kitai dalam internet. Pengawa ti bansa tu ulih mai nama kitai jai. Taja kitai enda ngena nama kitai empu tang identiti kitai ulih digiga.

Penutup

Forum tu siti ari cara kitai ngiga penerang dalam internet. Pia mega ia siti ari cara kitai bekunsi penemu enggau orang bukai. Enti kitai ngereja dagang internet, beguna bendar kitai bekunsi penemu enggau orang bukai. Orang meda kitai ulih dipecaya ari penemu ti dikunsi kitai enggau orang bukai. Enti orang udah bisi pengarap ka kitai bepun ari penemu ti dikunsi kitai, nyamai bendar kitai ngelaku ka barang kitai dalam internet.

Kena nutup randau ICT kitai ba Tusun 29 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

Tusun 28 - Social Networking

Terubah ia aku meri tabi basa ngagai peninga.

Selamat kitai begulai baru enggau aku Kassim Jeritan dalam program Randau ICT. Saritu tu Randau ICT kitai ba Tusun 28.

Saritu kitai berandau ka siti agi pekara dalam dunya ICT ianya Social Networking. Penerang pasal social networking tu besai bendar. Enti diterang ka enggau ringkas, reti social networking tu ianya gerempong orang ti ngembuan penemu ti sebaka. Sida tu begulai tauka betemu enggau pangan diri laban sida saum penemu nya alai sida tu ulih begempung enggau diri sama diri. Maioh macam social networking ti bisi di luar ari dunya ICT. Gerempung ti ukai dikuasa perintah tauka NGO semua nya bepun ngena konsep social networking magang.

Pendiau kitai di rumah panjai mega ngena social networking laban kitai sama saum ati sayau ka rumah panjai kitai. Ia ukai semina alai kitai diau beteduh tang mega alai kitai ngereja pengawa social kitai ninting hari.

Saritu kitai berandau ka bakani social networking tu dikereja dalam internet. Siti ari guna internet ti besai ianya alai orang social networking. Ngena internet social networking tu nyau makin nyamai dikereja. Ia nadai irau ka garis antara menoa laban asal kitai bisi internet, kitai ulih ngereja pengawa tu.

Asal Kitai mensia digaga kelia sigi idup besosial. Nadai tentu maioh kitai mensia ulih idup kediri. Makin maioh orang enggau kitai begulai makin besai reti pengidup kitai. Nya alai dini bisi peluang besosial enggau pangan diri, maioh kitai lalu ngambi peluang nya tadi. Tu sigi pengerindu asal kitai mensia. Semina cara kitai bisi lain nitih ka arus pemansang dunya.

Jarang bendar kitai tetemu ka orang ti enda rindu begulai enggau orang bukai. Bisi meh orang ti bansa nya tang sida tu nadai maioh. Tebal agi kitai sigi rindu begulai enggau orang bukai.
Berindik ari penemu ti bansa tu bisi orang ngambi peluang ngada ka tempat alai kitai ulih begulai tauka besosial enggau pangan diri ngena internet. Pengawa bersosial ngena internet sigi udah lama dikereja, nyau ka sama pengelama enggau penatai internet di dunya tu. Enti kitai ingat ka asal internet ti dikenang aku ba Tusun 3 dia kitai nemu siti ari guna internet maya nya sigi dikena nganjong email. Udah nya ia ngerembai alai orang chatting, tauka berandau ngena komputer. Tu meh asal pengawa social networking ngena internet. Nya alai tentu meh pengawa social networking tu siti ari pengawa ti besai bendar reti ia dalam dunya ICT.

Diatu maioh bendar website ti ngada ka social networking. Maioh ari website tu bepun ari membership website alai orang berandau ka siti pekara. Udah nya randau sida ia nyau ngerembai ngenang ngagai pekara bukai tauka betambah buah penemu. Laban nyau maioh pekara dikerandau ka, orang ti ngerejister nyadi kaban mega nyau majak nambah. Tegal nya website tu mega ngerembai besai agi. Bisi mega website ti bansa tu dibeli orang enggau rega ti tinggi nitih ka pemaioh orang ti nyadi kaban website nya.

Antara contoh website social networking ti tebilang nama ianya Myspace, Facebook, Hi5, Twitter, Friendster, Yahoo!360, Classmate, Meetup enggau Friendwise. Sida tu ukai sebarang social networking website. Sida ia bisi kaban bejuta-juta ari serata dunya. Empai lama tu ka udah, Facebook dibeli siko tycoon ari Hong Kong ianya Li Kai Shing enggau rega manggai berbillion Dollar Amerika. Nama kebuah tokey penyangkai kapal meli website? Laban ia nemu pemesai guna website dalam pengawa dagang ia.

Nama kebuah orang rindu ka social networking? Social networking tu nyamai alai kitai bulih kaban. Kitai enda iboh betemu enggau orang nya tang kitai ulih meda profil ia. Ari profil nya tadi kitai ulih nentu ka orang nya tau nyadi ka kaban kitai tauka enda. Ngena social networking tu mega kitai ulih bulih maioh kaban enggau jampat laban semina ngena beberapa klik aja kitai ulih nambah kaban kitai. Kitai minta diri nyadi kaban ia, udah nya enti ia nerima kitai nyadi ka kaban, ia klik “accept“ button, kitai lalu bulih siko agi kaban baru. Kaban kitai nya mega nyangka jauh ari menua bukai. Pia mega kitai bisi peluang bekaban enggau kaban ia nya tadi. Munyi lagu kaban tu...

Enti ba dunya luar, ukai ari internet kitai enda ulih ngereja pengawa tu enggau jampat. Pia mega maioh orang malu leboh ka terubah ia betemu enggau pangan diri. Nya alai social networking website tu balat bendar dikerindu ka orang.

Social networking website tu maioh manah. Enti enda manah tentu enda ngemaioh nya orang ngena social networking website. Ngena social networking tu kitai ulih nemu maioh pekara laban tebal agi website ti bansa tu alai orang bekunsi ka penemu. Pia mega ia alai kitai bekunsi ka penemu kitai enggau orang bukai. Ngena cara nya kitai semampai bisi tempat alai betanya.
Pia mega social networking tu ulih alai kitai ngelaku ka dagang internet kitai. Kitai ulih nesau bala kaban kitai madah ka kitai bisi barang dijual. Enti bala kaban kitai udah teleba enggau kitai, mudah agi ati ia tebuka deka meli barang kitai enti dibanding ka enggau orang bukai ti enda dikelala ia. Nya alai maioh orang ngena peluang ti bansa tu dalam social networking website.
Taja pia bisi mega orang nguji deka ngena peluang ngereja pengawa ti enda manah dalam social networking website. Bisi orang ngelalai ka identity diri leboh ka berandau ngena social networking website.

Orang ti bansa tu nguji deka mai betemu, kelebih agi enggau orang indu tauka anembiak. Udah betemu maioh pekara ti enda patut, nyadi. Enda lama tu ka udah kitai bisi maca ba surat kabar maioh indu di Singapore ulih umpan orang ari menua Afrika nyadi pengedar dadah. Maioh sida tu ditemu orang ti ngumpan sida nya tadi ari social networking website.

Pia mega bisi orang deka nguji ngambi penerang kitai ari profil ti diberi kitai ba website nya tadi. Penerang ti lengkap diisi kitai tau mega dikena ia ngerja pengawa ti tau ngerugi kitai baka dikena sida ia minta loan ari bank. Penyalah ti bakatu ti selalu didinga kitai ianya identity theft.
Nya alai kitai anang enda cukup jaga leboh ngena social networking website laban kitai tentu meh enggai kena tuntung pengerugi.

Siti cara kitai bejaga, munyi ti selalu dipadah aku ngelama tu, giga penerang orang ti enggau kitai berandau ngena internet empu. Ngena Google, taip nama ia dah nya tentu bisi penerang pasal orang nya. Enti nadai penerang dia, nyangka ia nya ukai orang ti bendar tauka ia ngena nama sebarang. Pia mega Tanya penerang pasal orang nya dalam social networking ti dikena kitai nya tadi. Enti orang ti enggau kitai berandau mai betemu anang enda madah ka pejalai diri. Manah agi enti kitai betemu enggau orang nya mai kaban bukai. Pia mega anang betemu enggau orang nya ba tempat ti sunyi. Enti kitai semina ngelala orang nya ari internet aja, agi mimit bendar penemu kitai pasal orang nya tadi.

Enti kitai ngisi profil kitai dalam social networking website, perati ka address tauka URL kitai ba atas skrin sudut kiba. Dia kitai ulih meda http:// tauka https:// . Enti semina http:// aja anang ngisi semua penerang kitai ti bendar laban penerang tu ulih dipeda orang bukai taja pan kitai enda ngasoh penerang nya ayan. Semadi meh kitai meda https:// baru penerang ti diberi kitai nya enda ulih dipeda orang bukai.

Anang mantai ka penerang ti beguna dalam social networking website baka no I.C enggau no akaun bank kitai laban penerang ti bansa tu patut bendar dilalai ka kitai enggai ka dikena orang enggau tuju ti enda manah.

Penutup

Social networking website tu siti ari cara kitai berandau enggau orang bukai enda ngira sempadan garis menua. Ia mega siti ari cara ti jampat alai kitai ulih ngelaku ka barang kitai dalam dagang internet kitai. Taja pia bisi orang ti ngibun ati ti enda manah sama mega bisi ngena social networking website nya tadi. Enti kitai nemu atur bejaga leboh ti ngena social networking website tu tentu meh kitai ulih nyeliah ka pekara ti enda patut nyadi.

Kitai patut ngena peluang social networking tu dalam dagang internet kitai ngambi ka maioh agi orang ulih nemu pengawa dagang kitai. Enti maioh orang nemu pengawa dagang kitai besai agi meh peluang dagang kitai ulih maju.

Kena nutup randau ICT kitai ba Tusun 28 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.

Tusun 27 - Internet Banking

Terubah ia aku meri tabi basa ngagai peninga.

Selamat kitai begulai baru enggau aku Kassim Jeritan dalam program Randau ICT. Saritu tu Randau ICT kitai ba Tusun 27.

Saritu kitai berandau ka siti agi pekara ti patut nyadi cara pengidup kitai ianya bakani kitai ngatur akaun bank kitai ngena internet. Pekara ti deka dikenang aku saritu ianya Internet Banking.

Dalam randau kitai ti udah aku bisi ngenang bakani kitai ulih mayar bill elektrik, bil ai enggau bill telefon kitai ti datai ninting bulan ngena internet. Leboh kitai berandau ka pekara nya suba aku bisi ngenang bakani kitai ulih ngatur akaun kitai ngambi ka ulih dikena kitai mayar bil tu tadi. Cara kitai ngatur akaun kitai ngambi ka ulih dikena mayar bil kitai ngena internet tu siti ari pekara ti dikumbai kitai internet banking.

Internet Banking mula dikena dalam taun 1995 di menoa Amerika. Cara tu balat bendar ngerembai sereta dikerindu ka orang laban cara tu jauh nyamai dikena enti dibanding ka enggau cara ti lama. Ngena internet banking semua pengawa ngurus ka akaun bank kitai ulih dikereja kitai ari rumah asal kitai bisi internet. Di menoa kitai, cara internet banking baru deka dikerindu ka orang maioh dalam dua tiga taun tu. Kitai di menua ditu agi maioh enda tentu arap ka pekara tu. Sanggup agi kitai bebaris ba bank ari taja pan pengawa ngadu ka akaun kitai ulih dikereja ba internet.


Internet banking ulih dikena kitai ngadu ka akaun kitai ngena maioh macam cara.

  • Ia ulih dikena kitai meresa penyampau duit dalam akaun kitai. Ngena cara tu kitai nyamai agi ngatur belanja kitai;
  • Ia ulih dikena kitai meresa balance dalam checkbook kitai. Tu tebal agi enti kitai ngena current account laban enti balance dalam akaun nya enda diatur enggau manah kitai nyangka besatup enggau penanggul cek tendang;
  • Kitai ulih mindah ka duit kitai ari siti akaun ngagai akaun ti bukai. Cara tu ngenyamai ka kitai ngirum ka duit;
  • Kitai ulih berati ka belanja ti dikereja kitai ngena akaun kitai nya tadi laban semua penerang belanja kitai ulih dipeda kitai ngena internet;
  • Kitai ulih ngemendar ka pengawa bebayar ka bil ti datai ninting bulan cara automatic. Kitai semina sekali aja kiroh leboh kitai ngatur akaun kitai. Udah nya bank ngatur pengawa mayar bil kitai leboh maya bil nya datai. Kitai enda iboh irau ka bil kitai laun dibayar. Kitai mega enda takut bill enda datai tauka lenyau laban semua penerang nya tadi datai ba kitai ngena internet.
    Kitai ulih minta penyata akaun kitai dicetak ngambi ka nyamai kitai nyimpan rekod akaun kitai ninting bulan;
  • Kitai ulih minta “traveller’s check” , casher enggau banker’s check dikena kitai enti kitai bejalai ngagai menoa bukai, serta mega bebayar ngena cek ngambi ka bisi rekod ianya cek kitai;
  • Ngeluar ka peminta ngetu ka bayar cek ti udah dikeluar ka kitai taja pan cek nya udah diberi ngagai orang ti nerima;
  • Auto payment dikena mayar loan rumah, loan kereta enggau loan bukai;
    Nerima penerang pasal pekara dagang baka melabur enggau service ti bukai ngambi ka kitai ulih ngena service bank ti bisi pulai ka penyamai kitai ngena service sida ia.

Sebedau ulih ngena internet banking, kitai dipinta datai ngagai bank ngadu ka akaun kitai. Kebuah pia bank beguna ka penerang ti ulih nentu ka kitai sigi orang ti bendar ti bempu akaun nya tadi. Udah nya bank meri kitai username enggau password dikena kitai muka akaun kitai ngena internet.

Siti ari penyamai kitai ngena internet banking ianya enda masau jam laban kitai ulih ngereja pengawa nya ari rumah asal kitai bisi internet. Enti kitai nyau nurun ngagai bank genap kali kitai ngatur akaun kitai tentu meh maioh jam tebasau. Ukai semina nya aja, belanja bukai baka minyak enggau bayar parking kereta mega ulih dijimat ka kitai. Tambah diatu kos pengidup diau di nengeri nyau majak nambah. Berunding ka pekara ti bansa tu meh perintah menoa kitai bendar ngansak bank ngada ka internet banking. Diatu nyau ka semoa bank ti bisi di menoa kitai bisi ngada ka internet banking.

Tambah mega internet banking ulih dikerja kitai sebarang maya kitai deka ngereja ia. Sistem tu tebuka 24 jam 7 hari seminggu. Nya alai kitai enda iboh limpang ari pengawa ti dikereja kitai. Kitai enda iboh ninggal ka ofis leboh maya jam bekerja. Jimat agi meh hari cuti kitai lalu ulih dikena kitai enggau tuju ti meruan agi baka mai bala anak raun leboh kemisi skula.
Kitai mega ulih ngatur akaun kitai nadai milih dini alai kitai diau asal aja kitai ulih ngena internet. Kitai ulih ngatur akaun kitai taja pan kitai diau ba luar negeri.

Taja pia bisi mega pekara ti enda manah ulih nyadi leboh kitai ngena internet banking.
Pekara ti balat ngasoh ati irau ianya orang ti nguji deka ngulih ka duit ari akaun kitai ngena cara ngencuri, tauka hackers. Sida tu orang ti landik ngena komputer nguji deka muka akaun kitai ngena cara ngulih ka username enggau password kitai. Enti dua penerang tu ulih ditemu sida, orang tu ulih muka akaun kitai. Enti ia ulih muka akaun kitai ia ulih ngereja semua pengawa ti udah disebut aku dulu tadi.

Kitai mega mesti bisi pengarap ngena cara tu. Diatu taja pan orang ti udah ngena cara tu udah nambah tang penyampau orang ti udah ngena cara tu agi mimit bendar. Anang ti ngena internet banking, indah ti ngena teller machine ti bisi ba luar bank maioh orang agi bedau nemu.

Taja pan bisi pekara ti enda manah ulih nyadi leboh kitai ngena internet banking kitai ulih nyaga diri ngambi ka kurang agi kena penusah ngena cara tu. Kebuah pia internet banking maioh agi ngenatai ka penguntung enti dibanding ka enggau pengerugi semadi meh nasib kitai nadai.

Siti cara ti bejaga ianya baka ti kala dipadah ka aku suba leboh kitai ngenang cara bejaga ngena kad kredit. Ianya tentu ka address box ba sudut kiba atas skrin monitor kitai ngena https:// ukai semina http:// aja. “s” tu reti ia “secure” laban semina siko nuan aja ngena webpage nya maya nya. Enti address nya ngena http:// reti ia orang bukai pan ulih muka webpage ti benong dikena nuan maya nya. Semua penerang ti ulih dipeda nuan ulih dipeda orang bukai mega.
Ba baruh skrin ba sudut kiba kitai ulih meda gambar kunci. Nya nanda ka webpage nya benong ngena secure line. Tu mega siti ari cara kitai nemu webpage kitai nya sigi webpage ti diatur bank, ukai digaga orang ti nyaru diri baka wakil bank, tang kebendar sida ia orang ti jai.

Tanya ngagai bank enti sida bisi orang ketiga (third party) dipadu ka sida nyaga pengelikun website sida. Enti sida ia bisi ngatur pengelikun ti bansa tu kitai ulih meda logo ti dikena ba website tu. Enti kitai nadai meda logo nya ayan, bisi peluang webpage nya ukai webpage ari bank ti bendar. Contoh ia logo “Verisign” ti maioh dikena bank ba serata dunya.

Anang sekali kali ngayan ka username enggau password kita. Anang mega meri dua iti penerang tu leboh dipinta orang ngena email laban bank sigi nadai kala bepinta ka dua penerang tu ngena email. Bank nemu penerang ti dianjung ngena email enda tentu selamat.

Penutup

Makin sehari makin maioh pengawa ulih dikereja ngena internet. Internet banking nyau makin maioh dikena orang diatu. Pia mega maioh pengawa ulih dikereja kitai ngena cara internet banking. Bank mega ngada ka maioh perengka ngambi ka pengawa ngatur akaun kitai ngena internet banking likun agi. Nya alai kitai patut ngena peluang ti bansa tu ngemansang ka pengidup kitai. Ulih kitai bebaris ba bank tang tentu meh manah enti kitai ulih ngereja semua pengawa tu ari rumah aja.

Pia mega enti kitai berati ka ni pengelikun tu ulih dikena kitai, tentu meh kitai berani agi ngena internet banking.

Kena nutup randau ICT kitai ba Tusun 27 tu aku sekali agi ngelalau, randau ICT tu randau kitai. Aku ngelalu ka tanya sereta komen peninga, nya alai aku bisi nyendia ka blog alai kitai berandau ba kjict.blogspot.com alai kita ulih ngenatai ka komen tauka tanya kita.

Pia mega peninga tau ngena search engine Google enggau Yahoo! Dikena ngiga blog ti dikena aku. Kita taip “randau ict“ ba search box, kita ulih meda blog ti dikena aku berandau ka pekara ICT. Dia kitai ulih berandau enggau silik agi.

Kitai berandau ka pekara ICT ngambi ka kitai mereti ICT, ulih ngena ICT dalam pengidup kitai lalu nyadi ka ICT penatai pemisi kitai laban anang enda ingat, ICT UNGKUP KITAI SEMUA.

Enggau nya, mupok aku.

Terima kasih.
 

Sample text

Sample Text

Sample Text